យក Land Cruiser ស៊េរីចាស់មកជួសជុលឡើងវិញ រួចដាក់លក់តម្លៃស្មើរថយន្តស៊េរីកប់

October 5, 2019

ក្រុមហ៊ុនអាមេរិក FJ Company បានបង្កើតគម្រោងការមួយក្នុងការជួសជុលរថយន្ត Land Cruiser ស៊េរីចាស់ ដើម្បីបំពេញតម្រូវការអតិថិជនចង់បាន SUV ខ្លាំងដែលមានរូបរាងបែបបុរាណ។ រថយន្តដែលកែច្នៃនេះត្រូវបានគេឲ្យឈ្មោះថា G40។

G40 គឺមានចែកចេញជាចំនួន ៣ ម៉ូដែលគឺ Heritage មានតម្លៃចាប់ពី ១៨ ម៉ឺនដុល្លារ, Expedition មានតម្លៃចាប់ពី ២០ ម៉ឺនដុល្លារ និង Signature G40-S តម្លៃចាប់ពី ២២ ម៉ឺនដុល្លារ។ ក្រុមហ៊ុន FJ Company ធ្វើការជួសជុលឡើងវិញលើរថយន្ត Land Cruiser ដែលផលិតចន្លោះឆ្នាំ ១៩៧០ ដល់ ១៩៨៣។

រថយន្តទាំងអស់គឺមានបំពាក់ដោយម៉ាស៊ីន Toyota 1GRE-FE ចំណុះ ៤,០ លីត្រ ៦ ស៊ីឡាំង ភ្ជាប់នឹងប្រអប់លេខដៃ ៥ វគ្គ។ អតិថិជនក៏អាចរើសយកម៉ាស៊ីន Superchaged តាមការចង់បានផងដែរ ដោយបន្ថែមលុយពីលើនេះ។

គួរដឹងថា FJ Company ផលិតរថយន្ត G40 នេះត្រឹម ៣០ គ្រឿងប៉ុណ្ណោះក្នុងមួយឆ្នាំ ដែលមួយគ្រឿងៗត្រូវចំណាយពេលជួសជុល/កែច្នៃរហូតដល់ ៦ ខែ៕

ផ្ទាំងផ្សាយពាណិជ្ជកម្ម

នេះជា Lamborghini ដែលលក់ដេញថ្លៃបានថ្លៃជាងគេ

October 4, 2019

កាលពីឆ្នាំ ២០១៦ បណ្ដុំរថយន្តស៊េរីកប់ជាច្រើន ដែលជាកម្មសិទ្ធិរបស់ Teodoro Nguema Obiang Mangue អនុប្រធានាធិបតីប្រទេស Equatorial Guinea និងជាកូនប្រុសរបស់ប្រធានាធិបតីប្រទេសនេះ ត្រូវបានរឹបអូសដោយសមត្ថកិច្ចស្វីស ជាផ្នែកមួយនៃការស៊ើបអង្កេតករណីលាងលុយខ្មៅ។

៣ ឆ្នាំក្រោយមក រថយន្តប្រណីតទាំង ២៥ គ្រឿងដែលត្រូវបានរឹបអូស ត្រូវបានគេយកដាក់លក់ដេញថ្លៃនៅប្រទេសស្វីស។ រថយន្តដែលជាតួអង្គឯក គឺ Lamborghini Veneno Roadster ដែលជារថយន្តមហាកម្រមួយ។

រថយន្តនេះមានត្រឹម ៩ គ្រឿងប៉ុណ្ណោះ ដែលក្រុមហ៊ុនផលិតឡើងក្នុងគោលបំណងអបអរសាទរខួបទី ៥០ ឆ្នាំរបស់ Lamborghini។ រថយន្តនេះរំពឹងថាអាចដេញថ្លៃបានខ្ទង់ ៥ លានដុល្លារ ប៉ុន្តែជាលទ្ធផលទទួលបានតម្លៃដល់ទៅ ៨,៣ លានដុល្លារ ដែលវាស្ទើរស្មើពីរដងនៃតម្លៃដើម ហើយក៏ធ្វើឲ្យវាក្លាយជារថយន្ត Lamborghini លក់ដេញថ្លៃបានថ្លៃជាងគេបំផុតក្នុងប្រវត្តិសាស្ត្រ។

គួរដឹងថារថយន្តទាំង ២៥ គ្រឿងដែលដេញថ្លៃមានដូចជា Koenigsegg One:1, Ferrari LaFerrari, Aston Martin One-77 និង Bugatti Veyron ជាដើម ដែលលក់បានសរុបដល់ ៣៦ លានដុល្លារ៕

ផ្ទាំងផ្សាយពាណិជ្ជកម្ម

Land Cruiser កែរូបរាងដោយអ៊ុយក្រែន ប្លែកទាំងក្នុងនិងក្រៅ

October 4, 2019

AutoLife ដែលជាក្រុមហ៊ុនកែច្នៃរថយន្តមួយមានមូលដ្ឋាននៅទីក្រុង Kyiv ប្រទេសអ៊ុយក្រែន បានបង្ហាញចេញរថយន្ត Land Cruiser ស៊េរីឆ្នាំ ២០១៩ ដែលទទួលបានកែច្នៃជាពិសេសទាំងក្នុងនិងក្រៅ។

ចំពោះរូបរាងខាងក្រៅមានការបន្ថែមកាងមុខ និងកាងក្រោយប្លែកខុសពីធម្មតា និងផ្លាស់ប្ដូររន្ធខ្យល់ខាងមុខផងដែរ។ នៅផ្នែកខាងក្នុងវិញមានប្រើប្រាស់នូវវត្ថុធាតុពិសេស ដូចជាដោយស្បែកពណ៌ក្រហម និងខៀវមានគុណភាពខ្ពស់របស់អូទ្រីស និងមានតុបតែងដោយឈើ ហើយអាលុយមីញ៉ូមផងដែរ។

ទស្សនាវីដេអូខាងក្រោមដើម្បីឃើញរូបរាងកាន់តែច្បាស់ ៖

ផ្ទាំងផ្សាយពាណិជ្ជកម្ម

ឡានអគ្គិសនីស៊ុយអែត Polestar 2 ប្រកាសតម្លៃដាក់លក់ជាផ្លូវការ

October 4, 2019

រថយន្តអគ្គិសនីរបស់ប្រទេសស៊ុយអែត Polestar 2 នឹងត្រូវផលិតនៅដើមឆ្នាំ ២០២០ ហើយចេញលក់នៅក្នុងខែមិថុនាខាងមុខ ។

ឥឡូវនេះ Polestar ដែលជាក្រុមហ៊ុនបុត្រសម្ព័ន្ធរបស់ Volvo បានប្រកាសពីតម្លៃលក់របស់ Polestar 2 ជាផ្លូវការ ដោយចាប់ពី ៦៤ ៤៦០ដុល្លារនៅលើទីផ្សារប្រទេសអាល្លឺម៉ង់ ខណៈតម្លៃសម្រាប់ទីផ្សារអាមេរិកខាងជើង ប្រហែល ៦៣ ០០០ដុល្លារ។

Polestar 2 ដែលចេញមកដំបូង នឹងមានកញ្ចប់ Option ដ៏អស្ចារ្យ ដូចជា Pilot package និង Plus package ព្រមទាំងមុខងារពិសេស Pilot Assist ជាដើម។

រថយន្តអគ្គិសនីនេះនឹងប្រើម៉ូទ័រអគ្គិសនី ២ ដែលមានកម្លាំងសរុប ៤០២សេះ និង អាគុយកម្លាំង ៧៨គីឡូវ៉ាត់ម៉ោង ដែលអាចបើកបរបានចម្ងាយ ៥០០គីឡូម៉ែត្រពេលសាកភ្លើងពេញ។ មិនតែប៉ុណ្ណោះ វាអាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេលមិនដល់ ៥ វិនាទីឡើយ៕

ផ្ទាំងផ្សាយពាណិជ្ជកម្ម

Tesla Model 3 ក្លាយជារថយន្តលក់ដាច់បំផុតនៅហូឡង់

October 4, 2019

Tesla កំពុងទទួលបានជោគជ័យខ្លាំងនៅអឺរ៉ុប ស្របពេលដែលរថយន្ត Tesla Model 3 បានក្លាយជារថយន្តលក់ដាច់បំផុតនៅក្នុងប្រទេសហូឡង់ ដោយទម្លាក់រថយន្ត Volkswagen Polo ចេញពីតំណែង។

Tesla បានលក់ដាច់ Model 3 ចំនួន ៥ ៧៦៨គ្រឿងកាលពីខែមុន ហើយតម្រូវការ Model 3 បានធ្វើឲ្យ Tesla ក្លាយជាម៉ាករថយន្តពេញនិយមបំផុតក្នុងប្រទេសហូឡង់ទៀតផង។

នៅអឺរ៉ុប រថយន្ត Tesla Model 3 បានដាក់លក់ក្នុងតម្លៃ ៤៧ ៣០៨ដុល្លារ ដោយវាអាចបើកបរបានចម្ងាយ ៣៨៦គីឡូម៉ែត្រនៅពេលសាកភ្លើងពេញ។

មិនតែប៉ុណ្ណោះ រថយន្តអគ្គិសនីរបស់អាមេរិកនេះ ក៏លក់ដាច់ខ្លាំងបំផុតនៅក្នុងប្រទេសន័រវេសដែរ ដោយលក់បានចំនួន ៣ ៣០០គ្រឿងនៅចន្លោះខែកក្កដា និងកញ្ញា៕

ផ្ទាំងផ្សាយពាណិជ្ជកម្ម

រថយន្ត SUV អគ្គិសនីរបស់ Ford អាចនឹងបង្ហាញមុខនៅខែវិច្ឆិកា

October 3, 2019

Ford បានប្រកាសជាលើកដំបូងពីផែនការបញ្ចេញលក់រថយន្តអគ្គិសនីតួខ្ពស់ កាលពីខែមករា ឆ្នាំ ២០១៨ ដែលក្រុមហ៊ុនបានសន្យាថារថយន្តនេះនឹងដាក់ឲ្យកុម្ម៉ង់ទិញអំឡុងឆ្នាំ ២០២០។

នៅខែសីហាឆ្នាំ ២០១៩ នេះ នាយកជាន់ខ្ពស់របស់ក្រុមហ៊ុនបានបង្ហើបខ្លះអំពីម៉ូដែលរថយន្តនេះ ដែលអាចនឹងលេចមុខនៅខែវិច្ឆិកា។ ហើយថ្ងៃនេះការចុះផ្សាយថ្មីបានសង្ស័យថារថយន្តប្រើថាមពលអគ្គិសនីសុទ្ធនេះ អាចនឹងបង្ហាញក្នុងកម្មវិធី Los Angeles Auto Show នាខែក្រោយនេះ។ គេជឿជាក់ថា LA Auto Show ជាកម្មវិធីសំខាន់មួយសម្រាប់បង្ហាញចេញរថយន្តថ្មី។

រថយន្តតួខ្ពស់ប្រើអគ្គិសនីរបស់ Ford អាចនឹងចេញលក់លើទីផ្សារជាមួយជម្រើសពីរ គឺជម្រើសបើកបរចម្ងាយ ៤៨៤ គ.ម និងជម្រើសបើកបរចម្ងាយដល់ ៦០០ គ.ម ហើយមានចចាមអារ៉ាមថាមានប្រភេទកម្លាំងខ្លាំងទៀតផង៕

ផ្ទាំងផ្សាយពាណិជ្ជកម្ម

រថយន្ត Lamborghini Aventador ក្លែងក្លាយដាក់លក់តម្លៃ ៤ ម៉ឺនដុល្លារ

October 3, 2019

នៅលើវិបសាយលក់ទំនិញអនឡាញ eBay គេបានប្រទះឃើញរថយន្ត Lamborghini Aventador ក្លែងក្លាយដាក់លក់ ដោយកំណត់តម្លៃលក់ ៤ ម៉ឺនដុល្លារ។

រថយន្តនេះមានរូបរាងស្រដៀងគ្នាខ្លាំងទៅនឹងរថយន្ត។ វាមានបំពាក់ម៉ាស៊ីនចំណុះ ៦,០ លីត្រ ផលិតកម្លាំងបាន ៥០០ សេះ ដែលមាន ៨ ស៊ីឡាំង។ រថយន្តនេះក៏មានប្រអប់លេខស្វ័យប្រវត្តិ, កន្លែងចាក់ CD, កៅអីស្បែក, ហ្វ្រាំង ABS, ពោងសុវត្ថិភាព, មុខងារទប់លំនឹង, ម៉ាស៊ីនត្រជាក់ និងចំណុចជាច្រើនទៀត។

គិតយ៉ាងណាដែរចំពោះរថយន្តនេះ តើវាសមនឹងតម្លៃ ៤ ម៉ឺនដុល្លារឬអត់?

ផ្ទាំងផ្សាយពាណិជ្ជកម្ម

Infiniti QX50 ឆ្នាំ ២០២០ បន្ថែមបច្ចេកវិទ្យាថ្មី ឯតម្លៃជាង ៣ម៉ឺនដុល្លារ

October 3, 2019

Infiniti QX50 បានទទួលការរចនាឡើងវិញកាលពីស៊េរីឆ្នាំ ២០១៩ ប៉ុន្តែសម្រាប់ស៊េរីឆ្នាំ ២០២០ នេះ វាទទួលបានការអាប់ដេតជាច្រើន លើផ្នែកបច្ចេកវិទ្យា។

ឥឡូវនេះ QX50 បំពាក់ប្រព័ន្ធ InTouc Infotainment System ថ្មី ហើយបំពាក់អេក្រង់ពីរ ទំហំ ៨អ៊ីង នៅខាងលើ និង ៧អ៊ីង នៅខាងក្រោម។ ប្រព័ន្ធថ្មីនេះក៏អាចភ្ជាប់ជាមួយមុខងារ Android Auto និង Apple CarPlay បានផងដែរ។

QX50 ឆ្នាំ ២០២០ បំពាក់ចង្កៀងមុខប្រភេទ LED ដែលគេហៅថា Ice Cube និង អំពូលកាត់អ័ព្ទប្រភេទ LED ដូចគ្នា , ដំបូលកញ្ចក់ Panoramic Moonroof និង យ៉ាន់ទំហំ ២០អ៊ីងមកស្តង់ដារតែម្តង។

រីឯផ្នែកខាងក្នុង វាបំពាក់កៅអីស្បែកមានមុខងារកម្តៅ , ដៃចង្កូតមានមុខងារកម្តៅ , ប្រព័ន្ធសំឡេង Bose , កញ្ចក់មើលក្រោយកាត់ពន្លឺអូតូ និង GPS ជាដើម ។

ក្រៅពីនោះ វាក៏បំពាក់មុខងារជំនួយការបើកបរជាច្រើន ដូចជា Intelligent Cruise Control, Blind Spot Intervention, Lane Departure Intervention, Distance Control Assist, High Beam Assist, Rear Cross Traffic Alert, Rear Automatic Braking និង Forward Emergency Braking with Pedestrian Detection ជាដើម។

Infiniti QX50 ប្រើម៉ាស៊ីនសាំងចំណុះ ២,០លីត្រ VC-Turbo ទំហំ ៤ស៊ីឡាំង មានកម្លាំង ២៦៨សេះ ប្រើប្រអប់លេខអូតូប្រភេទ CVT ហើយក៏មាន Option ប៉ុងពីរដែរ។ វាមានតម្លៃចាប់ពី ៣៧ ២៥០ដុល្លារនៅលើទីផ្សារសហរដ្ឋអាមេរិក ហើយនឹងចេញលក់ក្នុងពេលឆាប់ៗខាងមុខនេះតែម្តង៕

ផ្ទាំងផ្សាយពាណិជ្ជកម្ម

Hyundai Venue ឆ្នាំ ២០២០ ជិះ ១០០គ.ម៉ ស៊ីសាំងតែ ៧លីត្រ

October 3, 2019

ទីភ្នាក់ងារ EPA (Environmental Protection Agency) បានបញ្ចេញតួលេខនៃកម្រិតស៊ីសាំងរបស់រថយន្ត Hyundai Venue ស៊េរីឆ្នាំ ២០២០ ជាផ្លូវការ។

Hyundai Venue បំពាក់ម៉ាស៊ីនសាំងចំណុះ ១,៦លីត្រ ទំហំ ៤ស៊ីឡាំង មានកម្លាំង ១២១សេះ ប្រើប្រអប់លេខ CVT និង ប៉ុងមួយ។ វាមានកម្រិតស៊ីសាំងជាមធ្យមត្រឹមតែ ៧,៣លីត្រប៉ុណ្ណោះ សម្រាប់ការបើកបរចម្ងាយ ១០០គីឡូម៉ែត្រ។

បើប្រៀបធៀបទៅនឹង SUV ខ្នាតតូចដទៃទៀត វាចាញ់ Nissan Kicks តែឈ្នះ Honda HR-V, Hyundai Kona និង Subaru Crosstrek ជាដើម។

Hyundai Venue ឆ្នាំ ២០២០ មានពណ៌លាយគ្នារហូតដល់ទៅ ៣ ជម្រើស ដូចជា ពណ៌ទឹកក្រូច (Lava Orange Dual Tone), ពណ៌ខៀវ (Denom Blue Dual Tone) និង ពណ៌ស (Polar White Dual Tone) ។ ទោះជាយ៉ាងណា Hyundai មិនទាន់បានប្រកាសតម្លៃរបស់វានៅឡើយទេ៕

ផ្ទាំងផ្សាយពាណិជ្ជកម្ម

Hyundai បើកដំណើរការសាខាផលិតរថយន្តហោះ

October 2, 2019

Hyundai បានប្រកាសអំពីការបើកសាខាថ្មីមួយប្រចាំសម្ព័ន្ធ Hyundai Motor Group ដែលមានឈ្មោះថា Urban Air Mobility Division ដែលផ្ដោតសំខាន់លើការអភិវឌ្ឍន៍យានជំនិះហោះហើរលើមេឃ ក្នុងគោលបំណងបញ្ចៀសការកកស្ទះចរាចរណ៍លើដីគោក។

សាខាថ្មីនេះគឺដឹកនាំដោយលោកសាស្ត្រាចារ្យ Jaiwon Shin ដែលជាអតីតអ្នកដឹកនាំផ្នែក Aeronautics Research Mission Directorate នៅភ្នាក់ងារអវកាស NASA។ លោកសាស្ត្រាចារ្យបានលើកឡើងថា ៖ “ក្រុមថ្មីនៅ Hyundai នឹងអភិវឌ្ឍន៍បច្ចេកវិទ្យាស្នូល ដែលនឹងជួយឲ្យក្រុមហ៊ុនក្លាយជាកម្លាំងខ្លាំងក្លាមួយក្នុងវិស័យយានជំនិះលើអាកាស ជាវិស័យមួយដែលរំពឹងថាកើនឡើងទំហំទីផ្សារដល់តម្លៃ ១,៥ ពាន់ពាន់លានដុល្លារ នៅក្នុងរយៈពេល ២០ ឆ្នាំខាងមុខ។”

គួរដឹងថា Hyundai ជាក្រុមហ៊ុនផលិតរថយន្តដំបូងគេ ដែលអភិវឌ្ឍន៍យានជំនិះហោះដោយខ្លួនឯង ចំណែកក្រុមហ៊ុនផ្សេងបានបណ្ដាក់ទុនធំនៅវិស័យនេះ។ តួយ៉ាងដូចជា Toyota បានបណ្ដាក់ទុន ៣៧៥ ០០០ ដុល្លារទៅក្នុងគម្រោងការមួយដែលអភិវឌ្ឍន៍នូវម៉ាស៊ីនហោះសម្រាប់មនុស្សម្នាក់ ហើយក្រុមនេះរំពឹងថានឹងប្រើម៉ាស៊ីននេះដើម្បីអុចភ្លើងចន្លុះនៅព្រឹត្តិការណ៍អូឡាំពិកឆ្នាំ ២០២០ នៅជប៉ុន៕

ផ្ទាំងផ្សាយពាណិជ្ជកម្ម