នៅពេលបើករថយន្តសុខៗភ្លេចមើលទ្រនិចសាំងដែលចុះដល់កម្រិតទាប ហើយស្រាប់តែចេញសញ្ញាធុងសាំងក្នុងកុងទ័រ ប្រាកដជាធ្វើឲ្យអ្នកមានអារម្មណ៍មិនស្រួលជាមិនខាន ជាពិសេសនឹងបារម្ភខ្លាំងពេលស្ថិតក្នុងតំបន់ដែលនៅឆ្ងាយពីការ៉ាស់សាំង។

ការពិតទៅ នៅពេលចេញសញ្ញាធុងសាំងនេះ គឺមិនបានបញ្ជាក់ថា រថយន្តអ្នកនឹងត្រូវអស់សាំងភ្លាមៗនោះទេ ប៉ុន្តែវាជាការព្រមានឲ្យយើងដឹងថា កម្រិតសាំងបានចូលក្នុងតំបន់បម្រុងរបស់សាំង។ មានន័យថា កម្រិតសាំងគឺនៅសល់ប្រហែល ១០ ទៅ ១៥% ឬប្រហែល ៥ ទៅ ១០លីត្រទៀត។

បរិមាណសាំងដែលនៅសល់ប៉ុណ្ណេះ គឺគ្រប់គ្រាន់ឲ្យអ្នកអាចស្វែងរកកន្លែងចាក់សាំងបាន ពោលគឺអាចធ្វើដំណើរបានដល់ចម្ងាយប្រហែល ៥០ ទៅ ៨០ គីឡូម៉ែត្រទៀត ផ្អែកទៅលើស្ថានភាពចរាចរណ៍ កម្លាំងម៉ាស៊ីនរថយន្ត និងការជាន់ហ្គែរ។

ទោះជាយ៉ាងណាក៏ដោយ អ្នកជំនាញបានណែនាំឲ្យអ្នកបើកបរឧស្សាហ៍មើលកុងទ័រសាំង ធ្វើយ៉ាងណាកុំឲ្យលោតចេញសញ្ញាធុងសាំងនេះញឺកញាប់ពេក ព្រោះវាអាចបណ្តាលឲ្យប៉ះពាល់ដល់ប្រព័ន្ធសាំងរថយន្ត ដូចជា បូមសាំង តម្រងសាំង និងប៊ិចសាំងជាដើម។ គួរកត់សម្គាល់ដែរថា បើសញ្ញាធុងសាំងនេះ វាលោតភ្លឹបភ្លេតៗ គឺបញ្ជាក់ថា កម្រិតសាំងកាន់តែអស់ សល់តិចជាង ១០%។

ដូច្នេះ នៅពេលអ្នកប្រទះនឹងបញ្ហាចេញសញ្ញាព្រមានមួយនេះ កុំច្រួលច្របល់អី ហើយបើអាចគួរបិទម៉ាស៊ីនត្រជាក់សិន កុំជាន់ហ្គែខ្លាំងដោយត្រូវព្យាយាមរក្សាល្បឿន និងឆែក Google Map ស្វែងរកការ៉ាស់សាំងដែលនៅជិតបំផុត៕

ផ្ទាំងផ្សាយពាណិជ្ជកម្ម

សុពលភាពវិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ ឬ ឆៀក គឺមានរយៈពេល ៤ឆ្នាំ ២ឆ្នាំ ឬ១ឆ្នាំ ទៅតាមប្រភេទរថយន្តនីមួយៗខុសៗគ្នា។ យ៉ាងណាមិញ ឆៀកក៏នឹងអស់សុពលភាពមុនថ្ងៃផុតកំណត់ផងដែរ ប្រសិនបើមានករណីដូចខាងក្រោមនេះ៖

១. យានទទួលបានវិញ្ញាបនបត្រ និងលតាបត្រត្រួតពិនិត្យលក្ខណៈបច្ចេកទេសយានជំនិះថ្មី។

២. មានការជូនដំណឹងមកអគ្គនាយកដ្ឋានដឹកជញ្ជូនផ្លូវគោកអំពីការបាត់ ពីម្ចាស់យាន ឬតំណាង។

៣. យានមានគ្រោះថ្នាក់ចរាចរណ៍ដល់កម្រិតមិនធានាសុវត្ថិភាពបច្ចេកទេស

៤. លក្ខណៈបច្ចេកទេសពិសេសរបស់យានជាក់ស្តែង ខុសពីលក្ខណៈបច្ចេកទេសពិសេស នៅក្នុងវិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ។

នេះបើយោងតាមប្រកាសលេខ ១៧០ ស្តីពីការត្រួតពិនិត្យលក្ខណៈបច្ចេកទេសយានជំនិះគ្រប់ប្រភេទ ចុះកាលពីថ្ងៃទី១២ ខែមិថុនា ឆ្នាំ២០១៩។

ទោះជាយ៉ាងណាក៏ដោយ ប្រសិនបើរថយន្ត និងឆៀករបស់អ្នក មិនជួបប្រទះដូចក្នុងករណីខាងលើនេះទេ ក៏នៅតែត្រូវយករថយន្តមកឆៀកតាមកាលកំណត់ជាធម្មតា ដើម្បីចៀសវាងការផាកពិន័យ ពោលគឺបើលើស ៣០ថ្ងៃ គឺពិន័យ ៥០០រៀល ក្នុង១ថ្ងៃ សម្រាប់រថយន្តធុនតូច និង ២០០០រៀលក្នុង១ថ្ងៃ សម្រាប់រថយន្តធុនធំ៕

ផ្ទាំងផ្សាយពាណិជ្ជកម្ម

តើរថយន្តរបស់អ្នក អាចចាក់ទឹកធម្មតា ចូលក្នុងធុងទឹកបានដែរឬទេ? ជាទូទៅ អ្នកបច្ចេកទេសតែងតែបានណែនាំឲ្យម្ចាស់រថយន្តប្រើទឹកស្អំ ឬ coolant ជាជាងទឹកធម្មតា ហើយមិនតែប៉ុណ្ណោះ ទឹកស្អំនោះទៀតសោត ក៏ត្រូវមានគុណភាពដែរ។

ទឹកធម្មតា បានត្រឹមតែជួយទប់កម្តៅម៉ាស៊ីនប៉ុណ្ណោះ ប៉ុន្តែគ្មានសារធាតុអ្វីសម្រាប់ការពារប្រព័ន្ធធុងទឹកទេ ដោយខុសពីទឹកស្អំ បានផ្តល់នូវគុណសម្បត្តិជាច្រើនដូចជា៖

-ការពារម៉ាស៊ីនមិនឲ្យឡើងកម្តៅខ្លាំង

-ការពារមិនឲ្យកកទឹក នៅក្នុងប្រទេសត្រជាក់

-មានសារធាតុគីមីជួយមិនឲ្យប្រព័ន្ធធុងទឹក មានស្នឹម ច្រេះ ឬកំណកអំបិល

-និងមានសារធាតុរំអិលជួយដល់បូមទឹកបង្កើនអាយុកាលប្រើប្រាស់ទៀតផង។

ក្រៅពីនេះ នៅមានចំណុចដ៏ល្អមួយទៀតចំពោះការប្រើទឹកស្អំ គឺអាចឲ្យយើងបានដឹងពីការលេចជ្រាប ព្រោះទឹកស្អំ មានពណ៌ផ្កាឈូក ឬបៃតង ដែលវាលេចជ្រាបនៅកន្លែងណាមួយ ឬស្រកចុះដី គឺយើងអាចងាយសម្គាល់ដឹងថាជាទឹកស្អំ តាមរយៈពណ៌របស់វានេះតែម្តង។

ក្នុងករណីបើកបរតាមផ្លូវ ស្រាប់តែបាត់ទឹកហើយឡើងកម្តៅ លោកអ្នកត្រូវទុកឲ្យម៉ាស៊ីនរថយន្តចុះត្រជាក់សិន ហើយអាចចាក់ទឹកធម្មតាជាបណ្តោះអាសន្នសិន។ បន្ទាប់មកពេលចូលការ៉ាស់ជួសជុលរួច គឺគួរលាងសម្អាតធុងទឹក ហើយចាក់ទឹកស្អំថ្មីចូល៕

ផ្ទាំងផ្សាយពាណិជ្ជកម្ម

ការឈប់ ឬការចតរថយន្តមិនត្រឹមត្រូវរបស់អ្នកបើកបរមួយចំនួន បានបណ្តាលឲ្យមានការកកស្ទះចរាចរណ៍ និងបង្កការរំខានដល់អ្នកដំណើរដទៃ ហើយមិនតែប៉ុណ្ណោះ អាចនឹងរកការផាកពិន័យ ឬស្ទូចដោយសមត្ថកិច្ចចរាចរណ៍ទៀតផង។

យោងតាមមាត្រា២៣ នៃច្បាប់ស្តីពីចរាចរណ៍ផ្លូវគោក និងវិសោធនកម្ម មានខ្លឹមសារថា ការឈប់ និងការចតយានជំនិះនៅលើផ្លូវថ្នល់ ត្រូវអនុវត្តដូចខាងក្រោម៖

១. គ្រប់យានជំនិះដែលឈប់ ឬចត មិនត្រូវបង្កឲ្យរំខានដល់យានជំនិះផ្សេងៗទៀតដែលកំពុងធ្វើចរាចរណ៍។

២. នៅក្នុងទីប្រជុំជន គ្រប់យានជំនិះត្រូវឈប់ឬចត នៅតាមទិសដែលខ្លួនកំពុងធ្វើចរាចរណ៍ ដោយអនុវត្តតាមបទប្បញ្ញត្តិដូចខាងក្រោម៖

-ចំពោះទ្រូងផ្លូវដែលមានទិសចរាចរណ៍ពីរ ត្រូវចតឬឈប់ខាងស្តាំតាមទិសចរាចរណ៍របស់ខ្លួន។

-ចំពោះទ្រូងផ្លូវឯកទិស ត្រូវចតឬឈប់ខាងស្តាំ ឬខាងឆ្វេងតាមទិសចរាចរណ៍។

៣. នៅក្រៅទីប្រជុំជន  យានជំនិះឬសត្វពាហនៈត្រូវឈប់ឬចតនៅក្រៅទ្រូងផ្លូវ។ បើគ្មានទីណាផ្សេងទៀត ដែលយានជំនិះអាចចតបានក្រៅពីទ្រូងផ្លូវទេនោះ ត្រូវអនុវត្តតាមបទប្បញ្ញត្តិដែលមានចែងក្នុងចំណុចទី១ខាងលើនេះ។

៤. នៅក្រៅទីប្រជុំជន គ្រប់យានជំនិះដែលខូចគាំង ឬត្រូវបង្ខំឲ្យឈប់ ឬចតនៅលើទ្រូងផ្លូវ ត្រូវប្រើភ្លើងសញ្ញាអាសន្ន ឬ/និងដាក់សញ្ញាត្រីកោណចម្ងាយយ៉ាងតិច ៣០ម៉ែត្រ ដែលអាចមើលឃើញយ៉ាងតិច ១០០ម៉ែត្រ។ ក្នុងករណីបញ្ហាខាងលើនេះ កើតឡើងនៅកន្លែងហាមឈប់ ឬចត ត្រូវជូនដំណឹងដល់សមត្ថកិច្ច ដែលនៅជិតដើម្បីមានវិធានការបន្ថែម។

៥. នៅក្នុងទីប្រជុំជន គ្រប់យានជំនិះត្រូវឈប់ ឬចតដាក់ទំនិញ ឬមនុស្សឡើងចុះនៅចម្ងាយ ឬមនុស្សឡើងចុះនៅចម្ងាយមិនលើសពី ២៥សង់ទីម៉ែត្រពីគែមចិញ្ចើមផ្លូវ និងយ៉ាងតិច ៥ម៉ែត្រពីផ្លូវប្រសព្វ ឬផ្លូវបត់ ឬផ្លូវកោង និងចន្លោះយ៉ាងតិច ១០ម៉ែត្រ ពីផ្លូវប្រសព្វ ឬផ្លូវបត់ ឬផ្លូវកោងនៃមហាវិថី។ នៅក្រៅទីប្រជុំជន យានទាំងអស់ត្រូវឈប់ ឬចតយ៉ាងតិចបំផុត ១០ម៉ែត្រពីផ្លូវប្រសព្វ ឬផ្លូវបត់ ឬផ្លូវកោង។

៦. ក្នុងការចត មុនពេលដើរឆ្ងាយពីយានជំនិះរបស់ខ្លួន អ្នកបើកបរត្រូវចាប់ហ្វ្រាំងដៃ ឬមានវិធានការផ្សេងៗ ដើម្បីការពារគ្រោះថ្នាក់ជាយថាហេតុ នៅពេលដែលខ្លួនអវត្តមាន។ គួរបញ្ជាក់បន្ថែមថា ក្នុងមាត្រា៦៧ នៃច្បាប់ខាងលើដដែល មន្រ្តីនគរបាលចរាចរណ៍ផ្លូវគោក មានសិទ្ធិស្ទូចយានជំនិះដែលចតធ្វើឲ្យរំខាន ឬអាចនាំឲ្យមានគ្រោះថ្នាក់ដល់យានដទៃ យកទៅរក្សាទុកនៅអង្គភាពនគរបាលចរាចរណ៍ផ្លូវគោកក្នុងករណីដែលម្ចាស់យានជំនិះមិនព្រមទទួលការពិន័យ ឬគ្មានវត្តមាន៕

ផ្ទាំងផ្សាយពាណិជ្ជកម្ម