ម៉ាស៊ីន BMW មួយប្រភេទនៅតែជាម៉ាស៊ីនល្អដាច់គេក្នុងឆ្នាំ ២០២០

January 22, 2020

ម៉ាស៊ីន B58 ដែលផលិតដោយក្រុមហ៊ុនផលិតរថយន្ត BMW បានកាន់កាប់តំណែងលេខមួយ រយៈពេលពីរឆ្នាំជាប់គ្នា នៅក្នុងបញ្ជីម៉ាស៊ីនរថយន្តល្អទាំង ១០ ប្រចាំឆ្នាំរបស់ WardsAuto។

ការវាយតម្លៃលើម៉ាស៊ីនល្អគឺមានមើលលើផ្នែកកម្លាំង, សមត្ថភាព និងកម្រិតស៊ីប្រេងឥន្ធនៈជាដើម។ម៉ាស៊ីនចំណុះ ៣,០ លីត្រ ប្រភេទ Turbocharged នេះអាចផលិតកម្លាំងបានចន្លោះពី ៣៣៥ សេះ ទៅ ៣៨២ សេះ ដែលមានប្រើលើម៉ូដែលជាច្រើនដូចជា 5-Series, 7-Series, 8-Series, X5, X6 និង X7។

បន្ថែមពីនេះប្រភេទរថយន្តកម្លាំងខ្លាំងដូចជា Z4 M40i, X3 M40i ឬ X4 M40i ក៏មានប្រើម៉ាស៊ីន B58 នេះដែរ។ ក្រៅពីសមត្ថភាពខ្លាំង ម៉ាស៊ីននេះមានគួបផ្សំនឹងបច្ចេកវិទ្យា TwinPower Turbo ដែលធ្វើឲ្យវាមានទម្ងន់ស្រាលជាងម៉ាស៊ីន Turbocharged ដទៃ ២៥%៕

ផ្ទាំងផ្សាយពាណិជ្ជកម្ម

ក្រុមហ៊ុនរថយន្តជប៉ុន ៥ ហ៊ានទិញយករថយន្ត ៦ម៉ឺនគ្រឿងមកវិញ

January 22, 2020

ក្រុមហ៊ុន Honda, Mitsubishi, Toyota, Mazda និង Suzuki បានប្រកាសពីការទទួលទិញយករថយន្តប្រមាណ ៦ម៉ឺនគ្រឿងនៅអូស្ត្រាលី ដែលសង្ស័យថាពោងសុវត្ថិភាពមិនដំណើរការដូចប្រក្រតី។

ក្រុមហ៊ុនរថយន្តនៅអូស្ត្រាលីត្រូវបង្ខំចិត្តទិញយករថយន្តដែលមានបញ្ហាមកវិញ ដោយសារដំណើរការនៃការអភិវឌ្ឍការប្ដូរពោងសុវត្ថិភាពអាចចំណាយលុយច្រើន និងស៊ីពេលច្រើន បើប្រៀបនឹងការទិញចូលមកវិញ។

រថយន្ត Toyota ដែលក្រុមហ៊ុនទទួលទិញវិញគឺម៉ូដែលឆ្នាំ ១៩៩៧ ដល់ ១៩៩៩ ដែលរួមមាន Starlet ទ្វាបី, Starlet ទ្វាប្រាំ, Paseo, Celica, RAV4 ទ្វាបី និង RAV4 ទ្វាប្រាំ។ ចំណែក Mazda វិញប្រមូលទិញយករថយន្ត Eunos 800 ស៊េរីឆ្នាំ ១៩៩៦ ដល់ ១៩៩៩ ហើយ Suzuki វិញគឺម៉ូដែល Grand Vitara SQ625 ស៊េរីឆ្នាំ ១៩៩៨ និង ១៩៩៩។

ចំណែករថយន្ត Honda គឺមានម៉ូដែល Legend, CR-V និង Accord ស៊េរីឆ្នាំ ១៩៩៨ ដល់ ២០០០ និង Mitsubishi ស៊េរីឆ្នាំ ១៩៩៧ ដល់ ២០០០ ដែលមានម៉ូដែល NL Pajero, CE Lancer, WA Express, CE Mirage និង WA Starwagon៕

ផ្ទាំងផ្សាយពាណិជ្ជកម្ម

ញាក់សាច់! ឡាន Lexus LC500 Inspiration Series ស៊េរីថ្មីមួយគ្រឿងដំបូងបង្អស់ លក់បានតម្លៃ២លានដុល្លារ

January 22, 2020

រថយន្ត Lexus LC500 Convertible (បើកដំបូល) ប្រភេទ Inspiration Series ស៊េរីឆ្នាំ២០២១ មួយគ្រឿងដំបូងបង្អស់ ដែលមានលេខតួ VIN 100001 បានលក់ក្នុងតម្លៃរហូតដល់ទៅ ២លានដុល្លារឯណោះ។

រថយន្តស្ព័រនេះមានបំពាក់លក្ខណៈពិសេសជាច្រើន ដូចជា ចង្កៀងមុខ-ក្រោយ Liquid Platinum, យ៉ាន់ទំហំ ២១អ៊ីង, តួខ្លួនពណ៌ខៀវ (Structural Blue) និងមានឡូហ្គូ LC Inspiration Series Launch Exclusive 1 of 1 ផងដែរ។

រថយន្ត Lexus LC500 Convertible Inspiration Series នេះបំពាក់ម៉ាស៊ីនចំណុះ ៥,០លីត្រ ទំហំ ៨ស៊ីឡាំង មានកម្លាំង ៤៧១សេះ ប្រើប្រអប់លេខអូតូ ១០វគ្គ។ រថយន្តនេះនឹងត្រូវផលិតមានកំណត់ត្រឹមតែ ១០០គ្រឿងប៉ុណ្ណោះ។

គួរឲ្យដឹងថា រថយន្ត Lexus LC 500 ធម្មតាមានតម្លៃត្រឹមចាប់ពី ៩២ ៣០០ដុល្លារប៉ុណ្ណោះ៕

ផ្ទាំងផ្សាយពាណិជ្ជកម្ម

Toyota នឹងហៅឡាន ៣,៤លានគ្រឿងចូលវិញ ព្រោះពោងសុវត្ថិភាពអាចអត់ផ្ទុះពេលគ្រោះថ្នាក់

January 22, 2020

ក្រុមហ៊ុន Toyota Motor បានឲ្យដឹងនៅថ្ងៃអង្គារ ទី២១ មករា ២០២០ នេះថា ខ្លួននឹងហៅរថយន្តចំនួន ៣,៤លានគ្រឿង នៅទូទាំងពិភពលោក (មិនមានរថយន្តដែលនាំចូលស្របច្បាប់ដោយក្រុមហ៊ុនក្នុងស្រុកខ្មែរឡើយ) ដោយសារតែកំហុសផ្នែកអេឡិចត្រនិច ដែលធ្វើឲ្យពោងសុវត្ថិភាពអាចនឹងមិនផ្ទុះឡើងពេលជួបគ្រោះថ្នាក់។

ការកោះហៅចូលវិញនោះរួមមាន រថយន្តនៅសហរដ្ឋអាមេរិកសរុប ២,៩លានគ្រឿង ដូចជាម៉ូដែល Corolla ឆ្នាំ២០១១-២០១៩, Matrix ឆ្នាំ២០១១-២០១៣, Avalon ឆ្នាំ២០១២-២០១៨ និង Avalon Hybrid ឆ្នាំ២០១៣-២០១៨ ផងដែរ។

ទីភ្នាក់ងារ NHTSA បានប្រាប់ឲ្យដឹងថា ពួកគេបានរកឃើញគ្រោះថ្នាក់ (បុកពីមុខ) ចំនួន២ ពាក់ព័ន្ធនឹងរថយន្ត Toyota Corolla ស៊េរីថ្មី ដែលពោងសុវត្ថិភាពមិនបានផ្ទុះឡើងឡើយ។

មិនតែប៉ុណ្ណោះ NHTSA ក៏បានឲ្យដឹងដែរថា ពោងសុវត្ថិភាពដែលកំពុងស្ថិតក្រោមការស៊ើបអង្កេតនេះ ត្រូវបានបំពាក់លើរថយន្តជាង ១២លានគ្រឿង ផលិតចាប់ពីឆ្នាំ២០១០ ដល់ ២០១៩ ដែលលក់ដោយក្រុមហ៊ុន Toyota, Fiat Chrysler Automobiles, Honda Motor, Hyundai Motor, Kia Motors និង Mitsubishi ផងដែរ៕

ផ្ទាំងផ្សាយពាណិជ្ជកម្ម

រថយន្តទាំង ២១គ្រឿងរបស់ Paul Walker លក់ដេញថ្លៃបានច្រើនគួរសម

January 21, 2020

កាលពីចុងសប្ដាហ៍កន្លងទៅ រថយន្តចំនួន ២១ គ្រឿង ដែលជារបស់ Paul Walker តួអង្គក្នុងរឿង Fast and Furious ដ៏ល្បីល្បាញនោះ ត្រូវបានដាក់លក់ដេញថ្លៃក្នុងកម្មវិធីដេញថ្លៃប្រចាំឆ្នាំ Barrett-Jackson Scottsdale Auction។

សរុបទៅរថយន្តទាំង ២១ គ្រឿងអាចដេញថ្លៃបាន ២,៣៣ លានដុល្លារ។ ប្រាក់ចំណូលដែលបាននឹងត្រូវប្រគល់ទៅឲ្យកូនស្រីលោក Paul Walker គឺ Meadow Walker ដែលមានវ័យ ២១ ឆ្នាំ ហើយនាងជាអ្នកគ្រប់គ្រងមូលនិធិ Paul Walker Foundation។

រថយន្តដែលមានតម្លៃខ្លាំងគេក្នុងចំណោមនោះគឺ BMW M3 Lightweight ស៊េរីឆ្នាំ ១៩៩៥ ដែលជារថយន្តកម្រមួយ ទើបជិះបានចម្ងាយ ៤៦០០ ម៉ាយ ហើយវាលក់បាន ៣៨៥ ០០០ ដុល្លារ។ វាគឺជារថយន្តមួយក្នុងចំណោមរថយន្តទាំង ៥ ដែល Paul Walker កាន់កាប់ ហើយរថយន្តនេះដែរមានផលិតត្រឹម ១២៦ គ្រឿងប៉ុណ្ណោះក្នុងលោក។ រថយន្ត BMW M3 Lightweight បួនគ្រឿងផ្សេងទៀតរបស់ Paul លក់បានក្នុងតម្លៃចន្លោះពី ២២០ ០០០ ដុល្លារ ទៅ ២៥៨ ៥០០ ដុល្លារ៕

ផ្ទាំងផ្សាយពាណិជ្ជកម្ម

BMW បិទរោងចក្រ ៦សប្ដាហ៍ ដើម្បីត្រៀមផលិតឡានអគ្គិសនី i4

January 21, 2020

ក្រុមហ៊ុនផលិតរថយន្តប្រណីតរបស់អាល្លឺម៉ង់ BMW នឹងបិទរោងចក្រនៅទីក្រុង Munich រយៈពេល ៦ សប្ដាហ៍ដើម្បីធ្វើការផ្លាស់ប្ដូរដោយបន្ថែមនូវរ៉ូបូតជាង ១ពាន់ សម្រាប់ផលិតរថយន្តម៉ូដែល i4 នាឆ្នាំ ២០២១។

BMW i4 គឺជារថយន្តដែលផលិតឡើងផ្អែកតាមរថយន្ត BMW 4 Series Gran Coupe ដែលជា Sedan មានរូបរាងបែបរថយន្តស្ព័រ។ ក្រុមហ៊ុន BMW និយាយថារថយន្តអគ្គិសនី Sedan នេះអាចជិះបានចម្ងាយ ៤៨៣ គ.ម ដោយសារមានអាគុយទំហំ ៨០ គីឡូវ៉ាត់ម៉ោង។

មុនរថយន្ត BMW i4 នេះ រថយន្ត SUV អគ្គិសនី iX3 រំពឹងថានឹងចេញលក់លើទីផ្សារមុន ដោយរំពឹងថាចេញលក់នៅអំឡុងចុងឆ្នាំ ២០២០ នេះផ្ទាល់៕

ផ្ទាំងផ្សាយពាណិជ្ជកម្ម

Subaru នឹងផលិតឡានអត់ប្រើសាំងដំបូងរបស់ខ្លួន នៅមុនឆ្នាំ២០២៥

January 21, 2020

ថ្វីត្បិតតែ Subaru កំពុងស្ថិតនៅក្រោយគូប្រជែងរបស់ខ្លួន ក្នុងការលក់រថយន្តអគ្គិសនី ប៉ុន្តែពួកគេមានគម្រោងថ្មី ដែលនឹងផលិតរថយន្តអគ្គិសនីសុទ្ធ ត្រឹមឆ្នាំ២០៣៥។

ក្រុមហ៊ុនរថយន្តជប៉ុន Subaru បានប្រកាសថា គោលដៅបច្ចេកវិទ្យារយៈពេលវែងរបស់ខ្លួន ដែលជាការសហការណ៍គ្នាជាមួយ ក្រុមហ៊ុន Toyota គឺកំពុងសិក្សាការឌីហ្សាញថ្មីសម្រាប់រថយន្ត SUV ប្រើអគ្គិសនី។

ពួកគេបានកំណត់កាលបរិច្ឆេទផលិត និងចេញលក់រថយន្ត SUV អគ្គិសនីថ្មីនេះរួចទៅហើយ គឺនៅមុនឆ្នាំ២០២៥ ខាងមុខនេះតែម្តង។

ក្នុងនោះដែរ Subaru ចង់លក់រថយន្តអគ្គិសនី និង Hybrid បានឲ្យ ៤០% នៃចំនួនលក់សរុបនៅទូទាំងពិភពលោក ត្រឹមឆ្នាំ២០៣០ ហើយផលិតតែរថយន្តប្រើអគ្គិសនី-Hybrid សុទ្ធ មុនអំឡុងឆ្នាំ២០៣០ ទៀតផង៕

ផ្ទាំងផ្សាយពាណិជ្ជកម្ម

មកមើលកម្រិតស៊ីប្រេង ឡាន Chevrolet Blazer ឆ្នាំ២០២០ ទើបចេញថ្មី

January 21, 2020

ទីភ្នាក់ងារ EPA បានបង្ហាញកម្រិតស៊ីប្រេងនៃរថយន្ត Chevrolet Blazer ស៊េរីឆ្នាំ២០២០ ដែលទើបតែចេញថ្មី។

Chevrolet Blazer ថ្មី ម៉ូដែល 2LT និង 3LT បំពាក់ម៉ាស៊ីនចំណុះ ២,០លីត្រ Turbocharged ទំហំ ៤ស៊ីឡាំង មានកម្លាំង ២៣០សេះ ប្រើប្រអប់លេខអូតូ ៩វគ្គ ហើយកម្រិតស៊ីប្រេងជាមធ្យម ១១លីត្រក្នុងក្រុង និង ៨លីត្រក្រៅក្រុង សម្រាប់ប្រភេទប្រើប៉ុងមួយ ហើយ ១១លីត្រក្នុងក្រុង និង ១០លីត្រក្រៅក្នុង សម្រាប់ប្រភេទប្រើប៉ុងពីរ។

ជាមួយគ្នានេះ Chevrolet Blazer ម៉ូដែល L និង 1LT បំពាក់ម៉ាស៊ីនចំណុះ ២,៥លីត្រ Naturally Aspirated ទំហំ ៤ស៊ីឡាំង មានកម្លាំង ១៩៣សេះ ក៏មានកម្រិតស៊ីប្រេងជាមធ្យម ១១លីត្រក្នុងក្រុង និង ៨លីត្រក្រៅក្រុងដូចគ្នា។

ដោយឡែក Chevrolet Blazer ម៉ូដែល RS និង Premier ដែលបំពាក់ម៉ាស៊ីនចំណុះ ៣,៥លីត្រ ទំហំ ៦ស៊ីឡាំង មានកម្លាំង ៣០៨សេះ មានកម្រិតស៊ីប្រេងជាមធ្យម ១២លីត្រក្នុងក្រុង និង ៩លីត្រក្រៅក្រុង សម្រាប់ប្រភេទប្រើប៉ុងមួយ ហើយ ១៣លីត្រក្នុងក្រុង និង ៩លីត្រក្រៅក្រុង សម្រាប់ប្រភេទប្រើប៉ុងពីរ៕

ផ្ទាំងផ្សាយពាណិជ្ជកម្ម

ថតបាន Toyota Fortuner ស៊េរីឆ្នាំ ២០២១ ផ្លាស់ប្ដូររូបរាងថ្មី

January 20, 2020

រថយន្ត Toyota Fortuner ស៊េរីថ្មី ត្រូវបានប្រទះឃើញរត់សាកល្បងនៅប្រទេសថៃ ដែលវាអាចនឹងចេញលក់លើទីផ្សារឆ្នាំ ២០២០ ជាមួយមុខមាត់ថ្មី កាន់តែទាក់ទាញជាងរូបរាងនាពេលបច្ចុប្បន្នដែលប្រើតាំងពីឆ្នាំ ២០១៥ មក។

រថយន្តដែលរត់សាកល្បងគឺបានបិទបាំងរូបរាងជិត ប៉ុន្តែគេជឿជាក់ថាវាជា Fortuner ជំនាន់ថ្មីស៊េរីឆ្នាំ ២០២១ ហើយមុខមាត់របស់វាអាចមានការផ្លាស់ប្ដូរច្រើនជាពិសេសនៅផ្ទាំងប៉ាណាខាងមុខ, កាងខាងមុខ និងផ្លាស់ប្ដូរចង្កៀងមុខក្រោយផងដែរ។

toyota

ចំពោះម៉ាស៊ីនវិញអាចមិនមានការផ្លាស់ប្ដូរឡើយ ដោយនឹងមានជម្រើសខុសគ្នាទៅតាមទីផ្សារ។ តួយ៉ាងវាអាចមានជម្រើសម៉ាស៊ីនសាំង ២,៧ លីត្រ និង ៤ លីត្រ ជាមួយជម្រើសម៉ាស៊ីនម៉ាស៊ូត ២,៤លីត្រ ២,៨លីត្រ និង ៣,០លីត្រ៕

ផ្ទាំងផ្សាយពាណិជ្ជកម្ម

រថយន្តវៀតណាមមានអ្នកបញ្ជាទិញ ១៧ ០០០ គ្រឿងហើយ

January 20, 2020

ក្រុមហ៊ុនរថយន្តវៀតណាមបានប្រកាសថាបានទទួលបានការបញ្ជាទិញជាង ១៧ ០០០ គ្រឿងសម្រាប់រថយន្តទាំងបីម៉ូដែលរបស់ខ្លួន ដោយក្នុងនោះមានម៉ូតូអគ្គិសនីខ្ទង់ ៥ ម៉ឺនគ្រឿងផងដែរដែលអតិថិជនបានកុម្ម៉ង់ទិញ។

កាលពីឆ្នាំ ២០១៩ ក្រុមហ៊ុន VinFast បានចាប់ផ្ដើមដឹកជញ្ជូនរថយន្តទៅឲ្យអតិថិជននៅវៀតណាម ដែលមានម៉ូតូ Fadil ចេញលក់នៅពាក់កណ្ដាលខែមិថុនា និងម៉ូដែល Lux A2.0 និង Lux SA2.0 ចេញលក់នៅខែកក្កដា ដោយអតិថិជនបានចាប់ផ្ដើមកុម្ម៉ង់ទិញតាំងពីចុងឆ្នាំ ២០១៨ មកម្ល៉េះ។ រថយន្តដែលបានកុម្ម៉ង់គឺ ១៧ ២១៤ គ្រឿង ដែលក្នុងនោះមាន ១៥ ៣០០ គ្រឿងបានផលិតរួចរាល់។

សន្និដ្ឋានថារថយន្តដែលផលិតបាន ១៥ ៣០០ គ្រឿង គឺជាចំនួនលក់ប្រចាំឆ្នាំ ២០១៩ នោះតួលេខនេះគឺស្មើនឹងពាក់កណ្ដាលក្រុមហ៊ុនរថយន្តមួយចំនួនដូចជា Honda, Mitsubishi, Fod, Mazda និង Kia ដែលលក់រថយន្តបានប្រមាណ ៣ ម៉ឺនគ្រឿង។ ធៀបនឹងក្រុមហ៊ុនខ្លាំងវិញមាន Toyota និង Hyundai ដែលលក់រថយន្តបានជិត ៨ ម៉ឺនគ្រឿង។

អ្នកជំនាញបានបង្ហាញការជឿជាក់ថាតួលេខរបស់ VinFast គឺល្អ។ សម្រាប់រថយន្ត ៣ ម៉ូដែល និងចំនួនលក់ជាមធ្យម ៤០០ គ្រឿងក្នុងមួយខែ គឺអាចទទួលយកបាន។ ជាធម្មតាម៉ាករថយន្តថ្មីតែងមានការកំណត់គោលដៅលក់ឲ្យបាន ៣០០ គ្រឿងក្នុងមួយខែ៕

ផ្ទាំងផ្សាយពាណិជ្ជកម្ម