អគ្គិសនីកម្ពុជា (EDC) បាន​ចូលរួមវិនិយោគបង្កើតស្ថានីយបញ្ចូលថាមពលយានយន្តអគ្គិសនី នៅតាមរាជធានី-ខេត្តទាំង២៥ ដែលស្ថានីយទាំងនោះ​នឹងចាប់ផ្តើមដាក់ឲ្យដំណើរការជាបន្តបន្ទាប់ក្នុងពេលឆាប់ៗខាងមុខ។ នេះបើតាមលិខិតមួយរបស់អាជ្ញាធរអគ្គិសនីកម្ពុជា ផ្ញើជូនដល់​អ្នកកាន់អាជ្ញាបណ្ណធ្វើសេវាកម្មអគ្គិសនី កាលពីថ្ងៃទី២២ ខែមករា ឆ្នាំ២០២៦។

តាមរយៈលិខិតនេះ គឺអាជ្ញាធរអគ្គិសនីកម្ពុជា បានជំរុញឲ្យ​អ្នកកាន់អាជ្ញាបណ្ណធ្វើសេវាកម្មអគ្គិសនីទាំងអស់នៅកម្ពុជា ពិនិត្យលទ្ធភាពវិនិយោគបង្កើតស្ថានីយបញ្ចូលថាមពលយានយន្តអគ្គិសនី នៅក្នុងតំបន់​ផ្គត់ផ្គង់អគ្គិសនីរបស់ខ្លួន និងចូលរួមប្រើប្រាស់​យានយន្តអគ្គិសនី ជាពិសេស​ យានយន្តសម្រាប់​បម្រើ​ឲ្យប្រតិបត្តិការអាជីវកម្មអគ្គិសនី។

គួររំលឹកថា ក្នុងពិធីសម្ពោធស្ថានីយបញ្ចូលថាមពលរបស់ក្រុមហ៊ុន Zo Motors Cambodia កាលពីថ្ងៃទី៨ ខែមករា ឆ្នាំ២០២៦ ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល បានថ្លែងថា កម្ពុជាបាននិងកំពុងជំរុញបង្កើតស្ថានីយបញ្ចូលថាមពលសម្រាប់យានយន្តអគ្គិសនី ឱ្យគ្របបណ្តប់នៅទូទាំងប្រទេស សម្រាប់បម្រើដល់ការធ្វើដំណើររបស់ប្រជាពលរដ្ឋ និងការធ្វើអាជីវកម្ម ជាពិសេសសហគ្រាសដឹកជញ្ជូន តាមរយៈនៃការកាត់បន្ថយនូវការចំណាយខ្ពស់ និងការចូលរួមលើកកម្ពស់ថាមពលស្អាត។

គួរដឹងថា ក្រុមហ៊ុន Zo Motors Cambodia បានប្រកាសពីការតាំងចិត្តរបស់ខ្លួន ក្នុងគម្រោង​ពង្រាយស្ថានីយបញ្ចូលថាមពលល្បឿនលឿនឲ្យបាន​ចំនួន ៣០០ទីតាំងនៅទូទាំងប្រទេស។ ក្នុងនោះ ក្រុមហ៊ុនបង្កើតស្ថានីយបាន ៣០ទីតាំងក្នុងឆ្នាំ២០២៥ ហើយគ្រោងសង់ ២០០ទីតាំងនៅឆ្នាំ២០២៦នេះ និងបន្ថែម ៧០ទីតាំងទៀតនៅឆ្នាំ២០២៧។

សូមជម្រាបថា ពេល​ដែលប្រទេស​មានហេដ្ឋារចនាសម្ព័ន្ធស្ថានីយបញ្ចូលថាមពលកាន់តែច្រើនឡើងនោះ នឹងផ្តល់ប្រយោជន៍ដូចជា៖

១-ផ្តល់ទំនុកចិត្តកាន់តែខ្លាំងឡើងដល់អ្នកកំពុងប្រើប្រាស់ និងអ្នកមានបំណងប្រើប្រាស់យានយន្តអគ្គិសនី

២-ជួយសម្រួលដល់អាជីវកម្មលក់ និងចែកចាយយានយន្តអគ្គិសនី ឲ្យកាន់តែមានចីរភាព

៣-ជួយប្រើប្រាស់ថាមពលអគ្គិសនីដែលផលិតក្នុងស្រុក

៤-កាត់បន្ថយលំហូសាច់ប្រាក់ចេញក្រៅប្រទេសដើម្បីទិញឥន្ធនៈពីបរទេស

៥-ជួយប្រជាពលរដ្ឋសន្សំសំចៃថវិកា ដោយប្តូរមកប្រើយានយន្តអគ្គិសនី

៦-លើកកម្ពស់ថាមពលស្អាតតាមរយៈការកាត់បន្ថយការបំភាយឧស្ម័នកខ្វក់ទៅលើអាកាស

៧-ជួយធ្វើឲ្យប្រសើរដល់សុខភាពសាធារណៈ តាមរយៈការបន្ថយជាតិពុលក្នុងបរិយាកាស

៨-ធ្វើឲ្យទំនិញចុះថោក តាមរយៈតម្លៃដឹកជញ្ជូនទាបជាងមុន៕

ផ្ទាំងផ្សាយពាណិជ្ជកម្ម

រថយន្តដើរដោយថាមពលថ្មីគឺ​រថយន្តអគ្គិសនី និងរថយន្តអ៊ីដ្រូសែន បាននឹងកំពុង​បង្ហាញពីសញ្ញាអវិជ្ជមាន​នៅលើទឹកដីសហរដ្ឋអាមេរិក ខណៈការលក់​រថយន្តអគ្គិសនីក្នុងប្រទេសយក្សមួយនេះ បានធ្លាក់ចុះ ចំណែករថយន្តអ៊ីដ្រូសែនដ៏ល្បីគឺ Honda CR-V e:FCEV ក៏នឹងត្រូវបញ្ឈប់ការផលិតត្រឹមចុងឆ្នាំនេះទៀត។

ទិន្នន័យឆ្នាំ២០២៥ បង្ហាញថា នៅអាមេរិកខាងជើង ដែលរួមមាន សហរដ្ឋអាមេរិក កាណាដា និងម៉ិចស៊ីកូ លក់រថយន្តអគ្គិសនីបានចំនួន ១,៨លានគ្រឿងប៉ុណ្ណោះ ធ្លាក់ចុះ ៤%។ ការធ្លាក់ចុះបែបនេះ ក៏ដោយសារតែការលក់នៅសហរដ្ឋអាមេរិក មានត្រឹមតែ១០% នៃរថយន្តថ្មីៗ​ដែលបានលក់ក្នុងឆ្នាំ២០២៥ជាពិសេសការប្រែប្រួលគោលនយោបាយ ដែលបានបញ្ចប់ការលើកចិត្តពន្ធរបស់​រដ្ឋបាលដូណាល់ ត្រាំ កាលពីចុងខែកញ្ញា។

អ្នកប្រើប្រាស់នៅសហរដ្ឋអាមេរិក មិនទាន់មានទំនោរខ្លាំងលើរថយន្តអគ្គិសនីនៅឡើយ ដោយបារម្ភខ្វះកន្លែងសាកថ្ម ព្រោះហេដ្ឋារចនាសម្ព័ន្ធ​នៅមិនទាន់គ្រប់គ្រាន់ឡើយ។ បន្ថែមលើសនេះ ក្រុមហ៊ុនរថយន្តនៅអាមេរិក ពេលនេះ​ក៏លែងសូវផ្តោតខ្លាំងលើរថយន្តអគ្គិសនី។

មិនខុសពីស្ថានភាពរថយន្តអគ្គិសនីនោះទេ ទីផ្សាររថយន្តអ៊ីដ្រូសែននៅអាមេរិក ជួបការលំបាកខ្លាំង ដោយសារមានតម្រូវការ និងហេដ្ឋារចនាសម្ព័ន្ធគាំទ្រតិចតួចបំផុត ដែល​ធ្វើឲ្យការសហការផលិតរថយន្តអ៊ីដ្រូសែន CR-V រវាងក្រុមហ៊ុន Honda និងក្រុមហ៊ុន GM ត្រូវបានបញ្ចប់​ដោយការចែកផ្លូវគ្នា។

រថយន្ត CR-V អ៊ីដ្រូសែន ឬ e:FCEV នេះ​ត្រូវបានផលិតនៅរោងចក្រ​ក្នុងរដ្ឋ Ohio ចាប់តាំងពីឆ្នាំ​២០២៤មក ប៉ុន្តែមិនត្រូវបានលក់ទាំងមូលទេ ពោលគឺ​សម្រាប់ការដាក់ជួលតែប៉ុណ្ណោះ ដោយត្រូវបង់ជាប្រចាំខែ ខណៈបានប្រគល់ឲ្យអតិថិជន បានត្រឹមប្រហែល ២០០គ្រឿងប៉ុណ្ណោះ។

ជាមួយគ្នានេះ រថយន្តអ៊ីដ្រូសែន Mirai របស់ Toyota ក៏ជួបនូវការធ្លាក់ចុះចំនួនលក់​ក្នុងឆ្នាំ​២០២៥ ផងដែរ ដោយមូលហេតុចម្បងនោះ គឺដោយសារគ្មានស្ថានីយផ្គត់ផ្គង់​អ៊ីដ្រូសែនគ្រប់គ្រាន់ឡើយ ភាគច្រើនមានតែនៅក្នុងរដ្ឋកាលីហ្វ័រញ៉ា។

យ៉ាងណាមិញ Toyota នៅតែបញ្ចេញ Mirai ស៊េរីឆ្នាំ២០២៦ បន្តទៀតបើទោះជាការលក់ធ្លាក់ចុះយ៉ាងណាក៏ដោយ ហើយថែមទាំងកំពុងវិនិយោគបន្ថែមដោយសហការជាមួយក្រុមហ៊ុនអាមេរិក លើគម្រោងពង្រីកហេដ្ឋារចនាសម្ព័ន្ធអ៊ីដ្រូសែននេះ។ Honda ក៏ដូចគ្នាដែរ មិនទាន់បោះបង់ចោលនោះទេ ពោលគឺបានប្រកាសថា នឹងស្រាវជ្រាវ អភិវឌ្ឍបន្ថែមលើរថយន្តប្រភេទនេះ ទោះជាបញ្ចប់ CR-V អ៊ីដ្រូសែនក៏ដោយ៕

ផ្ទាំងផ្សាយពាណិជ្ជកម្ម