ផ្លាកលេខយានជំនិះបាក់ រហែក រលុបអក្សរឬលេខ ឬត្រូវប្តូរថ្មី  អាចធ្វើការស្នើសុំប្តូរផ្លាកលេខថ្មីបាន ប៉ុន្តែរក្សាស៊េរី និងលេខនៅដដែល។ យ៉ាងណាមិញ ចំពោះផ្លាកលេខ ដែលរលុប ឬឆ្កូតតិចតួចដែលនៅអាចកំណត់អត្តសញ្ញាណយានជំនិះបាន  គឺមិនតម្រូវឱ្យធ្វើការប្តូរនោះទេ។

ចំពោះ ការស្នើសុំប្ដូរ បណ្ណ និង/ឬផ្លាកលេខសម្គាល់យានជំនិះដែលជាកម្មសិទ្ឋិរូបវន្តបុគ្គល ឬក្រុមហ៊ុន ត្រូវបំពេញបែបបទ និងភ្ជាប់ជាមួយនូវសំណុំឯកសារ ដូចខាងក្រោម៖

– ពាក្យស្នើសុំ (ដែលមានបិទកាល់លេខតួ ឬលេខសាក់ស៊ី ដែលចម្លងជាក់ស្តែងពីយានជំនិះ)

– អត្តសញ្ញាណម្ចាស់កម្មសិទ្ធិ

ករណី (ជារូបវន្តបុគ្គល)

. ពលរដ្ឋខ្មែរ៖ ច្បាប់ថតចម្លងអត្តសញ្ញាណប័ណ្ណសញ្ជាតិខ្មែរ ដែលមានបញ្ជាក់ពីស្ថាប័នមានសមត្ថកិច្ច

. ជនបរទេស៖ ច្បាប់ថតចម្លងលិខិតឆ្លងដែន និងទិដ្ឋាការមានសុពលភាព ដោយមានផ្តិតស្នាមមេដៃរបស់សាម៉ីខ្លួន និងច្បាប់ដើមលិខិតបញ្ជាក់ទីលំនៅបច្ចុប្បន្នចេញដោយស្ថាប័នមានសមត្ថកិច្ច

– អត្តសញ្ញាណម្ចាស់កម្មសិទ្ធិ

ករណី (ជាក្រុមហ៊ុន)

. ច្បាប់ថតចម្លងវិញ្ញាបនបត្របញ្ជាក់ការចុះឈ្មោះក្នុងបញ្ជីពាណិជ្ជកម្ម ដែលមានបញ្ជាក់ពីស្ថាប័នមានសមត្ថកិច្ច

. ច្បាប់ថតចម្លងបណ្ណប៉ាតង់ ដែលមានបញ្ជាក់ពីស្ថាប័នមានសមត្ថកិច្ច

– បណ្ណសម្គាល់យានជំនិះដែលត្រូវប្តូរ (ករណីបណ្ណសម្គាល់ រហែក ខូច ឬរលុបមើលមិនឃើញ)

– ផ្លាកលេខសម្គាល់យានជំនិះដែលត្រូវប្តូរ (ករណីបណ្ណសម្គាល់ រហែក ខូច ឬរលុបមើលមិនឃើញ)

– វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ ច្បាប់ថតចម្លង (ករណី ត្រីចក្រយានយន្ត និងរថយន្ត)៕

ផ្ទាំងផ្សាយពាណិជ្ជកម្ម

ប្រព័ន្ធសាំងរបស់​រថយន្ត រួមបញ្ចូលគ្នានូវគ្រឿងបង្គុំដែលផ្ទុក និងបញ្ជូនសាំង​ចេញពីធុងសាំង ចូលទៅដុតចំហេះក្នុងម៉ាស៊ីនដើម្បីដំណើរការរថយន្ត។ មុខងារចម្បង​នៃប្រព័ន្ធនេះ ផ្តល់នូវ​ការផ្គត់ផ្គង់​សាំងដែលត្រូវបានសម្អាត មុនចូលក្នុងម៉ាស៊ីន ដើម្បីឲ្យរថយន្តដំណើរការដោយរលូន ប្រសិទ្ធភាព កម្លាំងខ្លាំង និងកាត់បន្ថយការបញ្ចេញផ្សែង។

គ្រឿងបង្គុំក្នុងប្រព័ន្ធសាំង និងតួនាទីរបស់វារួមមានដូចជា៖

១. ធុងសាំងៈ ជាកន្លែងផ្ទុកសាំងរបស់រថយន្ត។

២. ទុយោសាំងៈ ជាកន្លែងនៃលំហូរសាំងចូលទៅក្នុងម៉ាស៊ីន ដែលវាត្រូវតែមានភាពធន់ ទប់កម្តៅ និងរក្សាសម្ពាធ ដើម្បីធានាដល់ការបញ្ជូនសាំង។

៣. តម្រងសាំងៈ វាជាអ្នកច្រោះសម្អាតដី ធូលី កម្ទចកម្ទីចេញពីសាំង មុនចូលទៅក្នុងម៉ាស៊ីន។

៤. បូមសាំងៈ វាជាអ្នកទាញយកសាំងចេញពីធុងសាំង ចូលទៅម៉ាស៊ីន។

៥. កុងទ័រសាំង៖ វាជារង្វាស់​មួយដែលអាចឲ្យអ្នកបើកបរ ប៉ាន់ស្មានពីកម្រិតសាំងដែលនៅសល់ក្នុងធុង។ ប្រសិនបើសាំងនៅសល់តិចមែនទែននោះ វានឹងលោតចេញសញ្ញាធុងសាំងនៅលើកុងទ័រ ដើម្បីឲ្យអ្នកបើកបរ ចាក់បំពេញឲ្យបានឆាប់។

៦. ប៊ិចសាំង៖ វាជាអ្នកបាញ់សាំងនៅក្នុងបន្ទប់ចំហេះដើម្បីដុតជាមួយល្បាយខ្យល់។

៧. ឧបករណ៍ថ្លឹងសម្ពាធសាំង៖ វាជាអ្នកសម្រួលលំហូរសាំង ស្របតាមតម្រូវការរបស់ម៉ាស៊ីន ហើយបើសាំងលើស វានឹងកំណត់​ឲ្យបញ្ជូនសាំងចូលក្នុងធុងវិញ។

៨. រ៉ែលសាំង (Fuel Rail): វាជាអ្នកបញ្ជូនសាំងដោយផ្ទាល់ទៅឲ្យប៊ិចសាំង ដោយវានៅជាប់ជាមួយគ្នាតែម្តង៕

ផ្ទាំងផ្សាយពាណិជ្ជកម្ម

មុខងារ​របស់​ប្រព័ន្ធម៉ាស៊ីនរថយន្ត គឺជាអ្នកបម្លែងសាំង ទៅជាថាមពលមេកានិច ដើម្បីឲ្យរថយន្តដំណើរការ ពោលវាគឺជាបេះដូងរបស់រថយន្ត។ ប្រព័ន្ធម៉ាស៊ីននេះ ត្រូវបានផ្គុំឡើងដោយគ្រឿងបង្គុំជាច្រើន និងបែងចែកជា ៣ផ្នែកសំខាន់ៗ គឺក្បាលគុយឡាស់ ប្លុកស៊ីឡាំង និងផ្នែកខាងក្រោមស៊ីឡាំងដែលជាកន្លែងកាទែប្រេង។

១. ក្បាលគុយឡាស់៖ ជាផ្នែកដែលស្ថិតនៅលើគេនៃម៉ាស៊ីន មានតួនាទីសំខាន់ៗ ដូចជា រក្សាបំណែន​នៃម៉ាស៊ីន គ្រប់គ្រងលំហូរល្បាយខ្យល់ ឥន្ធនៈ ការបញ្ចេញឧស្ម័ន និងគ្រប់គ្រងសីតុណ្ហភាព។ ក្នុងផ្នែកនេះ វាក៏ត្រូវភ្ជាប់មកជាមួយរ៉ងក្បាលគុយឡាស់ដើម្បីបិទជិតមិនឲ្យមានការលេចជ្រាបចូលគ្នារវាងប្រេង និងទឹកចូលដល់ក្នុងបន្ទប់ចំហេះឡើយ។ គ្រឿងបង្គុំសំខាន់ៗដែលស្ថិតក្នុងផ្នែកនេះ មានដូចជា ស៊ូប៉ាប់ ម៉ូប៊ីន ប៊ូស៊ី និងប៊ិចសាំងជាដើម។

២. ប្លុកស៊ីឡាំង៖ វាជាទីកន្លែងនៃស៊ីឡាំង ពីស្តុង និងឡាបអាកាម ពោលវាគឺជាកន្លែងនៃបន្ទប់ចំហេះតែម្តង។ ក្នុងផ្នែកនេះ វាក៏ជាកន្លែងនៃផ្លូវឆ្លងកាត់របស់ទឹកស្អំ ដើម្បីទប់កម្តៅម៉ាស៊ីន មិនឲ្យឡើងហួសកម្រិត និងជាកន្លែងដែលប្រេងហូររំអិលដល់គ្រឿងបង្គុំផ្សេងៗ។

៣. ផ្នែកខាងក្រោមស៊ីឡាំង ឬកាទែប្រេង៖ វាជាទីតាំងដែលស្ថិតនៅបាតម៉ាស៊ីន ជាកន្លែងផ្ទុកប្រេងម៉ាស៊ីន ដែលហូរត្រឡប់មកពីប្លុកស៊ីឡាំង ក្រោយពេលពន្លត់ម៉ាស៊ីនរថយន្ត។ នៅក្នុងផ្នែកនេះ ក៏មានបូមប្រេង ដែលវាមានតួនាទីជាអ្នកនាំយកប្រេងពីក្នុងកាទែ ចូលទៅរំអិលដល់គ្រឿងបង្គុំផងដែរ នៅពេលបញ្ឆេះម៉ាស៊ីន​រថយន្ត៕

ផ្ទាំងផ្សាយពាណិជ្ជកម្ម