Lexus NX 300 ប្រភេទ Bronze Edition ស្អាតកប់

January 11, 2020

ក្រុមហ៊ុន Lexus បានដាក់តាំងបង្ហាញរថយន្ត NX 300 ម៉ូដែលពិសេសហៅថា Bronze Edition នៅក្នុងកម្មវិធី 2020 Tokyo Auto Salon នាទីក្រុងតូក្យូ ប្រទេសជប៉ុន។

Lexus NX 300 Bronze Edition នេះ ត្រូវបានដាក់ឈ្មោះតាមពណ៌តួខ្លួន និងកាប៊ីនខាងក្នុងរបស់វា ហើយបច្ចុប្បន្ននេះនឹងត្រូវដាក់លក់ផ្តាច់មុខ តែក្នុងប្រទេសជប៉ុនប៉ុណ្ណោះ។

NX 300 Bronze Edition នេះមានពណ៌តួខ្លួនខាងក្រៅហៅថា Sonic Titanium Metallic ជាមួយនឹងយ៉ាន់អាលុយមីញ៉ូមទំហំ ១៨អ៊ីងពណ៌ទង់ដែង, ប៉ាណា និងស៊ុមប៉ាណាពណ៌ខ្មៅ ជាដើម។

ដោយឡែកផ្នែកខាងក្នុងរបស់វា មានការតុបតែង និងរំលេចទៅដោយពណ៌ទង់ដែង ព្រមទាំងមានថ្នេរដេរពណ៌ទង់ដែង នៅលើកៅអី, ដៃចង្កូត, ចង្កឹះលេខ, តាប្លូផ្នែកកណ្តាល, កណ្តាលដាក់ដៃផ្នែកកណ្តាល និងលើទ្វារទៀតផង។

ក្រៅពីនោះ វាមានបំពាក់មុខងារពិសេសៗជាច្រើនទៀត ដូចជា blind spot monitor, rear cross traffic alert, parking support brake, ភ្លើងស្វាគមន៍ និងឃ្លុបក្រោយបើកអូតូ ជាដើម។ NX 300 Bronze Edition នេះ មានតម្លៃ ៤៤ ៦៩០ដុល្លារ សម្រាប់ប្រភេទប៉ុងមួយ និង ៤៧ ១១០ដុល្លារ សម្រាប់ប្រភេទប៉ុងពីរ៕

ផ្ទាំងផ្សាយពាណិជ្ជកម្ម

ក្រុមហ៊ុនរថយន្តរដ្ឋចិនចង់បង្កើតរថយន្តថ្មីឲ្យបាន ២១ ម៉ូដែលត្រឹមឆ្នាំ ២០២៥

January 11, 2020

លោក Xu Liuping ប្រធានក្រុមហ៊ុនរថយន្ត FAW Group ដែលគ្រប់គ្រងដោយរដ្ឋាភិបាលចិន ចង់ឲ្យ Hongqi ដែលជាសាខាក្រុមហ៊ុនរបស់ខ្លួន បង្កើតចំនួនលក់នៅឆ្នាំ ២០២០ ឲ្យបានទ្វេដង ពោលគឺឲ្យបាន ២០ ម៉ឺនគ្រឿង។

ដើម្បីបង្កើនចំនួនលក់នេះដែរ Hongqi ក៏មានគោលដៅចង់បង្កើតរថយន្តថ្មីឲ្យបាន ២១ ម៉ូដែលនៅត្រឹមឆ្នាំ ២០២៥ ហើយមាន ១៨ ម៉ូដែលនឹងមានប្រើប្រាស់ថាមពលអគ្គិសនីជាជំនួយ ឬប្រើអគ្គិសនីទាំងស្រុងតែម្ដង។

កាលពីឆ្នាំមុន Hongqi អាចលក់រថយន្តបានមិនតិចជាង ១០០ ១១៦ គ្រឿងនោះទេ នៅជុំវិញប្រទេសចិន។ គម្រោងការសម្រាប់ឆ្នាំ ២០២០ គឺលក់ឲ្យបាន ២០ ម៉ឺនគ្រឿង និង ៤០ ម៉ឺនគ្រឿងនៅឆ្នាំ ២០២២ ហើយនៅឆ្នាំ ២០២៥ លក់ឲ្យបាន ៦០ ម៉ឺនគ្រឿង។

អំឡុងពេលកម្មវិធី Frankfurt Motor Show ឆ្នាំមុន Hongqi បាននាំយករថយន្ត Concept ពីរដើម្បីបង្ហាញលើឆាកអន្តរជាតិ គឺរថយន្តមហាកម្លាំងម៉ូដែល S9 និងរថយន្តអគ្គិសនី E115 SUV៕

ផ្ទាំងផ្សាយពាណិជ្ជកម្ម

Toyota បង្ហាញ Concept រថយន្ត Prius រូបរាងកំពូលប្លែក

January 11, 2020

ក្នុងកម្មវិធី Tokyo Auto Salon នាឆ្នាំនេះ Toyota បាននាំយករថយន្តប្លែកមួយម៉ូដែលមកតាំងបង្ហាញ ដែលជា Toyota Ambient RD Prius PHV Concept ជាប្រភេទរថយន្ត Concept។

រថយន្ត Prius Concept នេះគឺជាសហការគ្នាបង្កើតឡើងជាលើកដំបូងរវាង Toyota Modellista សាខាដែលផ្ដោតលើការរចនារូបរាង ជាមួយនឹង Toyota Racing Development (TRD) ដែលជាសាខាផ្ដោតលើការលេងរថយន្ត។ តាមរយៈការសហការនេះគេបង្កើតបានរថយន្តដែលមានរូបរាងប្លែក ហើយក៏ទាក់ភ្នែកណាស់ដែរ។

ទស្សនារូបភាពនិងវីដេអូបន្ថែមទៀតដូចខាងក្រោមនេះ ៖

ផ្ទាំងផ្សាយពាណិជ្ជកម្ម

Ford នៅវៀតណាមបំបែកកំណត់ត្រាលក់ប្រចាំឆ្នាំ ២០១៩

January 10, 2020

ក្រុមហ៊ុន Ford Vietnam បានប្រកាសអំពីកំណត់ត្រាលក់ប្រចាំឆ្នាំ ២០១៩ ដែលមានការកើនឡើង ៣១% ធៀបនឹងឆ្នាំ ២០១៨ ពោលអាចលក់បានរហូតដល់ ៣២ ១៧៥ គ្រឿង ក្នុងរយៈពេល ១២ ខែនៃឆ្នាំមុន។

Ford Ranger ជារថយន្តលក់ដាច់ជាងគេរបស់ក្រុមហ៊ុន ហើយវាក៏ជាម៉ូដែលភីកអាប់លក់ដាច់ជាងគេនៅវៀតណាមប្រចាំឆ្នាំរយៈពេល ៧ ឆ្នាំជាប់ៗគ្នា។ ឆ្នាំ ២០១៩ ចំនួនលក់រថយន្ត Ford Ranger បានកើនឡើង ៥៤% អាចលក់បានសរុប ១៣ ៣១៩ គ្រឿង។ ចំណែកម៉ូដែល Everest វិញ អាចលក់បាន ៧ ៨៥២ គ្រឿង ដែលកើនឡើងខ្ពស់ផងដែរធៀបនឹងឆ្នាំមុន។

ចំពោះម៉ូដែល Ford Transit អាចលក់បាន ៤ ៦៩០ គ្រឿង បន្តជាប់ជារថយន្តដឹកអ្នកដំណើរ ១៦ កៅអី លក់ដាច់ជាងគេប្រចាំឆ្នាំ រយៈពេល ៧ ឆ្នាំជាប់គ្នា។ ម៉ូដែល EcoSport ឯណោះវិញលក់បាន ៤ ០០៦ គ្រឿង, ម៉ូដែល Explorer លក់បាន ៨៥៤ គ្រឿង និងម៉ូដែល Tourneo លក់បាន ២៤៥ គ្រឿង៕

ផ្ទាំងផ្សាយពាណិជ្ជកម្ម

Toyota Yaris ស៊េរីពិសេស មានបំពាក់ម៉ាស៊ីន ៣ស៊ីឡាំងកម្លាំងខ្លាំងដាច់គេក្នុងលោក

January 10, 2020

រថយន្ត Toyota Yaris ជំនាន់ថ្មីបានបង្ហាញមុខជាផ្លូវការកាលពីប៉ុន្មានខែមុន ហើយពេលនេះរថយន្តនេះមានការបន្ថែមនូវប្រភេទពិសេសគឺ GR Yaris ដែលជាប្រភេទមានកម្លាំងខ្លាំង និងមានលេងរូបរាងបែបស្ព័រកាន់តែពិសេស។

វាមានបំពាក់ម៉ាស៊ីនតូចមែនពិត ប៉ុន្តែមានកម្លាំងខ្លាំង ដោយម៉ាស៊ីន Turbocharged ចំណុះ ១,៦ លីត្រ ៣ ស៊ីឡាំង របស់វាអាចបង្កើតកម្លាំងបាន ២៥៧ សេះ ដែលជាម៉ាស៊ីន ៣ ស៊ីឡាំង មានកម្លាំងខ្លាំងជាងគេក្នុងលោកដែលបានប្រើលើរថយន្តបើកលើដងផ្លូវធម្មតា។ រថយន្ត GR Yaris នេះដែរក៏មានប្រើប្រាស់ប្រព័ន្ធបើកបរវិលកង់ទាំងអស់ (ប៉ុងពីរ) និងមានប្រអប់លេខ ៦ វគ្គ។

ទម្ងន់របស់រថយន្តនេះមានត្រឹមតែ ១២៨០ គីឡូក្រាម ហើយអាចស្ទុះពី ០-១០០ គ.ម/ម៉ ដោយប្រើពេលមិនដល់ ៥ វិនាទី និងមានល្បឿនអតិបរមា ២៣០ គ.ម/ម៉។ រថយន្តនេះដែរបានបង្ហាញមុខជាផ្លូវការក្នុងកម្មវិធី Tokyo Auto Salon ដែលកំពុងប្រព្រឹត្តទៅនៅជប៉ុន។

រថយន្តនេះមានពីរប្រភេទដែលមានការរូបរាងខុសគ្នាបន្តិចបន្តួច មានប្រភេទ First Edition តម្លៃប្រមាណ ៣៦ ១០០ ដុល្លារ និងប្រភេទ High-Performance First Edition មានតម្លៃប្រមាណ ៤១ ៦០០ ដុល្លារ៕

ផ្ទាំងផ្សាយពាណិជ្ជកម្ម

មកដឹងតម្លៃ Mazda CX-3 ឆ្នាំ២០២០ ទើបចេញលក់នៅបរទេស

January 10, 2020

ក្រុមហ៊ុន Mazda ទើបតែបានប្រកាសពីតម្លៃលក់នៃរថយន្ត CX-3 ស៊េរីឆ្នាំ២០២០ ដែលបំពាក់លក្ខណៈពិសេសមកស្តង់ដារជាច្រើន។

Mazda CX-3 ឆ្នាំ២០២០ នេះមានតែ១ម៉ូដែលគត់គឺ CX-3 Sport មានតម្លៃចាប់ពី ២១ ៦៨៥ដុល្លារលើទីផ្សារសហរដ្ឋអាមេរិក សម្រាប់ប្រភេទប៉ុងមួយ និង ២៣ ០៨៥ដុល្លារសម្រាប់ប្រភេទប៉ុងពីរ។

រថយន្ត Mazda CX-3 Sport បំពាក់ម៉ាស៊ីនសាំង Naturally Aspirated ចំណុះ ២,០លីត្រ SkyActiv-G ទំហំ ៤ស៊ីឡាំង មានកម្លាំង ១៤៨សេះ ហើយបំពាក់ប្រអប់លេខអូតូ ៦វគ្គមកស្តង់ដារតែម្តង។

CX-3 បំពាក់លក្ខណៈពិសេសមកស្តង់ដារជាច្រើន ដូចជា Apple CarPlay, Android Auto, Active Driving Display, ម៉ាស៊ីនត្រជាក់អូតូ, ភ្លិតទឹកអូតូ, អេក្រង់ Touchscreen ទំហំ ៧អ៊ីង, ប្រព័ន្ធបង្ហាញព័ត៌មាន Mazda Connect ជាដើម។

ក្រៅពីនោះនៅមានប្រព័ន្ធសុវត្ថិភាព i-Activsense ដែលរួមមានមុខងារដូចជា Radar Cruise Control, Advanced Smart City Brake Support with Pedestrian Detection និង Lane Departure Warning ផងដែរ៕

ផ្ទាំងផ្សាយពាណិជ្ជកម្ម

ឡានភីកអាប់ Ford Ranger និង Toyota Hilux លក់ដាច់ខ្លាំងបំផុតនៅអូស្ត្រាលី ក្នុងឆ្នាំ២០១៩

January 10, 2020

ចំនួនលក់នៃរថយន្តភីកអាប់នៅតែខ្លាំងក្លា នៅក្នុងប្រទេសអូស្ត្រាលី ដោយ Toyota HiLux ជាប់ឈ្មោះជារថយន្តលក់ដាច់បំផុត ៤ឆ្នាំជាប់គ្នា សរុបស្មើនឹង ៤៧ ៦៤៩គ្រឿង នៅក្នុងឆ្នាំ២០១៩ តាមពីក្រោយដោយ Ford Ranger សរុបចំនយន ៤០ ៩៦០គ្រឿង។

ដោយឡែក រថយន្ត Ford Ranger ប្រភេទប៉ុងពីរ 4×4 លក់ដាច់សរុប ៣៧ ០០៤គ្រឿង នាំមុខ Toyota Hilux ប្រភេទប៉ុងពីរ 4×4 ដែលលក់បានត្រឹម ៣៦ ៣២៥គ្រឿងប៉ុណ្ណោះ។

នៅក្នុងប្រទេសអូស្ត្រាលី Ranger បានតំណាងឲ្យចំនួនលក់សរុប ៦៤% របស់ Ford ខណៈ Hilux ត្រឹម ២៣% ប៉ុណ្ណោះសម្រាប់ Toyota។ ថ្វីបើ Toyota Hilux ឈរនៅលើកំពូងតារាងលេខ១ ក៏ពិតមែន ប៉ុន្តែបើប្រៀបធៀបចំនួនលក់សរុបកាលពីឆ្នាំមុន (៥១ ៧០៥គ្រឿង) គឺធ្លាក់ចុះបន្តិច៕

ផ្ទាំងផ្សាយពាណិជ្ជកម្ម

Toyota សម្រេចផលិតគ្រឿងសម្រាប់ Supra ស៊េរីចាស់លក់ឡើងវិញ

January 9, 2020

ក្រុមហ៊ុន Toyota បានប្រកាសថា ខ្លួននឹងចាប់ផ្តើមផលិតឡើងវិញនូវគ្រឿង (spare part) មួយចំនួនសម្រាប់ Supra ស៊េរីចាស់ (មានឈ្មោះកូដ A70 និង A80) តាមរយៈគម្រោង GR Heritage Parts Project ហើយដាក់លក់ទាំងក្នុង និងក្រៅស្រុកទៀតផង។

គម្រោងនេះនឹងចាប់ផ្តើមផលិតឡើងវិញនូវគ្រឿងដែលបច្ចុប្បន្នមិនទាន់មានលក់ (ពីក្រុមហ៊ុន) ដើម្បីធានាថា ម្ចាស់រថយន្ត Toyota Supra អាចបន្តបើកបររថយន្តរបស់ខ្លួន និងមើលថែទាំវាបានល្អទៅថ្ងៃអនាគតទៀត។

ជាមួយគ្នានេះ Toyota នឹងដាក់បង្ហាញគ្រឿងទាំងនោះ នៅក្នុងកម្មវិធី Tokyo Auto Salon ក្នុងខែមករានេះទៀតផង។

គួរឲ្យដឹងថា Toyota មិនមែនក្រុមហ៊ុនតែមួយគ្រឿងឡើយ ដែលមានផលិតគ្រឿងសម្រាប់រថយន្តស្ព័រស៊េរីចាស់របស់ខ្លួន។ ជាក់ស្តែង ក្នុងឆ្នាំ២០១៧ ក្រុមហ៊ុន Nissan បានប្រកាសថាខ្លួននឹងចាប់ផ្តើមផលិតឡើងវិញ នូវគ្រឿងសម្រាប់រថយន្ត Skyline R32, R33 និង R34 ខណៈ Mazda ក៏មានផលិតសម្រាប់រថយន្ត MX-5 Miata ផងដែរ៕

ផ្ទាំងផ្សាយពាណិជ្ជកម្ម

អុញនោះ! BMW នឹងផលិតឡាន X6 និង X7 ប្រើអ៊ីដ្រូហ្សែន

January 9, 2020

មេផ្នែកស្រាវជ្រាវ និងអភិវឌ្ឍរបស់ក្រុមហ៊ុន BMW លោក Klaus Froehlich បានបង្ហើបឲ្យដឹងថា ក្រុមហ៊ុនអាល្លឺម៉ង់នេះនឹងមានលក់រថយន្ត SUV ប្រើអ៊ីដ្រូហ្សែន។

លោក Froehlich បានប្រាប់ទៅកាន់ Auto News Europe ថា បច្ចេកវិទ្យាអ៊ីដ្រូហ្សែនដែល BMW កំពុងអភិវឌ្ឍ ដែលជាការចាប់ដៃសហការគ្នាជាមួយ Toyota នឹងធ្វើឲ្យរថយន្តអ៊ីដ្រូហ្សែនរបស់ខ្លួនកាន់តែអស្ចារ្យ។

យ៉ាងណាក៏ដោយ រថយន្តប្រើអ៊ីដ្រូហ្សែនជាទូទៅ មានតម្លៃថ្លៃជាងរថយន្តអគ្គិសនីសុទ្ធ រហូតដល់ទៅ ១០ដងឯណោះ។

លោក Froehlich ក៏បានបញ្ជាក់បន្ថែមឲ្យដឹងផងដែរថា BMW នឹងចេញលក់រថយន្តដ៏ល្បីរបស់ខ្លួនម៉ូដែល X6 និង X7 ដោយបំពាក់ម៉ាស៊ីនប្រើអ៊ីដ្រូហ្សែនវិញ៕

ផ្ទាំងផ្សាយពាណិជ្ជកម្ម

ស្លាកលេខពិសេស ២ កំពុងដាក់ដេញថ្លៃ

January 9, 2020

នៅពេលនេះមានលេខពិសេសចំនួន ២ ត្រូវបានក្រសួងសាធារណការ និងដឹកជញ្ជូនដាក់ធ្វើការដេញថ្លៃ ដោយមួយមានតម្លៃចាប់ផ្ដើមពី ៣ លានរៀល និងមួយទៀតមានតម្លៃចាប់ពី ១០០ លានរៀល។

ការដេញថ្លៃនឹងត្រូវបញ្ឈប់នៅថ្ងៃទី ១០ ខែមករានេះ ហើយដើម្បីអាចដេញថ្លៃបានគឺតម្រូវឲ្យមានទ្រព្យសកម្មក្នុងគណនីធនាគារជាដៃគូរបស់ក្រសួងចំនួន ២០ លានរៀល។ ការដេញថ្លៃមួយលើកៗគឺកើនឡើង ៥% នៃតម្លៃមុនធ្វើការដេញថ្លៃ។

ចង់ដឹងច្បាស់អំពីនីតិវិធីទិញលេខពិសេស ទស្សនាវីដេអូខាងក្រោមនេះ ៖

ផ្ទាំងផ្សាយពាណិជ្ជកម្ម