បងប្អូន​ប្រជាពលរដ្ឋ នឹងសម្រុកធ្វើដំណើរច្រើន​នៅថ្ងៃឈប់សម្រាកបុណ្យអុំទូក​ខាងមុខនេះ។ យ៉ាងណាមិញ សម្រាប់​អ្នកបើកបរ ឬម្ចាស់រថយន្ត ដាច់ខាតមិនត្រូវភ្លេចយកឯកសារ ចំនួន៣នេះឡើយ គឺបណ្ណបើកបរ បណ្ណសម្គាល់យានជំនិះ (កាតគ្រី) និង វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ (ឆៀក)។

យោងតាមសេចក្តីជូនដំណឹងរបស់​ក្រសួងសាធារណការ និងដឹកជញ្ជូន កាលពីថ្ងៃទី៥ ខែសីហា ឆ្នាំ២០២២ ឲ្យដឹងថា ឯកសារភ្ជាប់តាមខ្លួននៅពេលបើកបរយានយន្ត រួមមាន៖

១. បណ្ណបើកបរយានយន្ត ឬ ពាក់មីច្បាប់ដើម

២. បណ្ណសម្គាល់យានជំនិះ ឬកាតគ្រី ដែលមាន QR Code អាចប្រើច្បាប់ថតចម្លងបាន។ ប៉ុន្តែកាតគ្រីស៊េរីចាស់មិនមាន QR Code គឺត្រូវមានការបញ្ជាក់ពីស្ថាប័នមានសមត្ថកិច្ចលើច្បាប់ថតចម្លងនោះ។

៣. វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ ឬឆៀក អាចប្រើឯកសារ ច្បាប់ថតចម្លងបាន។

សូមបញ្ជាក់បន្ថែមថា សម្រាប់បណ្ណបើកបរ និងឆៀក គឺត្រូវមានសុពលភាព ហើយជាមួយគ្នានេះ ក៏មិនត្រូវភ្លេចបង់ពន្ធលើមធ្យោបាយដឹកជញ្ជូន ឬពន្ធផ្លូវ តាមកាលកំណត់ផងដែរ។

ដោយឡែក​ ចំពោះ​រថយន្ត​ដែលប្រកបអាជីវកម្មដឹកជញ្ជូនទំនិញ ឬអ្នកដំណើរ ត្រូវភ្ជាប់តាមខ្លួនបន្ថែម​នូវលិខិតអនុញ្ញាតឲ្យយានយន្ត​ធ្វើអាជីវកម្មដឹកជញ្ជូន អាចប្រើប្រាស់​ ឯកសារច្បាប់ថតចម្លង៕

ផ្ទាំងផ្សាយពាណិជ្ជកម្ម

ក្នុងឱកាសថ្ងៃ្ងបុណ្យឈប់សម្រាកខាងមុខនេះ បងប្អូនប្រជាពលរដ្ឋនឹងធ្វើដំណើរកម្សាន្តទៅតាមបណ្តារមណីយដ្ឋាននានា ក្នុងនោះ ក៏នឹងមានការធ្វើដំណើរតាមផ្លូវល្បឿនលឿនទៅលេងខេត្តព្រះសីហនុផងដែរ។ យ៉ាងណាមិញ ប្រសិនបើអ្នកទើបទិញរថយន្តថ្មី មិនទាន់មានផ្លាកលេខ និងឆៀក ទេនោះ គឺនឹងមិនត្រូវបានអនុញ្ញាតឲ្យចូលប្រើប្រាស់ផ្លូវល្បឿនលឿននេះឡើយ។

ក្រសួងសាធារណការ និងដឹកជញ្ជូន បាន​បញ្ជាក់រួចមកហើយ ក្នុងពេលចាប់ផ្តើមដាក់ដំណើរការផ្លូវល្បឿនលឿនភ្នំពេញ-ព្រះសីហនុ យ៉ាងដូច្នេះថា៖ រាល់យានយន្តចូលប្រើប្រាស់ផ្លូវល្បឿនលឿន​ ត្រូវមាន៖

– ផ្លាកលេខសម្គាល់​យានយន្ត​

– ត្រួតពិនិត្យលក្ខណៈបច្ចេកទេស (ឆៀក)​ មានសុពលភាព

– កាតព្វកិច្ចផ្សេងៗតាមច្បាប់ដែលបានកំណត់។

គួរយល់ដឹងផងដែរថា មុនចូលបើកបរលើផ្លូវល្បឿនលឿននេះ គឺត្រូវត្រួតពិនិត្យលក្ខណៈបច្ចេកទេសយានយន្តឲ្យបានត្រឹមត្រូវ រួមមានៈ

១. ការពិនិត្យបឋម

– ទឹក ប្រេងម៉ាស៊ីន និងប្រេងឥន្ធនៈ ត្រូវមានបរិមាណគ្រប់គ្រាន់តាមកម្រិតកំណត់

– ភ្លើងសញ្ញាប្តូរទិស ភ្លើងហ្វា/កូត ភ្លើងហ្រ្វាំង ត្រូវពិនិត្យដំណើរការឱ្យបានល្អ

– សំបកកង់ ត្រូវមានជម្រៅក្រឡាល្អ កុំឱ្យមានស្នាមប្រេះ រហែក ប៉ោង និងត្រូវពិនិត្យសម្ពាធខ្យល់ក្នុងកង់ឱ្យបានត្រឹមត្រូវ កុំអោយតឹងពេក ឬធូរពេក។

២. សម្ភារៈចាំបាច់ដែលគួរមាននៅក្នុងរថយន្ត

– សម្ភារៈជួសជុលបឋម

– ចំណាំងផ្លាតពណ៌ក្រហមរាងត្រីកោណ

– បំពង់ពន្លត់អគ្គិភ័យ៕

ផ្ទាំងផ្សាយពាណិជ្ជកម្ម