[ទីផ្សារបរទេស] Kia បានចេញផ្សាយរបាយការណ៍អំពីការលក់រថយន្តលើទីផ្សារសកលប្រចាំខែសីហា ដែលមានការកើនឡើង ១០,៤% ធៀបនឹងឆ្នាំពេលដូចគ្នាកាលពីឆ្នាំ២០២១ ដោយចំនួនលក់សរុបមាន ២៣៩ ៨៨៧គ្រឿង ជាសញ្ញាវិជ្ជមានមួយដែលបង្ហាញថាវិបត្តិគ្រឿងបន្លាស់កំពុងតែធូរស្បើយ។
យ៉ាងណាក្ដីមិនមែនវិជ្ជមានទាំងអស់នោះទេ ដោយគេសង្កេតឃើញថាការលក់រថយន្តអគ្គិសនី Kia EV6 ជួបប្រទះនឹងការធ្លាក់ចុះជាលើកដំបូង។ កាលពីខែមុន ការលក់ធំនៃរថយន្ត EV6 មានចំនួន ៤ ៧៧៨គ្រឿង ដែលក្នុងនោះមាន ១ ៦៧២គ្រឿងលក់ចេញនៅកូរ៉េខាងត្បូង និង ៣ ១០៦គ្រឿងបាននាំចេញទៅទីផ្សារក្រៅប្រទេស ដែលជាការថយចុះ ១៥,៧% ធៀបនឹងឆ្នាំមុន។
ដោយឡែកសម្រាប់ការលក់រាយនៃរថយន្ត Kia EV6 ប្រចាំខែសីហានេះដែរ មានចំនួន ៤៤៩៩គ្រឿង ជាចំនួនលក់ក្រៅទឹកដីប្រទេសកូរ៉េខាងត្បូង ដោយក្នុងនោះមានការលក់ចេញនៅសហរដ្ឋអាមេរិកចំនួន ១ ៨៤០គ្រឿង ខណៈដែលនៅអឺរ៉ុបអាចលក់ចេញបាន ២១៣៥គ្រឿង។
ងាកទៅមើលការលក់រាយរបស់រថយន្ត Niro EV និង Soul EV នៅក្រៅទឹកដីកូរ៉េខាងត្បូងគឺមានចំនួន ២ ២៩៨គ្រឿង និង ២៨៧គ្រឿង ដោយ Kia មិនបានប្រាប់អំពីចំនួនលក់លើទីផ្សារប្រទេសកូរ៉េខាងត្បូងឡើយ៕
