ក្រុមហ៊ុនអាល្លឺម៉ង់ Porsche បានបញ្ចេញរថយន្តអគ្គិសនីទ្វារបួនរបស់ខ្លួនជាផ្លូវការ ដែលជាម៉ូដែល Porsche Taycan មានកំណត់តម្លៃចាប់ពីជាង ១៥ ម៉ឺនដុល្លារឡើងទៅ។
រថយន្តអគ្គិសនីនេះមានរចនាបថមិនសូវខុសប្លែកខ្លាំងពីរចនាបថរថយន្ត Porsche ដែលចេញនាពេលកន្លងមកនោះទេ។ នៅផ្នែកខាងក្នុងរថយន្តនេះមានបំពាក់ដោយបច្ចេកវិទ្យាទំនើបៗជាច្រើន តួយ៉ាងមានអេក្រង់កម្សាន្តទំហំ ១០,៩ អ៊ីញ ហើយមានជម្រើសបន្ថែមអេក្រង់ឲ្យអ្នកដំណើរផងដែរប្រសិនត្រូវការ។ រថយន្តនេះអាចបញ្ជាមុខងារដោយសំឡេង ដោយគ្រាន់តែនិយាយពាក្យ “Hey Porsche”។
Porsche Taycan មានចែកចេញជាពីរប្រភេទគឺ Turbo និង Turbo S។ Turbo មានម៉ូទ័រដែលផ្ដល់កម្លាំងបាន ៦៧១ សេះ អាចស្ទុះដល់ ០-៩៦ គ.ម/ម៉ ក្នុងពេល ៣ វិនាទី ខណៈ Turbo S មានកម្លាំងដល់ ៧៥០ សេះ ប្រើពេល ២,៦ វិនាទីដើម្បីស្ទុះដល់ ៩៦ គ.ម/ម៉។ រថយន្តទាំងពីរមានល្បឿនអតិបរមា ២៦០ គ.ម/ម៉ ដូចគ្នា។
និយាយអំពីថាមពលអាគុយវិញគឺមាន ៩៣,៤ គីឡូវ៉ាត់ម៉ោង ដែលចំណាយពេលតែ ២២ នាទីកន្លះ សាកបានដល់ ៨០%។ ចំពោះប្រភេទ Turbo អាចបើកបរបានចម្ងាយ ៤៥០ គ.ម ឯ Turbo S បើកបរបាន ៤១២ គ.ម ពេលសាកបំពេញម្ដង។
រថយន្ត Taycan Turbo មានតម្លៃ ១៥៣ ៣១០ ដុល្លារ ចំណែក Taycan Turbo S វិញមានតម្លៃរហូតដល់ ១៨៧ ៦១០ ដុល្លារ៕
