ច្បាស់ហើយ! ឡានថ្មីរបស់ Toyota នឹងមានឈ្មោះថា 4Active

December 28, 2019

ក្រុមហ៊ុន Toyota បានចុះឈ្មោះម៉ាករថយន្ត 4Active ជាមួយនឹងការិយាល័យបាតង់ United States Patent and Trademark Office ជាផ្លូវការ។

រថយន្ត Toyota 4Active នេះ ធ្លាប់បានបង្ហាញខ្លួនជាគំរូរថយន្តកាលពីឆ្នាំ២០១៧ ដែលពេលនោះ Toyota ហៅឈ្មោះវាថា FT-4X Concept។

រថយន្តថ្មីសន្លាងមានរូបរាងជ្រុងៗ តែមានសមត្ថភាពខ្លាំងខាង Off-road នេះ នឹងប្រើម៉ាស៊ីនទំហំ ៤ស៊ីឡាំង ព្រមទាំងប្រព័ន្ធប៉ុងពីរ។ ខុសពីរថយន្ត 4Runner និង FJ Cruiser រថយន្ត 4Active នេះនឹងប្រើគ្រោងឆ្អឹង Toyota New Global Architecture-C។ វានឹងស្ថិតនៅចន្លោះម៉ូដែល C-HR និង RAV4 ក្នុងត្រកូល Toyota។

ទោះជាយ៉ាងណា Toyota មិនទាន់បានបង្ហាញពីតម្លៃ និងកាលបរិច្ឆេទចេញលក់រថយន្ត 4Active នេះនៅឡើយទេ៕

ផ្ទាំងផ្សាយពាណិជ្ជកម្ម

រថយន្ត Tesla Model 3 ផលិតនៅចិនដំបូង នឹងត្រូវដឹកឲ្យបុគ្គលិក Tesla ប្រើ

December 28, 2019

Tesla នឹងចាប់ផ្ដើមធ្វើការដឹកជញ្ជូនជាលើកដំបូងនូវរថយន្ត Model 3 ដែលផលិតនៅរោងចក្រថ្មីនាទីក្រុងសៀងហៃប្រទេសចិន នៅថ្ងៃទី ៣០ ខែធ្នូនេះ។

អ្នកនាំពាក្យរបស់ក្រុមហ៊ុនបានបញ្ជាក់អំពីដំណឹងនេះ ហើយបានបន្ថែមថាអតិថិជន ១៥ នាក់ដំបូងដែលទទួលបានរថយន្តនេះនៅថ្ងៃទី ៣០ ខែធ្នូ នឹងជាបុគ្គលិករបស់ Tesla។

Tesla បានចាប់ផ្ដើមសាងសង់រោងចក្រនៅសៀងហៃកាលពីខែមករា ជារោងចក្រទីមួយរបស់ក្រុមហ៊ុនដែលទីតាំងនៅក្រៅសហរដ្ឋអាមេរិក ហើយក៏ជារោងចក្រនៅចិនដំបូងដែលគ្រប់គ្រងដោយបរទេសទាំងស្រុងផងដែរ។

ការដឹកជញ្ជូនដំបូងនៅថ្ងៃទី ៣០ ធ្នូនេះ មានន័យថា Tesla ចំណាយពេលត្រឹមតែ ៣៥៧ ថ្ងៃប៉ុណ្ណោះ ក្នុងការបញ្ចប់ការសាងសង់ និងចាប់ផ្ដើមការផលិត។ រោងចក្រថ្មីនេះបានដាក់គោលដៅថាផលិតរថយន្តឲ្យបាន ២៥០ ០០០ គ្រឿងក្នុងមួយឆ្នាំ៕

ផ្ទាំងផ្សាយពាណិជ្ជកម្ម

Mitsubishi សម្រេចឈប់ផលិតរថយន្តម៉ាស៊ីនម៉ាស៊ូត

December 28, 2019

Mitsubishi Motors បានសម្រេចចិត្តឈប់អភិវឌ្ឍន៍រថយន្តម៉ាស៊ីនម៉ាស៊ូតថ្មីតទៀត។ ចាប់ពីចុងឆ្នាំ ២០២១ ជម្រើសម៉ាស៊ីនម៉ាស៊ូតលើរថយន្តសំខាន់ៗនឹងត្រូវដកចេញជាបន្តបន្ទាប់។

មុន Mitsubishi មានក្រុមហ៊ុនជប៉ុនជាច្រើនរួចមកហើយដែលសម្រេចឈប់បង្កើតម៉ាស៊ីនម៉ាស៊ូតថ្មី ក្នុងនោះមាន Nissan, Honda និង Toyota ផងដែរ។ Nissan គ្រោងនឹងបញ្ចប់ជីវិតម៉ាស៊ីនម៉ាស៊ូតត្រឹមចុងឆ្នាំ ២០២០ ចំណែក Toyota បញ្ឈប់ជាដំណាក់កាលៗ ហើយ Honda គ្រោងបញ្ឈប់នៅត្រឹមចុងឆ្នាំ ២០២១។

Mitsubishi បានប៉ាន់ស្មានថាចំនួនរថយន្តម៉ាស៊ីនម៉ាស៊ូតដែលខ្លួនផលិតនឹងធ្លាក់ក្រោមចំនួន ២០% ក្នុងរយៈពេល ២ ទៅ ៣ ឆ្នាំខាងមុខ ដោយនៅឆ្នាំ ២០១៨ ចំនួនរថយន្តម៉ាស៊ូតដែលក្រុមហ៊ុនផលិតមាន ២៤% នៃចំនួនសរុប៕

ផ្ទាំងផ្សាយពាណិជ្ជកម្ម

VW បង្ហាញគំនិតបង្កើតរ៉ូបូតសម្រាប់សាកអាគុយរថយន្ត

December 27, 2019

Volkswagen បានណែនាំអំពី Concept ថ្មី ដែលបង្កើតឡើងក្នុងគោលបំណងដោះស្រាយបញ្ហាការសាកថ្មនៃរថយន្តអគ្គិសនី ដោយប្រើប្រាស់រ៉ូបូតសាកភ្លើងដោយផ្លាស់ទីបាន។

រ៉ូបូតនេះអាចធ្វើដំណើរទៅមុខដោយស្វ័យប្រវត្តិ ទៅកាន់រថយន្តអគ្គិសនីដែលបានចត រួចវាធ្វើការបើកសន្ទះសាក និងដោតសាក។ ដំណើរការនៃសាករថយន្តអគ្គិសនីរបៀបនេះ គឺមិនបាច់មានមនុស្សចូលរួមនោះទេ។

រ៉ូបូតគឺអាចនាំយកធុងមានផ្ទុកថាមពលទៅកាន់រថយន្ត ដែលធុងនោះនឹងត្រូវប្រើប្រាស់សម្រាប់សាកភ្លើងរថយន្ត ហើយរ៉ូបូតនឹងទុកធុងនោះនៅជាមួយរថយន្តអំឡុងការសាកភ្លើង ដោយវានឹងបន្តកិច្ចការជាមួយរថយន្តអគ្គិសនីដទៃទៀត។ ពេកសាករួចរាល់ រ៉ូបូតនឹងប្រមូលយកធុងផ្ទុកថាមពល និងនាំយកទៅកាន់ស្ថានីយសាកភ្លើងវិញ។

ចង់ដឹងច្បាស់អំពីដំណើរការ អាចទស្សនាវីដេអូខាងក្រោមនេះ ៖

ផ្ទាំងផ្សាយពាណិជ្ជកម្ម

ឃើញមុខងារដ៏ពិសេសរបស់ឡានភីកអាប់អគ្គិសនី Rivian ហើយ Tesla អាចច្រណែន

December 27, 2019

Tesla Cybertruck បានក្លាយជារថយន្តជិតចេញលក់លើទីផ្សារមួយ ដែលត្រូវបានគេលើកយកមកជជែកវែកញែកជាញឹកញាប់ ដោយសារជារថយន្តភីកអាប់អគ្គិសនីដំបូងរបស់ Tesla។ យ៉ាងណាក្ដីនៅផ្នែករថយន្តភីកអាប់អគ្គិសនីនេះ មិនមែនមានតែ Tesla ម្នាក់ឯងនោះទេ។

Rivian R1T ជារថយន្តភីកអាប់អគ្គិសនីលេចធ្លោមួយទៀតដែលនឹងចេញលក់លើទីផ្សារនាឆ្នាំក្រោយនេះដែរ។ Rivan មិនមែនជាក្រុមហ៊ុន Startup ធម្មតានោះឡើយ ដោយសារវាមានអ្នកផ្គត់ផ្គង់គ្រាក់ៗជាច្រើន ក្នុងចំណោមនោះមាន Amazon និង Ford។

ហើយពេលនេះមានហេតុផលមួយទៀតដែលគ្រប់គ្នារំភើបចិត្តក្នុងការទន្ទឹងរង់ចាំរថយន្តភីកអាប់ R1T ដោយវាមានមុខងារមួយឈ្មោះថា Tank Turn។ វីដេអូថ្មីចេញផ្សាយដោយ Rivian បានបង្ហាញថារថយន្ត R1T អាចធ្វើការបង្វិលខ្លួនដូចរថក្រោះអ៊ីចឹង។ ម៉ូទ័រអគ្គិសនីដែលបំពាក់សម្រាប់កង់រថយន្តនីមួយៗ ជាមូលហេតុនាំឲ្យមុខងារ Tank Turn នេះអាចកើតមានឡើង។

គួរដឹងថា Rivian បានប្រកាសពីមុនមកថារថយន្ត R1T គឺមានតម្លៃចាប់ពី ៦៩ ០០០ ដុល្លារ ចំណែករថយន្ត R1S ដែលជាប្រភេទ SUV គឺមានតម្លៃចាប់ពី ៧២ ៥០០ ដុល្លារ។ តម្លៃនេះរាងថ្លៃបន្តិចបើធៀបនឹង Cybertruck ដែលមានចាប់ពី ៣៩ ០០០ ដុល្លារ៕

ផ្ទាំងផ្សាយពាណិជ្ជកម្ម

ឡានអគ្គិសនី BMW i6 ថ្មី សាកភ្លើងម្តងជិះបាន ៧០០គ.ម៉ នឹងបង្ហាញខ្លួន!

December 27, 2019

BMW មានគម្រោងបញ្ចេញលក់រថយន្តអគ្គិសនីជាច្រើនម៉ូដែលនាពេលអនាគត ក្នុងនោះរួមទាំង រថយន្ត iX3 ក្នុងឆ្នាំ២០២០ ក៏ដូចជា iNEXT និង i4 នៅឆ្នាំ២០២១ ផងដែរ។

មិនតែប៉ុណ្ណោះ បើយោងតាមប្រភពព័ត៌មានបានឲ្យដឹងថា រថយន្ត BMW i6 នឹងបង្ហាញខ្លួននៅក្នុងឆ្នាំ២០២៤ ដើម្បីប្រជែងនឹងរថយន្ត Audi e-tron GT, Mercedes-Benz EQS និង Porsche Taycan។

រថយន្ត BMW i6 នឹងមានការឌីហ្សាញកាត់តាមរថយន្ត BMW 8 Series Gran Coupe ហើយនឹងប្រើប្រាស់ទ្វារ៤ ទៀតផង។ វានឹងមានជម្រើសកម្លាំង ២០១សេះ, ៣៣៥សេះ និង ៥៣៦សេះ។

បើតាមពាក្យចចាមអារ៉ាមកន្លងមក i6 នឹងបំពាក់អាគុយកម្លាំង ៩០គីឡូវ៉ាត់ម៉ោង ដែលផ្តល់ចម្ងាយបើកបរ ៥៦០គីឡូម៉ែត្រ និង អាគុយកម្លាំង ១២០គីឡូវ៉ាត់ម៉ោង អាចបើកបានចម្ងាយ ៧០០គីឡូម៉ែត្រឯណោះ៕

ផ្ទាំងផ្សាយពាណិជ្ជកម្ម

មេក្រុមហ៊ុនឡានជប៉ុនដ៏ធំមួយថា ឡាន Hybrid ល្អជាងឡានអគ្គិសនី

December 27, 2019

CEO ក្រុមហ៊ុនរថយន្តជប៉ុន Honda លោក Takahiro Hachigo បានធ្វើកិច្ចសម្ភាសន៍មួយជាមួយ Autonews ដោយឲ្យដឹងថា ក្រុមហ៊ុនរបស់លោកនឹងពឹងផ្អែកលើរថយន្ត Hybrid ច្រើន។

លោក Hachigo និយាយថា “ខ្ញុំជឿជាក់ថារថយន្ត Hybrid នឹងដើរតួយ៉ាងសំខាន់បំផុតមួយ”។ ជាមួយគ្នានេះ នៅពេលចោទសួរអំពីរថយន្តអគ្គិសនី CEO រូបនេះបានបន្ថែមថា “តើអតិថិជនពិតជាត្រូវការរថយន្តអគ្គិសនីមែនឬ? ខ្ញុំមិនទាន់សូវច្បាស់ទេ ព្រោះរថយន្តអគ្គិសនីមានបញ្ហាច្រើនណាស់។ ខ្ញុំមិនជឿថានឹងមានតម្រូវការច្រើនឡើយលើរថយន្តអគ្គិសនី”។

គួរឲ្យដឹងផងដែរថា បច្ចុប្បន្ននេះ Honda មានរថយន្ត Hybrid ចំនួន២ម៉ូដែល ដែលដើរតួសំខាន់បំផុត គឺ Accord Hybrid និង CR-V Hybrid។ ទោះជាយ៉ាងណា ក្រុមហ៊ុន Honda ក៏មានរថយន្តអគ្គិសនីដែរ គឺ Honda e ដែលបានបង្ហាញខ្លួនជាគំរូរថយន្តកាលពីឆ្នាំ២០១៧ ហើយនឹងផលិតលក់នាពេលអនាគត៕

ផ្ទាំងផ្សាយពាណិជ្ជកម្ម

Aston Martin សង្ឃឹមថាលក់ឡាន DBX បាន ៤ ពាន់គ្រឿងក្នុងមួយឆ្នាំ

December 26, 2019

រថយន្ត DBX គឺជារថយន្ត SUV ដំបូងរបស់ក្រុមហ៊ុន Aston Martin ហើយក្រុមហ៊ុនសង្ឃឹមថាអាចលក់រថយន្តនេះបានយ៉ាងហោចណាស់ ៤ ពាន់គ្រឿងនៅទូទាំងពិភពលោក ក្នុងរយៈពេល ១២ ខែដំបូងនៃការចេញលក់។

ការដឹកជញ្ជូនរថយន្ត DBX ទៅកាន់អតិថិជនកំណត់ថានឹងចាប់ផ្ដើមនៅពាក់កណ្ដាលឆ្នាំ ២០២០ ខាងមុខ។ លោក Andy Palmer ជានាយកប្រតិបត្តិក្រុមហ៊ុនបានបង្ហាញជំនឿជាក់ថាប្រសិនបើដល់ចំណុចកំពូលខ្លាំង ក្រុមហ៊ុនអាចលក់រថយន្តបានដល់ ៥ ពាន់គ្រឿងក្នុងមួយឆ្នាំ។

ទីផ្សារធំជាងគេសម្រាប់ DBX គឺសហរដ្ឋអាមេរិក និងប្រទេសចិន ដោយជាមួយរថយន្តនេះលោក Palmer និយាយថាវាត្រូវបានឌីហ្សាញដោយមានអតិថិជនចិន និងអាមេរិកនៅក្នុងចិត្ត។ បច្ចុប្បន្ននេះDBX មានជម្រើសម៉ាស៊ីន ៤,០ លីត្រ Twin-Turbo ៨ ស៊ីឡាំង ដែលមានកម្លាំង ៥៥០ សេះ អាចស្ទុះដល់ ១០០ គ.ម/ម៉ ក្នុងពេល ៤,៥ វិនាទី និងជិះបានលឿនបំផុត ២៩១ គ.ម/ម៉៕

ផ្ទាំងផ្សាយពាណិជ្ជកម្ម

ក្រុមហ៊ុនឡានភីកអាប់អគ្គិសនី ប្រមូលបានដើមទុន ១,៣ ពាន់លានដុល្លារ

December 26, 2019

Rivian ដែលជាក្រុមហ៊ុនផលិតរថយន្តអគ្គិសនីសម្រាប់ក្រុមហ៊ុន Amazon និង Ford ទទួលបានការបណ្ដាក់ទុនច្រើនសន្ធឹក។ ក្រុមហ៊ុននេះប្រមូលបាន ១,៣ ពាន់លានដុល្លារ ពីក្រុមហ៊ុនបណ្ដាក់ទុនដែលដឹកនាំដោយលោក T. Rowe Price ដែលលោកជាម្ចាស់ភាគហ៊ុនមួយរូបរបស់ Tesla។

ការបណ្ដាក់ទុនចុងក្រោយនេះ ជាការបណ្ដាក់ទុនលើកទីបួននៅឆ្នាំ ២០១៩ នេះ ដែលធ្វើឲ្យទុនសរុបប្រមូលបានឆ្នាំនេះមានជិត ៣ ពាន់លានដុល្លារ។ ក្រៅពីការអភិវឌ្ឍរថយន្តរបស់ខ្លួន ក្រុមហ៊ុន Rivian ក៏នឹងជួយ Ford ក្នុងការអភិវឌ្ឍរថយន្តអគ្គិសនីថ្មី និងផលិតរថយន្តដឹកទំនិញអគ្គិសនីចំនួន ១០០ ០០០ គ្រឿងសម្រាប់ Amazon ផងដែរ។

Rivian ត្រូវបានគេមើលឃើញថាមានរថយន្តភីកអាប់អគ្គិសនី R1T ដែលជាគូប្រជែងធំមួយរបស់ Tesla Cybertruck។ ក្រុមហ៊ុនអះអាងថារថយន្តខ្លួនអាចជិះបានចម្ងាយដល់ប្រមាណ ៦៤៣ គីឡូម៉ែត្រសម្រាប់ការសាកបំពេញម្ដង៕

ផ្ទាំងផ្សាយពាណិជ្ជកម្ម

Toyota អាចនឹងផលិត Highlander ប្រភេទសាកភ្លើង តែមិនមែនឆាប់ៗនេះទេ

December 26, 2019

Toyota ទើបតែបានបញ្ចេញរថយន្ត Highlander ស៊េរីឆ្នាំ២០២០ ជាផ្លូវការ កាលពីដើមខែធ្នូកន្លងទៅនេះ ដែលមានទាំងប្រភេទប្រើម៉ាស៊ីនសាំង និង Hybrid។

ទោះជាយ៉ាងណា លោក Yoshinori Futonagane អនុប្រធានផ្នែកវិស្វករនៅ Toyota បានប្រាប់ឲ្យដឹងថា ក្រុមហ៊ុនអាចនឹងផលិតរថយន្ត Highlander ប្រភេទសាកភ្លើងនាពេលអនាគត។

យ៉ាងណាមិញ លោក Futonagane បាននិយាយថា Toyota នឹងមិនផលិត Highlander PHEV (Plug-in Hybrid) ក្នុងពេលឆាប់ៗនេះឡើយ ប៉ុន្តែនឹងនៅតែសំឡឹងមើលលើទីផ្សារនេះ ប្រសិនបើអតិថិជនត្រូវការ។

គួរឲ្យដឹងថា រថយន្ត Highlander ឆ្នាំ២០២០ ទាំងប្រភេទប្រើសាំង និង Hybrid នឹងមានលក់ជាផ្លូវការ នាខែកុម្ភៈ ឆ្នាំ២០២០ ជាមួយតម្លៃចាប់ពី ៣៤ ៦០០ដុល្លារលើទីផ្សារសហរដ្ឋអាមេរិក៕

ផ្ទាំងផ្សាយពាណិជ្ជកម្ម