ផ្ទាំងផ្សាយពាណិជ្ជកម្ម
Facebook Youtube
ទំព័រដើម កំណត់​ហេតុ​បណ្ដាញ ទំព័រ 50

មិនមែនមានក្បាល ១ ដូចរថយន្តធម្មតា តែនេះគឺជារថយន្តក្បាល ២ របស់ចិន!

ស្របពេលដែលប្រទេសចិនកំពុងតែក្លាយជាប្រទេសដែលមានឥទ្ធិពលយ៉ាងខ្លាំងនៅក្នុងវិស័យវិស្វកម្មយានយន្តរបស់ពិភពលោក វាមិនមែនជារឿងដ៏ចម្លែកនោះទេដែលថានៅក្នុងពេលបច្ចុប្បន្ននេះនៅក្នុងពិភពលោកយើងនេះមិនមានការឆ្នៃប្រឌិតនូវរថយន្តថ្មីៗ ជាក់ស្តែងដូចគ្នានឹងរថយន្តពន្លត់អគ្គីភ័យដែលមានក្បាលចំនួន ២ ដែលចិនបានបង្កើតឡើងនេះអញ្ចឹង វាមិនត្រឹមតែជាការឆ្នៃប្រឌិតថ្មីប៉ុណ្ណោះនោះទេ ប៉ុន្តែវាក៏ជាមធ្យោបាយថ្មីមួយដើម្បីឆ្លើយតបទៅនឹងតម្រូវការរបស់ពិភពលោក និងគ្រោះអាសន្នបានយ៉ាងឆាប់រហ័សផងដែរ។

ជាក់ស្តែងសម្រាប់រថយន្តដែលមានក្បាលចំនួន ២ ដែលចិនបានបង្កើតឡើងនេះ គឺវាអាចបើកបរបានទាំងទៅមុខ និងទៅក្រោយតែម្តង ពោលគឺមិនចាំបាច់ត្រូវបត់ត្រលប់ថយក្រោយដូចរថយន្តធម្មតានោះឡើយ ហើយវាក៏ជាមធ្យោបាយដ៏ល្អមួយនៅពេលដែលការកក់ស្ទះផងដែរ។ បើនិយាយពីលក្ខណៈពិសេសរបស់រថយន្តនេះវិញ មិនត្រឹមតែមានក្បាល ២ ប៉ុណ្ណោះនោះទេ ប៉ុន្តែវាក៏អាចបើកបរបានល្បឿនលឿនដល់ទៅ ១៩៣គីឡូម៉ែត្រ ក្នុងមួយម៉ោង ផងដែរ។

មួយវិញទៀត រថយន្តនេះទៀតសោត ក៏អាចផ្ទុកទឹក (water tank) បានចំនួន ៤ពាន់លីត្រ, សារធាតុពិសេស (foam tank) បានចំនួន ១ ៨៩២លីត្រ និងឧបករណ៍ពន្លត់អគ្គីភ័យគ្រប់ប្រភេទផងដែរ ខណៈការរចនាវិញ គឺត្រូវបានបំផុសគំនិតដោយព្រឹត្តិការណ៍សោកនាដកម្មដែលបានកើតឡើងនៅក្នុងតំបន់អឺរ៉ុប។ ខណៈក្នុងពេលបច្ចុប្បន្ននេះ វាគឺត្រូវប្រើប្រាស់នៅក្នុងទីក្រុង Nanjing និង Fuzhou ៕

ផ្ទាំងផ្សាយពាណិជ្ជកម្ម

មិនប្រើប្រេង ហើយក៏មិនប្រើអគ្គិសនីដែរ តែនេះគឺជាត្រាក់ទ័រដែលអាចបើកបរដោយខ្លួនឯង ហើយប្រើអ៊ីដ្រូសែនរបស់ជប៉ុន

ដើម្បីជាការឆ្លើយតបទៅនឹងតម្រូវការរបស់អ្នកប្រើប្រាស់ និងបង្ហាញពីការរីកចម្រើននៅក្នុងផ្នែកបច្ចេកវិទ្យារបស់ខ្លួន ក៏ដូចជាបង្ហាញពីការចូលរួមក្នុងការកាត់បន្ថយការប៉ះពាល់ដល់បរិស្ថាន ពេលនេះ ក្រុមហ៊ុន Kubota ដែលជាក្រុមហ៊ុនល្បីឈ្មោះខាងផ្នែកកសិកម្ម និងឧស្សាហកម្មរបស់ប្រទេសជប៉ុន បានប្រកាសបង្ហាញចេញនូវត្រាក់ទ័រថ្មីរបស់ខ្លួនហើយ ដោយក្នុងនោះ វាគឺជាត្រាក់ទ័រដែលអាចបើកបរដោយខ្លួនឯង និងជាត្រាក់ទ័រដែលប្រើប្រាស់នូវថាមពលអ៊ីដ្រូសែន។

បើនិយាយពីការរចនារបស់ត្រាក់ទ័រនេះ វាគឺមានប្រវែងប្រហែល ៤,៤ ម៉ែត្រ ទទឹង ២,២ ម៉ែត្រ និងកម្ពស់ដល់ទៅ ២,៣ ម៉ែត្រ ឯណ្ណោះ ប៉ុន្តែវាគឺមិនមានកៅអីសម្រាប់អ្នកបើកបរនោះឡើយ ពោលគឺវាអាចដំណើរការដោយខ្លួនឯងសុទ្ធតែម្តងដោយគ្រាន់តែចុចបញ្ជាពីចម្ងាយតែប៉ុណ្ណោះ។ ហើយអ្វីដែលកាន់តែពិសេសទៀតនោះ បើទោះបីជាវាដំណើរការដោយអ៊ីដ្រូសែនក៏ដោយ ក៏ប៉ុន្តែវាក៏អាចផលិតកម្លាំងបាន ១០០សេះ ផងដែរ។

លើសពីនេះទៅទៀត វាក៏បានភ្ជាប់មកជាមួយនឹងប្រព័ន្ធកាមេរ៉ា AI ដែលអាចចាប់ឧបសគ្គ ហើយបញ្ឈប់ប្រត្តិបត្តិការបានដោយស្វ័យប្រវត្តិ នៅពេលមានឧបសគ្គ ឬមនុស្សដើរកាត់ដើម្បីធានាសុវត្ថិភាពផងដែរ ខណៈនៅពេលចាក់អ៊ីដ្រូសែនមួយពេញវិញ វាគឺអាចប្រើប្រាស់បានដល់ទៅកន្លះថ្ងៃឯណ្ណោះ៕

ផ្ទាំងផ្សាយពាណិជ្ជកម្ម

រថយន្ដអគ្គិសនី Changan Nevo A06 បើកទទួលការកក់ជាផ្លូវការជាមួយតម្លៃចាប់ពីជាង១មុឺនដុល្លារ

រថយន្តប្រភេទ Sedan អគ្គិសនីសុទ្ធទំហំមធ្យមថ្មីរបស់ក្រុមហ៊ុន Changan ម៉ូឌែល Nevo A06 ឥឡូវនេះកំពុងទទួលការបញ្ជាទិញកក់ទុកមុន (pre-orders) ជាមួយតម្លៃចាប់ផ្តើមពី ១១៩ ៩០០ ដល់ ១៥៩ ៩០០ យន់ ឬស្មើនឹង ១៦ ៨០០ ដល់ ២២ ៤០០ ដុល្លារ ផ្ដល់ជូនជាមួយនឹងចម្ងាយបើកបរ ៥១០គីឡូម៉ែត្រ និង ៦៣០ គីឡូម៉ែត្រ គិតស្ដង់ដារវាស់ចម្ងាយ CLTC។ ខណៈម៉ូឌែលប្រើសាំងអគ្គិសនីលាយសាំង EREV នឹងត្រៀមដាក់លក់នៅពេលខាងមុខផងដែរ។

សម្រាប់ផ្នែកខាងក្រៅ (exterior) រថយន្ត Nevo A06 បន្តរក្សារូបរាងរចនាបថបែបគ្រួសារ (family design) ដោយមានមេគុណកកិតជាមួយខ្យល់ (drag coefficient) ត្រឹមតែ ០.២០៥ Cd។ សម្រាប់ភ្លើងមុខរចនារាងបន្ទាត់ដែលមានប្រវែង ២២៥៨ ម.ម ផ្សំឡើងពីអំពូល LED ចំនួន ២៣៦ គ្រាប់។

ចំណែកចង្កៀងក្រោយរចនាជាបន្ទាត់ផ្សំឡើងពីអំពូល LED ចំនួន ២៧៤ គ្រាប់ ហើយអាចកំណត់កម្មវិធីឱ្យបង្ហាញរូបភាព/សញ្ញាផ្សេងៗតាមតម្រូវការបាន។ Nevo A06 បានផ្ដល់មកជាមួយជម្រើសពណ៍ខាងក្រៅចំនួន៦ក្នុងនោះរួមមាន៖ពណ៌ខៀវ, ពណ៌ខ្មៅ, ពណ៌ស្វាយ, ពណ៌ប្រផេះ, ពណ៌ស និង ពណ៌ប្រាក់។

ឲសម្រាប់ម៉ូឌែលកម្រិតខ្ពស់រថយន្ដអគ្គិសនី Changan Nevo A06 ត្រូវបានបំពាក់ដោយឧបករណ៍ចាប់សញ្ញា Lidar នៅលើដំបូល (roof-mounted lidar) បន្ថែមពីលើរ៉ាដា Millimeter-wave ចំនួនបី៣, រ៉ាដា Ultrasonic ចំនួន១២, និងកាមេរ៉ាចំនួន១១គ្រាប់ ដើម្បីគាំទ្រប្រព័ន្ធជំនួយការបើកបរកម្រិតខ្ពស់ (advanced driving assistance system) របស់ក្រុមហ៊ុន Changan ដែលមានឈ្មោះថា Tianshu Intelligent lidar edition។

ប្រព័ន្ធនេះដំណើរការដោយបន្ទះឈីប J6M របស់ក្រុមហ៊ុន Horizon Robotics ដែលមានថាមពលគណនា (computing power) ១២៨ TOPS ហើយអាចអនុវត្តមុខងារ បើកបរស្វ័យប្រវត្តិលើផ្លូវល្បឿនលឿន NOA (highway NOA), មុខងារជំនួយពេលចូលចត (parking assist) និង ប្រព័ន្ធកាច់ចង្កូតសង្គ្រោះបន្ទាន់ដោយស្វ័យប្រវត្តិ (automatic emergency steering)។

គ្រប់ម៉ូដែលទាំងអស់របស់រថយន្ដអគ្គិសនី Changan Nevo A06 ត្រូវបានបំពាក់ដោយម៉ូទ័រអគ្គិសនីនៅខាងក្រោយ

ក្នុងនោះសម្រាប់ម៉ូឌែលផ្កល់ជូនជាមួយរយៈចម្ងាយបើកបរ ៥១០ គីឡូម៉ែត្រ៖

  • ដំណើរដោយម៉ូទ័រអគ្គិសនីចំនួន១នៅផ្នែកខាងក្រោយ (e-motor) អាចផលិតកម្លាំងបាន ១២០ គីឡូវ៉ាត់ (kW) ឬ ១៦១ សេះ (hp) កម្លាំងរមួល ១៩០ញ៉ូតុនម៉ែត្រ
  • បំពាក់មកជាមួយអាគុយ Lithium Iron Phosphate ទំហំ ៥១,៤៨ គីឡូវ៉ាត់ម៉ោង (kWh)
  • គាំទ្រការសាកថ្ម ៤០០វ៉ុល (V)
  • អាចបើកបរល្បឿនអតិបរមា ១៦០ គីឡូម៉ែត្រក្នុងមួយម៉ោង (km/h)

ចំណែកម៉ូឌែលផ្កល់ជូនជាមួយរយៈចម្ងាយបើកបរ ៦៣០ គីឡូម៉ែត្រ៖

  • ដំណើរដោយម៉ូទ័រអគ្គិសនីនៅផ្នែកខាងក្រោយអាចផលិត ២១០ គីឡូវ៉ាត់ (kW) ឬ ២៨២ សេះ (hp)  កម្លាំងរមួល ២៩០ញ៉ូតុនម៉ែត្រ
  • បំពាក់មកជាមួយអាគុយ Lithium Iron Phosphate ទំហំ ៦៣,១៨ គីឡូវ៉ាត់ម៉ោង (kWh)
  • គាំទ្រការសាកថ្ម ៨០០ វ៉ុល (V)
  • អាចបើកបរល្បឿនអតិបរមា ១៨៨ គីឡូម៉ែត្រក្នុងមួយម៉ោង (km/h)

សម្រាប់សាកល្បឿនលឿន 6C (6C fast-charging) រថយន្ដចំណាយពេលតែ ១២នាទីក្នុងការសាកថ្មពី ១០% ទៅ ៨០%។

ចូលមកដល់ផ្នែកខាងក្នុងរថយន្ដនេះបានបំពាក់មកជាមួយអេក្រង់កម្សាន្ដទំហំ ១៥,៦ អ៊ីញ កម្រិត ២.៥K កុងទ័រឌីជីថលទំហំ ១០,១៧ អ៊ីញ, ឧបករណ៍បំពងសំឡេងចំនួន ២០គ្រាប់, កន្លែងសាកថ្មឥតខ្សែនិងទូទឹកកកពីរជាន់ទំហំ ៩,៥ លីត្រ៕

ផ្ទាំងផ្សាយពាណិជ្ជកម្ម

Lexus LS នឹងលាទីផ្សារអាមេរិចរហូត បន្ទាប់ពីម៉ូឌែលពិសេសមួយនេះ

[បរទេស] វាមានរយៈពេលជាង ៣ទស្សវត្សរ៍ហើយចាប់តាំងពី Toyota បានបង្ហាញចេញ Lexus LS នៅកំឡុងឆ្នាំ១៩៨៩ ជាមួយម៉ូឌែលដំបូង LS 400 និងជាម៉ូឌែលឆ្នាំ១៩៩០​ ដែលបង្ហាញថាអ្នកមិនចាំបាច់ត្រូវការតែរថយន្តរបស់អាល្លឺម៉ង់ ដើម្បីបានរថយន្តប្រណិតនោះ។ ប៉ុន្តែគួរអោយស្តាយរថយន្តនេះមិនអាចរក្សាជីវិតអោយបានយូរ ដោយចូលដល់ម៉ូឌែលឆ្នាំ២០២៦ វាជាឆ្នាំដែលរថយន្ត Sedan ប្រណិតខ្នាតពេញមួយនេះត្រូវលាទីផ្សារសហរដ្ឋអាមេរិចហើយ។

សម្រាប់ហេតុផលនៃការលានេះ ដោយសារតែការលក់បានធ្លាក់ចុះ ដោយគិតត្រឹមពាក់កណ្តាលឆ្នាំ២០២៥នេះ រថយន្តនេះលក់បានតែចំនួន ៦៩១គ្រឿងប៉ុណ្ណោះ ធ្លាក់ចុះ ៤២,៣ភាគរយ បើធៀបទៅនឹងពេលដូចគ្នាកាលពីឆ្នាំមុន។ ប៉ុន្តែមុននឹងលាគ្នា Lexus ក៏បានបញ្ចេញនូវម៉ូឌែលពិសេស LS Heritage Edition 2026 សម្រាប់ជាកាដូ ដែលផលិតត្រឹម ២៥០គ្រឿងប៉ុណ្ណោះ សម្រាប់ទីផ្សារសហរដ្ឋអាមេរិច ជាមួយតម្លៃ ៩៩ ២៨០ដុល្លារ។

ក្នុងនោះ LS Heritage Edition នឹងមានពណ៌តួរខ្លួនខាងក្រៅពិសេសថ្មីហៅថា Ninety Noir និង Rioja Red សម្រាប់ផ្នែកខាងក្នុង។ លើសពីនេះម៉ូឌែលពិសេសនេះក៏បានបំពាក់ជាមួយលក្ខណ:ពិសេសផ្សេងៗដូចជា ថាសកង់ពណ៌ប្រផេះទំហំ ២០អ៊ីញ, ដំបូលកញ្ចក់ Panoramic, កៅអីខាងក្រោយមានមុខងារកម្តៅ និងឧបករណ៍បំពងសម្លេងប្រភេទ Mark Levinson កម្លាំង 2,400W ចំនួន ២៣ចំណុច។

សម្រាប់  Lexus LS Heritage Edition 2026 នឹងបំពាក់មកជាមួយម៉ាស៊ីនដូចទៅនឹង Lexus LS 500 ឆ្នាំ២០២៥ ដែលជាម៉ាស៊ីន Twin-Turbo V6 ចំណុះ ៣,៤លីត្រ អាចផលិតកម្លាំងបាន ៤១៦សេះ និងកម្លាំងរមួល ៦០០ញ៉ូតុនម៉ែត្រ ផ្គូរផ្គង់ជាមួយប្រអប់លេខស្វ័យប្រវត្តិ ១០វគ្គ៕

ផ្ទាំងផ្សាយពាណិជ្ជកម្ម

មិនមែន ១ ឬ ២! តែ Dongfeng នឹងបង្កើនការលក់រថយន្តរបស់ខ្លួននៅក្នុងទីផ្សារអឺរ៉ុបចំនួន ៣ដងឯណ្ណោះ

ជាមួយនឹងមហិច្ឆតាថ្មីរបស់ខ្លួនក្ន្នុងការប្រកួតប្រជែងជាមួយរថយន្តអឺរ៉ុប ក្រុមហ៊ុនផលិតរថយន្តចិន Dongfeng Motor បានប្រកាសគ្រោងនឹងពង្រីកការលក់រថយន្តរបស់ខ្លួននៅក្នុងទីផ្សារអឺរ៉ុបចំនួន ៣ដងឯណ្ណោះ ដែលក្នុងនោះនឹងបង្កើនពីចំនួន ២៥ ០០០ ឬ ៣០ ០០០គ្រឿង ទៅចំនួន ៨០ ០០០គ្រឿង ក្នុងមួយឆ្នាំ ក្នុងឆ្នាំ២០២៦។

ក្នុងនោះ ចំពោះមូលហេតុនៃការបង្កើនចំនួនលក់នៅក្នុងទីផ្សារអឺរ៉ុបរបស់ក្រុមហ៊ុន Dongfeng Motor នេះ គឺដោយសារតែក្រុមហ៊ុនផ្ទាល់នឹងបង្ហាញចេញលក់នូវរថយន្តថ្មីៗជាច្រើនម៉ូឌែលដែលមានទាំងជម្រើសប្រើក្នុងក្រុង, SUV និងភីកអាប់។

ជាមួយគ្នានេះ ក្រុមហ៊ុនផ្ទាល់ក៏មានគម្រោងបង្កើតរោងចក្រដំឡើងដើម្បីផលិតរថយន្ត plug-in hybrids, full hybrids និងរថយន្តចំហេះខាងក្នុង (ICE) ជាច្រើនម៉ូឌែលផងដែរ៕

ផ្ទាំងផ្សាយពាណិជ្ជកម្ម

ក្រុមហ៊ុន Xpeng បានប្រកាសពីការពង្រីកទីផ្សាររបស់ខ្លួននៅប្រទេសក្នុងតំបន់អឺរ៉ុបចំនួន៥បន្ថែម

ក្រុមហ៊ុន Xpeng បានបង្ហើបឲ្យដឹងថា ខ្លួនកំពុងបង្កើនល្បឿននៃការអភិវឌ្ឍទីផ្សាររបស់ខ្លួននៅតំបន់អឺរ៉ុប ដោយបានបង្កើតភាពជាដៃគូជាផ្លូវការជាមួយក្រុមហ៊ុនផ្តល់សេកវាកម្មចល័តនៅអឺរ៉ុបគឺ Hedin Group ដើម្បីដាក់លក់រថយន្ត Xpeng G6 និង G9 ឆ្នាំ២០២៥ នៅក្នុងប្រទេសស្វីស ហើយក៏មានគម្រោងនាំយករថយន្ត P7+ នៅក្នុងឆមាសទីមួយនៃឆ្នាំ២០២៦។

XPeng Expands Into Five European Markets in Global Push | ChinaEVHomeបន្ទាប់ពីការចាប់ផ្តើមយុទ្ធសាស្ត្រទិផ្សារនៅតំបន់អឺរ៉ុបរបស់ខ្លួនជាមួយប្រទេស ន័រវេស ជាទីផ្សារនៅតំបន់អុឺរ៉ុបដំបូងក្នុងឆ្នាំ២០២១ ក្រុមហ៊ុន Xpeng បានពង្រីកវត្តមានជាសកលរបស់ខ្លួនជាបន្តបន្ទាប់។ រហូតមកដល់បច្ចុប្បន្ន បណ្តាញលក់ និងសេវាកម្មរបស់ក្រុមហ៊ុនបានគ្របដណ្តប់លើប្រទេស និងតំបន់ជាង ៤៦ នៅទូទាំងពិភពលោក។

ជាមួយគ្នានេះដែរ ក្រុមហ៊ុន Xpeng បានប្រកាសថា ខ្លួននឹងចូលទីផ្សារ អូទ្រីស ជាផ្លូវការនៅខែតុលា ឆ្នាំ២០២៥។ នៅប្រទេសអូទ្រីស ក្រុមហ៊ុន Xpeng នឹងបន្តប្រើប្រាស់ គំរូអ្នកចែកចាយដែលធ្លាប់ទទួលបានជោគជ័យនៅក្នុងប្រទេសអាល្លឺម៉ង់រួចមកហើយ។ សម្រាប់ទីតាំងដាក់លក់ដំបូងនឹងគ្របដណ្តប់ទីក្រុងសំខាន់ៗ រួមមាន ទីក្រុង Vienna Salzburg Graz និង Klagenfurt ដោយមានផែនការពង្រីកដល់ ១០ ទីតាំង នៅចុងឆ្នាំ២០២៥ និង ២០ ទីតាំង នៅឆ្នាំ២០២៦។

លើសពីនេះ ក្រុមហ៊ុន Xpeng នឹងចូលទីផ្សារប្រទេស ហុងគ្រី ស្លូវេនី និង ក្រូអាស៊ី ក្នុងពេលដំណាលគ្នា ដោយបន្តពង្រីកវត្តមានទីផ្សារអឺរ៉ុបរបស់ខ្លួន។ កិច្ចសហការបណ្ដាក់ទុនរួមគ្នារវាង AutoWallis Group និង Salvador Caetano Group នឹងគ្រប់គ្រងប្រតិបត្តិការនៅក្នុងប្រទេសទាំងបីនេះ។

ការពង្រីកខ្លួននេះកើតឡើងស្របពេលជាមួយនឹងភាពជាដៃគូផលិតកម្មដែលក្រុមហ៊ុន Xpeng ទើបតែប្រកាសជាមួយរោងចក្រ Magna នៅទីក្រុង Graz ប្រទេសអូទ្រីស។ កិច្ចសហការនេះនឹងអនុញ្ញាតឱ្យមានការ ផលិតរថយន្ត Xpeng នៅតាមមូលដ្ឋាន ជួយក្រុមហ៊ុនចៀសវាងពន្ធនាំចូលរបស់សហភាពអឺរ៉ុប ខណៈពេលដែលបង្កើតវត្តមានដ៏រឹងមាំនៅក្នុងទ្វីបអឺរ៉ុប។ ម៉ូឌែលដំបូងដែលត្រូវផលិតនៅរោងចក្រ Graz គឺ G6 និង G9 ដែលគ្រោងនឹងចាប់ផ្តើមផលិតនៅក្នុងត្រីមាសទីបី។

XPeng European Sales in July Nearly Triple YoY Despite Sequential Drop – EV

នៅឆមាសទីមួយនៃឆ្នាំ២០២៥ ក្រុមហ៊ុន Xpeng បានលក់រថយន្តបានជាង ៨ ០០០ គ្រឿង នៅអឺរ៉ុប ហើយក្រុមហ៊ុនក៏ទើបតែបានបើកមជ្ឈមណ្ឌលស្រាវជ្រាវ និងអភិវឌ្ឍន៍ (R&D) នៅអឺរ៉ុបដំបូងរបស់ខ្លួននៅទីក្រុង Munich ប្រទេសអាល្លឺម៉ង់ ដែលនឹងគាំទ្រដល់ការអភិវឌ្ឍម៉ូឌែលបន្ថែមសម្រាប់ផលិតកម្មអឺរ៉ុប រួមមានរថយន្ត Sedan និង SUV៕

ផ្ទាំងផ្សាយពាណិជ្ជកម្ម

តម្រូវការបច្ចេកវិទ្យាខ្ពស់! Nissan នឹងបញ្ចេញប្រព័ន្ធ ProPILOT ជំនាន់ថ្មីរបស់ខ្លួននៅឆ្នាំ២០២៧

ដើម្បីជាការឆ្លើយតបទៅនឹងតម្រូវការរបស់អ្នកប្រើប្រាស់ និងបង្ហាញពីការរីកចម្រើនក្នុងផ្នែកបច្ចេកវិទ្យារបស់ខ្លួន ពេលនេះ ក្រុមហ៊ុន Nissan ដែលក្រុមហ៊ុនផលិតរថយន្តឈ្មោះល្បីនៅលើពិភពលោកបានប្រកាសគ្រោងនឹងដាក់ឲ្យដំណើរការនូវប្រព័ន្ធ ProPILOT ជំនាន់ថ្មីរបស់ខ្លួនហើយ ដោយក្នុងនោះ នឹងប្រកាសដាក់ឲប្រើប្រាស់នៅក្នុងឆ្នាំ២០២៧ ខាងមុខនេះ។

ក្នុងនោះ បើនិយាយពីមុខងារ ឬលក្ខណៈពិសេសៗរបស់ប្រព័ន្ធ ProPILOT ជំនាន់ថ្មីនេះវិញ គឺបានភ្ជាប់មកជាមួយមុខងារថ្មីៗជាច្រើន ហើយក្នុងនោះក៏បានរួមបញ្ចូលនូវប្រព័ន្ធ Nissan Ground Truth Perception, ប្រព័ន្ធ LiDAR ជំនាន់ថ្មី និងប្រព័ន្ធ Wayve AI Driver ផងដែរ។

លើសពីនេះ ប្រព័ន្ធ ProPILOT នេះ ក៏អាចបញ្ចៀសគ្រោះថ្នាក់ផ្សេងៗ និងបើកបរដោយស្វ័យប្រវត្តិបានទាំងក្នុងទីក្រុង និងនៅលើផ្លូវហាយវេបានផងដែរ៕

ផ្ទាំងផ្សាយពាណិជ្ជកម្ម

ក្រុមហ៊ុន GWM បានដាក់បង្ហាញរថយន្តអគ្គិសនីខ្នាតតូចរបស់ខ្លួនជាផ្លូវការសម្រាប់ទីផ្សារប្រទេសចិន

ក្រុមហ៊ុន Ora ជាម៉ាកយីហោរថយន្តអគ្គិសនីរបស់ក្រុមហ៊ុន Great Wall Motor (GWM) បានដាក់បង្ហាញរថយន្ដម៉ូឌែលថ្មីរបស់ខ្លួនគឺរថយន្ត Ora 5 ជាផ្លូវការនៅក្នុងប្រទេសចិន។

រថយន្ត Ora 5 នៅតែបន្តរក្សាការរចនាបថដែលងាយស្រួលចំណាំរបស់ម៉ូឌែល “cat family” នៃម៉ាក Ora ដោយប្រើផ្នែកខាងមុខបិទជិតជាមួយនឹងចង្កៀងមុខមូលធំ ខណៈកាងខាងមុខបាននិងផ្នែកជំហៀងបានបន្ថែមមកជាមួយរន្ធខ្យល់។ ម៉ូឌែលនេះនឹងត្រូវបានផ្តល់ជូននូវជម្រើសពណ៌ខាងក្រៅចំនួន៦ ដោយពណ៌នីមួយៗត្រូវបានបំផុសគំនិតដោយទីតាំងភូមិសាស្ត្រលេចធ្លោ រួមមាន៖ បៃតង Aurora ប្រផេះ Senna ខៀវ Lake Sayram ស Cliff បៃតង Sand Dune និង ក្រហម Linzhi។

ចំពោះទំហំរូបរាងផ្នែកខាងក្រៅរថយន្ត Ora 5 មានប្រវែង ៤ ៤៧១ ម.ម ទទឹង ១ ៨៣៣ ម.ម កម្ពស់ ១ ៦៤១ ម.មនិងប្រវែងគម្លាតកង់មុខក្រោយ ២ ៧២០ ម.ម។ ទំហំទាំងនេះគឺធំជាងរថយន្ត Good Cat។ រថយន្តនេះបំពាក់ដោយ Lidar នៅលើដំបូល ដែលត្រូវបានគាំទ្រដោយកាមេរ៉ាខាងមុខ ចំហៀង និងខាងក្រោយ គាំទ្រដល់មុខងារជំនួយការបើកបរកម្រិតខ្ពស់។ តាមការរំពឹងទុក វានឹងប្រើប្រាស់ប្រព័ន្ធ Coffee Pilot Ultra ជំនាន់ទីបី របស់ GWM ដែលគាំទ្រមុខងារ Urban NOA (Navigation on Autopilot ក្នុងទីក្រុង) និង Highway NOA (នៅលើផ្លូវល្បឿនលឿន)។

សម្រាប់កម្រិតសមត្ថភាពវិញ រថយន្ត Ora 5 ត្រូវបានបំពាក់ដោយ ម៉ូទ័រអគ្គិសនីមានកម្លាំងអតិបរមា ១៥០kW ដែលភ្ជាប់ជាមួយ អាគុយលីចូម-ដែក-ផូស្វាត (LFP) ផ្គត់ផ្គង់ដោយក្រុមហ៊ុន SVOLT។ ទោះបីជាសមត្ថភាពលម្អិតរបស់អាគុយ និងចម្ងាយនៃការបើកបរផ្លូវការមិនទាន់ត្រូវបានបញ្ចេញក្តី ប៉ុន្ដែរថយន្ដ Ora 5 អាចនឹងមានសមត្ថភាពស្រដៀងគ្នា រថយន្ត Ora Lightning Cat Sedan  ផ្តល់ជម្រើសអាគុយ ៦៣.៨៧ kWh និង ៨៣.៤៩ kWh ដែលមានចម្ងាយបើកបរ ៥៥៥ គីឡូម៉ែត្រ និង ៧០៥ គីឡូម៉ែត្រ គិតតាមស្តង់ដារវាស់ចម្ងាយ CLTC ។

រថយន្ដ Ora 5 ត្រូវបានគេរំពឹងថានឹងចូលរួមប្រកួតប្រជែងនៅក្នុងទីផ្សាររថយន្តអគ្គិសនីខ្នាតតូច កំពុងរីកចម្រើនរបស់ប្រទេសចិន។ គូប្រជែងសំខាន់ៗរបស់រថយន្ដនេះរួមមាន៖ BYD Yuan Plus មានតម្លៃចាប់ពី ១៦ ៣០០ ដល់ ២០ ៨០០ ដុល្លារ និង Geely Galaxy E5 ដែលមានតម្លៃចាប់ពី ១៥ ២០០ ដល់ ២៥ ៣០០ដុល្លារ។ យ៉ាងណាមិញតម្លៃផ្លូវការរបស់រថយន្ដ Ora 5 ត្រូវបានគេរំពឹងថានឹងប្រកាសនៅក្នុងពេលដាក់លក់ជាផ្លូវការរបស់ខ្លួន៕

ផ្ទាំងផ្សាយពាណិជ្ជកម្ម

មិនត្រឹមតែបង្ហាញចេញនូវស្មាតហ្វូនថ្មីប៉ុណ្ណោះនោះទេ តែ Xiaomi ផ្ទាល់ក៏គ្រោងនឹងបង្ហាញចេញនូវសេះប្រណាំងថ្មីដែលមានកម្លាំងលើស ១ពាន់សេះរបស់ខ្លួនផងដែរ!

បន្ទាប់ពីបង្ហាញចេញនូវរថយន្ត Xiaomi SU7 Ultra របស់ខ្លួនអស់រយៈពេលជាច្រើនខែ និងបានធ្វើឲអ្នកស្រឡាញ់ឡានប្រណាំងនៅទូទាំងពិភពលោកអង្គុយមិនចង់ជាប់នឹងទីលាន ពេលនេះ ក្រុមហ៊ុន Xiaomi បានកំពុងនឹងរៀបចំបង្ហាញចេញនូវនូវរថយន្តថ្មី ឬតួឯកថ្មីរបស់ខ្លួនហើយ ដោយក្នុងនោះ រថយន្តនេះ គឺអាចនឹងមានឈ្មោះថា Xiaomi YU7 GT ។

បើនិយាយពីលក្ខណៈពិសេសរបស់រថយន្ត Xiaomi YU7 GT នេះ គឺត្រូវបានរំពឹងថានឹងអាចផលិតកម្លាំងបានជាង ១ពាន់សេះឯណ្ណោះ ខណៈការរចនាវិញ ក៏បានមិនចាញ់បងធំ SU7 Ultra ប៉ុន្មាននោះដែរ នេះយោងតាមការខ្សឹបខ្សៀវរបស់សារព័ត៌មានចិនផ្ទាល់នៅក្នុងសុន្ទរកថាប្រចាំឆ្នាំរបស់ក្រុមហ៊ុន Xiaomi លោក Lei Jun ។

គួរបញ្ជាក់ផងដែរថា សម្រាប់ការឌីស្សាញនូវរថយន្តថ្មីនេះទៀតសោត ក៏នឹងទទួលបានការរចនាថ្មីដែលលាយបញ្ជូលនូវលក្ខណៈ Aerodynamics ផងដែរ ខណៈព័ត៌មានលម្អិតអំពីតម្លៃ, Specs និងថ្ងៃប្រកាសចេញជាផ្លូវការ គឺមិនទាន់បានបង្ហាញចេញនៅឡើយនោះទេ៕

ផ្ទាំងផ្សាយពាណិជ្ជកម្ម

Highlander ឆ្នាំ២០២៦ សម្រាប់ទីផ្សារប្រទេសចិន ទទួលបានកែកុនថ្មីសម្រាប់ផ្នែកខាងក្នុង ទំនើបជាងទីផ្សារផ្សេងៗ

[ប្រទេសចិន] ក្រុមហ៊ុន GAC-Toyota បានធ្វើការបើកទទួលកក់ជាផ្លូវការនូវរថយន្ត Highlander ឆ្នាំ២០២៦ ក្នុងទីផ្សារប្រទេសចិន ជាមួយការធ្វើអោយប្រសើរឡើងនៅផ្នែកខាងក្នុងទៅលើចំណុចសំខាន់ៗមួយចំនួន ដែលខុសប្លែកពីទីផ្សារដដៃទៀត។

ក្នុងនេះអ្វីដែល Highlander ឆ្នាំ២០២៦ ទទួលបានគឹអេក្រង់កម្សាន្តទំហំធំរហូតដល់ ១៥,៦អ៊ីញ ដោយកាលពីមុនទំហំត្រឹម ១០,២៥អ៊ីញ និង ១២,៣អ៊ីញប៉ុណ្ណោះ ចំណែកកុងទ័រឌីជីថលទំហំ ១២,៣អ៊ីញ ខណ: US-Spec គឺស្ថិតក្នុងជម្រើស ១២,៣អ៊ីញទាំងអេក្រង់កម្សាន្ត និងកុងទ័របង្ហាញ។ ដើម្បីរក្សាបាននូវភាពទូលាយ Toyota ក៏បានធ្វើការទៅលើការរចនាតាបឡូថ្មី រួមជាមួយរចនាថ្មីទៅលើរន្ធម៉ាស៊ីនត្រជាក់អោយមានរាងស្លីមជាងមុន និងបានដកប៊ូតុងម៉ាស៊ីនត្រជាក់ចោលផងដែរ។  

បន្ថែមពីនេះ Toyota ក៏បានបន្ថែមថ្មីនូវកន្លែងសាកថ្មឥតខ្សែកម្លាំង ៥០វ៉ាត់, ដំបូលកញ្ចក់ Panoramic, កៅអីក្តៅ-ត្រជាក់, ឧបករណ៍បំពងសម្លេងប្រភេទ JBL ចំនួន​ ១១ចំណុច និងជម្រើសចំនួនកៅអី ៦ ឬ ៧ផងដែរ។

ដូចលើកឡើងខាងដើមសម្រាប់ម៉ូឌែលឆ្នាំ ២០២៦ ក្រៅពីធ្វើអោយប្រសើរឡើងនៅផ្នែកខាងក្នុង អ្វីគ្រប់យ៉ាងរក្សាទុកដដែល។ ក្នុងនោះ រថយន្ត Highlander ឆ្នាំ ២០២៦ ដំណើរការជាមួយជម្រើសចំនួន ២ប្រភេទគឺ ជម្រើសម៉ាស៊ីនចំណុះ ២,០លីត្រ Turbo ៤ស៊ីឡាំង អាចផលិតកម្លាំងបាន ២៤៤សេះ ផ្គូរផ្គង់ជាមួយប្រអប់លេខស្វ័យប្រវត្តិ ៨វគ្គ និងជម្រើសកូនកាត់ហាយប្រ៊ីដ ចំណុះ ២,៥លីត្រ ផលិតកម្លាំងបាន ២៤៣សេះ។

សម្រាប់ទីផ្សារប្រទេសចិន រថយន្តHighlander ឆ្នាំ ២០២៦ មានតម្លៃចន្លោះពី ៣៥ ០០០ដុល្លារ ដល់ ៤៥ ៧០០ដុល្លារ បើធៀបជាមួយទីផ្សារសហរដ្ឋអាមេរិចគឺមានតម្លៃចាប់ផ្តើមពី ៤៥ ២៧០ដុល្លារ ដល់ ៥៤ ៦៧៥ដុល្លារ៕

ផ្ទាំងផ្សាយពាណិជ្ជកម្ម
1...495051...1,079ទំព័រ 50 នៃ 1,079

បច្ចេកវិទ្យា

គន្លឹះសំខាន់ៗ

REVIEW+

© ២០២២ រក្សាសិទ្ធិគ្រប់យ៉ាង​ ហាមដាច់ខាតយកព័ត៌មានទៅផ្សាយបន្ត ដោយគ្មានការអនុញ្ញាត | www.camboauto.com