ផ្ទាំងផ្សាយពាណិជ្ជកម្ម
Facebook Youtube
ទំព័រដើម កំណត់​ហេតុ​បណ្ដាញ ទំព័រ 450

ឡានអគ្គិសនី GAC AION Y Plus EV សាកថ្មម្តងជិះបាន ៦១០ គីឡូម៉ែត្រ តម្លៃខ្ទង់ ២មុឺនដុល្លារ ក្នុងប្រទេសចិន

[ទីផ្សារបរទេស] ក្រុមហ៊ុនផលិតរថយន្ត GAC បានធ្វើការដាក់បង្ហាញចេញនៅរថយន្តអគ្គិសនី AION Y Plus EV ស៊េរីថ្មី ជាមួយនឹងតម្លៃលក់ចាប់ពី ១៩ ៣៩៦ ដុល្លារ ដល់​ ២៤ ៩៦៨ ដុល្លារនៅក្នុងទីផ្សារប្រទេសចិន។

រថយន្តនេះមាន​ប្រវែងតួខ្លួនសរុប ៤ ៥៣៥ ម.ម ទទឹង ១ ៨៧០​ ម.ម កំពស់ ១៦៥០​ ម.ម និងប្រវែងគន្លាតកង់មុខ-ក្រោយ ២ ៧៥០ ម.ម ។ បើនិយាយពីការរចនាវិញ វាមានភាពលេចធ្លោជាមួយនឹងអំពូល LED ឲ្យឈ្មោះថា “Angel Wings Big Eyes” អបសងខាងនៃប៉ាណាមុខបិទជិត, ចង្កៀងខាងក្រោយប្រភេទ LED អូសកាត់ពីផ្នែកម្ខាងទៅផ្នែកម្ខាង​, កាងក្រោយទំហំធំ និងថាសកង់ស្ព័រត្រូវបានរចនាយ៉ាងពិសេស។

នៅខាងក្នុងបន្ទប់ប្រើប្រាស់ការរចនា V PLUS បន្ថែមពណ៌ថ្មីទៅ “Zero Focus Green” រួមទាំងអេក្រង់កំសាន្តបញ្ឈរ touchscreen ទំហំ ១៤,៦ អ៊ីញ និងកុងទ័រព័ត៌មានឌីជីថលទំហំ ១២,៣ អ៊ីញ ការធ្វើឲ្យប្រសើរឡើងនៅអេក្រង់ dual-screen dual-core, ប្រើប្រាស់បន្ទះឈីបចំនួន ២ សម្រាប់ ADiGO SPACE និងប្រព័ន្ធ ADiGO PILOT, ដំបូលបើកបែប Panoramic និងមុខងារ OTA update។

រថយន្តនេះ បានបំពាក់ជាមួយម៉ូទ័រអគ្គិសនីចំនួនមួយ អាចផលិតកម្លាំងបាន ២០១ សេះ និងកម្លាំងរមួល ២២៥ ញ៉ូតុនម៉ែត្រ ផ្គួបជាមួយអាគុយទំហំ ៦៣,៩៨ គីឡូវ៉ាត់ម៉ោង និង ៧៦,៨ គីឡូវ៉ាត់ម៉ោង អាចបើកបរបានចម្ងាយប្រហែល ៥១០​ គីឡូម៉ែត្រ ដល់ ៦១០ គីឡូម៉ែត្រក្នុងការសាកថ្មម្តង៕

ផ្ទាំងផ្សាយពាណិជ្ជកម្ម

តើរថយន្តប្រភេទស៊ីឌានម៉ូឌែលមួយណាដែលមានការរចនាល្អជាងគេនៅកម្ពុជា?

ការទិញរថយន្តមិនពិបាកណាស់ណាទេ អ្វីដែលពិបាកនោះគឺការជ្រើសរើសរថយន្តដែលល្អបំផុតសម្រាប់ខ្លួនអ្នក។ ទោះជាយ៉ាងណាក៏ដោយ វាមិនងាយស្រួលទេក្នុងការចំណាយច្រើនពេកលើតម្លៃរថយន្ត ប៉ុន្តែនៅមុនពេលដែលអ្នកសម្រេចចិត្តចំណាយលុយលើរថយន្តនោះ អ្នកគួរតែដឹងថារថយន្តមួយណាដែលកំពុងពេញនិយម មានការរចនាល្អ តម្លៃសមរម្យ បច្ចេកវិទ្យាថ្មីទំនើប និងលក្ខណៈពិសេសជាច្រើដែលអ្នកត្រូវការពីរថយន្តក្នុងក្តីស្រមៃរបស់អ្នក។ មានរថយន្តជាច្រើនប្រភេទត្រូវបានគេនាំចូលមកកាន់ទីផ្សារប្រទេសកម្ពុជាដូចជាប្រភេទ ស៊ីឌាន Sedan, Crossover, SUV និង ភីកអាប់។ ប្រសិនបើអ្នកជាមនុស្សម្នាក់ដែលចូលចិត្តលេងស្ទាយលើរថយន្តដើម្បីបង្ហាញពីស្ទីលផ្ទាល់ខ្លួនរបស់អ្នក នោះរថយន្តប្រភេទស៊ីឌាននឹងស្ថិតនៅក្នុងចិត្តរបស់អ្នក។ ដូច្នេះហើយថ្ងៃនេះ យើងខ្ញុំសូមបង្ហាញអំពីរថយន្ត៥ម៉ូឌែលនៃរថយន្តស៊ីឌានដែលមានការរចនាល្អទាក់ទាញ និងពេញនិយមនៅក្នុងប្រទេសកម្ពុជានាពេលបច្ចុប្បន្ននេះ។

១. រថយន្ត New MG GT: MG គឺជាម៉ាកយីហោរថយន្តរបស់ចក្រភពអង់គ្លេសដែលទើបតែបង្ហាញវត្តមានផ្លូវការនូវរថយន្ត MG GT ស៊េរីថ្មីក្នុងប្រទេសកម្ពុជា ដែលមានការរចនាបែបស្ព័រនៃជំនាន់ទី៣របស់ខ្លួនជាមួយនឹងរូបរាងយ៉ាងប្រណីតទាក់ទាញ និងមានភាពស៊ីវីល័យខ្ពស់។ ការបំផុសគំនិតនៃការរចនារថយន្ត MG GT គឺចេញមកពីរថយន្តស្ព័របុរាន MGB ដែលជារថយន្តស្ព័រទ្វារពីរ ហើយមានការផលិត និងដាក់លក់នៅលើទីផ្សារពីតាំងពីឆ្នាំ ១៩៦២ រហូតដល់ឆ្នាំ ១៩៨០ តាមរយៈអាជីវកម្មមួយរបស់ចក្រភពអង់គ្លេស (British Motor)។ រថយន្ត MG GT បានភ្ជាប់មកជាមួយថាមពលដ៏អស្ចារ្យពីម៉ាស៊ីនសាំងចំណុះ ១,៥ លីត្រ បន្ថែមជាមួយតួបូ (Turbo) ដែលផ្តល់នូវការស៊ីប្រេងឥន្ធនៈទាប និងមានកម្លាំងរហូតដល់ ១៦៩ សេះ និងកម្លាំងរមួល ២៥០ ញ៉ូតុនម៉ែត្រ។ ម៉ូដែលនេះក៏បានភ្ជាប់មកជាមួយនឹងចំណុចពិសេសជាច្រើនដែលធ្វើអោយអ្នកប្រើប្រាស់កាន់តែមានផាសុកភាព និងសុវត្ថិភាព និងពិសេសតម្លៃសមរម្យត្រឹមតែ ៣៨ ៩៩០ ដុល្លារ  ប៉ុណ្ណោះ។

២. រថយន្ត Mazda 3: ប្រសិនបើអ្នកកំពុងស្វែងរករថយន្តប្រភេទស៊ីឌានពីប្រេន Mazda នោះម៉ូដែល 3 នឹងជាជម្រើសរបស់អ្នក ដែលវាជាប្រភេទរថយន្តស៊ីឌានកំពុងពេញនិយមក្នុងជួររបស់ Mazda ផងដែរ ហើយវាមានតម្លៃល្អត្រឹម ៥២ ០០០ ដុល្លារ ប៉ុណ្ណោះ។ ការរចនាដ៏រលើបរលោង និងឆើតឆាយរបស់វាបានជំរុញឱ្យអ្នកប្រើប្រាស់នូវកម្រិតខ្ពស់នៃភាពលេចធ្លោ និងបានឆក់យកអារម្មណ៍ពីអ្នកបើកបរតាមរយៈ រូបរាងដ៏ប្រណីត និងការបើកបរបែបរថយន្តស្ព័រ។ រថយន្តប្រភេទស៊ីឌានផ្សេងទៀតដូចជា Honda Civic និង Toyota Corolla ហាក់ដូចជាមានភាពស៊ីវិល័យជាង ក៏ប៉ុន្តែរថយន្ត Mazda 3 ត្រូវបានផលិតឡើងសម្រាប់អ្នកទិញដែលចូលចិត្តផ្តល់នូវបទពិសោធន៍នៃការបើកបរដ៏រីករាយ និងប្រណិតភាពនៃផ្នែកខាងក្នុងផងដែរ។

៣. រថយន្ត MG6: នៅក្នុងជួរនៃម៉ាកយីហោ MG, រថយន្ត MG6 ក៏រួមបញ្ចូលក្នុងចំណាត់ថ្នាក់នៃរថយន្តប្រភេទស៊ីឌានពេញនិយមនៅប្រទេសកម្ពុជា និងមានរូបរាងទាក់ទាញផងដែរជាមួយនឹងការរចនាបែបស្ព័រយ៉ាងទាន់សម័យ ហើយអ្វីដែលគួរឱ្យចាប់អារម្មណ៍ជាងនេះទៅទៀតនោះគឺថា កាប៊ីនខាងក្នុងមានលក្ខណៈពិសេសជាមួយនឹងគ្រឿងតុបតែងពីរពណ៌គឺ ក្រហមលាយខ្មៅយ៉ាងប្រណិតដើម្បីបន្ថែមភាពទាក់ទាញបន្ថែមទៀតដល់ MG6។ ចំណែកទំហំនៃកន្លែងដាក់ជើងវិញគឺពិតជាធំទូលាយជាងរថយន្តក្នុងជួរថ្នាក់របស់វាដែលមានចំណុះ ៤៥៨ លីត្រ។ រថយន្ត MG6 ក៏ជារថយន្តដែលលក់ដាច់បំផុត និងបានទាក់ទាញដល់យុវវ័យជំនាន់ថ្មីជាច្រើន ជាមួយនឹងតម្លៃដ៏សមរម្យត្រឹមតែ ៣៣ ៥០០ ដុល្លារ  ប៉ុណ្ណោះនិងមានភាពងាយស្រួលសម្រាប់អ្នកទិញក្នុងការក្លាយជាម្ចាស់រថយន្ត MG6 តាមរយៈការបង់រំលោះនិងទិញដាច់។

៥. រថយន្ត KIA Soluto: រថយន្តប្រភេទស៊ីឌានរបស់Kiaនេះក៏មានការរចនាដ៏ល្អជាមួយនឹងដំណើរការស្មូតនៃម៉ាស៊ីនសាំង 95-Ps 1.4MPI ជាមួយនឹងប្រអប់លេខអូតូស្វ័យប្រវត្តិ4វគ្គ ហើយក៏មានជម្រើសដ៏ឆ្លាតវៃសម្រាប់អ្នកបើកបរផងដែរ។ លោកអ្នកអាចក្លាយជាម្ចាស់រថយន្ត KIA Soluto ដែលផ្តល់អត្ថប្រយោជន៍ល្អសម្រាប់អ្នកទិញ។ ការរចនាផ្នែកខាងក្រៅរបស់ KIA Soluto មើលទៅសាមញ្ញប៉ុន្តែទំនើប ហើយកាប៊ីនខាងក្នុងក៏មានកៅអីពូកស្បែកពណ៌ខ្មៅលាយសរ ដែលធ្វើឲ្យអ្នកបើកបរ និងអ្នកដំណើរអាចទទួលបានអារម្មណ៏ស្រស់ស្រាយផងដែរ។

៥. រថយន្ត BMW The 4: វាក៏មានជម្រើសបែបស្ព័រដ៏ពិសេសនាឆ្នាំ២០២២ ជាមួយនឹងម៉ូឌែល BMW The 4 ដែលជារថយន្តស្ទីលថ្មីបែបស្ព័រ និងផ្តល់នូវផាសុកភាពខ្ពស់ក្នុងការបើកបរ។ ផ្នែកខាងក្រៅ និងផ្នែកខាងក្នុងនៃរថយន្តនេះបានរចនាយ៉ាងប្រណីត ហើយផ្នែកខាងក្នុងរបស់វាផ្តល់នូវបច្ចេកវិទ្យាថ្មីៗទំនើប ដែលជាលក្ខណៈពិសេសនៃក្តីស្រមៃរបស់អ្នកទិញរថយន្តគ្រប់រូបទៀតផង។ ដំណើរការរបស់វាគឺពិតជាអស្ចារ្យណាស់ ដែលបង្កើននូវថាមពលខ្លាំង និងមានលំនឹងល្អក្នុងការបើកបរជាមួយនឹងបទពិសោធន៍ថ្មីពី BMW The 4។

ទីផ្សាររថយន្តប្រភេទស៊ីឌានគឺពិតជាទូលំទូលាយណាស់ ហើយផ្តល់ជម្រើសជាច្រើនសម្រាប់អ្នកទិញជាមួយ តម្លៃសមរម្យ ការរចនាដ៏ល្អគួរឱ្យទាក់ទាញ និងប្រព័ន្ធសុវត្ថិភាពខ្ពស់។ យ៉ាងណាមិញរថយន្តប្រភេទស៊ីឌានដែលបានរៀបរាប់ខាងលើគឺមានការពេញនិយមយ៉ាងខ្លាំងនៅក្នុងប្រទេសកម្ពុជា ដោយសារតែដំណើរការម៉ាស៊ីនខ្លាំង និងរូបរាងដ៏ទាក់ទាញ។ ទន្ទឹមនឹងនេះដែរ ប្រសិនបើអ្នកកំពុងស្វែងរករថយន្តដ៏ពេញនិយមជាមួយនឹងការរចនាបែបស្ព័រ អមជាមួយភាពធំទូលាយនោះ MG GT នឹងក្លាយជាជម្រើសទី១របស់អ្នកព្រោះវាជារថយន្តដែលលក់ដាច់បំផុតនិងមានលក្ខណៈពិសេសច្រើន ហើយប្រសិនបើអ្នកកំពុងស្វែងរករថយន្តប្រណិតដែលមានតម្លៃថ្លៃ លោកអ្នកអាចធ្វើការសម្រេចចិត្តជាមួយយីហោ BMW បាន៕

ផ្ទាំងផ្សាយពាណិជ្ជកម្ម

ឡាន Toyota Crown នឹងមានលក់ជាប្រភេទសាកភ្លើងបាន

[ទីផ្សារបរទេស] យើងបានដឹងរួចមកហើយថា Toyota Crown នឹងមាន​ចេញ​លក់​ជា​មួយ​ជម្រើស​ម៉ាស៊ីន Hybrid ពីរ​ប្រភេទ ជាមួយ​រូបរាងចំនួន៤ប្រភេទផ្សេងៗគ្នារបស់វា។

ពេលនេះដែរ បើតាម Motor Trend ឲ្យដឹងថារថយន្តជំនាន់ថ្មីនេះនឹងមាន​ជា​ជម្រើស PHEV មួយទៀត។ លោក Akio Toyoda បាន​លើក​ឡើង​ពី​ប្រភេទ PHEV នេះដោយផ្ទាល់ នៅ​ក្នុង​ជំនួបជាមួយ​ឈ្មួញលក់រថយន្តនៅឯទីក្រុង Las Vegas កាលពី​ដើម​សប្ដាហ៍។

ពេលប្រកាសចេញដំបូង រថយន្ត Toyota Crown ជំនាន់ថ្មី មានតែជម្រើសម៉ាស៊ីន Hybrid ប៉ុណ្ណោះ ដោយ​ម៉ាស៊ីន Hybrid ស្តង់ដារគឺមាន​ប្រើ​ម៉ាស៊ីន ២,៥លីត្រ ៤ស៊ីឡាំង ជាមួយម៉ូទ័រអគ្គិសនីពីរ ឯប្រភេទ Hybrid Max វិញ មានប្រើម៉ាស៊ីន ២,៤លីត្រ ប្រភេទ Turbocharged ជាមួយ​ម៉ូទ័រអគ្គិសនីពីរនៅខាងមុខ និងខាងក្រោយ។

អំពីប្រភេទ PHEV លោក Toyoda មិនបានប្រាប់ពីលក្ខណៈសម្បត្តិរបស់វានោះទេ ប៉ុន្តែវាទំនង​ជា​ប្រើអាគុយ​ទំហំធំ ដើម្បី​អាចផ្ដល់​ចម្ងាយឆ្ងាយសម្រាប់ការបើកដោយប្រើថាមពលអគ្គិសនីសុទ្ធ។ គួរដឹងថា​ Toyota បាន​មានប្រើប្រាស់រួចមកហើយនូវបច្ចេកវិទ្យា PHEV នេះ ដោយបានប្រើលើរថយន្ត RAV4 Prime ហើយវាអាចផ្ដល់ចម្ងាយបើកបរបាន ៦៧គីឡូម៉ែត្រ បើ​ប្រើ​ថាមពល​អគ្គិសនីសុទ្ធ ជាមួយអាគុយ ១៨,១kWh៕

 

ផ្ទាំងផ្សាយពាណិជ្ជកម្ម

រថយន្ត​ថ្មី​ជាង​ពាក់​កណ្តាល​នៅ​អាមេរិក​នឹង​ប្រើ​អគ្គិសនី​នៅ​ឆ្នាំ ​២០៣០

[បរទេស] កាលពីពេលថ្មីៗ កន្លងទៅនេះ យោងតាមអ្នកវិភាគនិយាយថា ការលើកទឹកចិត្តដូចជាឥណទានពន្ធថ្មីសម្រាប់អ្នកទិញរថយន្តអគ្គិសនី នឹងជួយឲ្យទីផ្សារផ្ទុះឡើងក្នុងរយៈពេលប៉ុន្មានឆ្នាំខាងមុខ ពោលគីនៅឆ្នាំ ២០៣០។ ទោះបីជាលោកប្រធានាធិបតី Joe Biden មិនទាន់បានធ្វើការផ្លាស់ប្តូរណាមួយដើម្បីឲ្យរដ្ឋនានាហាមឃាត់ការលក់រថយន្តចំហេះក្នុងក៏ដោយ។

ជាមួយគ្នានេះ យោងតាមរបាយការណ៍ថ្មីមួយដោយគេហទំព័រ BloombergNEF បានប៉ាន់ប្រមាណថា ការលក់រថយន្តអគ្គិសនី ស្ថិតនៅលើការកើនឡើង ៤៣% នៃរថយន្តថ្មីដែលបានទិញក្នុងឆ្នាំ ២០៣០ ហើយមានជម្រើសកាន់តែច្រើននៅក្នុងទីផ្សារអគ្គិសនីថ្មី និងការបង្កើនការទទួលយកអ្នកប្រើប្រាស់រថយន្តអគ្គិសនី។

ប៉ុន្តែការប៉ាន់ស្មានទាំងនោះត្រូវបានកែសម្រួលបន្ទាប់ពីរដ្ឋាភិបាលសហរដ្ឋអាមេរិកបានអនុម័តច្បាប់កាត់បន្ថយអតិផរណានៅក្នុងខែសីហាឆ្នាំនេះ ដោយជំរុញឱ្យការព្យាករណ៍ឆ្នាំ ២០៣០ កើនឡើងដល់ ៥២%។ តួលេខនេះច្រើនជាងការសន្យារបស់លោក Biden ពីមុនដែលថាពាក់កណ្តាលនៃរថយន្តទាំងអស់គួរតែជារថយន្តអគ្គិសនី រថយន្ត Plug-in Hybrid ឬ Fuel Cell (រថយន្តប្រើប្រេង) ដែលដំណើរការនៅចុងទសវត្សរ៍នេះ។

 

អ្នកវិភាគ BloombergNEF បានទទួលស្គាល់ថា ការលក់រថយន្តអគ្គិសនី ប្រហែលជាមិនហក់ឡើងខ្លាំងក្នុងប៉ុន្មានឆ្នាំខាងមុខនោះទេ ដោយមួយផ្នែកដោយសារតែច្បាប់ឥណទានពន្ធថ្មីមានន័យថា ជំនួយពេញ ៧ ៥០០ ដុល្លារគឺបើកសម្រាប់តែរថយន្តដែលផលិតនៅអាមេរិកខាងជើងប៉ុណ្ណោះ ហើយក៏មានការរឹតបន្តឹងលើកន្លែងដែលអាគុយមានប្រភពផងដែរ។

គួរបញ្ជាក់ផងដែរថា ចំនួនរថយន្តអគ្គីសនីនៅអាមេរិកត្រូវបានគេរំពឹងថានឹងកើនឡើងយ៉ាងខ្លាំងនៅពេលដែលយើងខិតជិតពាក់កណ្តាលទសវត្សរ៍ក្រោយ ដោយមានជំនួយពីច្បាប់ដែលហាមប្រាមរថយន្តដែលប្រើម៉ាស៊ីនចំហេះក្នុងនៅក្នុងរដ្ឋជាច្រើន៕

ផ្ទាំងផ្សាយពាណិជ្ជកម្ម

ក្រុមហ៊ុនចិន Geely ទិញបានភាគហ៊ុនរបស់ Aston Martin ចំនួន ៧,៦%

[ទីផ្សារបរទេស] កាលពីដើមឆ្នាំ ក្រុមហ៊ុន Aston Martin Lagonda បានច្រានចោលសំណើរ​ទិញ​ភាគហ៊ុន​ពី​ក្រុមហ៊ុនរថយន្ត​ចិន Geely ដោយពេលនោះបាន​ប្រាប់ហេតុផល​ថា​សំណើរនេះ​មិន​មែន​ជា​ជម្រើស​ដ៏​ទាក់ទាញ ឬ​ផ្ដល់​តម្លៃ​ខ្ពស់​ដល់​ម្ចាស់​ភាគហ៊ុននោះទេ។

យ៉ាងណាក្ដី ពេលនេះ​​ក្រុមហ៊ុន Geely បានចេញសេចក្ដីប្រកាស​ឲ្យដឹងថា​ខ្លួន​បាន​សម្រេចកិច្ចព្រមព្រៀង​ទិញលក់​ភាគ​ហ៊ុន​ជាមួយ Aston Martin Lagonda ហើយ។ ក្រុមហ៊ុនធំរបស់ចិននេះ បាន​​សម្រេចការទិញយកភាគហ៊ុនរបស់ Aston Martin ចំនួន ៧,៦% ដោយ​មិនបានបញ្ជាក់ពីតម្លៃ។

ក្រោយការទិញនេះ Geely នឹងចូលរួមជាមួយមូលនិធិវិនិយោគសាធារណៈរបស់អារ៉ាប៊ីសាអ៊ូឌីតដែលមាន​ភាគហ៊ុន ១៦,៧% និង​សម្ព័ន្ធ Yew Tree មាន​ភាគហ៊ុន ១៨,៣% រួមជាមួយ Mercedes ដែលមានចំណែកភាគហ៊ុន ៩,៧%។

ក្រុមហ៊ុន Geely បានគ្រប់គ្រងម៉ាករថយន្តជាច្រើនរួមមាន Volvo, Lotus, Polestar, Proton និង London Electric Vehicle Company (LEVC) រួមទាំងម៉ាករថយន្តថ្មីដូចជា Lynk & Co, Zeekr និង Geometry ផងដែរ៕

ផ្ទាំងផ្សាយពាណិជ្ជកម្ម

Rolls-Royce Boat Tail តម្លៃជាង ២៦ លានដុល្លារ ជារថយន្តថ្លៃជាងគេក្នុងចំនោមរថយន្តទាំង ៥ លើលោក

[បរទេស] រថយន្តថ្លៃបំផុតក្នុងពិភពលោកពីក្រុមហ៊ុនរថយន្តឈានមុខនានា ពីព្រោះរថយន្តទំនើបថ្លៃៗអាចបង្ហាញពីស្ថានភាពរបស់ពួកគេ ដែលជួយបង្កើនមុខមាត់ និងមុខក្នុងសង្គមសម្រាប់ម្ចាស់ផងដែរ។ យោងតាមគេហទំព័រ Amazing Road ក្នុងបញ្ជី World of Speed ​​បានប្រមូលផ្តុំនូវរថយន្តប្រណីតល្អបំផុត។ ខាងក្រោមនេះ ជាថយន្តថ្លៃបំផុតទាំង ៥ នៅលើពិភពលោកសម្រាប់ឆ្នាំ ២០២២៖

១) Rolls-Royce Boat Tail៖ ជារថយន្តដែលមានតម្លៃថ្លៃបំផុតរបស់ពិភពលោកក្នុងឆ្នាំ ២០២២  ជាមួយនឹងលក្ខណៈពិសេសចុងក្រោយបំផុតដែលផលិតឡើងយ៉ាងពិសេស គួបផ្សំជាមួយនឹងការរចនាដ៏ប្រណិតពីទូកទេសចរណ៍លំដាប់ពិភពលោក  ជាមួយនឹងតម្លៃ ២៦ ០២៧ ៩៦១ ដុល្លារ  ដែលផលិតបានតែ ៣ គ្រឿងប៉ុណ្ណោះនៅលើពិភពលោក។

២) Bugatti La Voiture Noire៖ ជារថយន្តតែមួយគត់នៅលើលោកដែលចាយពេលផលិត ២ ឆ្នាំពេញ និងមានតម្លៃ ១៧ ៣៩៥ ៧៤៦ ដុល្លារ ម្ចាស់បច្ចុប្បន្នគឺខ្សែប្រយុទ្ធ Cristiano Ronaldo របស់ក្រុម Manchester United ។ រថយន្តនេះប្រើប្រាស់ម៉ាស៊ីនចំណុះ ៨ លីត្រ W16 មានកម្លាំង ១ ៥០០ សេះ។

៣) Bugatti Centodieci៖ ជារថយន្តផលិតឡើងដើម្បីអបអរខួបលើកទី ១១០ ឆ្នាំ របស់ Buggatti ដែលមានតម្លៃ ៨ ៣៧៦ ៣០៨ ដុល្លារ ដោយមានត្រឹមតែ ១០ គ្រឿងប៉ុណ្ណោះ។ រថយន្តនេះ ប្រើប្រាស់ម៉ាស៊ីនចំណុះ ៨ លីត្រ W16 មានកម្លាំង ១ ៦០០ សេះ។

៤) Mercedes Maybach Exelero៖ រថយន្តនេះបានចេញលក់ជាផ្លូវការក្នុងឆ្នាំ ២០០៤ ដែលជា រថយន្តមានែតមួយគត់លើពិភពលោក មានតម្លៃ ៧ ៤៣៧ ៤៥២ ដុល្លារ ម៉ាស៊ីនប្រើម៉ាស៊ីន V12 ចំណុះ ៥,៩ លីត្រ មានកម្លាំង ៦៩០ សេះ។​

៥) Bugatti Divo៖ វាជារថយន្តដ៏កម្រ និងថ្លៃបំផុតមួយ ដែលមានតម្លៃ ៥ ៤០១ ៧២៦ ដុល្លារ ដែលផលិតបានតែ ៤០ គ្រឿងប៉ុណ្ណោះនៅលើពិភពលោក ត្រូវបានបំពាក់ដោយម៉ាស៊ីនចំណុះ ៨,០ លីត្រ W16 ដែលមានកម្លាំង ១ ៥០០ សេះ៕

 

ផ្ទាំងផ្សាយពាណិជ្ជកម្ម

Toyota បង្ហាញម៉ូដែលពិសេសចុងក្រោយ FJ Cruiser ២០២៣ មុនពេលបញ្ចប់ជីវិតម៉ូដែលនេះ

[បរទេស] ក្រុមហ៊ុនផលិតរថយន្ត Toyota គ្រោងនឹងធ្វើការផលិតម៉ូដែល FJ Cruiser Final Edition ដែលជាម៉ូដែលចុងក្រោយរបស់ FJ Cruiser ជាមួយចំនួនមានកំណត់ត្រឹមតែ​ ១ ០០០ គ្រឿងប៉ុណ្ណោះ មុនពេលរថយន្តនេះត្រូវបានឈប់ផលិតនៅមជ្ឈិមបូព៌ានៅខែធ្នូឆ្នាំ ២០២២។

FJ Cruiser ត្រូវបានដាក់បង្ហាញនៅមជ្ឈិមបូព៌ា ឬអាស៊ីកណ្តាល តាំងពីឆ្នាំ ២០០៧ ហើយបានបន្តការលក់របស់ខ្លួន ទោះបីជាត្រូវបានទាញចេញពីទីផ្សារផ្សេងទៀតទាំងអស់ក៏ដោយ។

2011 Toyota FJ Cruiser

សម្រាប់ការរចនានៃរថយន្ត FJ Cruiser Final Eddition ស៊េរីឆ្នាំ ២០២៣ ក្រុមហ៊ុន Toyota បានបង្ហើបថា នឹងត្រូវបានតុងតែងដោយពណ៌បន៍ត្នោតខ្ចីដូចគ្នាទាំង ១ ០០០ គ្រឿង ហើយមកជាមួយនៅប៉ាណាមុខសំណាញ់ពណ៌ខ្មៅ កាង ស្លាបកញ្ចក់ទា្វរខាងក្រៅ, ដៃទ្វារ និងគម្របសំបកកង់ទំនេរខាងក្រោយជាដើម។ លើសពីនេះទៀត ក៏បានបន្ថែម ថាសកង់អាលុយមីញ៉ូមទំហំ ១៧ អ៊ីញ និងឈ្នាន់ចំហៀង ហើយត្រូវបានបំពាក់ដោយឡូហ្គោ Final Edition ផងដែរ។

ទាក់ទងនឹងផ្នែកម៉ាស៊ីនវិញ រថយន្ត Toyota FJ Cruiser Final Edition ស៊េរីឆ្នាំ ២០២៣ នឹងបន្តដំណើរការដោយម៉ាស៊ីនចំណុះ ៤,០ លីត្រ V6 ដែលអាចផលិតកម្លាំងបាន ២៧០ សេះ និងកម្លាំងរមួល ៣៨០ ញ៉ូតុនម៉ែត្រ ។

ជាមួយគ្នានេះ លោក Kei Fujita ប្រធានតំណាងមកពីការិយាល័យតំណាងមជ្ឈិមបូព៌ា និងអាស៊ីកណ្តាលរបស់ Toyota លោក Kei Fujita បាននិយាយនៅក្នុងសេចក្តីថ្លែងការណ៍មួយថា “រថយន្ត FJ Cruiser បានបន្សល់ទុកនៅការចងចាំដ៏យូរអង្វែងនៃរថយន្ត SUV ដ៏ល្បីបំផុតមួយនៅក្នុងប្រវត្តិសាស្រ្តដ៏សម្បូរបែបរបស់ Toyota ហើយផ្តល់នៅបទពិសោធន៍ប្រកបដោយផាសុកភាព និងអាចទុកចិត្តបានសម្រាប់អ្នកបើកបរ និងអ្នកដំណើរ គ្រប់ទីកន្លែងដែលការធ្វើដំណើររបស់ពួកគេអាចឈានទៅដល់។

សម្រាប់ព័ត៌មានលម្អិតអំពីតម្លៃមិនត្រូវបានប្រកាសនោះទេ ប៉ុន្តែម៉ូដែលនេះនឹងចាប់ផ្តើមដឹកជញ្ចូនទៅដល់អតិថិជនក្នុងត្រីមាសទី ៤ ឆ្នាំ ២០២២៕

ផ្ទាំងផ្សាយពាណិជ្ជកម្ម

Audi សម្លឹងឃើញថាការបើកបានឆ្ងាយ នឹងលែងសំខាន់សម្រាប់ឡានអគ្គិសនី

[ទីផ្សារបរទេស] ក្នុងអំឡុងកិច្ចពិភាក្សា​ទូលំទូលាយមួយប្រធានក្រុមហ៊ុន Audi ប្រចាំ​សហរដ្ឋ​អាមេរិក លោក Daniel Weissland បាន​បង្ហាញការយល់​ឃើញថា​រយៈចម្ងាយ​បើកបរបានឆ្ងាយរបស់រថយន្តអគ្គិសនី នឹងលែង​ជា​រឿង​សំខាន់​នៅ​ពេល​ដែល​ហេដ្ឋារចនាសម្ព័ន្ធនៃស្ថានីយសាកភ្លើងកាន់តែល្អប្រសើរ។

នេះ​ជារឿងសមហេតុផលមួយសម្រាប់ទីផ្សារសហរដ្ឋអាមេរិក ព្រោះថា​ស្ថានីយចាក់សាំងមាន​ជាង ១០ម៉ឺនកន្លែង នៅទូទាំង​សហរដ្ឋ​អាមេរិក ខណៈដែលស្ថានីយសាក​ភ្លើងល្បឿនលឿនមានប្រមាណ ៦ពាន់​កន្លែងប៉ុណ្ណោះ។ គួរចាប់​អារម្មណ៍ផងដែរថា​បច្ចេកវិទ្យា​សាក​ភ្លើង​នឹងបន្តល្អប្រសើរ ដែល​មានន័យថានៅថ្ងៃអនាគតការសាកភ្លើងនឹងកាន់តែចំណាយពេលខ្លី។

និយាយពីចម្ងាយបើកបរ Audi និយាយថាអតិថិជនដែល​ទិញរថយន្តអគ្គិសនីថ្លៃៗ បើកបរ​ចម្ងាយ​ប្រមាណ ៤៨គីឡូម៉ែត្រ ប៉ុណ្ណោះ​ក្នុង​មួយ​ថ្ងៃ​។ ក្រុមហ៊ុន​បាន​បន្ថែមថា ៩៨% នៃ​ការធ្វើដំណើរ​មួយ​ជើង​គឺមាន​ចម្ងាយតិច​ជាង ៨០គីឡូម៉ែត្រ ដូច​នេះ​រថយន្ត​ដូច​ជា Q4 e-tron គឺលើស​ពី​សក្តិសមសម្រាប់អ្នកបើកបរភាគច្រើន ដោយវាផ្ដល់ចម្ងាយបើកបរបាន ៤២៦គីឡូម៉ែត្រ។

បច្ចុប្បន្ននេះ Audi កំពុងតែផ្ដោតខ្លាំងលើ​រថយន្តអគ្គិសនី ហើយ​ដាក់​គោលដៅ​ថា​នឹង​សម្រេចឲ្យបាននូវសែស្រឡាយ​រថយន្ត​អគ្គិសនី​សុទ្ធនៅ​ត្រឹម​ឆ្នាំ​២០៣៣ ដោយមិន​បូកបញ្ចូល​ប្រទេសចិនឡើយ៕

ផ្ទាំងផ្សាយពាណិជ្ជកម្ម

Nissan Frontier ស៊េរីឆ្នាំ២០២៣ លក់តម្លៃចាប់ពីជិត ៣ម៉ឺនដុល្លារ

[ទីផ្សារបរទេស] កាលពីឆ្នាំមុន រថយន្ត Nissan Frontier ដែល​បាន​ផ្លាស់​ប្ដូររូបរាងថ្មី​ទាំង​ស្រុងបានបង្ហាញ​ខ្លួន​ជា​ផ្លូវ​ការ ក្នុង​នាម​ជាគូ​ប្រជែងដ៏ខ្លាំងក្លាមួយរបស់ Toyota Tacoma នៅលើទីផ្សារសហរដ្ឋ​អាមេរិក។

ពេលនេះ Nissan បានប្រកាស​អំពី​តម្លៃ​លក់​សម្រាប់រថយន្តភីកអាប់ Frontier ស៊េរីឆ្នាំ២០២៣ ដោយតម្លៃរបស់វា​មាន​ចាប់​ពី ២៩ ១៩០​ដុល្លារ ខ្ពស់ជាង Toyota Tacoma ដែល​មាន​តម្លៃ​ចាប់​ពី ២៧ ១៥០ដុល្លារ។ យ៉ាងណាក្ដី Nissan បាន​បញ្ចូល​មុខងារ​ពិសេសៗ​មក​ជាស្តង់ដារ ដើម្បី​ឲ្យ Nissan Frontier សមនឹងតម្លៃ។

គួរដឹងថា Nissan ផ្ដល់ជម្រើស​ប្រព័ន្ធបើកបរ 4×4 និង 4×2 លើ​គ្រប់ប្រភេទនៃរថយន្ត Frontier ហើយ​អតិថិជន​ក៏​មាន​ជម្រើស​រើស​យក Option ប្រភេទ King Cab, Crew Cab, S, SV, Pro-X និង Pro-4X ដែលមានតម្លៃ​ចាប់​ពី ២៩ ១៩០​ដុល្លារ ឡើង​ដល់ ៣៨ ៧២០​ដុល្លារ។

សម្រាប់ស៊េរីឆ្នាំ២០២៣នេះដែរ Nissan បាន​បន្ថែម​កញ្ចប់​ Midnight Edition ជាមួយ​ប្រភេទ SV Crew Cab ដែល​ក្នុង​នោះ​មាន​យ៉ាន់​កង់​ពណ៌​ខ្មៅ​ទំហំ ១៧អ៉ីញ ជាមួយ​កញ្ចក់​ដែល​ស្រោបដោយ​ពណ៌​ខ្មៅ និង​ការដាក់ពណ៌ខ្មៅ​លើ​ផ្នែក​ដទៃ​ទៀត​ដូច​ជា​កាង​ខាងមុខ, ផ្ទាំងប៉ាណា និង​រំលេចពណ៌ខ្មៅនៅផ្នែកខាងក្នុងរថយន្តផងដែរ៕

ផ្ទាំងផ្សាយពាណិជ្ជកម្ម

រថយន្តទី ៦ លានគ្រឿង របស់ BMW បានរំកិលចេញពីរោងចក្រហើយ នៅសហរដ្ឋអាមេរិក

[បរទេស] ក្រុមហ៊ុនផលិតរថយន្ត BMW បានធ្វើការប្រកាសថា រថយន្តទី ៦ ០០០ ០០០ គ្រឿង ដែលផលិតនៅរោងចក្រ Spartanburg របស់ខ្លួនក្នុងរដ្ឋ South Carolina បានរំកិលចេញពីរោងចក្រហើយ ដែលជាសមិទ្ធិផលដ៏សំខាន់ក្នុងខួបលើកទី 30th Anniversary នៃការបើកដំណើរការរោងចក្រ ដែលជារោងចក្រដំឡើងម៉ាកយីហោដំបូង និងតែមួយគត់នៅសហរដ្ឋអាមេរិក។

សម្រាប់រថយន្តនេះ ដែលនឹងត្រូវបានរក្សាទុកដោយក្រុមហ៊ុន BMW សម្រាប់ការប្រមូលជាប្រវត្តិសាស្ត្ររបស់វាគឺ Java Green Metallic X6 M ដែលបំពាក់ដោយម៉ាស៊ីនចំណុះ ៤,៤ លីត្រ V8  Twin-turbocharged ដែលបង្កើតកម្លាំងបាន ៦០០ សេះ ។ ទន្ទឹមនឹងនោះ ផ្នែកខាងក្នុងត្រូវបានបំពាក់ដោយស្បែក Silverstone Full Merino Leather ជាមួយនឹងថាសកង់ពីរពណ៌ទំហំ ២១-២២ អ៊ីញប្រភេទ M Star-spoke wheel។

ដំណាក់កាលនៃការផលិតកើតឡើងត្រឹមតែពីរឆ្នាំបន្ទាប់ពីរោងចក្របានបញ្ចប់ការងារលើរថយន្តទី ៥ ០០០ ០០០ គ្រឿងរបស់ខ្លួនក្នុងខែមិថុនា ឆ្នាំ ២០២០។ រថយន្តនោះជារថយន្ត BMW X5 M Competition ត្រូវបានបន្តដោយផលិតភាពបំបែកកំណត់ត្រាជាច្រើនខែសម្រាប់រោងចក្រ។ នៅឆ្នាំ ២០២១ រោងចក្រនេះអាចផលិតរថយន្តបានជាង ១ ៥០០ គ្រឿងក្នុងមួយថ្ងៃ និងរថយន្ត ៤៣៣ ៨១០ គ្រឿងពេញមួយឆ្នាំ។ បច្ចុប្បន្ន រោងចក្រនេះមានសមត្ថភាពផលិតរថយន្តប្រចាំឆ្នាំរហូតដល់ ៤៥០ ០០០ គ្រឿង និងមានបុគ្គលិកជាង ១១ ០០០ នាក់។

លោក Robert Engelhorn ប្រធាន និងជានាយកប្រតិបត្តិនៃក្រុមហ៊ុន BMW Manufacturing បាននិយាយថា “ចាប់តាំងពីខែមិថុនា ឆ្នាំ ២០២០ មក ក្រុមនៅរោងចក្រ Plant Spartanburg បានផលិតរថយន្តបានមួយលានគ្រឿង” ។ “ខ្ញុំមានមោទនភាពមិនគួរឲ្យជឿចំពោះសហការីរបស់យើង និងភាពធន់ដែលពួកគេបានបង្ហាញក្នុងអំឡុងពេលប្រែប្រួលនេះ។

តាម​រយៈ​ប្រវត្តិ​របស់​រោងចក្រនេះ បានបើកដំណើរការក្នុងឆ្នាំ ១៩៩២ ចាយពេល ១៤ ឆ្នាំដើម្បីផលិតរថយន្តទី ១ លានគ្រឿងរបស់ខ្លួនដែលជារថយន្តម៉ាក Z4 M Roadster ឆ្នាំ ២០០៦ ។ ឥឡូវនេះ រោងចក្រ BMW ដ៏ធំបំផុតនៅលើលោកនេះ បានផលិតរថយន្តប្រភេទ SUV និងប្រភេទ Crossovers ភាគច្រើនរបស់ក្រុមរួមមាន X3, X4, X6, X6 និង X7 ហើយវានឹងចាប់ផ្តើមផលិតម៉ូដែលខ្ពស់បំផុតសម្រាប់ XM ផងដែរ។ មិនតែប៉ុណ្ណោះ រោងចក្រ Spartanburg បានបញ្ចេញរថយន្ត SUV ទៅកាន់ទីផ្សារជុំវិញពិភពលោក ហើយរោងចក្រតែមួយនេះ បានធ្វើឲ្យ BMW ក្លាយជាក្រុមហ៊ុននាំចេញរថយន្តធំជាងគេនៅសហរដ្ឋអាមេរិក៕

The E53 X5 was BMW’s very first SUV and it was manufactured at the Spartanburg plant from 1999 to 2006.
ផ្ទាំងផ្សាយពាណិជ្ជកម្ម
1...449450451...1,085ទំព័រ 450 នៃ 1,085

បច្ចេកវិទ្យា

គន្លឹះសំខាន់ៗ

REVIEW+

© ២០២២ រក្សាសិទ្ធិគ្រប់យ៉ាង​ ហាមដាច់ខាតយកព័ត៌មានទៅផ្សាយបន្ត ដោយគ្មានការអនុញ្ញាត | www.camboauto.com