SUV កៅអី៣ជួរថ្មីសន្លាង Mercedes-AMG GLB 35 ត្រៀមចេញលក់ឆ្នាំក្រោយ

September 11, 2019

Mercedes-AMG បានបញ្ចេញរថយន្ត SUV កៅអី៣ជួរម៉ូដែលថ្មីសន្លាង គឺ GLB 35 ដែលអាចអង្គុយបានច្រើនគ្នា ហើយមានកម្លាំងខ្លាំងទៀតផង។

Mercedes-AMG GLB 35 ប្រើម៉ាស៊ីនសាំងចំណុះ ២,០ លីត្រ Turbocharged ទំហំ ៤ ស៊ីឡាំង កម្លាំង ៣០២ សេះ ដំណើរការជាមួយប្រអប់លេខអូតូ ៨ វគ្គ ប្រភេទ Dual-clutch និង ប្រព័ន្ធបើកបរប៉ុងពីរ AMG Performance 4MATIC AWD។

វាអាចរត់ស្ទុះពីកុងទ័រ ០ ដល់ ១០០ គីឡូម៉ែត្រក្នុងមួយម៉ោងពេល ប្រើពេល ៥,២ វិនាទី ហើយមានល្បឿនអតិបរមាដល់ទៅ ២៥០ គីឡូម៉ែត្រក្នុងមួយម៉ោងណោះ។ GLB 35 បានបំពាក់ប្រព័ន្ធបូម AMG ដែលជួយមិនឱ្យតួខ្លួនញ័រខ្លាំង ហើយដំណើរការកាន់តែប្រសើរនៅលើផ្លូវកោង។

ងាកមកមើលផ្នែកខាងក្នុងវិញ Mercedes-AMG GLB 35 បំពាក់កៅអីប្រភេទ Artico / Dinamica Microfiber Sports Seats រំលេចដោយថ្នេរដេរពណ៌ក្រហមយ៉ាងស្រស់ស្អាត។ លើសពីនេះវាបំពាក់កុងទ័រឌីជីថល , អេក្រង់បង្ហាញព័ត៌មាន-កម្សាន្យ MBUX និង ដៃចង្កូតស្បែកប្រភេទ Nappa Leather ទៀតផង។ វានឹងចេញលក់នៅឆ្នាំ ២០២០ ខាងមុខនេះតែម្តង៕

ផ្ទាំងផ្សាយពាណិជ្ជកម្ម

រថយន្តភីកអាប់អគ្គិសនីរបស់ Tesla នឹងបង្ហាញមុខខែវិច្ឆិកា

September 10, 2019

រថយន្តភីកអាប់របស់ Tesla ដែលលោក Elon Musk រៀបរាប់ថាជា “រថយន្តឡូយជាងគេបំផុតដែលខ្ញុំធ្លាប់ឃើញ” នឹងត្រូវបង្ហាញមុខលឿនបំផុតនៅអំឡុងខែវិច្ឆិកាខាងមុខ។ នេះបើតាមការឆ្លើយតបសាររបស់លោក Elon Musk នៅលើ Twitter។

រថយន្តនេះធ្លាប់លោកនាយកប្រតិបត្តិក្រុមហ៊ុន Tesla បង្ហាញក្ដីរំពឹងថាលេចមុខនៅអំឡុងខែតុលា ប៉ុន្តែដំណឹងថ្មីនេះ មានន័យថាការបង្ហាញមុខត្រូវពន្យារពេល។ ទាក់ទងនឹងរថយន្តភីកអាប់នេះដែរ គេមិនបានដឹងថាវាមានរូបរាងបែបណានៅឡើយទេ។ កន្លងមកមានតែរូបមួយសន្លឹកគត់អំពីរថយន្តនេះ ត្រូវបង្ហាញដោយលោក Elon Musk ប៉ុន្តែមិនច្បាស់ថាវាមានទ្រង់ទ្រាយបែបម៉េចទេ។

រថយន្តភីកអាប់ Tesla នឹងត្រូវប្រឈមនឹងគូប្រជែងខ្លាំងៗមួយចំនួនពេលវាបង្ហាញមុខ។ តួយ៉ាងដូចជារថយន្តអគ្គិសនី Ford F-150, រថយន្ត R1T ពីក្រុមហ៊ុន Rivian និងរថយន្តភីកអាប់អគ្គិសនីដែល Ford គ្រោងចាប់ដៃគូផលិតជាមួយ Volkswagen ជាដើម៕

ផ្ទាំងផ្សាយពាណិជ្ជកម្ម

ចេញតម្លៃហើយ កូនរថយន្តអគ្គិសនីរបស់ Honda តម្លៃចាប់ពីជាង ៣ ម៉ឺនដុល្លារ

September 10, 2019

Honda e ដែលជារថយន្តអគ្គិសនីដំបូងរបស់ Honda ផលិតលក់លើទីផ្សារ បានកំណត់តម្លៃលក់ចាប់ពីប្រមាណ ៣២ ៥០០ ដុល្លារនៅប្រទេសអាល្លឺម៉ង់ និងនៅចក្រភពអង់គ្លេសមានតម្លៃចាប់ពីប្រមាណ ៣២ ២៨០ ដុល្លារ។

រថយន្តនេះបានបង្ហាញមុខក្នុងកម្មវិធី Frankfurt Motor Show ដែលអាចទាក់ទាញចិត្តអតិថិជន ៤ ម៉ឺននាក់ធ្វើការកក់ទិញ ហើយវានឹងចេញពីរោងចក្រដំបូងនៅអំឡុងដើមឆ្នាំ ២០២០។

Honda e មានប្រភេទ Base ប្រើម៉ូទ័រអគ្គិសនីកម្លាំង ១៣៤ សេះ ហើយមានប្រភេទ Advance កម្លាំង ១៥២ សេះ។ ទាំងពីរប្រភេទនេះបានថាមពលពីអាគុយចំណុះ ៣៥,៥ គីឡូវ៉ាត់ម៉ោង ដែលអាចបើកបរបានចម្ងាយ ២២០ គ.ម ពេលសាកពេញ។

Honda e ទ្រាំទ្រនឹងការសាកភ្លើងបានលឿន ដែលមានការអះអាងថាអាចសាកដល់ ៨០% ក្នុងពេលត្រឹម ៣០ នាទី។ លើរថយន្តនេះមានមុខងារទំនើបៗដូចជាប្រើកាមេរ៉ាសម្រាប់មើលចំហៀងជំនួសកញ្ចក់ធម្មតា, ប្រព័ន្ធសំឡេងកម្រិតខ្ពស់ និងមុខងារជំនួយចូលចតជាដើម៕

ផ្ទាំងផ្សាយពាណិជ្ជកម្ម

Ferrari F8 Spider កម្លាំង ៧១០សេះ ចេញមកប្រជែង Lamborghini និង McLaren

September 10, 2019

Ferrari បានបញ្ចេញរថយន្តស្ព័របើកដំបូងម៉ូដែលថ្មីសន្លាង F8 Spider ដើម្បីប្រជែងនឹង Lamborghini Huracan Evo Spyder និង McLaren 720S Spider។

F8 Spider ប្រើម៉ាស៊ីនសាំងចំណុះ ៣,៩ លីត្រ Twin-turbo ទំហំ ៨ ស៊ីឡាំង កម្លាំង ៧១០ សេះ ដំណើរការជាមួយប្រអប់លេខ Dual-clutch ៧ វគ្គ អាចរត់ពីកុងទ័រ ០ ដល់ ១០០ គីឡូម៉ែត្រក្នុងមួយម៉ោង ប្រើពេលត្រឹមតែ ២,៩ វិនាទី ហើយមានល្បឿនអតិបរមា ៣៤០ គីឡូម៉ែត្រក្នុងមួយម៉ោង។

ម៉ាស៊ីន V8 របស់ F8 Spider ធ្លាប់បានឈ្នះពានរង្វាន់ម៉ាស៊ីនប្រចាំឆ្នាំ “International Engine of the Year Award” រយៈពេល ៤ ឆ្នាំ ហើយក៏ត្រូវបានប្រើលើរថយន្តល្បីៗជាច្រើន ដូចជា Ferrari Portofino, Ferrari California T, Ferrari GTC4 Lusso T, Ferrari 488 និង Ferrari F8 Tributo ផងដែរ។

F8 Spider អាចបើកដំបូលបានដោយប្រើរយៈពេល ១៤ វិនាទី និង បិទវិញ ១៤ វិនាទីដូចគ្នា ហើយអាចបើក/បិទពេលកំពុងបើកបរបានក្នុងល្បឿនដល់ ៤៥ គីឡូម៉ែត្រក្នុងមួយម៉ោង៕

ផ្ទាំងផ្សាយពាណិជ្ជកម្ម

Ferrari ចេញឡានបើកដំបូល ម៉ាស៊ីន V12 កម្លាំងខ្លាំងបំផុតលើលោក

September 10, 2019

Ferrari ទើបបានបញ្ចេញរថយន្តស្ព័របើកដំបូលថ្មី ម៉ូដែល 812 GTS ដែលផលិតផ្អែកលើម៉ូដែល 812 Superfast ។

Ferrari 812 GTS ប្រើម៉ាស៊ីនសាំង ចំណុះ ៦,៥ លីត្រ Naturally Aspirated ទំហំ ១២ ស៊ីឡាំង កម្លាំង ៧៨៩ សេះ ជារថយន្តបើកដំបូលកម្លាំងខ្លាំងបំផុតលើពិភពលោក។

រថយន្តស្ព័រអ៊ីតាលី 812 GTS នេះ អាចរត់ពីកុងទ័រ ០ ដល់ ១០០ គីឡូម៉ែត្រក្នុងមួយម៉ោង ប្រើពេលមិនដល់ ៣ វិនាទីឡើយ ហើយមានល្បឿនអតិបរមា ៣៤០ គីឡូម៉ែត្រក្នុងមួយម៉ោងឯណោះ។

812 GTS អាចបើកដំបូលបានដោយប្រើរយៈពេល ១៤ វិនាទី និង បិទវិញ ១៤ វិនាទីដូចគ្នា ហើយអាចបើក/បិទពេលកំពុងបើកបរបានក្នុងល្បឿនដល់ ៤៥ គីឡូម៉ែត្រក្នុងមួយម៉ោង៕

ផ្ទាំងផ្សាយពាណិជ្ជកម្ម

Lexus RC F ប្រភេទ Track Edition មិនមែន Lexus ធម្មតាដូចអ្នកគិតឡើយ!

September 9, 2019

Lexus បានដាក់បង្ហាញរថយន្តស្ព័រ RC F ប្រភេទ Track Edition ថ្មី ស៊េរីឆ្នាំ ២០២០ ជាផ្លូវការ ដោយបំពាក់នូវលក្ខណៈពិសេសជាច្រើន។

Lexus RC F Track Edition បានអាប់ដេតប្រសើរជាងម៉ូដែល RC F ធម្មតា ដូចជា ជួយឲ្យរថយន្តបើកកាត់ខ្យល់ប្រសើរជាងមុន, មានទម្ងន់ស្រាលជាងមុន, ប្រព័ន្ធប៊ូមដំណើរការប្រសើរជាងមុន ហើយរូបរាងដ៏ទាក់ទាញជាងមុន។

RC F Track Edition នៅតែបំពាក់ម៉ាស៊ីនដូច RC F ដដែល គឺ ម៉ាស៊ីនសាំងចំណុះ ៥,០ លីត្រ Naturally Aspirated ទំហំ ៨ ស៊ីឡាំង (V8) កម្លាំង ៤៧២ សេះ ប្រើប្រអប់លេខអូតូ ៨ វគ្គ ជាមួយមុខងារ Launch Controlមកស្តង់ដារ អនុញ្ញាតឲ្យវាស្ទុះពីកុងទ័រ ០ ដល់ ១០០ គីឡូម៉ែត្រក្នុងមួយម៉ោង ប្រើពេលត្រឹមតែ ៣,៩ វិនាទីប៉ុណ្ណោះ ខណៈ RC F ធម្មតាប្រើពេល ៤,២ វិនាទី។

អ្វីដែលធ្វើឲ្យ Lexus RC F Track Edition ពិសេសជាង RC F ធម្មតា ក៏ដោយសារតែ កាងកាត់ខ្យល់ផ្នែកខាងមុខ,ដំបូលម៉ាស៊ីន, ដំបូលរថយន្តទាំងមូល និង កាងកន្ទុយត្រីខាងក្រោយ សុទ្ធតែជា Carbon Fiber។ កន្ទុយត្រីផ្នែកខាងក្រោយនោះទៀតសោធ ជួយឲ្យលំហូរខ្យល់រត់បានល្អប្រសើរជាងមុនទៀតផង។

ក្រៅពីនោះ Lexus RC F Track Edition បំពាក់បំពង់ស៊ីម៉ាំង ៤, ហ្វ្រាំង Brembo Carbon Ceramic និង យ៉ាន់អាលុយមីញ៉ូមទម្ងន់ស្រាល ប្រភេទ BBS ទំហំ ១៩ អ៊ីញ។ រថយន្តស្ព័ររបស់ជប៉ុននេះមានតែ ២ ពណ៌ប៉ុណ្ណោះ គឺ ពណ៌ស (Ultra White) និង ពណ៌ប្រផេះ (Matte Nebula Gray) ជាមួយតម្លៃ ៩៦ ៦៥០ ដុល្លារលើទីផ្សារសហរដ្ឋអាមេរិក៕

ផ្ទាំងផ្សាយពាណិជ្ជកម្ម

Rolls-Royce ថែមបុគ្គលិក ២០០នាក់ ព្រោះលក់ SUV ដាច់ពេក

September 9, 2019

បន្ទាប់ពីបានបង្ហាញរថយន្ត SUV ដំបូងបង្អស់របស់ខ្លួន Rolls-Royce ទទួលបានការបញ្ជាទិញជាច្រើន រហូតសឹងតែផលិតមិនទាន់។

ចំនួននៃការលក់ និងបោះទៅឲ្យឈ្មួញកាន់តែច្រើនឡើងៗ រហូតធ្វើឲ្យក្រុមហ៊ុនរថយន្តអង់គ្លេសខាងលើ សម្រេចចិត្តបន្ថែមបុគ្គលិករហូតដល់ទៅ ២០០ នាក់ទៀត សរុប ២ ពាន់នាក់ នៅក្នុងឆ្នាំ ២០១៩ នេះ ។

បើយោងតាម Automotive News បានឲ្យដឹងថា តម្រូវការ Rolls-Royce Cullinan បានកើនឡើងយ៉ាងច្រើន រហូតដល់ចំនួននៃការបញ្ជាទិញ ត្រូវរំកិលទៅខែក្រោយៗទៀត។

យ៉ាងណាមិញ Rolls-Royce បានបង្ហាញថា អតិថិជនដែលទិញ Cullinan ភាគច្រើនជាមនុស្សស្រីវ័យក្មេង ខុសពី Rolls-Royce ដទៃទៀត ដែលភាគច្រើនជាមនុស្សវ័យចំណាស់ជិះ។

នាយកប្រតិបត្តិក្រុមហ៊ុន Rolls-Royce Motor Cars Americas លោក Martin Fritsches បានប្រាប់ Automotive News ថា “អតិថិជនជាច្រើនដែលធ្លាប់បានបើក Rolls-Royce Dawn ឬ Phantom គឺទិញ Cullinan យកទៅប្រើបន្ថែម”៕

ផ្ទាំងផ្សាយពាណិជ្ជកម្ម

ជប៉ុននឹងសាកល្បងរថយន្តបើកបរស្វ័យប្រវត្តិ អំឡុងព្រឹត្តិការណ៍អូឡាំពិក ២០២០

September 9, 2019

លោក Seigo Kuzumaki ថ្នាក់ដឹកនាំនៃគម្រោងការរថយន្តបើកបរដោយខ្លួនឯងរបស់រដ្ឋាភិបាលជប៉ុន បានប្រាប់ដល់ Bloomberg ថានឹងសាកល្បងដាក់ឲ្យរត់នូវរថយន្តបើកបរដោយខ្លួនឯងជុំវិញទីតាំងប្រកួត មុនព្រឹត្តិការណ៍អូឡាំពិក ២០២០ ប៉ុន្មានសប្ដាហ៍ និងអំឡុងពេលព្រឹត្តិការណ៍ផងដែរ។

រដ្ឋាភិបាលមានគម្រោងនឹងដាក់រថយន្តបើកបរដោយខ្លួនឯងប្រមាណ ១០០ គ្រឿង ឲ្យបំពេញសេវាកម្មនៅចាប់ពីថ្ងៃទី ៦ ខែកក្កដា ឆ្នាំ ២០២០។ រថយន្តនឹងត្រូវផ្គត់ផ្គង់ដោយ Toyota, Nissan និងក្រុមហ៊ុនផ្គត់ផ្គង់គ្រឿងបន្លាស់យានយន្ត។ ក្នុងអំឡុងពេលនោះ រថយន្តនឹងបើកបរទៅមុខដោយសេរីក្នុងតំបន់ក្បែរទីតាំងរៀបចំព្រឹត្តិការណ៍។

អំឡុងការប្រកួតនេះដែរ Toyota ផ្ទាល់ គ្រោងនឹងដាក់ដំណើរការសាកល្បងរថយន្តក្រុងស្វ័យប្រវត្តិគ្មានមនុស្សបើករបស់ខ្លួនម៉ូដែល e-Palette ដើម្បីជាការដឹកជញ្ជូនអត្តពលិក និងមន្ត្រីរៀបចំកម្មវិធីផងដែរ។

ការសាកល្បងរថយន្តស្វ័យប្រវត្តិនេះគឺជាផ្នែកមួយនៃការជំរុញរដ្ឋាភិបាលជប៉ុន ដែលចង់ឲ្យមានរថយន្តបើកបរស្វ័យប្រវត្តិលក់លើទីផ្សារនៅត្រឹមឆ្នាំ ២០២៥៕

ផ្ទាំងផ្សាយពាណិជ្ជកម្ម

Bugatti បង្ហាញចេញជាផ្លូវការ Chiron ស៊េរីថ្មី តម្លៃ ៣,៩ លានដុល្លារផលិតត្រឹម ៣០ គ្រឿង

September 9, 2019

ក្រុមហ៊ុន Bugatti បានបង្ហាញចេញជាផ្លូវការនូវរថយន្តស៊េរីថ្មីរបស់ខ្លួន ម៉ូដែល Bugatti Chiron Super Sport 300+ ដែលវាជាប្រភេទផលិតផលចុងក្រោយនៃ រថយន្ត Bugatti គំរូ (Prototype) ដែលបានបំបែករនាំងល្បឿន ៣០០ ម៉ាយ/ម៉ (៤៨២ គ.ម/ម៉) កាលពីពេលថ្មីៗកន្លងទៅ។

ប្រភេទដែលជាផលិតផលចុងក្រោយសម្រាប់លក់លើទីផ្សារនេះ មានរូបរាងដូចគ្នានឹងប្រភេទផលិតគំរូដែរ ហើយមានស្បែកសរសៃកាបូនពណ៌ទឹកក្រូចលេចដូចគ្នាទៀតផង។ រថយន្ត Chiron Super Sport 300+ ដំណើរការដោយម៉ាស៊ីន Quad-Turbo ១៦ ស៊ីឡាំង ចំណុះ ៨,០ លីត្រ កម្លាំង ១៥៧៨ សេះ ដូចនឹងប្រភេទផលិតផលគំរូដែរ។ រថយន្តនេះនឹងផលិតលក់ត្រឹម ៣០ គ្រឿង ជាមួយតម្លៃចាប់ពីប្រមាណ ៣,៩ លានដុល្លារ។

បើតាមការចុះផ្សាយរបស់ Top Gear បានឲ្យដឹងថា Chiron Super Sport 300+ នឹងមានមកជាមួយនូវប្រព័ន្ធអេឡិចត្រូនិកកំណត់ល្បឿន ប៉ុន្តែ Bugatti មិនទាន់សម្រេចថាកំណត់ល្បឿនរថយន្តនៅត្រឹមប៉ុន្មាននោះទេ។ បន្ថែមពីនេះមានការលើកឡើងថា អ្នកទិញរថយន្តនេះ អាចមានឱកាសសាកល្បឿនរថយន្តនៅទីលានសាកល្បង Ehra-Lessien របស់ Volkswagen ផងដែរ៕

ផ្ទាំងផ្សាយពាណិជ្ជកម្ម

Lamborghini Sián រថយន្តស្ព័រដំបូងបង្អស់ដែលមានបំពាក់នូវម៉ាស៊ីនហ៊ាយប្រ៊ីតកំរិត V12

September 8, 2019

រថយន្ត Lamborghini Sián ជារថយន្តស្ព័រដំបូងបង្អស់ដែលមានបំពាក់នូវម៉ាស៊ីនដ៏មានថាមពល Supercapacitor-Based កម្រឹតហ៊ាយប្រ៊ីត V12 ប្រអប់លេខ ៧វគ្គ ផ្តល់នូវកំលាំងខ្លាំងបើទោះជាប្រភេទហ៊ាយប្រ៊ីតយ៉ាងណាក៏ដោយ រថយន្តនេះអាចរត់ល្បឿនរហូតដល់ទៅ ៣៥០គ.ម៉/ម៉ោង ត្រឹមតែ ២,៨ វិនាទីរថយន្តនេះអាចមានល្បឿន១០០ គ.ម៉ ផងដែរ។

រថយន្តនេះត្រូវបានរំលេចជាមួយថាសកង់ផ្នែកខាងមុខទំហំ ២០អុីញ និងខាងក្រោយ ២១អុីញ ដែលសាកសមជារថយន្តបែបស្ព័រពិតៗ។

ចំណែកផ្នែកខាងក្នុងវិញគឺត្រូវបានរចនាជាដោយកំពូលអ្នកជំនាញរបស់ប្រទេសអុីតាលី ដើម្បីធានាបាននូវផាសុកភាព ផ្សារភ្ជាប់ជាមួយការរចនាជារាងអក្សរ Y បំផុសនូវភាពល្អឥតខ្ចោះគ្មានគូរប្រៀប។