ផ្ទាំងផ្សាយពាណិជ្ជកម្ម
Facebook Youtube
ទំព័រដើម កំណត់​ហេតុ​បណ្ដាញ ទំព័រ 1052

Mercedes-Benz CLS ឆ្នាំ ២០១៩ លក់នៅថៃ ថ្លៃប្រហែល Lexus NX នៅខ្មែរ

នាពេលថ្មីៗនេះ ក្រុមហ៊ុន Mercedes-Benz Thailand បានបញ្ចេញតម្លៃលក់នៃរថយន្ត CLS ស៊េរីថ្មីចុងក្រោយបង្អស់ ដែលផលិតក្នុងប្រទេសថៃផ្ទាល់តែម្តង។

CLS ឆ្នាំ២០១៩ មាន​ការ​រចនា និង​រូបរាង​ទាក់ទាញ។ វា​បាន​ប្រើ​មូលដ្ឋាន​រូបរាង​របស់ Mercedes E-Class ស៊េរី​ថ្មី ហើយ​មាន​លក្ខណៈ​ប្រហាក់ប្រហែល​គ្នា​ជា​ច្រើន ដូច​ជា ប៉ាណា​ខាង​មុខ​ជា​ដើម ខណៈ​ដែល​កាង​ខាង​មុខ ហាក់​បី​ដូច​ជា​បាន​រចនា​ឡើង​ថ្មី តាម​ម៉ូដែល AMG GT R។

ដោយឡែកផ្នែក​ខាង​ក្រោយ វា​បាន​រចនា​រូបរាង​ចង្កៀង​ថ្មី ដែល​មើល​ទៅ​សាកសម និង​ស៊ី​គ្នា​ជាមួយ​ផ្នែក​ខាង​ក្រោយ​នៃ​រថយន្ត។

CLS 300d ប្រើម៉ាស៊ីនម៉ាស៊ូតចំណុះ ២,០ លីត្រ Turbo ទំហំ ៤ ស៊ីឡាំង កម្លាំង ២៤៥ សេះ ដំណើរការជាមួយប្រអប់លេខអូតូ ៩ វគ្គ មានតម្លៃចាប់ពី ២,២៨ លានបាត ឬ ៦៩ ២០០ ដុល្លារ។

ផ្នែក​ខាង​ក្នុង​ CLS ប្រើប្រាស់​តាប្លូ និង​រន្ធ​ខ្យល់​ម៉ាស៊ីន​ត្រជាក់​ពី​ម៉ូដែល E-Class លោត​ពណ៌​ខៀវ ឬ​ក្រហម ទៅ​តាម​សីតុណ្ហភាព​នៅ​ក្នុង​រថយន្ត។ វាក៏​ខ្ចី​ចង្កូត​ពី​ម៉ូដែល S-Class ដែល​មើល​ទៅ​ពិត​ជា​ស្រស់​ស្អាត​មែន​ទែន។ ក្រៅ​ពី​នេះ វា​​បាន​​បំពាក់​នូវ​អេក្រង់​ទ្រវែង Ultra-wide Screen ទៀត​ផង។

Mercedes-Benz CLS គឺជាគូប្រជែងរបស់រថយន្ត Audi A7 Sportback និង BMW 6 Series Gran Turismo៕

ផ្ទាំងផ្សាយពាណិជ្ជកម្ម

គ្រាន់​ម៉ាស៊ីន Ferrari ១២ ស៊ីឡាំង មានគេលក់តម្លៃដល់ ៣៧ ម៉ឺនដុល្លារ

ម៉ាស៊ីន​រថយន្ត​ Ferrari ១២ ស៊ីឡាំង​ដែល​ប្រើ​លើ​រថយន្ត​ Formula 1 ត្រូវ​គេ​ប្រទះ​ឃើញ​ដាក់​លក់​លើ​វិបសាយ​លក់​ទំនិញ​អនឡាញ eBay ជា​មួយ​តម្លៃ​រហូត​ដល់ ៣៧៥ ០០០ ដុល្លារ​ឯណោះ (មិន​ទាន់​មាន​អ្នក​ទិញ​នៅ​ឡើយ​ទេ)។

អ្នក​លក់​បាន​អះអាង​ថា​ម៉ាស៊ីន​គឺ​មាន​ម៉ូដែល Tipo 044/1។ ដែល​នេះ​មាន​ន័យ​ថា​វា​ផលិត​ឡើង​សម្រាប់​ការ​ប្រណាំង​រថយន្ត​ Formula 1 រដូវ​កាល​ឆ្នាំ ១៩៩៥ មាន​ចំណុះ ៣,០ លីត្រ ដែល​មាន​ទម្ងន់​ប្រមាណ ១៣២ គីឡូក្រាម​ឯណោះ។ ម៉ាស៊ីន​នេះ​មាន​អាយុ​កាល​ប្រមាណ ២៥ ឆ្នាំ ប៉ុន្តែ​វា​អាច​ផលិត​កម្លាំង​បាន ៧៦០ សេះ។

អ្នក​ដែល​ដាក់​លក់​មិន​បាន​ប្រាប់​អំពី​ស្ថានភាព​លម្អិត​របស់​ម៉ាស៊ីន ដូច​ជា​ថា​វា​ត្រូវ​​ប្រើ​ក្នុង​ការ​ប្រកួត​ណា​មួយ​ក្នុង​រដូវ​កាល​ឆ្នាំ ១៩៩៥ នោះ​ទេ។ រូបភាព​ដែល​បង្ហាញ​ធ្វើ​ឲ្យ​គេ​យល់​ថា​ម៉ាស៊ីន​នេះ​គេ​​ទើប​កែ​លម្អ​ថ្មីៗ​នេះ​ឯង៕​

ផ្ទាំងផ្សាយពាណិជ្ជកម្ម

តម្លៃ​រថយន្ត Rolls-Royce លក់នៅវៀតណាម សុទ្ធតែខ្ទង់ ១ លានដុល្លារឡើង

កាល​ពី​ថ្ងៃ​ទី ២៧ សីហា ក្រុមហ៊ុន​លក់​រថយន្ត Rolls-Royce ផ្លូវ​ការ​នៅ​វៀតណាម បាន​បង្ហាញ​តម្លៃ​លក់​រថយន្ត​ Rolls-Royce គ្រប់​ម៉ូដែល​ដែល​កំពុង​ដាក់​លក់​នៅ​វៀតណាម។

Rolls-Royce Cullinan

គេ​អាច​ឃើញ​ថា​រថយន្ត​ Rolls-Royce លក់​នៅ​វៀតណាម​ មាន​ ១០ ប្រភេទ​ខុសៗ​គ្នា ដោយ​តម្លៃ​ទាប​ជាង​គេ​បំផុត​គឺ​ម៉ូដែល Rolls-Royce Ghost ដែល​មាន​តម្លៃ​ប្រមាណ​ ១,៣ លាន​ដុល្លារ។ ចំណែក​​ប្រភេទ​ថ្លៃ​ជាង​គេ​គឺ Rolls-Royce Phantom EWB ដែល​មាន​តម្លៃ​រហូត​ដល់ ២,៣ លាន​ដុល្លារ។

តម្លៃ​ដែល​ក្រុមហ៊ុន​បាន​បង្ហាញ​គឺ​សម្រាប់​ប្រភេទ​ស្តង់ដារ ដោយ​មិន​មាន​បញ្ចូល​នូវ​ Option ពិសេស​អ្វីៗ​នោះ​ទេ។ ប្រសិន​បើ​អតិថិជន​ចង់​បាន​ Option ពិសេសៗ​លើ​រថយន្ត​ប្រភេទ​ណា​មួយ ត្រូវ​ចំណាយ​លុយ​បន្ថែម​តាម​ Option ដែល​បាន​រើស៕

ផ្ទាំងផ្សាយពាណិជ្ជកម្ម

តើគួរប្តូរស្បែកហ្វ្រាំងនៅពេលណា?

ជាធម្មតាបើយើងពិភាក្សាគ្នាទាក់ទងនិងរថយន្ត ភាគច្រើនយើងតែងតែគិតដល់មុនគេទាក់ទងនឹងកម្លាំងម៉ាស៊ីន បច្ចេកវិទ្យា ឬក៏កំរិតនៃការស៊ីប្រេងជាដើម។ តែយើងពុំសូវបានគិតនោះទេ ថាតើរថយន្តយើងអាចឈប់បានល្អកំរិតណាបើសិនមានឧបសគ្គនៅខាងមុខ?

ថ្ងៃនេះយើងខ្ញុំសូមលើកយកផ្នែកសំខាន់មួយ នៃប្រព័ន្ធហ្រ្វាំងដែលតែងតែជួយរក្សាសុវត្ថិភាពរបស់លោកអ្នកមកស្រាយបំភ្លឺ នោះគឺស្បែកហ្វ្រាំង។​ ស្បែកហ្រ្វាំងជាចំនែកមួយសំខាន់ក្នុងការកំណត់ចម្ងាយនៃការបញ្ឈប់រថយន្ត ហើយការដែលប្រើប្រាស់ស្បែកហ្វ្រាំងសឹកខ្លាំង ឬស្បែកហ្វ្រាំងមិនសុទ្ធ មិនត្រឹមតែប៉ះពាល់ដល់គុណភាពនៃការចាប់ហ្វ្រាំងនោះទេ​ វាថែមទាំងបណ្តាលអោយសឹក ឬខូច Brake Rotor Disc (តាំបួ) ដែលនាំអោយលោកអ្នកត្រូវចំនាយច្រើនជាងមុនក្នុងការជួសជុលប្រព័ន្ធហ្វ្រាំង។

I. សញ្ញាណមួយចំនួនបញ្ជាក់ថា ស្បែកហ្វ្រាំងរថយន្ត អាចមានបញ្ហា/ដល់ពេលប្តូរស្បែកហ្វ្រាំង៖ ​​​​
១. លោតសញ្ញា Brake Warning Light

២. លឺសំលេងខុសធម្មតាពេលជាន់ហ្វ្រាំង
៣. ញ័រឈ្នាន់ហ្វ្រាំងខុសធម្មតាពេលជាន់ហ្វ្រាំងម្តងៗ
៤. រថយន្តរ៉េទៅឆ្វេង ឬទៅស្តាំ ពេលជាន់ហ្វ្រាំងឈប់

II. កម្រាស់នៃស្បែកហ្រ្វាំងចែកជា៣កំរិត (ស្បែកហ្វ្រាំងថ្មីមានកម្រាស់ប្រហែល ១១-១២មីលីម៉ែត្រ) ៖

១. កម្រាស់ចាប់ពី ៧ – ១២ មីលីម៉ែត្រ ៖ ស្ថិតក្នុងសភាពល្អ អាចប្រើប្រាស់បាន
២. កម្រាស់ចាប់ពី ៣ – ៦ មីលីម៉ែត្រ ៖ ស្ថិតក្នុងសភាពមធ្យម ជិតដល់ពេលផ្លាស់ប្តូរ ឬគួរផ្លាស់ប្តូរមុនពេល ធ្វើដំណើរផ្លូវឆ្ងាយ
៣. កម្រាស់ចាប់ពី ០ – ២ មីលីម៉ែត្រ ៖ ស្ថិតក្នុងសភាពមិនល្អ ត្រូវធ្វើការផ្លាស់ប្តូរ ដើម្បីជៀសវាងបញ្ហានានាដោយយថាហេតុណាមួយ

កំណត់សំគាល់! លោកអ្នក មិនត្រូវថែមប្រេងហ្វ្រាំងដោយខ្លួនឯងនោះទេ​ បើសិនរថយន្តមិនមានការលេចជ្រាបប្រេងហ្រ្វាំង។
ប្រសិនបើលោកអ្នកមានភាពស្រពិចស្រពិលឬជួបបញ្ហាណាមួយដូចដែលបានលើកឡើងខាងលើ លោកអ្នកក៏អាចទំនាក់ទំនងមកយើងខ្ញុំ តាមរយៈ ០១៧ ២២២​ ៨៥៧ ដើម្បីសាក់សួរបន្ថែមផងដែរ។ ក្រុមហ៊ុន តូយ៉ូតា (ខេមបូឌា) តែងតែនាំចូលនៅស្បែកហ្វ្រាំង ក៏ដូចជាគ្រឿងបន្លាស់សុទ្ធ១០០% ពីរោងចក្រ តូយ៉ូតា (ជប៉ុន) ដែលផលិតមកតម្រូវតាមប្រភេទរថយន្តនីមួយៗ ហើយព្រមទាំងប្រើនូវវត្ថុធាតុដើមពិសេសដែលកាត់បន្ថយសំណឹកនៃ Brake Rotor Disc និងមានសម្ថភាពខ្ពស់ក្នុងការបញ្ឈប់រថយន្តទាន់ពេលវេលា។

ហើយកាន់តែពិសេសជាងនេះគឺ លោកអ្នកនឹងទទួលបានការពិនិត្យប្រព័ន្ធហ្វ្រាំង ក៏ដូចជាចំនុចសុវត្ថិភាពដទៃទៀត ដោយឥតគិតថ្លៃ រាល់ពេលដែលលោកអ្នកនាំយករថយន្តមកប្តូរប្រេងនៅយានដ្ឋានយើងខ្ញុំ។ បន្ទាប់ពីពិនិត្យរួចរាល់ អ្នកបច្ចេកទេសយើងនឹងធ្វើការពន្យល់លោកអ្នកអំពីកំរិតនៃស្បែកហ្វ្រាំងរថយន្ត ក៏ដូចជាចំនុចសុវត្ថិភាពផ្សេងៗទៀតផងដែរ។

ក្រុមហ៊ុនយើងខ្ញុំមានទទួលសេវាកម្មសម្រាប់គ្រប់ម៉ូដែល & ស៊េរីទាំងអស់នៃរថយន្ត TOYOTA & LEXUS។ ហើយយើងខ្ញុំតែងតែផ្តល់ជូននូវសេវាកម្មប្រកបដោយទំនុកចិត្តជាច្រើន រួមមាន៖
? សេវាកម្មថែទាំរថយន្ត (ប្តូរប្រេងម៉ាស៊ីន)
? សេវាកម្មជួសជុលទូទៅ
? សេវាកម្មតោន និងបាញ់ថ្នាំ
គ្រប់សេវាកម្មទាំងអស់របស់យើងគឺធានាជូននូវគុណភាពព្រមជាមួយគ្រឿងបន្លាស់សុទ្ធ100% ពីរោងចក្រតូយ៉ូតា។
☎ សូមទំនាក់ទំនងមកយើងខ្ញុំសម្រាប់ព័ត៌មានបន្ថែម 017 222 857 / 017 333 719
សូមអរគុណ

ផ្ទាំងផ្សាយពាណិជ្ជកម្ម

BMW បង្ហាញរថយន្តពិសេស គ្រាប់កាំភ្លើង​បាញ់​មិន​ធ្លុះ

BMW បាន​បង្ហាញ​ចេញ​នូវ​រថយន្ត​ពិសេស​​ម៉ូដែល X5 Protection VR6 ដែល​​វា​មាន​សមត្ថភាព​អាច​​ធន់​នឹង​គ្រាប់​កាំភ្លើង 7.62×39-mm របស់​កាំភ្លើង AK-47 ហើយ​វា​អាច​ទ្រាំទ្រ​នឹង​ការ​បំផ្ទុះ​ពី​គ្រាប់​បែក TNT ទម្ងន់​ ១៥ គីឡូក្រាម​ ដែល​ស្ថិត​នៅ​ចម្ងាយ ៤ ម៉ែត្រ​ពី​រថយន្ត​បាន​ទៀត​ផង។

ដើម្បី​បង្កើត​នូវ​​សមត្ថភាព​ការពារ​នេះ BMW បាន​បំពាក់​លើ​ X5 នូវ​បន្ទះ​ដែក​ដ៏​រឹង​មាំ​ក្នុង​ទ្វា​រថយន្ត, គ្រោង​ឆ្អឹង​ផ្នែក​ចំហៀងៗ, ដំបូល និង​មាន​ការ​ប្រើ​ប្រាស់​អាលុយមីញ៉ូម​ការពារ​ផ្នែក​ខាង​ក្រោម និង​ផ្នែក​ខាង​ក្រោយ​ផង​ដែរ។

កញ្ចក់​​មុខ កញ្ចក់​ទ្វារ​ និង​កញ្ចក់​ខាង​ក្រោយ​របស់​រថយន្ត​មាន​កម្រាស់​ ៣០ ម.ម។ វា​អាច​ទ្រាំទ្រ​នឹង​ការ​​កម្លាំង​ប៉ះ​ទង្គិច​ពី​សំណាក់​អាវុធ​ដៃ​បាន។ អតិថិជន​មាន​ជម្រើស​បន្ថែម​សមត្ថភាព​ការពារ​ឲ្យ​ខ្លាំង​ជាង​មុខ។ ដូច​ជា​​ការ​ពាស​ដែក​ផ្នែក​ខាង​ក្រោម​ដើម្បី​ធន់​នឹង​ការ​បំផ្ទុះ​ពី​គ្រាប់​បែក​ដៃ។ ប្រសិន​បារម្ភ​ពី​ដ្រូន ក៏​មាន​ជម្រើស​ដំបូល​ពាស​ដែក​ ដែល​អាច​ធន់​នឹង​កម្លាំង​បំផ្ទុះ ២០០ ក្រាម​របស់​គ្រាប់​បែក C4។

ក្រៅ​ពី​មាន​​សមត្ថភាព​ការពារ​ខ្ពស់​ រថយន្ត​នេះ​ក៏​មាន​បំពាក់​នូវ​ម៉ាស៊ីន Twin-Turbo ចំណុះ ៤,៤ លីត្រ ៨ ស៊ីឡាំង កម្លាំង ៥២៣ សេះ ដែល​អាច​រត់​បាន​ដល់​ល្បឿន ២១០ គ.ម/ម៉។ ការ​ប្រកាស​របស់ BMW មិន​បាន​ប្រាប់​អំពី​តម្លៃ និង​កាល​បរិច្ឆេទ​ចេញ​លក់​រថយន្ត​នេះ​ទេ ប៉ុន្តែ​ប៉ាន់​ស្មាន​ថា​មាន​តម្លៃ​មិន​ក្រោម​ខ្ទង់​សែន​ដុល្លារ​នោះ​ទេ៕​​​

ផ្ទាំងផ្សាយពាណិជ្ជកម្ម

រថយន្តលោកពូទីន ចាប់ផ្ដើមលក់លើទីផ្សារតម្លៃចាប់ពី ២៧៤ ០០០ ដុល្លារ

កាល​ពី​ពេល​ថ្មីៗ​កន្លង​ទៅ​នេះ ហាង​លក់​រថយន្ត​ដំបូង​របស់​ម៉ាក​រថយន្ត​រុស្ស៊ី Aurus បាន​​បើក​សម្ពោធ​ជា​ផ្លូវ​ការ ដំណាល​គ្នា​នឹង​ការ​ចាប់​ផ្ដើម​លក់​រថយន្ត​ប្រណីត​របស់​ខ្លួន​លើ​ទីផ្សារ​ផង​ដែរ។

Aurus គឺ​​ម៉ាក​រថយន្ត​ដែល​លោក​ពូទីន ប្រធានាធិបតី​រុស្ស៊ី​ប្រើ​ប្រាស់​នា​ពេល​បច្ចុប្បន្ន​នេះ ដោយ​វា​បាន​បង្ហាញ​មុខ​លើក​ដំបូង​កាល​ពី​ពាក់​កណ្ដាល​ឆ្នាំ ២០១៨ ក្នុង​ថ្ងៃ​ឡើង​កាន់​តំណែង​របស់​លោក​ ពូទីន។ រថយន្ត​នេះ​ត្រូវ​បាន​គេ​ឲ្យ​ឈ្មោះ​ថា “រថយន្ត​ពូទីន”។

រថយន្តលោកពូទីន

រថយន្ត​ដែល​ក្រុមហ៊ុន​​ Aurus បាន​ដាក់​តាំង​បង្ហាញ​នៅ​ហាង​លក់​ទី​មួយ​របស់​ខ្លួន គឺ​ជា​ម៉ូដែល Senat Sedan ដែល​វា​មាន​តម្លៃ​ចាប់​ផ្ដើម​ពី ២៧៤ ០០០ ដុល្លារ។ Senat Sedan មាន​រូបរាង​ដូច​គ្នា​នឹង​រថយន្ត​របស់​លោក​ពូទីន ប៉ុន្តែ​វា​មាន​ប្រវែង​ខ្លី​ជាង និង​មិន​មាន​សមត្ថភាព​ការពារ​គ្រាប់​នោះ​ទេ។

ក្រុមហ៊ុន​ Aurus នឹង​បន្ត​បញ្ចេញ​លក់​រថយន្ត​ច្រើន​ប្រភេទ​ទៀត ដោយ​នៅ​ចន្លោះ​ឆ្នាំ ២០២៤ ទៅ ២០២៥ ខាង​មុខ​គេ​រំពឹង​ថា​នឹង​មាន​វត្តមាន​រថយន្ត​អគ្គិសនី​ Hybrid ដំបូង​របស់​ក្រុមហ៊ុន​រុស្ស៊ី​នេះ៕

ផ្ទាំងផ្សាយពាណិជ្ជកម្ម

Toyota Corolla GR Sport និង Corolla Trek រចនាអេមកប់

Toyota ទើប​តែ​បានបញ្ចេញ​រថយន្ត Corolla ​ចំនួន ២ ម៉ូដែល​ថ្មីគឺ Corolla GR Sport និង Corolla Trek។

Corolla GR Sport ដ៏​ថ្មី​សន្លាង​នេះ​ មាន​ជម្រើស​តួ​ខ្លួន​ចំនួន ២ ប្រភេទ គឺ គូទ​ហើម (Hatchback) និង តួ​វែង (Touring Sports)។ វាផ្តល់​ជម្រើស​ម៉ាស៊ីន​ចំនួន ២ ដែរ គឺ ចំណុះ ១,៨ លីត្រ និង ២,០ លីត្រ ដែលដំណើរការជាមួយប្រព័ន្ធ Hybrid។

Corolla GR Sport បាន​ប៉ាណាពណ៌​ខ្មៅ​រលោង, កាង​កាត់​ខ្យល់​ផ្នែក​ខាង​មុខ ចំហៀង និង​ក្រោយ​។ តួ​ខ្លួន​ខាង​ក្រៅ​របស់​វា​មាន​ពណ៌​ប្រផេះ (Dynamic Grey) អម​ជាមួយ​យ៉ាន់​អាលុយមីញ៉ូម ទំហំ ១៨ អ៊ីញ យ៉ាង​ស្រស់​ស្អាត, ចង្កៀង​មុខ LED, អំពូល​កាត់​អ័ព្ទ និង​ចង្កៀង​ក្រោយយ៉ាង​ទាក់​ទាញ។

ដោយឡែក Corolla Trek វិញ មាន​តួ​ខ្លួន​តែ​មួយ​ប្រភេទ​ប៉ុណ្ណោះ គឺ តួ​វែង (Estate) ហើយ​ប្រើ​ម៉ាស៊ីន​ដូច Corolla GR Sport ដែរ។ Corolla Trek បាន​ដំឡើង​កម្ពស់​ឈរ​ផុត​ពី​ដី ២០ មីល្លីម៉ែត្រ ជាមួយ​នឹង​រូបរាង​ស្រដៀង​រថយន្ត​ប្រភេទ Crossover ទាំង​ផ្នែក​ខាង​មុខ និង​ខាង​ក្រោយ, យ៉ាន់​អាលុយមីញ៉ូម ទំហំ ១៧ អ៊ីញ, ចង្កៀង​មុខ LED, អំពូល​កាត់​អ័ព្ទ និង​កញ្ចក់​ផ្នែក​ខាង​ក្រោយ​ពណ៌​ខ្មៅ៕

ផ្ទាំងផ្សាយពាណិជ្ជកម្ម

ការសិក្សាថ្មី៖ ឡានបើកស្វ័យប្រវត្តិសម្បូរ តែមនុស្សមិនច្រើនទេ ហ៊ានប្រថុយជិះ

បច្ចុប្បន្ន​ មាន​ការ​ជជែក​ជា​ច្រើន​អំពី​រឿងរ៉ាវ​ដែល​មនុស្ស​ ​នឹង​ងាកទៅប្រើ​រថយន្ត​បើកបរ​​ស្វ័យប្រវត្តិ​នា​ពេល​អនាគត  ប៉ុន្តែ​ការ​សិក្សា​ថ្មី​មួយ ហាក់​មិន​គាំទ្រ​ចំពោះ​ការ​អះអាង​នេះ​ឡើយ។

ការ​ស្ទង់​មតិ​មួយ​របស់​សមាគម​រថយន្ត​អាមេរិក American Automobile Association បាន​ឲ្យ​ដឹង​ថា ៧១ ភាគរយ​នៃ​អ្នក​ដែល​ត្រូវ​គេ​ចោទ​សួរ មិន​ហ៊ាន​ជិះ​ក្នុង​រថយន្ត​បើកបរ​​ស្វ័យប្រវិត្ត​ឡើយ។ ការ​ស្ទង់​មតិ​នេះ​ត្រូវ​បាន​ចោទ​សួរ​លើ​មនុស្ស​ពេញវ័យ អាយុ​ចាប់​ពី ១៨ ឆ្នាំ​ឡើង​ទៅ សរុប​ចំនួន ១ ០០៨ នាក់។

សមាគម​រថយន្ត​អាមេរិកបាន​ឲ្យ​ដឹង​ថា ការ​កើន​ឡើង​គួរ​ឲ្យ​កត់សម្គាល់ ​ចំពោះភាពមិន​ជឿ​ទុក​ចិត្ត​លើ​រថយន្តបើកបរ​​ស្វ័យប្រវត្តិ អាច​មក​ពី​ឧប្បត្តិហេតុ​នៃ​រថយន្ត​បើកបរ​ស្វ័យប្រវត្តិ​ ដែល​បាន​កើត​ឡើង​ក្នុង​រយៈពេល​ពីរ​ឆ្នាំ​កន្លង​មក​នេះ។

សមាគម​រថយន្តខាងលើជឿជាក់​ថា ការ​ធ្វើ​អន្តរកម្ម​ជាមួយ​ប្រព័ន្ធ​ជំនួយ​ការ​បើកបរ​ទំនើប Advanced Driver Assistance Systems (ADAS) ដូចជា មុខងារ Lane Keeping Assistance, Adaptive Cruise Control, Automatic Emergency Braking និង ការ​ចូលចត​ដោយ​ស្វ័យប្រវត្តិ ជួយ​ឲ្យ​កម្រិត​ផាសុកភាព​របស់​អ្នក​បើកបរ​កាន់តែ​ប្រសើរ​ឡើង។

ការ​ស្ទង់មតិ​បាន​រក​ឃើញ​ថា អ្នក​បើកបរ​រថយន្តដែល​មាន​មុខងារ ADAS ទាំង ៤ ខាងលើ ​ប្រហែល ៦៨ ភាគរយ ហាក់​ដូច​ជា​ទុកចិត្ត​លើ​លក្ខណៈ​ពិសេស​ទាំង​នេះ ជាង​អ្នក​ដែល​មិន​មាន៕

ផ្ទាំងផ្សាយពាណិជ្ជកម្ម

ឡានស្ព័រ ៥ ម៉ូដែលនេះ បំពាក់ម៉ាស៊ីន V8 ល្អបំផុត

គ្មាន​អ្វី​អាច​យក​ឈ្នះ ម៉ាស៊ីន V8 បាន​ឡើយ ប៉ុន្តែ​ម៉ាស៊ីន V8 ទាំង​អស់ មិនមែន​សុទ្ធ​តែ​ដូច​គ្នា​ឡើយ។ ម៉ាស៊ីន V8 ដ៏​ខ្លាំង​ក្លា ធ្លាប់​ជា​និមិត្តសញ្ញា​ដ៏​ខ្ពង់ខ្ពង់ នៃ​ភាព​ស្វាហាប់ និង​អំណាច ហើយ​វា​ជា​ម៉ាស៊ីន​ដែល​គេ​ពេញ​និយម​ខ្លាំង​នៅ​សហរដ្ឋអាមេរិក។

រថយន្ត​ដែល​បំពាក់​ម៉ាស៊ីន V8 ដ៏​អស្ចារ្យ​បំផុត​មួយ​ចំនួន ក៏​កំពុង​តែ​ត្រូវ​បាន​ដាក់​លក់​នៅ​លើ​ទីផ្សារ នា​ពេល​បច្ចុប្បន្ន​នេះ​ផង​ដែរ។ ខាងក្រោមនេះគឺជា​កំពូល​រថយន្ត​ស្ព័រ ៥​ម៉ូដែល មាន​ម៉ាស៊ីន V8 ល្អ​បំផុត នៅ​លើ​ទីផ្សារ​រថយន្ត​បច្ចុប្បន្ន​៖

១) រថយន្ត Ford Mustang

Ford Mustang តែងតែ​ជា​និមិត្ត​រូប​នៃ​ម៉ាស៊ីន V8 បែប​អាមេរិក។ Mustang មាន​ភាពខុស​គ្នា​បន្តិចបន្តួច​ពី រថយន្ត Ford ម៉ូដែល Shelby GT350 និង GT350R។ ម៉ូដែល GT350 និង GT350R សុទ្ធ​តែ​ប្រើប្រាស់​ម៉ាស៊ីន​ទំហំ ៥,២​លីត្រ ៨​ស៊ីឡាំង (V8) និង​មាន​កម្លាំង​រហូត​ដល់​ទៅ ៥២៦​សេះ។

២) រថយន្ត Mercedes AMG GT

ម៉ាស៊ីន​ទំហំ ៤,០​លីត្រ ៨​ស៊ីឡាំង (V8) របស់​ក្រុមហ៊ុន Mercedes បាន​បង្ហាញ​ខ្លួន​ជា​លើក​ដំបូង នៅ​ក្នុង​រថយន្ត​ស្ព័រ Mercedes AMG GT។ ម៉ាស៊ីន ៤,០លីត្រ Turbocharged នេះ បាន​ជំនួស​ម៉ាស៊ីន ៦,២​លីត្រ (ធម្មតា) ចេញ និង​បាន​បង្ហាញ​ឲ្យ​ឃើញ​ថា ម៉ាស៊ីន Turbocharged ពិត​ជា​ល្អ អាច​មាន​សំឡេង​ធ្ងន់​ល្អ​ជាង​ទៀត​ផង។ វា​អាច​ផលិត​កម្លាំង​រហូត​ដល់​ទៅ ៤៦៩​សេះ។

៣) រថយន្ត Chevy Z06 Corvette

រថយន្ត Chevy Z06 Corvette បាន​បំពាក់​ម៉ាស៊ីន LT4 V8 ដែល​អាច​ផលិត​កម្លាំង​រហូត​ដល់​ទៅ ៦៥០សេះ។ ម៉ាស៊ីន​ប្រភេទ​នេះ​ក៏​បាន​បំពាក់​នៅ​លើ​រថយន្ត Chevrolet ម៉ូដែល ZL1 Camaro និង Cadillac ម៉ូដែល CTS-V ផង​ដែរ។

៤) រថយន្ត Jaguar F-Type

ម៉ាស៊ីន​ទំហំ ៥,០​លីត្រ Supercharged V8 របស់​ក្រុមហ៊ុន Jaguar និង Land Rover ពិត​ជា​ល្អ និង​មាន​សំឡេង​ធ្ងន់​ល្អ​ខ្លាំង​ណាស់។ ម៉ាស៊ីន​ប្រភេទ​នេះ​បាន​បំពាក់​នៅ​លើ​រថយន្ត Jaguar ម៉ូដែល F-Type និង Range Rover ម៉ូដែល Sport SVR ផង​ដែរ។

៥) រថយន្ត McLaren 720S

រថយន្ត​ម៉ូដែល​នេះ​បាន​បំពាក់​ម៉ាស៊ីន ៤,០លីត្រ Twin-Turbo V8 ដែល​អាច​ផលិត​កម្លាំង​រហូត​ដល់​ទៅ ៧២០​សេះ។ ម៉ាស៊ីន ៤,០​លីត្រ V8 នេះ គឺ​ជា​ការ​កែលម្អ​ដ៏​ធំធេង​មួយ ពី​ម៉ាស៊ីន ៣,៨​លីត្រ V8 របស់ McLaren 720S៕

ផ្ទាំងផ្សាយពាណិជ្ជកម្ម

Ford Explorer ឆ្នាំ ២០២០ ដូររូបរាងថ្មី ហើយអាចចូលចតស្វ័យប្រវត្តិទៀត

នាពេលថ្មីៗនេះ Ford ​បាន​បង្ហាញរថយន្ត SUV កៅអី ៣ ជួរ ម៉ូដែល Explorer ស៊េរី​ឆ្នាំ ២០២០ ជាផ្លូវការ ដោយទទួល​បាន​ការ​រចនា​ឡើង​វិញ ជា​ពិសេស​ផ្នែក​ខាង​មុខ ដូចជា ប៉ាណា, រន្ធ​បឺត​ខ្យល់ និង ចង្កៀង ផង​ដែរ ខណៈ​ផ្នែក​ខាង​ក្រោយ​ស្រដៀង​ទៅ​នឹង​ស៊េរី​មុន។ អ្វី​ដែល​អស្ចារ្យ​បំផុត​នោះ​គឺ ផ្នែក​ខាង​ក្នុង ដែល​ទទួល​បាន​ការ​រចនា​ឡើង​វិញ​ទាំង​ស្រុង ហើយ​បំពាក់​គ្រឿង​បរិក្ខា​មាន​គុណភាព​ល្អ​ជាង​មុន ព្រម​ទាំង​រចនា និង​រៀប​ចំ​បាន​យ៉ាង​ល្អ​បំផុត។

Ford Explorer ប្រភេទ Base Model នឹង​បំពាក់​មុខងារ Dual-Zone Automatic Climate Control System, ប្រព័ន្ធ 4G LTE Wi-Fi Hotspot និង កៅអី​អង្គុយ​ជួរ​ទី ២ អាច​កាត់​ទៅ​មុខ-ក្រោយ ហើយ​បត់​បាន​ផង​ដែរ។ រឹត​តែ​ពិសេស គឺ អេក្រង់​ទំហំ ៨ អ៊ីញ ដំណើរការ​ដោយ​ប្រព័ន្ធ SYNC 3 ជាមួយ​មុខងារ Apple CarPlay និង Android Auto ទៀត​ផង។ ក្រៅ​ពី​ប្រភេទ Base Model រថយន្ត SUV Ford Explorer នេះ​ក៏​មាន​ប្រភេទ XLT, Limited និង Platinum ដោយ​បំពាក់​មក​ជាមួយ​នូវ​លក្ខណៈ​ពិសេស​កាន់​តែ​សម្បូរ​បែប។

ចំណែក​ឯ​ម៉ាស៊ីន​វិញ​ក៏​ខុស​គ្នា​ទៅ​តាម​ប្រភេទ​និមួយៗ​ដែរ ដូច​ជា ប្រភេទ Base Model ប្រើ​ម៉ាស៊ីន​សាំង​ចំណុះ ២,៣ លីត្រ EcoBoost ទំហំ ៤ ស៊ីឡាំង កម្លាំង ៣០០ សេះ ប្រើ​ប្រអប់លេខ​ថ្មី ១០ វគ្គ និង ប៉ុង ១ កាឡេ​ក្រោយ (RWD)។ វា​ក៏​មាន​ជា Option ប៉ុង ២ វៃឆ្លាត 4WD ដែល​មក​ជាមួយ​នូវ​ប្រព័ន្ធ​គ្រប់គ្រង​ស្ថានភាព​ផ្លូវ Terrain Management System សរុប​ចំនួន ៧ ប្រភេទ​ខុសៗ​គ្នា។

ក្រៅ​ពី​នេះ​គឺ ម៉ាស៊ីន​សាំង​ចំណុះ ៣,០ លីត្រ EcoBoost ទំហំ ៦ ស៊ីឡាំង កម្លាំង ៣៦៥ សេះ។ ដោយ​សារ​តែ​ម៉ាស៊ីន និង​គ្រោង​ឆ្អឹង​ដែល​ប្រើ​ប្រព័ន្ធ​បើកបរ​ប៉ុង​ក្រោយ​ថ្មី រថយន្ត Ford Explorer ស៊េរី​ឆ្នាំ ២០២០ អាច​អូស​សណ្តោង​រហូត​ដល់​ទៅ​ទម្ងន់ ២ ៥៤០ គីឡូក្រាម​ឯណោះ។

បើ​និយាយ​ពី​ប្រព័ន្ធ​សុវត្ថិភាព​វិញ វា​បាន​បំពាក់​ប្រព័ន្ធ Co-Pilot360 មក​ស្តង់ដារ​តែម្តង ដោយ​ក្នុង​នោះ​រួម​មាន​មុខងារ Pre-collision Assist System with Pedestrian Detection, Forward Collision Warning, Automatic Emergency Braking, Lane-Keeping Assist, កាមេរ៉ា​ក្រោយ, ចង្កៀង​អូតូ និង Blind Spot Information System with Cross-Traffic Alert ផង​ដែរ។

Ford Explorer Platinum មាន​បំពាក់ប្រព័ន្ធ Active Park Assist 2.0 System ដែល​អនុញ្ញាត​ឲ្យ​រថយន្ត​ចូល​ចត​​ស្វ័យប្រវត្តិ ដោយ​គ្រាន់​តែ​ចុច​ប៊ូតុង​មួយ​ប៉ុណ្ណោះ ហើយ​អ្នកបើកបរ​មិន​ចាំ​បាច់​កាន់​ដៃ​ចង្កូត, ដាក់​លេខ, ជាន់​ហ្គ៊ែរ ឬ​ជាន់​ហ្វ្រាំង​ឡើយ។ Ford Explorer ​ឆ្នាំ ២០២០ ​មាន​តម្លៃ​ចាប់​ពី ៣២ ៧៦៥ ដុល្លារ​នៅ​សហរដ្ឋអាមេរិក៕

ផ្ទាំងផ្សាយពាណិជ្ជកម្ម
1...1,0511,0521,053...1,079ទំព័រ 1,052 នៃ 1,079

បច្ចេកវិទ្យា

គន្លឹះសំខាន់ៗ

REVIEW+

© ២០២២ រក្សាសិទ្ធិគ្រប់យ៉ាង​ ហាមដាច់ខាតយកព័ត៌មានទៅផ្សាយបន្ត ដោយគ្មានការអនុញ្ញាត | www.camboauto.com