មានរឿងអ្វីបានជា Toyota ពន្យារពេលសាងសង់រោងចក្រអាគុយរបស់ខ្លួននៅជប៉ុន

March 27, 2025

យោងតាមការចុះផ្សាយព័ត៌មានបរទេសធំៗ កាលពីពេលថ្មីៗនេះក្រុមហ៊ុន Toyota បានប្រកាសពន្យារពេលក្នុងការសាងសង់រោងចក្រអាគុយរបស់ខ្លួននៅប្រទេសជប៉ុន។

មូលហេតុនៃកការពន្យារពេលសាងសង់រោងចក្រអាគុយនៅប្រទេសកំណើតខ្លួន ដោយសារការលក់រថយន្ដអគ្គិសនីរបស់ពួកគេ មិនបានគ្រប់តាមគម្រោងដែលបានព្រៀងទុក ហើយដោយសារពួកគេ កំពុងកែសម្រួលយុទ្ធសាស្រ្តផលិតរថយន្តអគ្គិសនីរបស់ខ្លួន។ ការពន្យារពេលបែបនេះ អាចប៉ះពាល់ដល់កាលបរិច្ឆេទចាប់ផ្តើមប្រតិបត្តិការដែលពួកគេបានរំពឹងទុកនៅឆ្នាំ ២០២៨ ។

ក្រុមហ៊ុន Toyota បានដាក់ចេញនូវនៃគោលដៅ ក្នុងការអភិវឌ្ឍរថយន្តអគ្គិសនីជំនាន់ក្រោយរបស់ខ្លួន ដែលមានសមត្ថភាពអាចបើកបរបានបានរហូត ១ ០០០គីឡូម៉ែត្រ។ ឥឡូវគេពួកគេកំពុងបន្ថយល្បឿនបន្តិច លើគម្រោងសាងសង់ហេដ្ឋារចនាសម្ព័ន្ធរោងចក្រអាគុុយនៅប្រទេសជប៉ុន។

តាមការគ្រោងទុករោងចក្រអាគុយនេះនឹងសាងសង់នៅខេត្ត Fukuoka របស់ប្រទេសជប៉ុន យោងតាមបញ្ជាក់របស់លោក Seitaro Hattori ដែលជាអភិបាលខេត្ត។

យោងតាមរបាយការណ៍របស់ Nikkei Asia ក្រុមហ៊ុន Toyota នៅតែប្តេជ្ញាចិត្តសាងសង់ទីតាំងនេះ ប៉ុន្តែក្រុមហ៊ុនកំពុងវាយតម្លៃឡើងវិញនូវអ្វីដែលនឹងត្រូវបានផលិតនៅទីនោះ។ ការផ្លាស់ប្តូរនេះឆ្លុះបញ្ចាំងពីការកែសម្រួលយ៉ាងធំ នៃមហិច្ឆតាលើទីផ្សាររថយន្តអគ្គិសនីរបស់ Toyota។ ខណៈពេលដែលការលក់រថយន្តអគ្គិសនីសកលនៅតែបន្តកើនឡើង ប៉ុន្តែក្រុមហ៊ុន Toyota មិនបង្កើនល្បឿនលឿនដូចដែលក្រុមហ៊ុនផលិតរថយន្តមួយចំនួនបានព្យាករណ៍នោះទេ។ ការមិនស៊ីគ្នារវាងការព្យាករណ៍ និងការពិតនេះកំពុងជំរុញឲ្យក្រុមហ៊ុនគិតឡើងវិញនូវគោលដៅរបស់ខ្លួន។

កាលពីឆ្នាំ ២០២២ ក្រុមហ៊ុន Toyota បានប្រកាសថាខ្លួនមានគោលបំណងលក់រថយន្តអគ្គិសនីឲ្យបានចំនួន ១,៥ លានគ្រឿងក្នុងមួយឆ្នាំ គិតត្រឹមឆ្នាំ ២០២៦។ ចំនួននៃការលក់នេះត្រូវបានកាត់បន្ថយមកត្រឹម ១ លានគ្រឿងនៅឆ្នាំ ២០២៣ ហើយថ្មីៗនេះត្រូវបានកាត់បន្ថយម្តងទៀតមកត្រឹម ៨០០ ០០០ គ្រឿងប៉ុណ្ណោះ។ ក្រុមហ៊ុនជប៉ុនមួយនេះ ក៏មិនបានបោះបង់ការផលិតរថយន្តអគ្គិសនីនោះទេ គ្រាន់តែកំពុងកែសម្រួលខ្លះ ដោយសារការរំពឹងទុកនៃការលក់ក្នុងទីផ្សារ មានភាពស្មុគស្មាញជាងមុន និងមិនអាចព្យាករណ៍បានដូចការលើកឡើងដំបូងឡើយ។

កាលពីដើមខែនេះ ក្រុមហ៊ុន Toyota បានបង្កើតក្រុមហ៊ុនបុត្រសម្ព័ន្ធចិនថ្មីមួយសម្រាប់ក្រុមហ៊ុន Lexus ដែលនឹងអភិវឌ្ឍ និងផលិតរថយន្តអគ្គិសនី និងអាគុយនៅរោងចក្រមួយក្នុងប្រទេសចិន។ រោងចក្រនេះនឹងមានទីតាំងនៅទីក្រុងសៀងហៃ ហើយនឹងផលិតម៉ូដែលជាច្រើន ប៉ុន្តែសម្រាប់ទីផ្សារចិនតែប៉ុណ្ណោះ៕

ផ្ទាំងផ្សាយពាណិជ្ជកម្ម

រថយន្តថ្មីចំនួន ១៣ ម៉ូឌែល របស់ Nissan នឹងមកដល់នៅឆ្នាំ ២០២៧ ចាប់ពី Sentra ដល់ Frontier

March 27, 2025

ក្រុមហ៊ុន Nissan បានប្រកាសជាផ្លូវការថា ពួកគេកំពុងរៀបចំដំណើរការផលិតរថយន្តថ្មីៗ និងរចនាឡើងវិញចំនួន ១៣ ម៉ូឌែល ក្នុងរយៈពេល ២ ឆ្នាំខាងមុខ ដើម្បីប្រកួតប្រជែងក្នុងឧស្សាហកម្មរថយន្តដែលកំពុងតែមានភាពប្រកួតប្រជែងយ៉ាងខ្លាំងនៅក្នុងពេលបច្ចុប្បន្ននេះ។

ចំពោះរថយន្តថ្មីៗទាំងនេះ រួមមានប្រភេទប្រើម៉ាស៊ីនចំហេះក្នុងធម្មតា, Hybrid, Plug-in Hybrid និងអគ្គិសនីសុទ្ធ (EV) ដើម្បីបំពេញតម្រូវការអតិថិជននៅក្នុងតំបន់ផ្សេងៗ។

សម្រាប់នៅសហរដ្ឋអាមេរិក, Nissan នឹងបញ្ចេញ Leaf ជំនាន់ថ្មី ដែលផ្លាស់ប្តូររចនាបថពី Hatchback ទៅ Crossover ជាមួយរូបរាងស្ព័រ ប្រើប្រាស់នូវថាសកង់ ១៩ អ៊ីញ និងគាំទ្រប្រព័ន្ធសាក Tesla Supercharger (NACS Charging Port)។ រួចមកគឺ Nissan Sentra ជាមួយរចនាបទថ្មីដែលទាក់ទាញជាងមុន និង Rogue ឆ្នាំ២០២៦ ដែលមានទាំងជម្រើស Hybrid និង Plug-in Hybrid ។

ចំណែកនៅអឺរ៉ុប, Nissan នឹងចេញ Micra EV និង Juke EV ដែលជាម៉ូឌែលអគ្គិសនីទាំងស្រុង ដែលនឹងផ្អែកលើរចនាបទ Hyper Punk Concept ។ ជាមួយគ្នានេះ សម្រាប់ Qashqai នឹងទទួលបានប្រព័ន្ធ Hybrid e-Power ជំនាន់ទី ៣ ។

ក្នុងទីផ្សារតំបន់ Latin America និងអូស្ត្រាលី, Nissan នឹងបញ្ចេញ Navara/Frontier ជំនាន់ថ្មី ដែលមានរូបរាងកាន់តែរឹងមាំ និងប្រព័ន្ធបើកបរឆ្លាតវៃ។ ចំណែកនៅតំបន់អាស៊ីនឹងមានការផលិតរថយន្តប្រទេស SUV និង Minivan ថ្មី នៅឥណ្ឌា។

គួរឲដឹងថា បច្ចុប្បន្ននេះ Nissan ក៏កំពុងបន្តអភិវឌ្ឍន៍ប្រព័ន្ធ e-Power Hybrid ថ្មីផងដែរ រួមជាមួយនឹងការបង្កើនការវិនិយោគលើរថយន្តអគ្គិសនី ដើម្បីបំពេញតម្រូវការទីផ្សារនាពេលអនាគត៕

ផ្ទាំងផ្សាយពាណិជ្ជកម្ម

យកពន្ធនាំចូលថ្មី 25% លើរថយន្តគ្រប់ប្រភេទដែលមិនផលិតក្នុងអាមេរិក

March 27, 2025

ប្រធានាធិបតីអាមេរិកលោក Donald Trump បានប្រកាសដាក់ពន្ធថ្មីចំនួន ២៥% លើរថយន្តទាំងអស់ដែលមិនបានផលិតនៅក្នុងសហរដ្ឋអាមេរិក។ នេះជាការបង្កើនពន្ធដ៏ធំដែលនឹងមានឥទ្ធិពលលើក្រុមហ៊ុនផលិតរថយន្តទាំងអស់ និងអ្នកប្រើប្រាស់ទូទាំងពិភពលោក ប៉ុន្តែគាត់បានអះអាងថា វានឹងជួយបង្កើនការងារឲ្យអាមេរិក និងប្រាក់ចំណូលប្រមាណ ១០០ ពាន់លានដុល្លារ ដោយជំរុញឲ្យក្រុមហ៊ុនផលិតរថយន្តមកបើករោងចក្រនៅក្នុងប្រទេសវិញ។

ចំពោះពន្ធនេះនឹងត្រូវអនុវត្តលើរថយន្តគ្រប់ប្រភេទដែលនាំចូលមកក្នុងសហរដ្ឋអាមេរិករួមមានប្រភេទ sedans, SUVs, minivans, trucks និងផ្នែកគ្រឿងបង្គុំរថយន្តសំខាន់ៗដូចជា ម៉ាស៊ីន, ប្រអប់លេខ និងម៉ូទ័រអគ្គិសនីជាដើម។

ក្នុងនោះ ដើម្បីគេចពីពន្ធថ្មីនេះ ក្រុមហ៊ុនផលិតរថយន្តជាច្រើនកំពុងពិចារណាការវិនិយោគនៅសហរដ្ឋអាមេរិកវិញ។ ជាឧទាហរណ៍ កាលពីពេលថ្មីៗនេះ ក្រុមហ៊ុន Hyundai បានប្រកាសវិនិយោគប្រមាណ ២១ ពាន់លានដុល្លារ ដើម្បីបើករោងចក្រថ្មីនៅអាមេរិកផងដែរ។

គួរឲដឹងថា រថយន្តដែលផលិតនៅអាមេរិកនឹងមិនជាប់ពន្ធនោះទេ ប៉ុន្តែពន្ធអាចនឹងត្រូវអនុវត្តលើរថយន្តដែលប្រើប្រាស់នូវគ្រឿងបង្គុំដែលនាំចូលពីបរទេស។ ខណៈព៌ត័មានលម្អិតអំពីការអនុវត្តពន្ធនេះនឹងត្រូវបង្ហាញនៅថ្ងៃទី ២ ខែមេសា៕

ផ្ទាំងផ្សាយពាណិជ្ជកម្ម

MG S5 EV ប្រើអគ្គីសនីសុទ្ធ សាកថ្មម្តងជិះបាន ៥៤០ គីឡូម៉ែត្រ ដាក់លក់នៅថៃតម្លៃលក់ខ្ទង់ ២មុឺនដុល្លារ

March 27, 2025

[បរទេស] ក្រុមហ៊ុនផលិតរថយន្ត MG បានធ្វើការដាក់បង្ហាញចេញជាផ្លូវការនៅរថយន្តអគ្គីសនីសុទ្ធ MG S5 EV ស៊េរីឆ្នាំ ២០២៥ ជាមួយតម្លៃលក់ ២១ ២២០ ដុល្លារ ដល់ ២៦ ៥២៦ ដុល្លារ នៅឯពិព័រណ៍រថយន្ត Bangkok Motor Show 2025 កំពុងធ្វើឡើងនៅប្រទេសថៃ ។

រថយន្តនេះ ត្រូវបានផលិតឡើងនៅលើគ្រោងឆ្អឹង NPE platform ដំណើរការដោយ៖

ម៉ូទ័រអគ្គិសនីចំនួន ១ អាចផលិតកម្លាំងបាន ១៧០ សេះ និងកម្លាំងរមួល ២៥០ ញ៉តុនម៉ែត្រ ផ្គួបជាមួយអាគុយទំហំ ៥០ គីឡូវ៉ាត់ម៉ោង អាចបើកបរបានចម្ងាយ ៤១៦ គីឡូម៉ែត្រ នៅពេលសាកថ្មពេញម្តង សម្រាប់ម៉ូដែល D និង X
ម៉ូទ័រអគ្គិសនីចំនួន ២ អាចផលិតកម្លាំងបាន ២៤៥ សេះ និងកម្លាំងរមួល ៣៥០ ញ៉តុនម៉ែត្រ ផ្គួបជាមួយអាគុយទំហំ ៦៤ គីឡូវ៉ាត់ម៉ោង អាចបើកបរបានចម្ងាយ ៥៥០ គីឡូម៉ែត្រ នៅពេលសាកថ្មពេញម្តង សម្រាប់ម៉ូដែល V ។ សម្រាប់ការសាកថ្មល្បឿនលឿនបានពី ៣០-៨០% ប្រើរយៈពេល ៣០នាទី ។

សម្រាប់ការឌីស្សាញផ្នែកខាងក្រៅ មានប៉ាណាមុខបិទជិត ចង្កៀងមុខប្រភេទ LED មានមុខងារទម្លើង-ទម្លាក់ដោយស្វ័យប្រវត្តិ កញ្ចក់ចំហៀងសក្តោបអូតូ ភ្ជាប់អំពូលស៊ីញូ LED ជាមួយមុខងារផ្តល់សញ្ញាគ្រោញថ្នាក់មកពីផ្នែកចំហៀង Blind Spot Monitoring ក៏ដូចជាថាសកង់ស្ព័រទំហំ ១៨អ៉ីញ និងទ្វារឃ្លុបក្រោយបើក-បិទដោយការក្រវាសជើង ។

ចំពោះនៅផ្នែកខាងក្នុង មានកុងទ័របង្ហាញព័ត៌មានឌីជីថលទំហំ ១០,២៥ អ៉ីញ និងអេក្រង់កំសាន្ត touchscreen ទំហំ ១២,៨ អ៉ីញ ប្រើប្រព័ន្ធប្រតិបត្តិការ i-SMART system រួមទាំង Apple CarPlay/Android ហ្វ្រាំងដៃអេឡិចត្រូនិច ជាមួយមុខងារ Auto Hold ក៏ដូចជាកន្លែងសាកថ្មឥតប្រើខ្សែ ដំបូលកញ្ចក់ Panoramic sunroof ជាដើម ៕

ផ្ទាំងផ្សាយពាណិជ្ជកម្ម

Nissan បង្ហាញគ្រមូរថយន្ដអគ្គិសនី ស៊េរីឆ្នាំ២០២៦ សាកថ្មមួយពេញបើកបាន៦០០គីឡូ

March 27, 2025

ក្រុមហ៊ុនជប៉ុន Nissan បានបង្ហាញពីរូបភាពគម្រូរបស់រថយន្ត Nissan Leaf ឆ្នាំ២០២៦ ដែលត្រៀមបង្ហាញនៅក្នុង ខែមិថុនា ខាងមុខនេះ។

យោងតាមទស្សនាវដ្តី Autocar របស់ចក្រភពអង់គ្លេស បានរាយការណ៍ពីការពិភាក្សាជាមួយនាយកប្រតិបត្តិក្រុមហ៊ុន Nissan ពាក់ព័ន្ធជាមួយរថយន្ត Nissan Leaf ស៊េរី២០២៦ តាមការបញ្ជក់ពីក្រុមហ៊ុន រថយន្ដនេះត្រូវបានបន្ថែមថាមពលថ្ម ដើម្បីធានានូវការបើកបានបានតែឆ្ងាយនិងបានរចនាឡើងរូបថ្មីបែបរថយន្ដនាពេលអនាគត។ យោងតាមសារព័ត៌មានធំៗនៅបរទេស ក៏បានចុះផ្សាយថា រថយន្ដអគ្គិសនី Nissan Leaf បើកបរបានរយ:ចម្ងាយ ៦០០គីឡូម៉ែត្រ។

រថយន្ដនេះអាចនឹងបំពាក់មកជាមួយអាគុយធំជាង រថយន្តអគ្គិសនី Nissan Ariya ទៅទៀត តាមការប៉ាន់ស្មានអាចនឹងប្រើអាគុយទំហំ ៦៣kWh ឬ ៨៧kWh។

ក្នុងឆ្នាំ២០២៦ ក្រុមហ៊ុនជប៉ុន Nissan នឹងត្រៀមបង្ហាញនូវរថយន្ដ៣ម៉ូដែលរបស់ខ្លួនរួមមាន៖ Nissan Leaf, Nissan Micra និង Nissan Juke។ ចំពោះព័ត៌មានលម្អិត ទាក់ទងនិងរថយន្តស៊េរីឆ្នាំ២០២៦ ទាំង៣គ្រឿងនេះ ក្រុមហ៊ុនមិនបានបង្ហាញជាផ្លូវការនៅឡើយទេ។

រថយន្ត Nissan Leaf ត្រូវបានចេញលក់ដំបូងក្នុងឆ្នាំ ២០១០ ហើយបានក្លាយជារថយន្តអគ្គិសនីផលិតទ្រង់ទ្រាយធំដំបូងគេរបស់ពិភពលោក ដោយលក់បានជាង ៦៥០,០០០ គ្រឿងគិតត្រឹមពាក់កណ្តាលឆ្នាំ ២០២៣៕

ផ្ទាំងផ្សាយពាណិជ្ជកម្ម

ស្ថានីយសាកថ្មល្បឿនលឿនរបស់ BYD សាកតែ ៥នាទី ជិះបាន ៤០០គីឡូម៉ែត្រ នឹងដាក់ឲ្យប្រើនៅខែក្រោយនេះ

March 27, 2025

[បរទេស] ក្រុមហ៊ុនផលិតរថយន្ត BYD គ្រោងនឹងចាប់ផ្តើមដាក់ពង្រាយស្ថានីយ៍សាកថ្មល្បឿនលឿន Ultrafast-Charging station ចំនួន ៥០០ ទីតាំងដំបូងសិន ក្នុងខែមេសា ឆ្នាំ ២០២៥ បន្ទាប់ពីបានដាក់បញ្ចេញបច្ចេកវិទ្យា BYD Super e-Platform នៅប្រទេសចិនកាលពីសប្តាហ៍មុន ។

សម្រាប់ស្ថានីយ៍សាកថ្មល្បឿនលឿននេះមានឈ្មោះថា Megawatt Flash Charger មានកម្លាំងខ្លាំងជាង ១ ០០០ គីឡូវ៉ាត់ដែលសាកថ្មត្រឹមតែ ៥នាទីប៉ុណ្ណោះ ក៏អាចបើកបរបានចម្ងាយ ៤០០គីឡូម៉ែត្រ ជាឆ្នាំងសាក EV ដំបូងគេរបស់ពិភពលោកដែលអាចផ្ទុកថាមពលខ្លាំងជាងស្ថានីយសាកថ្មល្បឿនលឿន Supercharger ចុងក្រោយបង្អស់របស់ក្រុមហ៊ុន Tesla ដល់ដល់ទៅ ២ដង ។

គួរឲ្យដឹងថា រថយន្តដំបូងដែលនឹងត្រូវប្រើប្រាស់ស្ថានីយសាកថ្មល្បឿនលឿន គឺជាម៉ូដែល BYD Han L EV និង BYD Tang L EV ៕

ផ្ទាំងផ្សាយពាណិជ្ជកម្ម

Mazda គ្រោងនឹងបញ្ចប់ជីវិតរថយន្ដ ៤ម៉ូដែលរបស់ខ្លួននៅចុងឆ្នាំនេះ

March 26, 2025

យោងតាមការចុះផ្សាយព័ត៌មានពី Carcoops រថយន្ត Mazda ចំនួនបួនម៉ូដែលអាចនឹងត្រូវបញ្ឈប់ការផលិតនៅចុងឆ្នាំ២០២៥។រថយន្តទាំង ៤ម៉ូដែលកំពុងស្ថិតក្នុងបញ្ជីរង់ចាំការបញ្ឈប់ការផលិតរួមមាន៖ រថយន្ត Mazda2 supermini, CX-3, Mazda6 និងរថយន្ដអគ្គិសនី MX-30។

រថយន្ដ Mazda MX-30 ជារថយន្តអគ្គិសនីដែលផលិតដំបូងបង្អស់របស់ Mazda យោងតាមចុះផ្សាយពី Creative Trend ។ រថយន្ដមួយនេះ គ្រោងនឹងបញ្ចប់ការផលិតនៅខែមីនា ឆ្នាំ២០២៥ មូលហេតុដោយសារ ដោយសារមានតម្លៃរាងខ្ពស់ ប៉ុន្តែរយ:ចម្ងាយនៃការបើកបរបានជិត ជាហេតុធ្វើឲ្យពិបាកប្រកួតប្រជែងលើទីផ្សារ។

រថយន្ត Mazda2 Supermini ក៏ត្រូវបានគេរាយការណ៍ថាក៏ជិតដល់ទីបញ្ចប់ការផលិតដូចគ្នា។ រថយន្តមួយនេះបានបង្ហាញខ្លួនដំបូងក្នុងឆ្នាំ២០១៤ ហើយបានទទួលការផ្លាស់ប្តូររូបរាងនៅឆ្នាំ ២០១៩និង២០២៣។ ការធ្វើបច្ចុប្បន្នភាពថ្មីបំផុត របស់វាបានមកដល់ក្នុងឆ្នាំ២០២៤ ប៉ុន្តែទោះបីជាយ៉ាងណាក៏ដោយ ការធ្វើបច្ចុប្បន្នភាពទាំងនោះហាក់ដូចជាសញ្ញាវិជ្ជមាន មិនគ្រប់គ្រាន់ដើម្បីឲ្យវាបន្តដំណើរទៅមុខទៀតទេ។ Mazda ត្រូវបានគេរាយការណ៍ថាគ្រោងនឹងបញ្ឈប់វាមុនដំណាច់ឆ្នាំ២០២៥។

រថយន្ត Mazda CX-3 ក៏នឹងត្រូវបញ្ចប់នៅខែកញ្ញា ឆ្នាំ២០២៥ ផងដែរ។ ទោះបីជាមានការផ្លាស់ប្តូររូបរាងក្នុងឆ្នាំ ២០១៨ និងការកែប្រែមួយចំនួនផ្សេងទៀតក្នុងរយៈពេលប៉ុន្មានឆ្នាំចុងក្រោយនេះក៏ដោយ វាត្រូវបានបញ្ឈប់មិនឲ្យមានការដាក់លក់រួចហើយនៅអាមេរិកខាងជើង និងអឺរ៉ុប ប៉ុន្តែវានៅតែមានលក់នៅក្នុងប្រទេសជប៉ុន និងទីផ្សារអាស៊ីមួយចំនួន។

រថយន្ត Mazda6 ក៏ត្រៀមខ្លួនចាកចេញពីពិភពគុនក្នុងឆ្នាំនេះផងដែរ។ រថយន្ដនេះបានបង្ហាញដំបូងនៅក្នុងឆ្នាំ ២០១២ ហើយវាក៏មានការផ្លាស់ប្តូររូបរាងមួយចំនួនក្នុងរយៈពេលប៉ុន្មានឆ្នាំនេះផងដែរ ទោះបីជាយ៉ាងណាក៏រថយន្ដមួយនេះ មិនសូវទទួលបានការគាំទ្រនិងមានទាក់ទាញគ្រប់គ្រាន់ ដើម្បីរក្សាភាពតាមទាន់និន្នាការទីផ្សារដែលកំពុងផ្លាស់ប្តូរនាពេលបច្ចុប្បន្ននោះទេ៕

ផ្ទាំងផ្សាយពាណិជ្ជកម្ម

Ford Ranger Super Duty ឆ្នាំ២០២៦ កំពុងធ្វើតេស្តនៅអឺរ៉ុប ត្រៀមបង្ហាញខ្លួននៅឆ្នាំក្រោយ

March 26, 2025

រថយន្ត Ford Ranger Super Duty ឆ្នាំ២០២៦ ត្រូវបានគេប្រទះឃើញកំពុងធ្វើតេស្ត ក្នុងអាកាសធាតុត្រជាក់នៅតំបន់អឺរ៉ុបខាងជើង។ ម៉ូដែលនេះគឺជាកំណែទម្រង់ថ្មីរបស់ត្រកូល Ranger ដោយផ្ដោតលើសមត្ថភាពនៃការអូស និងដឹកទំនិញ។ រថយន្ដនេះនឹងត្រូវផលិតនៅក្នុងប្រទេសថៃ ហើយត្រូវចែកចាយបន្ដនៅលើទីផ្សារបរទេស។

ក្រុមហ៊ុន Ford បានបញ្ជាក់ថារថយន្ដ Ranger Super Duty អាចនឹងមានវត្តមានននៅលើទីផ្សារនៅឆ្នាំក្រោយនេះ។ រថយន្ដនេះរចនាតាមលំនាំត្រកូល Ranger ស្តង់ដារ ប៉ុន្តែត្រូវបានបំពាក់ដោយបំពង់ខ្យល់ ហើយមានការទ្រុងក្រោយរបស់រថយន្ដនេះត្រូវបានច្នៃជាពិសេស ដើម្បីផ្ដោតលើការដឹកធ្ងន់។

ចំពោះរូបរាងខាងក្រៅយើងអាចមើលឃើញត្រឹមចង្កៀងខាងមុខ ដែលរថយន្ដនេះ បានរក្សានូវលំនាំនៃការរចនាបែបអក្សរ C ខណ:ប៉ាណាខាងត្រូវបានបិទជិត ប៉ុន្តែត្រូវបានជឿថានៅតែមានអក្សរ Ford ផុសនៅផ្នែកខាងមុខ។ រថយន្ដមួយនេះបានបំពាក់មកជាមួយថាសកង់ទំហំ ១៨អុីញអបជាមួយសំបកធំដែលផ្ដោតលើការបើកបរគ្រប់ស្ថានភាពផ្លូវ។

រថយន្ដនេះមានសមត្ថភាពអូសទាញរហូតដល់ទម្ងន់ ៤ ៥០០គីឡូក្រាម។ ក្រុមហ៊ុន Ford ក៏មិនបានបង្ហាញព័ត៌មានអ្វីច្រើនទេ ប៉ុន្តែតាមការប៉ាន់ស្មានរថយន្ដ Ranger Super Duty អាចនឹងដំណើរការជាមួយម៉ាស៊ីន ៣.០ EcoBoost twin-turbo ៦សុីឡាំង អាចផលិតកម្លាំង ៣៩២សេះនិងកម្លាំងបង្វិល៥៨៣ញ៉ូតុនម៉ែត្រ។

ចំពោះព័ត៌មានបន្ថែមទៀតយើងនឹងអាចដឹងក្នុងរយៈពេលប៉ុន្មានខែខាងមុខនេះ ប៉ុន្តែ Ranger Super Duty ត្រូវបានបង្កើតឡើងដោយក្រុមអ្នកជំនាញទីផ្សារអន្តរជាតិរបស់ Ford ហើយនឹងត្រូវផលិតនៅប្រទេសថៃ។ រថយន្ដនេះវានឹងត្រូវដាក់លក់នៅក្នុងទីផ្សារជុំវិញពិភពលោក ប៉ុន្តែតាមការរំពឹងទុក Ford Ranger Super Duty សម្លឹងឃើញទីផ្សារធំនៅតំបន់អាស៊ី, អាហ្វ្រិក, អូស្ត្រាលី និងនូវែលសេឡង់៕

ផ្ទាំងផ្សាយពាណិជ្ជកម្ម

ចិនប្រកាសចេញឡានអគ្គិសនីថ្មី រត់បាន ១ពាន់គីឡូម៉ែត្រ ឯតម្លៃវិញក្រោម ១មុឺនដុល្លារ

March 26, 2025

[ទីផ្សារចិន] ក្រុមហ៊ុនផលិតរថយន្ត SGMW បានធ្វើការដាក់បង្ហាញចេញលក់ជាផ្លូវការនូវរថយន្ត Wuling Hongguang សេរ៊ីឆ្នាំ២០២៥ ប្រភេទ MPV EREV ផ្តល់ជូនទាំងជម្រើស ៥ និង ៧កៅអី ជាមួយតម្លៃលក់ខ្ទង់ ៩ ៥០០ ដុល្លារ នៅក្នុងទីផ្សារប្រទេសចិន។

Wuling Hongguang មានប្រវែងតួខ្លួនសរុប ៤ ៥១៥ ម.ម ទទឹង ១ ៧២៥ ម.ម កម្ពស់ ១ ៧៩០ ម.ម និងប្រវែងគម្លាតកង់មុខ-ក្រោយ ២ ៨៥០ ម.ម ដំណើរការដោយម៉ាសុីនសាំងចំណុះ ១,៥ លីត្រ ផលិតម្លាំងបាន ៩៨ សេះ និងកម្លាំងរមួល ១២៥ ញ៉ូតុនម៉ែត្រ ផ្គួបម៉ូទ័រអគ្គិសនីចំនួន ១ ប៉ុង ១ RWD ផលិតម្លាំងបាន ១០១ សេះ និងកម្លាំងរមួល ១៨០ ញ៉ូតុនម៉ែត្រ រួមនឹងអាគុយទំហំ ៨,៥ គីឡូវ៉ាត់ អាចបើកបរបានចម្ងាយ ៥០គ.ម ដោយអគ្គិសនីសុទ្ធ និងសរុប ១ពាន់គីឡូម៉ែត្រ អាចសាកឡើងបាន ៨០ភាគរយ ចំណាយពេលខ្ទង់ ៣០នាទី ប៉ុណ្ណោះ។

សម្រាប់ការរចនាផ្នែកខាងក្រៅ មានការរចនាជាមួយប៉ាណាបែបសំបុកឃ្មុំអមជាមួយចង្កៀងមុខរាងស្លីម និងកាងខ្យល់ទំហំធំ ខណៈផ្នែកខាងក្រោយវិញរចនាជាមួយចង្កៀងបែបបញ្ឈរ ព្រមទាំងប្រើប្រាស់នូវថាសកង់ទំហំ ១៥ អ៊ីញ និងទ្វារប្រភេទអគ្គិសនី។

ចំពោះផ្នែកខាងក្នុងវិញ ទទួលបានអេក្រង់កម្សាន្តទំហំ ៨អ៊ីញ និងអេក្រង់ឌីជីថល អាចភ្ជាប់មុខងារ Apple CarPlay និង Android Auto ក៏ដូចជាកៅអីក្រណាត់ រន្ធ USB ចំនួន ១, ឧបករណ៍បំពងសម្លេងចំនួន ២ និងប្រព័ន្ធសុវត្ថិភាពនិងប្រព័ន្ធជំនួយការបើកបរមួយចំនួនជាដើម៕

ផ្ទាំងផ្សាយពាណិជ្ជកម្ម

BYD Sealion 05 ប្រើអគ្គីសនីសុទ្ធ សាកថ្មម្តងជិះបាន ៥២០គីឡូម៉ែត្រ ដាក់លក់តម្លៃក្រោម ២មុឺនដុល្លារនៅចិន

March 26, 2025

[បរទេស] ក្រុមហ៊ុនផលិតរថយន្ត BYD បានធ្វើការដាក់បង្ហាញចេញជាផ្លូវការនៅរថយន្ត BYD Sealion 05 ជំនាន់ទី ៥ ស៊េរីឆ្នាំ ២០២៥ ប្រភេទ Crossover ប្រើអគ្គិសនីសុទ្ធ ជាមួយតម្លៃលក់ចាប់ពី ១៦ ២៤០ ដុល្លារ ដល់ ១៩ ០០០ ដុល្លារ នៅទីផ្សារប្រទេសចិន ។

BYD Sealion 05 ប្រភេទអគ្គីសនីសុទ្ធ EV នេះ ផលិតឡើងនៅលើគ្រោងឆ្អឹង e-platform 3.0 Evo ដំណើរការដោយម៉ូទ័រអគ្គិសនីចំនួន ១ អាចផលិតកម្លាំងបាន ២១៥ សេះ និងកម្លាំងរមួល ៣៣០ ញ៉ូតុនម៉ែត្រ ផ្គួបជាមួយអាគុយទំហំ ៦០,៩ គីឡូវ៉ាត់ម៉ោង អាចបើកបរបានចម្ងាយ ៥២០ គីឡូម៉ែត្រ នៅពេលសាកថ្មពេញម្តង ខណៈការសាកថ្មពីស្ថានីយល្បឿនលឿន បានពី ៣០-៨០% ប្រើរយៈពេល ១៨នាទីប៉ុណ្ណោះ ។

សម្រាប់ការឌីស្សាញផ្នែកខាងក្រៅ មានប៉ាណាមុខបិទជិត ចង្កៀងមុខប្រភេទ LED មានមុខងារទម្លើង-ទម្លាក់ដោយស្វ័យប្រវត្តិ កញ្ចក់ចំហៀងភ្ជាបអំពូលស៊ីញូ LED ជាមួយមុខងារផ្តល់សញ្ញាគ្រោញថ្នាក់មកពីផ្នែកចំហៀង Blind Spot Monitoring ក៏ដូចជាថាសកង់ស្ព័រទំហំ ១៨អ៉ីញមានមុខងារវាស់សម្ពាធខ្យល់កង់ និងទ្វារឃ្លុបក្រោយបើក-បិទដោយថាមពលអគ្គិសនីផងដែរ ។

ចំពោះនៅផ្នែកខាងក្នុង មានកុងទ័របង្ហាញព័ត៌មានឌីជីថលទំហម ៨,៨ អ៉ីញ និងអេក្រង់កំសាន្ត touchscreen ទំហំ ១២,៨ អ៉ីញ ហ្វ្រាំងដៃអេឡិចត្រូនិច ជាមួយមុខងារ Auto Hold ក៏ដូចជាកន្លែងសាកថ្មឥតប្រើខ្សែ ដំបូលកញ្ចក់ Panoramic sunroof ជាដើម ។ លើសពីនេះ ក៏បានភ្ជាប់មកជាមួយប្រព័ន្ធជំនួយការអ្នកបើកបរ God Eye’s កម្រិត C ជាពិសេសមុខងារជំនួយពេលចេញ-ចូលដោយអូតូទៀតផង។