កុំប្រេស័រ (compressor) ជាបេះដូងនៃប្រព័ន្ធម៉ាស៊ីនត្រជាក់រថយន្ត ដែលមានតួនាទីជាច្រើន បង្កើតភាពត្រជាក់ក្នុងកាប៊ីនរថយន្ត និងជួយកម្ចាត់អ័ព្ទចេញពីកញ្ចក់រថយន្តក្នុងពេលអាកាសធាតុខាងក្រៅចុះត្រជាក់ជាដើម។ ប៉ុន្តែនៅពេលដែលកុំប្រេស័រចាប់ផ្តើមចុះខ្សោយ ឬខូច វានឹងលេចចេញសញ្ញាមួយចំនួន​ដូចខាងក្រោមនេះ៖

១. ព្រិលម៉ាស៊ីនត្រជាក់ លែងបញ្ចេញខ្យល់ត្រជាក់ ដោយមានតែខ្យល់ក្តៅ នោះដោយសារតែកុំប្រេស័រ​មិនអាចគ្រប់គ្រងសម្ពាធខ្យល់បានទៀតឡើយ។

២. មានខ្យល់ត្រជាក់ដែរប៉ុន្តែបាញ់ចេញខ្យល់តិចៗ ចេញពីព្រិលម៉ាស៊ីនត្រជាក់ ទោះបើកកម្រិតវាខ្លាំងយ៉ាងណាក៏ដោយ នេះវាអាចពាក់ព័ន្ធការ​ចុះខ្សោយសមត្ថភាពធ្វើការរបស់កុំប្រេស័រ។

៣. មានសំឡេងលាន់ប្លែកចេញពីកុំប្រេស័រដែលស្ថិតនៅជាមួយប្លុកម៉ាស៊ីន ជាពិសេសក្នុងពេលបើកម៉ាស៊ីនត្រជាក់។

៤. ពេលកុំប្រូស័រខូច នឹងបណ្តាលឲ្យមានការលេចជ្រាបទឹកដែលមានជាតិរំអិល និងធុំក្លិនជាតិថ្នាំ នៅម្តុំកុំប្រូស័រ ឬក្នុងផ្នែកផ្សេងទៀតនៃប្រព័ន្ធម៉ាស៊ីនត្រជាក់។

ប្រសិនបើអ្នកកំពុងបើកបររថយន្ត ហើយស្រាប់តែជួបប្រទះសញ្ញាណាមួយក្នុងចំណោមសញ្ញាខាងលើនេះ ឬសញ្ញាផ្សេងៗទៀត ដែលអ្នកសង្ស័យថា អាចបណ្តាលមកពីបញ្ហាកុំប្រេស័រ ដំបូងបំផុតគឺបិទម៉ាស៊ីនត្រជាក់ជាបណ្តោះអាសន្នសិន ដើម្បីកាត់បន្ថយផលប៉ះពាល់ធ្ងន់ធ្ងរនៃប្រព័ន្ធម៉ាស៊ីនត្រជាក់ ហើយស្វែងរកការត្រួតពិនិត្យឲ្យបានត្រឹមត្រូវ នៅតាមការ៉ាស់ជំនាញឆាប់បំផុតតាមដែលអាចធ្វើបាន៕

ផ្ទាំងផ្សាយពាណិជ្ជកម្ម

ការប្រមូលពន្ធលើមធ្យោបាយដឹកជញ្ជូន ឬពន្ធផ្លូវ សម្រាប់ឆ្នាំ២០២៥នេះត្រូវបានបញ្ចប់ហើយត្រឹមថ្ងៃទី៣០ ខែវិច្ឆិកា ដោយអ្នកដែលយឺតយ៉ាវមិនទាន់បង់ ត្រូវទទួលការពិន័យគុណនឹង២។ ចុះបើអ្នកដែលទើបទិញ​រថយន្តថ្មីខ្លាញ់គោ ឬរថយន្តក្រដាសពន្ធ ក្នុងខែធ្នូនេះវិញ តើត្រូវបង់ពន្ធផ្លូវ សម្រាប់ឆ្នាំ២០២៥នេះដែរទេ ឬទទួលពិន័យដែរ ឬមិនចាំបាច់បង់ពន្ធទេ?

យោងតាមប្រកាសស្តីពីពន្ធលើមធ្យោបាយដឹកជញ្ជូន របស់​ក្រសួងសេដ្ឋកិច្ច និងហិរញ្ញវត្ថុ ចុះកាលពីថ្ងៃទី៣១ ខែតុលា ឆ្នាំ​២០២៤ បានបញ្ជាក់ពីលក្ខខណ្ឌដូចខាងក្រោមនេះ៖

១. ចំពោះ​រថយន្ត​មាន​បង្កាន់ដៃបង់ពន្ធនាំចូល ឬសន្លឹកពន្ធ ដែលចេញមុនខែធ្នូ តែមានបណ្ណសម្គាល់យានជំនិះ (កាតគ្រី) ចេញក្នុងខែធ្នូនេះ គឺត្រូវបង់ពន្ធផ្លូវសម្រាប់ឆ្នាំ២០២៥នេះផងដែរ ប៉ុន្តែមិនទទួលការពិន័យគុណនឹង២នោះទេ។

២. ចំពោះ​រថយន្តមានបង្កាន់ដៃបង់ពន្ធនាំចូល ដែលចេញក្នុងខែធ្នូនេះ ហើយកាតគ្រីក៏ចេញក្នុងខែធ្នូនេះដែរ គឺមិនចាំបាច់បង់ពន្ធផ្លូវឆ្នាំ២០២៥នេះទេ ពោលគឺត្រូវបានអនុញ្ញាតឲ្យបង់ពន្ធសម្រាប់ឆ្នាំក្រោយតែម្តង។

សូមជម្រាបបន្ថែមទៀតដែរថា សម្រាប់រថយន្តថ្មី​ដែលទើបតែត្រូវបានចុះបញ្ជីជាលើកដំបូង គឺម្ចាស់រថយន្ត​ត្រូវដាក់លិខិតប្រកាសបង់ពន្ធ និងបង់ពន្ធផ្លូវ នៅអគ្គនាយកដ្ឋានពន្ធដារ​ ឬសាខាពន្ធដារណាមួយ ដោយភ្ជាប់មកជាមួយឯកសារ២ប៉ុណ្ណោះគឺ កាតគ្រីច្បាប់ដើម និងអត្តសញ្ញាណបណ្ណ។ ជាមួយគ្នានេះ សម្រាប់​រថយន្តដឹកទំនិញ ឬរថយន្តដឹកអ្នកដំណើរ គឺត្រូវការបន្ថែមនូវវិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ (ឆៀក) ច្បាប់ដើមផងដែរ៕

សម្រាប់ព័ត៌មានបន្ថែមសូមទាក់ទងទៅកាន់អគ្គនាយកដ្ឋានពន្ធដារតាមរយៈទូរសព្ទលេខ ១២៧៧ ដោយឥតគិតថ្លៃ

ផ្ទាំងផ្សាយពាណិជ្ជកម្ម

បើសិនលោកអ្នកបានទិញរថយន្តមួយទឹកមានផ្លាកលេខស្រាប់ ដែលត្រូវបានទិញលក់តៗគ្នាជាច្រើននាក់ ហើយអ្នកមិនអាចរកឃើញម្ចាស់ដើមដែលមានឈ្មោះក្នុងកាតគ្រីនៃរថយន្តនោះ តើធ្វើដូចម្តេចទើបអាចផ្ទេរកម្មសិទ្ធិ ឬកាត់ឈ្មោះ ស្របតាមច្បាប់ មកដាក់ឈ្មោះអ្នកវិញបាន?

បើតាមក្រសួងសាធារណការ និងដឹកជញ្ជូន បានឲ្យដឹងថា ក្នុងករណីរថយន្តនោះ ពុំអាចរកម្ចាស់ដើមឃើញដែលត្រូវបានលក់ទិញបន្តគ្នា អ្នកកាន់កាប់រថយន្តបច្ចុប្បន្ន ត្រូវទៅផ្តិតស្នាមមេដៃលើកិច្ចសន្យាធានានៅប៉ុស្តិ៍នគរបាលរដ្ឋបាល ដែលខ្លួនរស់នៅ។

គួរដឹងដែរថា ចំពោះការធ្វើកិច្ចសន្យាធានានេះ នាយប៉ុស្តិ៍នគរបាលរដ្ឋបាល នឹងតម្រូវឲ្យលោកអ្នកយកមកនូវឯកសារមួយចំនួន រួមទាំងសាក្សីផងដែរ ដើម្បីបញ្ជាក់ថា លោកអ្នកពិតជាម្ចាស់រថយន្តនោះប្រាកដមែន។

បន្ទាប់ពីទទួលបាន​កិច្ចសន្យាធានានេះហើយ អ្នកអាចអញ្ជើញទៅទីតាំងផ្តល់សេវាសាធារណៈណាមួយរបស់ក្រសួងសាធារណការ និងដឹកជញ្ជូន ជាមួយឯកសារតម្រូវផ្សេងៗទៀតរួមមាន៖

– ពាក្យសុំផ្ទេរកម្មសិទ្ធិ ដែលមានកាល់លេខតួ ឬលេខសាក់ស៊ី (ដែលចម្លងជាក់ស្តែងពីយានយន្ត)

– អត្តសញ្ញាណអ្នកលក់ និងអ្នកទិញ៖

*ពលរដ្ឋខ្មែរ៖ អត្តសញ្ញាណប័ណ្ណសញ្ជាតិខ្មែរ (ច្បាប់ចម្លងដែលមានបញ្ជាក់ពីអាជ្ញាធរមានសមត្ថកិច្ច)

-ក្នុងករណីអាសយដ្ឋានបច្ចប្បន្ន ខុសពីអាសយដ្ឋានដែលមាននៅក្នុងអត្តសញ្ញាណប័ណ្ណសញ្ជាតិខ្មែរ ត្រូវភ្ជាប់មកជាមួយសៀវភៅគ្រួសារ ឬសៀវភៅស្នាក់នៅដែលមានបញ្ជាក់ពីអាជ្ញាធរមានសមត្ថកិច្ច។

– បណ្ណសម្គាល់យានជំនិះ ឬកាតគ្រី (ច្បាប់ដើម) និងផ្លាកលេខសម្គាល់យានជំនិះ (ករណីផ្ទេរកម្មសិទ្ធិឆ្លងរាជធានី-ខេត្ត)

– វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ (ឆៀក)

– លិខិតលក់ទិញរថយន្ត

– បង្កាន់ដៃពន្ធផ្លូវ (ក្នុងពេលប្រមូលពន្ធមធ្យោបាយយានយន្ត)

កម្រៃសេវា៖

-ក្នុងរាជធានី-ខេត្ត ៤៨ ០០០ រៀល

-ឆ្លងរាជធានី-ខេត្ត ១០១ ០០០ រៀល

សូមបញ្ជាក់ថា តម្លៃនេះ មិនរួមបញ្ចូលពន្ធប្រថាប់ត្រា ៤% របស់អគ្គនាយកដ្ឋានពន្ធដារនោះទេ៕

ផ្ទាំងផ្សាយពាណិជ្ជកម្ម