អ្នកបើកបរទាំងឡាយ តែងតែត្រូវបានក្រើនរំលឹកឲ្យឧស្សាហ៍ពិនិត្យ​រថយន្ត ដើម្បីបង្ការ និងស្វែងរកកំហូចណាមួយនៅប្លុកម៉ាស៊ីន មុនចេញដំណើរ។ យ៉ាងណាមិញ ពេលខ្លះទោះជាយើងបានយកចិត្តទុកដាក់​ឆែកគ្រប់ជ្រុងជ្រោយយ៉ាងណាក៏ដោយ ក៏នៅតែមានបញ្ហាកើតឡើងដោយជៀសមិនរួច ពោលគឺ​វាអាច​ខូចចំណុចណាមួយភ្លាមៗ ពេលកំពុងបើកបរតាមផ្លូវ ដែលធ្វើឲ្យរថយន្តរលត់តែម្តង។

ដូច្នេះ នៅពេលកំពុងបើករថយន្តតាមផ្លូវ ហើយស្រាប់តែរលត់ម៉ាស៊ីននោះ លោកអ្នកអាចគិតលើ​កំហូចធំៗប៉ុន្មានចំណុចខាងក្រោមនេះ៖

• អស់សាំងៈ វាច្បាស់ហើយថា រថយន្តមិនអាចបន្តដំណើរទៀតឡើយ ហើយកត្តាចម្បងដែលធ្វើឲ្យអ្នកភ្លេចចាក់សាំង គឺអាចមកពីកុងទ័រសាំងខូច បណ្តាលឲ្យអ្នកមិនអាចដឹងពីកម្រិតសាំងនៅសល់។

• បូមសាំងៈ វាមានតួនាទីបញ្ជូនសាំងពីធុងសាំង ចូលទៅក្នុងម៉ាស៊ីនដើម្បីដុតចំហេះជាមួយប៊ូស៊ី ដើម្បីឲ្យម៉ាស៊ីនដំណើរការបាន។ ដូច្នេះ បើវាខូច គឺវាមិនអាចបំពេញការងារវាបានឡើយ។
• ឌីណាម៉ូ: វាជាអ្នកសាកភ្លើងចូលអាគុយ និងផ្តល់ភ្លើងសម្រាប់រថយន្ត ពេលម៉ាស៊ីនដំណើរការ។ អ៊ីចឹងបើវាខូច រថយន្តក៏មិនអាចបន្តដំណើរទៀតដែរ។

• អាគុយ: ពេលវាខូច គឺនឹងមិនសាកភ្លើងចូលទៀតឡើយ ហើយថាមពល​ក្នុងរថយន្តក៏នឹងត្រូវកាត់ផ្តាច់ទាំងស្រុង។
• ប៊ូស៊ី ឬម៉ូប៊ីន: ពួកវាជាអ្នកផ្តល់ផ្កាភ្លើង ដើម្បីដុតចំហេះជាមួយសាំង អ៊ីចឹងវានឹងបញ្ឈប់ម៉ាស៊ីនភ្លាមៗ នៅពេលវាខូច។

• ឡើងកម្តៅខ្លាំង: វាពាក់ព័ន្ធនឹងប្រព័ន្ធទឹក ដូចជាខូចធុងទឹក បូមទឹក ឬមានការលេចជ្រាបទឹក ដែលធ្វើឲ្យមានបរិមាណទឹកទាបមិនគ្រប់គ្រាន់ បណ្តាលឲ្យម៉ាស៊ីនឡើងកម្តៅខ្លាំង ដូច្នេះវានឹងផ្តាច់បិទម៉ាស៊ីនខ្លួនវា ដើម្បីបញ្ចៀសការខូចខាតធ្ងន់ធ្ងរ។

• ប្រព័ន្ធ ECU: វាជាខួរក្បាល​ប្រព័ន្ធម៉ាស៊ីន​រថយន្តតែម្តង ពោលគឺ​វាមានតួនាទី​ជាអ្នកប្រមូលព័ត៌មាន​ពី​ប្រព័ន្ធម៉ាស៊ីន និងគណនា​ការដុត​កម្រិតសាំង និងល្បាយ​ខ្យល់ ឱ្យបានត្រឹមត្រូវ។ បើប្រព័ន្ធ ECU នេះមានបញ្ហា នោះរថយន្តអ្នក​អាច​នឹង​បាត់បង់​ថាមពល​ភ្លាមៗ ចេញ​សញ្ញា check និងអាច​រលត់ម៉ាស៊ីនផងដែរ៕

ផ្ទាំងផ្សាយពាណិជ្ជកម្ម

ចរន្តនៃការប្រើប្រាស់រថយន្តអគ្គិសនីនាពេលបច្ចុប្បន្ននេះ កាន់តែមានសន្ទុះខ្លាំងឡើងហើយ ដោយឡែកនៅកម្ពុជា ក៏មានកំណើនប្រើប្រាស់រថយន្តប្រភេទនេះច្រើនផងដែរពីមួយឆ្នាំទៅមួយឆ្នាំ តាមរយៈការលើកទឹកចិត្តពីរដ្ឋ និងការហូរចូលវិនិយោគទុនរបស់ក្រុមហ៊ុនរថយន្តបរទេសជាដើម។

យ៉ាងណាមិញ ហេដ្ឋារចនាសម្ព័ន្ធសម្រាប់បម្រើឱ្យការប្រើប្រាស់រថយន្តអគ្គិសនីនៅក្នុងស្រុក នៅមិនទាន់អាចឆ្លើយតបបានគ្រប់គ្រាន់ ហើយវាក៏ជាកត្តារាំងស្ទះដ៏ធំមួយ សម្រាប់វិស័យ EV។ លើសពីនេះ កង្វះខាតហេដ្ឋារចនាសម្ព័ន្ធ ក៏បានធ្វើឱ្យអ្នកប្រើរថយន្ត EV ខ្លះ ចង់ងាកមករករថយន្តចំហេះក្នុងវិញទៀតផង។

តាមរយៈ «គោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០» របស់រាជរដ្ឋាភិបាល គឺបានជំរុញការប្រើប្រាស់យានយន្តអគ្គិសនី ក្នុងនោះការរៀបចំហេដ្ឋារចនាសម្ព័ន្ធគាំទ្រ សម្រាប់អ្នកប្រើប្រាស់ ដោយរួមមានការបញ្ចូលថាមពល ការផ្គត់ផ្គង់ថាមពល ការថែទាំ និងជួសជុលជាដើម។

ហេដ្ឋារចនាសម្ព័ន្ធបញ្ចូលថាមពលយានយន្តអគ្គិសនី

• រៀបចំបទបញ្ញត្តិ និងស្តង់ដាសម្រាប់ឧបករណ៍ឬបរិក្ខារបញ្ចូលថាមពល និងស្ថានីយបញ្ចូលថាមពល ឬផ្លាស់ប្តូរឧបករណ៍ស្តុកថាមពល (swap)
• កំណត់ទីតាំង និងកម្រិតចំនួនស្ថានីយបញ្ចូលថាមពល ស្របតាមតម្រូវការជាក់ស្តែង
• រៀបចំស្តង់ដាស្ថានីយ ឬឧបករណ៍បញ្ចូលថាមពល ដែលប្រើប្រាស់គ្រប់ប្រភេទយានយន្តអគ្គិសនី
• ដាក់ឱ្យប្រើប្រាស់កម្មវិធីទូរសព្ទ សម្រាប់គ្រប់គ្រង និងបង់ប្រាក់លើការប្រើប្រាស់ស្ថានីយ
• ជំរុញការកសាងស្ថានីយនៅតាមផ្លូវជាតិ ផ្លូវល្បឿនលឿន អគារ ខុនដូរ ផ្សារទំនើប និងសណ្ឋាគារ។

ការផ្គត់ផ្គង់ថាមពល

• កំណត់ថ្លៃអគ្គិសនី
• កំណត់បទដ្ឋានបច្ចេកទេស និងស្តង់ដាសុវត្ថិភាពសម្រាប់ការបញ្ចូលថាមពល
• សម្រួល និងពន្លឿននីតិវិធីផ្តល់លិខិតអនុញ្ញាត និងអាជ្ញាបណ្ណ ដល់អ្នកផ្តល់សេវាកម្មបញ្ចូលថាមពល
• ជំរុញការប្រើប្រាស់ប្រភពថាមពលកកើតឡើងវិញ នៅតាមស្ថានីយបញ្ចូលថាមពល

ស្តង់ដាយានយន្តអគ្គិសនី និងគ្រឿងបង្គុំ/គ្រឿងបន្លាស់

• រៀបចំបទបញ្ញត្តិ និងស្តង់ដាគុណភាព និងសុវត្ថិភាព
• ពង្រឹងការត្រួតពិនិត្យលក្ខណៈបច្ចេកទេសយានយន្ត

បណ្តាញតភ្ជាប់ និងគ្រប់គ្រងទិន្នន័យ

• រៀបចំបណ្តាញតភ្ជាប់ ចែករំលែកទិន្នន័យ និងបង្កើតត្រួតពិនិត្យ និងរាយការណ៍បញ្ហាកំហុសបច្ចេកទេស ដើម្បីធានាសុវត្ថិភាព និងដោះស្រាយទាន់ពេល។

ហេដ្ឋារចនាសម្ព័ន្ធគាំទ្រដទៃទៀត

• រៀបចំបទដ្ឋានចំណតអាទិភាពសាធារណៈ ឬនៅតាមអគារ ឬផ្សារទំនើប សម្រាប់យានយន្តអគ្គិសនី
• កែសម្រួលបទដ្ឋានសាងសង់អគារ និងបទដ្ឋាននៃការអភិវឌ្ឍទីក្រុង និងតំបន់អភិវឌ្ឍសំខាន់ៗផ្សេងទៀត ដើម្បីជាកាតព្វកិច្ចក្នុងការបញ្ចូលហេដ្ឋារចនាសម្ព័ន្ធបញ្ចូលថាមពល និងចំណតយានយន្តអគ្គិសនីនៅក្នុងគម្រោង៕

ផ្ទាំងផ្សាយពាណិជ្ជកម្ម