Corolla Altis ២០២០ នៅខ្មែរលើកនេះស្អាត និងទំនើបកប់ម៉ង់

October 23, 2019

តាមរយះការបង្ហោះក្នុងពិធីសម្ពោធជាផ្លូវការកាលពីថ្ងៃទី ១៩ ខែតុលា ឆ្នាំ២០១៩កន្លងទៅនេះ រថយន្តតូយ៉ូតា Corolla Altis ២០២០ របស់ក្រុមហ៊ុនតូយ៉ូតា កម្ពុជា យើងសង្កេតឃើញ ២ចំនុចធំៗ។ ទី១ គឺត្រូវបានផ្លាស់ប្តូររូបរាងទាំងស្រុងម៉ង និងទី២គឺ កញ្ចប់សុវត្ថិភាពជំនាន់ថ្មីរបស់ត៉ូយ៉ូតា Toyota Safety Sense (TSS)៖

PCS ប្រព័ន្ធផ្ដល់សញ្ញាគ្រោះថ្នាក់ និង ចាប់ហ្វ្រាំងដោយស្វ័យប្រវត្តិ
DRCC ប្រព័ន្ធកំណត់ល្បឿន បន្ថែមល្បឿន និង បន្ថយល្បឿនតាមយានយន្តខាងមុខដោយស្វ័យប្រវត្តិ
LDA ប្រព័ន្ធជំនួយដៃចង្កូតមិនអោយរថយន្តរេចង្កូតចេញពីគន្លងផ្លូវដោយស្វ័យប្រវត្ថិ
AHB ប្រព័ន្ធកំណត់ភ្លើង ហ្វា/កូដ ដោយស្វ័យប្រវត្តិ

នៅលើបណ្តារសង្គមផ្លូវការក៏បានបង្ហាញតម្លៃរបស់រថយន្តថ្មីនេះគឺមានតម្លៃ ៤៧,៧០០ ដុល្លារអាមេរិក។
លោកអ្នកអាចចូលមើលព័ត៍មានលម្អិតដោយ ចុចទីនេះ!

ផ្ទាំងផ្សាយពាណិជ្ជកម្ម

Honda Fit ឆ្នាំ២០២០ ដូររាងទាំងស្រុង ហើយមានជម្រើស Hybrid ទៀត

October 23, 2019

រថយន្ត Honda Fit ជំនាន់ថ្មីចុងក្រោយបង្អស់ បានបង្ហាញខ្លួនជាផ្លូវការ នៅក្នុងកម្មវិធី Tokyo Motor Show។

រថយន្តប្រភេទ Hatchback ថ្មីមានការរចនាយ៉ាងស្រស់ស្អាត រំលេចដោយក្រូមេយ៉ាងទាក់ទាញ ហើយនឹងមានជម្រើសចំនួន ៥ម៉ូដែល គឺ Basic, Home, Ness, Crosstar និង Luxe។

ថ្វីបើមិនទាន់បង្ហាញលម្អិតអំពីជម្រើសម៉ាស៊ីនរបស់វា ប៉ុន្តែ Honda អះអាងថា នឹងមានម៉ូដែល Fit Hybrid ដែលប្រើម៉ូទ័រអគ្គិសនី ២ ដូច Honda Accord Hybrid ដែរ។

រថយន្ត Honda Fit ថ្មី នឹងបំពាក់បច្ចេកវិទ្យា Honda SENSING និងមុខងារជំនួយការបើកបរកម្រិតខ្ពស់ជាច្រើន ដែលប្រើប្រាស់កាមេរ៉ាមុខជាមួយសេនស័រ ៨គ្រាប់ទាំងមុខ-ក្រោយរថយន្ត ដើម្បីធានាសុវត្ថិភាពខ្ពស់បំផុត។

មិនតែប៉ុណ្ណោះ វានឹងបំពាក់មុខងារថ្មីរបស់ Honda ហៅថា “CONNECT” ដែលអនុញ្ញាតឲ្យអ្នកបើកបរ អាចបញ្ជាមុខងារមួយចំនួនពីចម្ងាយ តាមរយៈស្មាតហ្វូនទៀតផង។ Honda Fit ថ្មីនឹងចេញលក់នៅក្នុងខែកុម្ភៈ ឆ្នាំ២០២០ ខណៈតម្លៃរបស់វានឹងត្រូវបង្ហាញនៅពេលក្រោយ៕

ផ្ទាំងផ្សាយពាណិជ្ជកម្ម

Toyota ជាប់ជាម៉ាករថយន្ត មានតម្លៃបំផុតប្រចាំឆ្នាំ២០១៩

October 23, 2019

ចំណាត់ថ្នាក់ “2019 Best Global Brands” របស់ក្រុមហ៊ុន Interbrand បានបង្ហាញឲ្យឃើញ ម៉ាករថយន្តចំនួន១៥ ស្ថិតនៅក្នុងកំពូលចំណាត់ថ្នាក់ទាំង១០០។

ជាថ្មីម្តងទៀត Toyota បានឈរនៅលើកំពូលតារាងលេខ១ ក្នុងចំណោមម៉ាករថយន្តសម្រាប់ឆ្នាំ២០១៩នេះ ជាម៉ាករថយន្តមានតម្លៃបំផុត សរុបប្រមាណ ៥៦ពាន់លានដុល្លារ ហើយឈរនៅលេខ៧ ក្នុងចំណោមម៉ាកទាំងអស់ ដោយឈរពីក្រោយ Samsung, Coca Cola, Microsoft, Amazon, Google និង Apple។

ក្រៅពីនេះ Mercedes-Benz បានរក្សាតំណែងលេខ២ ក្នុងចំណោមម៉ាករថយន្ត ដោយមានតម្លៃសរុបប្រមាណ ៥០ពាន់លានដុល្លារ តាមពីក្រោយដោយ BMW មានតម្លៃសរុបប្រមាណ ៤១ពាន់លានដុល្លារ។

បន្ទាប់មកទៀតគឺ Honda មានតម្លៃសរុបប្រមាណ ២៤ពាន់លានដុល្លារ, Ford ១៤ពាន់លានដុល្លារ, Hyundai ១៤ពាន់លានដុល្លារ, Volkswagen ១២ពាន់លានដុល្លារ, Audi ១២ពាន់លានដុល្លារ និង Porsche ១១ពាន់លានដុល្លារ។

Ferrari បានឈរនៅលេខ១១ មានតម្លៃសរុបប្រមាណ ៦ពាន់លានដុល្លារ, Kia ៦ពាន់លានដុល្លារ និង Land Rover ៥ពាន់លានដុល្លារ៕

ផ្ទាំងផ្សាយពាណិជ្ជកម្ម

Lexus បញ្ចេញរថយន្ត Concept ថ្មី រូបរាងប្លែកបំផុត

October 23, 2019

ក្នុងកម្មវិធីតាំងបង្ហាញរថយន្ត Tokyo Motor Show ឆ្នាំ ២០១៩ នេះ ក្រុមហ៊ុន Lexus បាននាំយករថយន្ត Concept ថ្មីមកតាំងបង្ហាញ ដែលមានឈ្មោះថា LF-30 ជាប្រភេទរថយន្ត SUV នាពេលអនាគត។

LF-30 មានប្រវែង ៥០៩០ ម.ម ទទឹង ១៩៩៥ ម.ម និងកម្ពស់ ១៦០០ ម.ម ហើយប្រវែងពីកង់មុខទៅកង់ក្រោយគឺ ៣២០០ ម.ម។ ទម្ងន់របស់វាគឺ ២៤០០ គីឡូក្រាម រាងធ្ងន់បន្តិច ដោយសារតែមានបំពាក់ម៉ូទ័រអគ្គិសនីរហូតដល់ ៤ ឯណោះ ម៉ូទ័រមួយ សម្រាប់កង់មួយ។ ការរៀបចំបែបនេះ អាចឲ្យរថយន្តរត់ដោយប្រើប្រាស់កង់មុខ កង់ក្រោយ ឬកង់ទាំងអស់ក្នុងពេលតែមួយបាន ដោយផ្អែកតាមស្ថានភាពផ្លូវ។

ម៉ូទ័រអគ្គិសនីទាំង ៤ អាចបង្កើតកម្លាំងបានសរុប ៥៣៦ សេះ និងអាចបង្កើនសន្ទុះពី ០-១០០ គ.ម/ម៉ ក្នុងពេលត្រឹម ៣,៨ វិនាទី។ ម៉ូទ័រទាំងបួន ទទួលបានថាមពលពីអាគុយ ១១០ គីឡូវ៉ាត់ម៉ោង ដែលបំពាក់នៅផ្នែកខាងក្រោមរថយន្ត។ Lexus និយាយថា LF-30 អាចរត់បានចម្ងាយ ៥០០ គីឡូម៉ែត្រ ពេលសាកបំពេញម្ដង៕

ផ្ទាំងផ្សាយពាណិជ្ជកម្ម

ចេញមុខច្បាស់ហើយ រថយន្តអគ្គិសនីដំបូងរបស់ Mazda

October 23, 2019

Mazda បានបង្ហាញចេញរូបរាងផ្លូវការនៃរថយន្តអគ្គិសនីដំបូងរបស់ខ្លួន សម្រាប់ផលិតលក់លើទីផ្សារ ដែលជាម៉ូដែល Mazda MX-30។

ក្រុមហ៊ុនរថយន្តជប៉ុននិយាយថា MX-30 មានបំពាក់នូវម៉ូទ័រអគ្គិសនីនៅខាងមុខ ដែលផលិតកម្លាំងបាន ១៤២ សេះ ហើយវាទទួលបានថាមពលពីអាគុយទំហំ ៣៥,៥ គីឡូវ៉ាត់ម៉ោង ដែលក្រុមហ៊ុននិយាយថាអាចទ្រាំទ្រការជិះចម្ងាយប្រមាណ ២០០ គីឡូម៉ែត្រ។

រថយន្ត MX-30 គឺប្រើប្រាស់គ្រោងឆ្អឹង e-SkyActiv ដែលមានមកជាមួយនូវមុខងារសុវត្ថិភាពជាច្រើន។ ឧទាហរណ៍ដូចជា Smart Brake Support ជាមួយនឹង Turn-Across Traffic Detection ដែលប្រើប្រាស់រ៉ាដា និងកាមេរ៉ាខាងមុខ។

Mazda មិនបានបញ្ជាក់នៅឡើយទេថារថយន្តនេះនឹងបញ្ចេញលក់លើទីផ្សារនាពេលណានោះ ហើយក៏មិនបានប្រាប់អំពីតម្លៃដែរ៕

ផ្ទាំងផ្សាយពាណិជ្ជកម្ម

ធ្វើតេស្តសុវត្ថិភាពទៅឃើញថារថយន្តវៀតណាម អាចទទួលបានកម្រិតផ្កាយ ៥

October 22, 2019

កាលពីថ្មីៗនេះ មានវីដេអូបង្ហាញអំពីការធ្វើតេស្តសមត្ថភាពការពារអ្នកបើកបររបស់រថយន្ត Lux SA2.0, Lux A2.0 និងរថយន្ត Fadil របស់ក្រុមហ៊ុនរថយន្តវៀតណាម Vinfast ដែលធ្វើតេស្តដោយអង្គភាពវាយតម្លៃរថយន្តថ្មីប្រចាំនៅអាស៊ាន (ASEAN NCAP)។

រថយន្តទាំងបីបានឆ្លងកាត់ការប៉ះទង្គិចពេលបើកបរនៅល្បឿនលឿន និងការបុកកម្ទេចពីផ្នែកចំហៀងជាដើម។ ជាលទ្ធផលរថយន្ត Vinfast Lux SA2.0 និង Lux A2.0 ទទួលបានពិន្ទុផ្កាយ ៥ (5-Stars) ជាពិន្ទុខ្ពស់បំផុតមួយរបស់ ASEAN NCAP។ ចំណែក Vinfast Fadil ទទួលបានកម្រិតសុវត្ថិភាពផ្កាយ ៤។

ដូចនេះមែន មានន័យថារថយន្ត Vinfast ទាំងបីគឺស្ថិតក្នុងចំណោមរថយន្តផ្ដល់សុវត្ថិភាពបានខ្ពស់បំផុតក្នុងលោក។ នៅថ្ងៃទី ២៣ តុលានេះដែរ ក្រុមហ៊ុន Vinfast នឹងទទួលនូវលិខិតបញ្ជាក់អំពីសុវត្ថិភាពនេះ ពីសំណាក់ ASEAN NCAP ផ្ទាល់៕

ផ្ទាំងផ្សាយពាណិជ្ជកម្ម

Toyota Century GRMN ត្រូវគេយកផលិតជាកូនឡាន មានកំណត់ត្រឹម ៧០០គ្រឿង

October 22, 2019

ចំនួនពិតប្រាកដនៃរថយន្ត Toyota Century GRMN នៅមិនទាន់មានការបញ្ជាក់ច្បាស់នៅឡើយ ប៉ុន្តែគេដឹងថាវាជារថយន្តដ៏កម្រមួយ។ កន្លងមកគេឃើញរថយន្តនេះបង្ហាញនៅទីសាធារណៈត្រឹម ២ គ្រឿងប៉ុណ្ណោះ ដោយមួយគឺប្រើប្រាស់ដោយលោក Akio Toyoda ប្រធានក្រុមហ៊ុន Toyota និងមួយគ្រឿងទៀតបង្ហាញនៅក្នុងកម្មវិធី Osaka Automesse ឆ្នាំ ២០១៩។

ប៉ុន្តែពេលនេះ អ្នកអាចមានឱកាសធ្វើជាម្ចាស់រថយន្តនេះ ដោយសារក្រុមហ៊ុនជប៉ុន Kyosho នឹងផលិតរថយន្ត Century GRMN ពណ៌សចំនួន ៧០០ គ្រឿង ក្នុងទំហំមាត្រដ្ឋាន ១/១៨។ តម្លៃរបស់កូនរថយន្តនេះគឺមួយគ្រឿង ១៩ ៨០០ យេន ឬស្មើប្រមាណ ១៨២,៤ ដុល្លារ។

តាមរយៈរូបភាពគេមើលឃើញថារថយន្តខ្នាតតូចនេះ គឺដូចគ្នាបេះដាក់នឹងរថយន្តខ្នាតធំ។ ចំណែកផ្នែកខាងក្នុងក៏ធ្វើបានផ្ចិតផ្ចង់សម្បើមណាស់ដែរ។

និយាយអំពីរថយន្ត Century GRMN ខ្នាតធំឯណោះវិញ មានការរាយការណ៍ថាវាបំពាក់ម៉ាស៊ីន ៥,០ លីត្រ ៨ ស៊ីឡាំង ដូចនឹងប្រភេទធម្មតាដែរ។ Toyota Century ប្រភេទធម្មតានាពេលនេះមានលក់តែនៅជប៉ុន ដោយមានតម្លៃប្រមាណ ១៨ ម៉ឺនដុល្លារ ហើយក្រុមហ៊ុនផលិតវា ៥០ គ្រឿងប៉ុណ្ណោះក្នុងមួយខែ៕

ផ្ទាំងផ្សាយពាណិជ្ជកម្ម

ឡានអគ្គិសនីដំបូងបង្អស់របស់ Mazda អាចមានរូបរាងបែបនេះ

October 22, 2019

ក្រុមហ៊ុន Mazda នឹងដាក់បង្ហាញគំរូរថយន្តអគ្គិសនីដំបូងបង្អស់របស់ខ្លួន នៅក្នុងកម្មវិធី Tokyo Motor Show នាថ្ងៃទី២៣ តុលា ២០១៩ ខាងមុខ។

គំរូរថយន្តអគ្គិសនីដំបូងបង្អស់របស់ Mazda មានឈ្មោះថា MX-30 Concept ដោយវាគឺជារថយន្តប្រភេទ SUV។ នេះបើតាមរូបថតនៅលើទស្សនាវដ្តីជប៉ុន Japan’s Car Top។

MX-30 Concept មានតួខ្ពស់ កាត់រូបរាងបែប Coupe ហើយមានទ្វារក្រោយតូច គ្មានដៃកាន់ខាងក្រៅឡើយ ហើយ ទំនងជាតម្រូវឲ្យទ្វារខាងមុខបើកជាមុនសិន ដើម្បីអាចឲ្យអ្នកដំណើរចូលបាន ដោយការរចនាបែបនេះគឺកាត់តាមរថយន្តស្ព័រ Mazda RX-8។

ការរចនាដ៏គួរឲ្យចាប់អារម្មណ៍មួយទៀតនោះ គឺប៉ាណាមុខដែលមានរូបរាងស្លីមខ្លាំងជាងម៉ូដែលចុងក្រោយរបស់ Mazda ទាំងអស់ ហើយថែមទាំងផុងចូលក្នុងខ្លាំងទៀតផង។ មិនតែប៉ុណ្ណោះ សូម្បីតែចង្កៀងមុខរបស់វាក៏ថ្មីដែរ ខណៈដងខ្លួនរបស់វាស្រដៀងទៅនឹងរថយន្ត Mazda CX-30។

គំរូរថយន្ត MX-30 Concept អាចនឹងប្រើម៉ូទ័រអគ្គិសនីមួយ ដែលមានកម្លាំងសរុប ១៤១សេះ និងកញ្ចប់អាគុយកម្លាំង ៣៥,៥គីឡូវ៉ាត់ម៉ោងមួយទៀតផង៕

ផ្ទាំងផ្សាយពាណិជ្ជកម្ម

ញាក់សាច់! Audi A6 ប្រើម៉ាស៊ីន Plug-in Hybrid ជិះ១០០គ.ម៉ ស៊ីសាំងមិនដល់២លីត្រ

October 22, 2019

Audi បានបញ្ចេញរថយន្ត A6 ប្រើម៉ាស៊ីនកូនកាត់ Plug-in Hybrid ថ្មី ម៉ូដែល 55 TFSI e Quattro ដែលមានតម្លៃ ៧៦ ៨០០ដុល្លារ លើទីផ្សារប្រទេសអាល្លឺម៉ង់។

រថយន្ត Audi A6 55 TFSI e Quattro នេះ ប្រើម៉ាស៊ីនសាំងចំណុះ ២,០លីត្រ ទំហំ៤ស៊ីឡាំង ម៉ូទ័រអគ្គិសនីមួយ និងអាគុយ Hybrid មួយ មានកម្លាំងសរុប ៣៦២សេះ ដំណើរការដោយប្រអប់លេខអូតូ S Tronic ៧វគ្គ។ វាអាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេលត្រឹម ៥,៦វិនាទី ហើយមានល្បឿនអតិបរមាដល់ ២៥០គីឡូម៉ែត្រក្នុងមួយម៉ោង។

មិនតែប៉ុណ្ណោះ កញ្ចប់អាគុយកម្លាំង ១៤,១គីឡូវ៉ាត់ម៉ោង អាចឲ្យ A6 55 TFSI e Quattro នេះរត់ដោយប្រើថាមពលអគ្គិសនីសុទ្ធ ចម្ងាយ ៥៣គីឡូម៉ែត្រ បន្ទាប់ពីចំណាយពេលសាកភ្លើងមួយពេញ ២ម៉ោងកន្លះ។ លើសពីនេះ វាមានកម្រិតស៊ីសាំងជាមធ្យមត្រឹមតែ ១,៩លីត្រប៉ុណ្ណោះ សម្រាប់ការបើកបរចម្ងាយ ១០០គីឡូម៉ែត្រ៕

ផ្ទាំងផ្សាយពាណិជ្ជកម្ម

ថ្ងៃដំបូងនៃការអនុវត្តន៍ច្បាប់ ចាប់ទាំងអស់អោយតែគ្មានស្លាកលេខត្រឹមត្រូវ

October 21, 2019

ភ្នំពេញ៖ នៅថ្ងៃនេះ ទី២១ ខែតុលា ឆ្នាំ២០១៩ ដែលជាថ្ងៃដំបូងនៃការអនុវត្តន៍ច្បាប់ចរាចរណ៍ផ្លូវគោក មន្ត្រីនគរបាលចរាចរណ៍ផ្លូវគោក និងអធិការដ្ឋាននគរបាលខណ្ឌ បានធ្វេីការឃាត់រថយន្ត និងម៉ូតូមួយចំនួនដែលធ្វេីចរាចរណ៍ដោយគ្មានស្លាកលេខនៅតាមដងផ្លូវ ដោយយកមករក្សាទុកនៅការិយាល័យចរាចរណ៍ និងធ្វេីការផាកពិន័យ ដោយអោយម្ចាស់ទៅធ្វេីស្លាកលេខរួចរាល់ទេីបអនុញ្ញាតិអោយយកត្រឡប់ទៅវិញបាន។ រថយន្តដែលមានបង្កាន់ដៃធ្វេីស្លាកលេខត្រឹមត្រូវ ត្រូវបានអនុញ្ញាតិអោយធ្វេីដំណេីរទៅមុខទៀតបាន។

គួរបញ្ជាក់ផងដែរថា ស្នងការដ្ឋាននគរបាលរាជធានីភ្នំពេញ បានចេញសេចក្តីជូនដំណឹងមុនអនុវត្តន៍ច្បាប់កាលពីថ្ងៃទី១១ ខែតុលា ឆ្នាំ២០១៩ កន្លងទៅនេះផងដែរ។