ក្រុមហ៊ុន Mini បានបញ្ចេញរថយន្តម៉ូដែលពិសេសថ្មីមួយ សម្រាប់ទីផ្សារសហរដ្ឋអាមេរិក ហៅថា Mini Cooper 1499 GT ស៊េរីឆ្នាំ២០២១។
រថយន្ត Mini Cooper 1499 GT នេះ គឺដើម្បីចូលរួមគោរពដល់រថយន្ត Mini 1275 GT ឆ្នាំ១៩៦៩ ហើយវានឹងត្រូវដាក់លក់ក្នុងតម្លៃចាប់ពី ២៧ ០៤០ដុល្លារ នៅលើទីផ្សារសហរដ្ឋអាមេរិក។
Cooper 1499 GT ត្រូវបានតុបតែងដូចទៅនឹង 1275 GT ដែលជារថយន្តមានតម្លៃថោកបំផុតមួយ កាលពីឆ្នាំ១៩៦៩។ តួខ្លួនខាងក្រៅរបស់វាមានពណ៌ខ្មៅ ហៅថា Midnight Black Metallic ជាមួយនឹងតែមឆ្នូតៗពណ៌មាសនៅចំហៀង លាយអក្សរ 1499 GT បូករួមទាំង ស៊ុមប៉ាណាមុខខ្មៅ, ដៃទ្វារខ្មៅ និង ស៊ុមចង្កៀងមុខ-ក្រោយខ្មៅ ផងដែរ។
មិនតែប៉ុណ្ណោះ វាក៏មានបំពាក់កញ្ចប់ Mini John Cooper Works Styling Package ដោយក្នុងនោះមានកាងមុខ កាងក្រោយ កាងចំហៀង កាងក្រោយកាត់ខ្យល់ និងយ៉ាន់ខ្មៅ ១៧អ៊ីញ សុទ្ធតែជារបស់ម៉ូដែល John Cooper Works។
រថយន្ត Cooper 1499 GT បំពាក់ម៉ាស៊ីនសាំងចំណុះ ១,៥លីត្រ ទំហំ ៣ស៊ីឡាំង មានកម្លាំង ១៣៤សេះ ដំណើរការដោយប្រអប់បលេខដៃ ៦វគ្គមកស្តង់ដារ ខណៈលេខអូតូ ៧វគ្គ ជា Option។ វាអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៧,៥វិនាទី៕
