ប្រសិនបើករថយន្តសុខៗស្រាប់តែលោតចេញសញ្ញាឆេករូបអាគុយ ក្នុងកុងទ័រ គឺវាបង្ហាញពីបញ្ហានៃប្រព័ន្ធសាកភ្លើងដែលដំណើរការមិនស្រួលចេញពីឌីណាម៉ូ និងបញ្ហាអាគុយ។ ដូច្នេះទាំងនេះ គឺជាមូលហេតុ ដែលបណ្តាលឲ្យលោតចេញសញ្ញារូបអាគុយ និងវិធីដោះស្រាយ៖

១. ឌីណាម៉ូខូច ដែលមិនអាចផ្តល់ភ្លើងសម្រាប់រថយន្តទាំងមូល និងសាកអាគុយបានឡើយ។

២. ខ្សែពានរលុង ឬដាច់ ដែលមិនអាចឲ្យឌីណាម៉ូ បង្វិលដល់កម្រិតល្បឿនក្នុងការបង្កើតថាមពលបានឡើយ។

៣. ក្បាលអាគុយរលុង ឬមានច្រេះ ដែលកាត់ផ្តាច់ចរន្តភ្លើងរវាងឌីណាម៉ូ និងអាគុយ។

៤. អាគុយបានខូចតែម្តង ដែលមិនអាចផ្ទុក និងទទួលការសាកភ្លើងពីឌីណាម៉ូទៀតនោះទេ។

៥. ឧបករណ៍គ្រប់គ្រងតង់ស្យុង (Voltage Regulator) បានខូច ដែលមិនអាចគ្រប់គ្រងរក្សាកម្រិតវ៉ុលដែលបញ្ជូនថាមពលទៅអាគុយ បណ្តាលឲ្យមានការសាកភ្លើងចូលច្រើនជ្រុល ឬសាកចូលតិចមិនគ្រប់គ្រាន់។

ក្រៅពីនេះ វាក៏អាចបណ្តាលមកពីការដាច់រហែកខ្សែភ្លើងណាមួយខូចហ្វ៊ុយស៊ីប និងរ៉ឺឡេ ក៏ដូចជាអាចមកពីប្រព័ន្ធ ECU ឬហៅថា បតបញ្ជាជាដើម។

អ៊ីចឹងជាដំណោះស្រាយបន្ទាន់ក្នុងពេលមានបញ្ហានេះកើតឡើង អ្វីដែលត្រូវធ្វើមុនគេនោះគឺ បិទឧបករណ៍ដែលប្រើភ្លើងដូចជា វិទ្យុ ម៉ាស៊ីនត្រជាក់ និងគ្រឿងអេឡិចត្រូនិចដែលមិនចាំបាច់ ដើម្បីកុំឲ្យអាគុយឆាប់អស់ថាមពល។ បន្ទាប់មកទៀត ព្យាយាមបើកទៅស្វែងរកការ៉ាស់ជួសជុលតាមដែលអាចធ្វើបាន ឬទីតាំងដែលមានសុវត្ថិភាព ហើយបើរកមិនទាន់បានទេ កុំទាន់ ពន្លត់ម៉ាស៊ីនរថយន្តឲ្យសោះ ព្រោះវានឹងមិនអាចដេរបញ្ឆេះវិញបានឡើយ៕

ផ្ទាំងផ្សាយពាណិជ្ជកម្ម

ចាប់ពីខែកុម្ភៈ ឆ្នាំ២០២៦នេះតទៅ អគ្គស្នងការដ្ឋាននគរបាលជាតិ បានប្រកាសចាប់ផ្តើមរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោកឡើងវិញ ដើម្បីបង្កើនសុវត្ថិភាពចរាចរណ៍។

ដូច្នេះហើយដើម្បីចៀសវាងការផាកពិន័យ សម្រាប់អ្នកបើកបររថយន្ត គឺត្រូវតែបើកបរគោរពទៅតាមច្បាប់ចរាចរណ៍ ដូចជា ការពាក់ខ្សែក្រវាត់ ហាមប្រើទូរសព្ទដោយគ្មានឧបករណ៍ភ្ជាប់ និងគោរពតាមភ្លើងសញ្ញាចរាចរណ៍ ផ្លាកសញ្ញាចរាចរណ៍ ល្បឿនកំណត់ ក៏ដូចជាសិទ្ធិអាទិភាពជាដើម។ ជាមួយគ្នានេះ រឿងដ៏សំខាន់បំផុតមួយទៀតសម្រាប់អ្នកបើកបររថយន្ត គឺមិនត្រូវភ្លេចដាច់ខាតនូវឯកសារសំខាន់ៗដែលត្រូវដាក់តាមខ្លួន គឺបណ្ណបើកបរ បណ្ណសម្គាល់យានជំនិះឬកាតគ្រី និងវិញ្ញាបនបត្រត្រួតពិនិត្យលក្ខណៈបច្ចេកទេស ឬឆៀក។

យោងតាមអនុក្រឹត្យស្តីពីការកែសម្រួលអនុក្រឹត្យលេខ៤៤ ស្តីពីពីការពិន័យអន្តរការណ៍ចំពោះអំពើល្មើសនឹងច្បាប់ចរាចរណ៍ផ្លូវគោក ចុះកាលពី១៧ ខែមីនា ឆ្នាំ២០២០ បានឲ្យដឹងដូចខាងក្រោមនេះ៖

១-អ្នកបើកបរយានយន្តធុនស្រាល ដែលមិនបានយកភ្ជាប់តាមខ្លួននូវបណ្ណបើកបរច្បាប់ដើម ត្រូវពិន័យ ៧៥០០០រៀល។ មានបណ្ណបើកបរដែរ តែហួសសុពលភាព ឬមិនត្រូវតាមប្រភេទយានយន្ត ត្រូវពិន័យ ១៨០ ០០០រៀល។ លើសពីនេះ បើគ្មានបណ្ណបើកបរ ឬក្នុងរយៈពេលដែលបណ្ណបើកបរត្រូវបានដកហូត ព្យួរទុក ឬទុកជាមោឃៈ ត្រូវពិន័យដល់ទៅ ១ ២០០ ០០០រៀល។

២-អ្នកបើកបរយានយន្តធុនស្រាល ដោយគ្មានបណ្ណសម្គាល់យានជំនិះ និង/ឬគ្មានផ្លាកលេខ ត្រូវពិន័យ ១ ២០០ ០០០រៀល។

៣. អ្នកបើកបរយានយន្តធុនស្រាល ដោយគ្មានវិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត ឬមានដែរតែហួសសុពលភាព ត្រូវពិន័យ ១៨០ ០០០រៀល។

សូមបញ្ជាក់ដែរថា សម្រាប់បណ្ណសម្គាល់យានជំនិះ ដែលមាន QR Code អាចប្រើច្បាប់ថតចម្លងបាន ប៉ុន្តែបើជាបណ្ណស៊េរីចាស់មិនមាន QR Code គឺត្រូវមានការបញ្ជាក់ពីស្ថាប័នមានសមត្ថកិច្ច។ ចំណែក ឆៀក អាចប្រើច្បាប់ថតចម្លងបាន ប៉ុន្តែបណ្ណបើកបរដាច់ខាតគឺត្រូវប្រើច្បាប់ដើម។ នេះបើតាមសេចក្តីជូនដំណឹងរបស់ក្រសួងសាធារណការ និងដឹកជញ្ជូន កាលពីថ្ងៃទី៥ ខែសីហា ឆ្នាំ២០២២៕

ផ្ទាំងផ្សាយពាណិជ្ជកម្ម

រថយន្តបាត់ប្រេងម៉ាស៊ីន ជារឿងមួយដែលវាបណ្តាលមកពីការលេចជ្រាបផ្សេងៗ និងការខូចសឹករិចរិលនៃគ្រឿងបង្គុំជាដើម។ យ៉ាងណាមិញ បើសិនចាក់ប្រេងថែមដល់លើសចំណុះវិញ វានឹងទុក្ខកាន់តែខ្លាំងដល់ម៉ាស៊ីន។

នៅពេលប្រេងម៉ាស៊ីនត្រូវបានចាក់លើសពីកម្រិត Maximum របស់វា បើលើសបន្តិចបន្តួច មិនមានបញ្ហាអ្វីទេ ប៉ុន្តែបើលើសកាន់តែច្រើន ឬលើសចាប់ពីកន្លះលីត្រឡើងទៅ នឹងបង្កផលប៉ះពាល់ដូចខាងក្រោមនេះ៖

១. ចេញផ្សែង៖ ប្រេងដែលចាក់លើសនោះ នឹងចូលដល់បន្ទប់ចំហេះដែលវានឹងត្រូវដុតចោលជាមួយឥន្ធនៈ និងខ្យល់ ហើយចេញផ្សែងតាមបំពង់ស៊ីមាំង។

២. ខូចប៊ូស៊ី៖ ពេលដែលមានប្រេងច្រើន ចូលក្នុងបន្ទប់ចំហេះ វាក៏នឹងរុំព័ទ្ធប៊ូស៊ីដែលជាអ្នកបាញ់ផ្កាភ្លើងនោះដែរ ធ្វើឲ្យក្បាលប៊ូស៊ីខ្មៅឆាប់ខូច។

៣. លេចប្រេង៖ សម្ពាធផ្នែកខាងក្នុងនឹងកើនឡើង ហើយនឹងរុញប្រេងដែលលើសនោះបញ្ចេញតាមរ៉ង និងហ្វឺតផ្សេងៗ។

៤. ម៉ាស៊ីនស្ទក់៖ នៅពេលមានប្រេងច្រើនលើសលុបពេក គឺវាមិនអាចបំពេញការងារបានល្អឡើយក្នុងការរំអិលដល់គ្រឿងបង្គុំម៉ាស៊ីន ដែលជាហេតុធ្វើឲ្យដំណើរការម៉ាស៊ីនកាន់តែស្ទក់ ឬឆាប់សឹករិចរិលថែមទៀតផង៕

ផ្ទាំងផ្សាយពាណិជ្ជកម្ម