ផ្ទាំងផ្សាយពាណិជ្ជកម្ម
Facebook Youtube
ទំព័រដើម កំណត់​ហេតុ​បណ្ដាញ ទំព័រ 55

Xpeng បញ្ចេញ Xpeng G7 ជម្រើស EREV របស់ខ្លួន អាចបើកបាន ៣២៥គ.ម ដោយអគ្គិសនីសុទ្ធ

បន្ទាប់ពីប្រកាសបង្ហាញចេញលក់នូវជម្រើសអគ្គិសនីសុទ្ធរបស់ខ្លួនរួច ពេលនេះ ក្រុមហ៊ុនផលិតរថយន្ត Xpeng បានធ្វើការដាក់បង្ហាញចេញនូវរថយន្ត Xpeng G7 ប្រភេទ EREV របស់ខ្លួនហើយ ដោយក្នុងនោះ គ្រោងនឹងប្រកាសចេញជាផ្លូវការនៅក្នុងពេលឆាប់ៗខាងមុខនេះ នៅក្នុងទីផ្សារប្រទេសចិន។

ចំពោះរថយន្ត Xpeng G7 ប្រភេទ EREV នេះ ដំណើរការដោយម៉ាសុីនចំណុះ ១,៥លីត្រ ផលិតកម្លាំងបាន ១៤៨សេះ និងម៉ូទ័រអគ្គិសនីចំនួន ១ អាចផលិតកម្លាំងបាន ២៩២សេះ ផ្គួបជាមួយអាគុយ LFP ទំហំ ៥៥,៨គីឡូវ៉ាត់ម៉ោង អាចបើកបរបានចម្ងាយ ៣២៥គីឡូម៉ែត្រ ដោយអគ្គិសនីសុទ្ធ និងមានល្បឿនអតិបរមា ២០២គ.ម/ម៉ោង។

រថយន្តនេះ មានប្រវែងតួខ្លួនសរុប ៤ ៩១៨ ម.ម ទទឹង ១ ៩២៥ ម.ម កម្ពស់ ១ ៦៥៥ ម.ម និងប្រវែងគម្លាតកង់មុខ-ក្រោយ ២ ៨៩០ ម.ម ។ វាមានការឌីស្សាញជាមួយប៉ាណាបិទជិត ចង្កៀងមុខ-ក្រោយ LED អូសកាត់ពីផ្នែកម្ខាងទៅផ្នែកម្ខាង ទ្វារប្រភេទ hidden door handles និងជម្រើសថាសកង់ស្ព័រទំហំ ១៩ និង ២០ អ៊ីញ ជាដើម ខណៈព័ត៌មានលម្អិតផ្សេងៗទៀត ក៏ដូចជាតម្លៃមិនទាន់បង្ហាញចេញនៅឡើយទេ៕

ផ្ទាំងផ្សាយពាណិជ្ជកម្ម

SUV កូនកាត់ឆ្នាំ​​២០២៦ ដែលមានកម្លាំងសរុប ៩១២សេះរបស់ Denza ត្រៀមបង្ហាញខ្លួននៅសប្តាហ៍ក្រោយ

[បរទេស] Denza ដែលជាក្រុមហ៊ុនបុត្រសម្ព័ន្ធរបស់ BYD បានធ្វើការប្រកាសថារថយន្ត SUV កូនកាត់ PHEV ប្រណិត Denza N9 សេរ៊ីថ្មីឆ្នាំ២០២៦ នឹងសម្ភោធជាផ្លូវការនៅថ្ងៃទី១៧ ខែកញ្ញានេះ។ 

តាមរយ:រូបភាពដែលបានបង្ហាញចេញដោយ Denza ឃើញថាម៉ូឌែលឆ្នាំ២០២៦ នឹងទទួលបាននូវពណ៌តួរខ្លួន Two-tone ថ្មី ដោយមាន Purple Jade Gold និង Red Elegant Gold ខណ:ព័ត៌មានលម្អិតមួយចំនួនទៀត Denza ពុំទាន់បញ្ចេញនៅឡើយនោះទេ។

សម្រាប់រថយន្ត Denza N9 ដំណើរការដោយប្រព័ន្ធ PHEV ដែលដំណើរការរួមគ្នារវាងម៉ាស៊ីនសាំងចំណុះ ២,០លីត្រ និងម៉ូទ័រអគ្គិសនីចំនួន៣ ផលិតកម្លាំងសរុបបាន ៩១២សេះ។ ក្នុងនោះ N9 អាចបើកបរដោយប្រើអគ្គិសនីសុទ្ធបានចម្ងាយ ២០២គ.ម និងបើកបរដោយប្រើទាំងអគ្គិសនី និងសាំងបានសរុប ១​ ៣០២គ.ម។

បន្ថែមពីនេះ លក្ខណ:ពិសេសបន្ថែមនៃរថយន្ត N9 មានដូចជា បំពាក់មកជាមួយកុងទ័រព័ត៌មានបាញ់លើកញ្ចក់(HUD)ទំហំ ៥០អ៊ីញ, កុងទ័របង្ហាញព័ត៌មានកម្រិត 2.5K ទំហំ ១៣,២អ៊ីញ, អេក្រង់កម្សាន្តកណ្តាលកម្រិត 2.5K ទំហំ ១៧,៣អ៊ីញ, អេក្រង់កម្សាន្តសម្រាប់អ្នករួមដំណើរខាងមុខកម្រិត 2.5K ១៣,២អ៊ីញ, អេក្រង់លើដំបូលសម្រាប់អ្នកដំណើរខាងក្រោយទំហំ ១៧,៣អ៊ីញ, ឧបករណ៍បំពងសម្លេងប្រភេទ Devialet ចំនួន ២៦ចំណុច រួមជាមួយកន្លែងសាកថ្មឥតខ្សែថាមពល ៥០វ៉ាត់ និងប្រព័ន្ធជំនួយការបើកបរ DiPilot 300 ផងដែរ។

គួររំលឹកផងដែរថា បច្ចុប្បន្ន Denza N9 ឆ្នាំ២០២៥ មានតម្លៃចន្លោះពី ៥៤ ៥០០ដុល្លារ ដល់ ៦២ ៥០០ដុល្លារក្នុងទីផ្សារប្រទេសចិន៕

 

ផ្ទាំងផ្សាយពាណិជ្ជកម្ម

រាជរដ្ឋាភិបាលកម្ពុជាត្រៀមរថយន្តក្រុងចំនួន ៤៩៧គ្រឿងដឹក​ពលរដ្ឋ​ទៅស្រុកកំណេីត​ឥតគិតថ្លៃ

យោងតាមការបញ្ជាក់របស់សម្តេច​មហាបវរ​ធិបតី​ ហ៊ុន​ ម៉ាណែត​ នាយករដ្ឋមន្ត្រី​ នៃ​ព្រះរាជាណាចក្រ​កម្ពុជា នៅឆ្នាំ២០២៥នេះ មិនខុសពីពេលច្រើនឆ្នាំកន្លងមកនេះទេ ដើម្បីជួយសម្រាលបន្ទុកចំណាយរបស់បងប្អូនប្រជាពលរដ្ឋ ក្នុងការធ្វើដំណើរទៅលេងស្រុកកំណើតក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ សម្តេច​​ធិបតី​ ហ៊ុន​ ម៉ាណែត ​បានផ្តល់គោលការណ៍ជូនរដ្ឋបាលរាជធានីភ្នំពេញរៀបចំនូវរថយន្តក្រុង សម្រាប់ដឹកជញ្ជូនបងប្អូនប្រជាពលរដ្ឋធ្វើដំណើរទៅលេងស្រុកកំណើតដោយឥតគិតថ្លៃ។

ជាមួយគ្នានេះឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានបញ្ជាក់ថា រដ្ឋបាលរាជធានីភ្នំពេញ បានត្រៀមរៀបចំរថយន្តក្រុង ចំនួន ៥៩៧គ្រឿង សម្រាប់បម្រើសេវាដឹកជញ្ជូនប្រជាពលរដ្ឋ ក្នុងរាជធានីភ្នំពេញប្រចាំថ្ងៃ និងសម្រាប់ដឹកជញ្ជូនប្រជាពលរដ្ឋទៅលេងស្រុកកំណើតក្នុងឱកាសបុណ្យភ្ជុំបិណ្ឌ ប្រពៃណីជាតិខ្មែរ ឆ្នាំ២០២៥ ចំនួន ៦ថ្ងៃ ដោយគិតចាប់ពីថ្ងៃទី២០ ដល់ថ្ងៃទី២៥ ខែកញ្ញាឆ្នាំ២០២៥ ដោយក្នុងនោះ៖

១. រថយន្តក្រុងចំនួន ១០០គ្រឿង ប្រើប្រាស់សម្រាប់បម្រើសេវាដឹកជញ្ជូនប្រជាពលរដ្ឋប្រចាំថ្ងៃក្នុង រាជធានីភ្នំពេញ និងសេវារថយន្តក្រុងសាធារណៈអាកាសយានដ្ឋានអន្តរជាតិតេជោ (AIRPORT EXPRESS BUS)។

២. រថយន្តក្រុងចំនួន ៤៩៧គ្រឿង ប្រើប្រាស់សម្រាប់ដឹកជញ្ជូនប្រជាពលរដ្ឋពីរាជធានីភ្នំពេញទៅ លេងស្រុកកំណើត និងការវិលត្រលប់មកវិញ ដោយមានបែងចែកជាខ្សែរត់ធំៗចំនួន ៧ គោលដៅ។ ព័ត៌មានលម្អិត សាលារាជធានីភ្នំពេញនិងផ្ដល់ជូនសាធារណៈជនក្នុងពេលឆាប់ៗខាងមុខ៕


ផ្ទាំងផ្សាយពាណិជ្ជកម្ម

មើលឃើញអនាគតកាល! ក្រុមហ៊ុនចិន និងអាមេរិក ប្រកាសសហការគ្នា ត្រៀមវៃយកទីផ្សាររថយន្ត Robotaxi នៅទ្វីបអឺរ៉ុប

បន្ទាប់ពីមើលឃើញកំណើននៃទីផ្សាររថយន្ត Robotaxi ពីមួយឆ្នាំទៅមួយឆ្នាំ និងពេលអនាគត ពេលនេះ ក្រុមហ៊ុន Uber របស់សហរដ្ឋអាមេរិក និងក្រុមហ៊ុន Momenta របស់ប្រទេសចិន បានប្រកាសសហការគ្នាហើយ ដោយក្នុងនោះ ពួកគេនឹងដាក់ឲ្យដំណើរការនូវរថយន្ត Robotaxi នៅក្នុងទីក្រុង Munich ប្រទេសអាល្លឺម៉ង់ ក្នុងឆ្នាំ ២០២៦។

ក្នុងនោះ ការសាកល្បងនេះ គឺជាជំហានដ៏សំខាន់របស់ក្រុមហ៊ុន Momenta បន្ទាប់ពីការសម្រេចចិត្តចូលរកសុីនៅក្នុងទីផ្សារតំបន់អឺរ៉ុបជាលើកដំបូងរបស់ខ្លួន។

គួរឲដឹងថា ក្រុមហ៊ុន Momenta គឺជាក្រុមហ៊ុនបច្ចេកវិទ្យាខាងផ្នែក autonomous driving របស់ប្រទេសចិន ហើយត្រូវបានបង្កើតឡើងនៅឆ្នាំ ២០១៦ ខណៈនៅក្នុងពេលបច្ចុប្បន្ននេះ គឺកំពុងសហការគ្នាជាមួយក្រុមហ៊ុនផលិតរថយន្តធំៗជាច្រើនដូចជា Mercedes-Benz និង BMW ជាដើម។

គួរបញ្ជាក់ថា ប្រសិនបើការសាកល្បងនេះទទួលបានជោគជ័យ ក្រុមហ៊ុន Momenta និង Uber ផ្ទាល់ ក៏មានគម្រោងពង្រីកទីផ្សារបន្ថែមនៅក្នុងប្រទេសក្នុងតំបន់អឺរ៉ុបជាច្រើនផ្សេងៗទៀតផងដែរ ហើយវាក៏នឹងក្លាយជាភាពជោគជ័យដំបូងរបស់ក្រុមហ៊ុន Momenta បន្ទាប់ពីសៀងហៃផងដែរ៕

ផ្ទាំងផ្សាយពាណិជ្ជកម្ម

រថយន្ដប្រភេទ Seden មានកម្លាំងដល់៥៣៤សេះ របស់ Lynk & Co ដាក់លក់ក្នុងតម្លៃជាង២មុឺនដុល្លារ

ក្រុមហ៊ុន Geely បានប្រកាសដាក់លក់ជាផ្លូវការនូវរថយន្ត Lynk & Co 10 EM-P ប្រភេទ plug-in hybrid ជាមួយតម្លៃចាប់ពី មានចាប់ពី ១៦៣ ៨០០ ដល់ ២០១ ៨០០ យ័ន (ស្មើនឹង ២២ ៨០០ ដល់ ២៨ ០០០ ដុល្លារ)។ រថយន្ដ Lynk & Co 10 EM-P ផ្ដល់មកជាមួយជម្រើស៤ម៉ូឌែលក្នុងនោះរួមមាន៖ 120 AWD Ultra, 240 AWD Ultra, និង 240 AWD Ultra Sport និង 120 AWD Halo។ រថយន្តនេះត្រូវបានរចនាឡើងតាមរចនាបថ “The Next Day” របស់យីហោនេះ។ សម្រាប់ទំហំរូបរាងខាងក្រៅវាមានប្រវែងតួសរុប ៥ ០៥០មម ទទឹង ១ ៩៦៦មម កម្ពស់ ១ ៤៨៧មម និងប្រវែងគម្លាតកង់មុខក្រោយ ៣ ០៥៥មម។

ជាមួយការរចនាគិតគូដល់ប្រព័ន្ធលំហូរខ្យល់ (aerodynamic) វាបានធ្វើឲ្យរថយន្តមានមេគុណកម្លាំងកកិតជាមួយខ្យល់ត្រឹមតែ ០.២១៩ Cd ប៉ុណ្ណោះ។ នៅផ្នែកខាងក្រោយ រថយន្តនេះមានបំពាក់អំពូលភ្លើងក្រោយដែលលាតសន្ធឹងពេញមួយផ្ទាំង ដែលជារចនាបថពេញនិយមនាពេលបច្ចុប្បន្ន។

នៅផ្នែកខាងក្នុង រថយន្តនេះបានបំពាក់មកជាមួយកុងទ័រ LCD ទំហំ ១២.៦អុីញ, អេក្រង់កម្សាន្ដទំហំ ១៥.៤ អុីញ ដំណើរការដោយប្រព័ន្ធ infotainment ជំនាន់ថ្មី Lynk Flyme Auto ដែលប្រើបន្ទះឈីប Qualcomm Snapdragon 8295។ វាគាំទ្រជម្រើសតភ្ជាប់ទូរស័ព្ទចល័តជាច្រើនរួមមាន៖ ICCOA1.6, HiCar, និង CarPlay។

រថយន្ត Lynk & Co 10 EM-P ត្រូវបានផលិតឡើងនៅលើស្ថាបត្យកម្មថាមពលថ្មី CMA Evo ហើយដំណើរការដោយប្រព័ន្ធ plug-in hybrid ហៅថា EM-P។ ប្រព័ន្ធនេះដំណើរការរួមបញ្ចូលគ្នានូវម៉ាស៊ីន hybrid 1.5 រួមបញ្ចូលជាមួយនឹងប្រព័ន្ធ DHT Evo hybrid electric drive អាចផលិតកម្លាំងបា ៣៩០គីឡូវ៉ាត់ (៥២៣ សេះ) និងកម្លាំងបង្វិលអតិបរមា ៧៥៥ញូតុនម៉ែត្រ។ រថយន្តនេះមានបំពាក់ប្រព័ន្ធបូម double wishbone នៅខាងមុខ និង five-link independent នៅខាងក្រោយ ព្រមទាំងមានប្រព័ន្ធបើកបរកង់បួនទាំង៤ (AWD) ជាស្តង់ដារសម្រាប់គ្រប់ម៉ូឌែលទាំងអស់៕

ផ្ទាំងផ្សាយពាណិជ្ជកម្ម

កម្ពុជានឹងមានធនធានមនុស្សលើផ្នែកមេកានិករថយន្ដបន្ថែម ទទួលការបណ្ដុះបណ្ដាលពីក្រុមហ៊ុន Toyota

ក្រុមហ៊ុនជប៉ុន Toyota នឹងបើកដំណើរការមជ្ឈមណ្ឌល​បណ្តុះ​បណ្តាល​ជំនាញ​បច្ចេកទេស មានឈ្មោះជាភាសាអង់គ្លេស Toyota Academy ផ្ដោកលើជំនាញក្នុងវិស័យមេកានិកនិងយានយន្ត បន្ថែមជូនដល់ប្រជាជនកម្ពុជា។ ដូច្នេះនាខាងមុខកម្ពុជានឹងកាន់តែមានធនធានមនុស្សលើផ្នែកមេកានិករថយន្ដ ដែលទទួលបានការបណ្ដុះបណ្ដាលពីក្រុមហ៊ុន Toyota ផ្ទាល់។

Toyota's assembly plant plans to assemble more than 1,300 vehicles in Cambodia - Khmer Times

យោងតាមការចុះផ្សាយរបស់ក្រសួងពាណិជ្ជកម្មការសម្រេចបើកមជ្ឈមណ្ឌល​បណ្តុះ​បណ្តាល​ជំនាញ​បច្ចេកទេសគឺជាតបស្នង ដោយសាររាជរដ្ឋាភិបាលកម្ពុជា តែងតែផ្តល់ការគាំទ្រនិងសម្របសម្រួលដល់ក្រុមហ៊ុនសម្រាប់ដំណើរការវិនិយោគ និងធុរកិច្ចរបស់ខ្លួននៅកម្ពុជា តួយ៉ាងការចុះបញ្ជីម៉ាក និងការស្នើសុំសិទ្ធផ្តាច់មុខ នេះបើយោងតាមការលើកឡើងរបស់លោក Harada Shigeru ជានាយកប្រត្តិបត្តិរបស់ក្រុមហ៊ុន Toyota Tsusho Co., LTD។

បន្ថែមពីនេះលោក Harada Shigeru បានបន្ថែមថាក្រុមហ៊ុនយកចិត្តទុកដាក់ខ្ពស់ចំពោះការបណ្តុះបណ្តាលធនធានមនុស្ស ជាក់ស្តែងក្រុមហ៊ុននឹងដាក់ឱ្យដំណើរការ Toyota Academy នៅដើមឆ្នាំ២០២៦ ដើម្បីជំរុញការអភិវឌ្ឍ ជំនាញក្នុងវិស័យមេកានិក និងយានយន្ត។ ដោយយោងតាមតម្រូវការបញ្ជាទិញខ្ពស់របស់អតិថិជន និងការជឿជាក់លើរាជរដ្ឋាភិបាលកម្ពុជា ក្រុមហ៊ុននឹងពង្រីកខ្សែចង្វាក់ផលិតកម្មរបស់ខ្លួនបន្ថែមទៀតនាពេលខាងមុខនេះ។

រូបភាព៖ក្រសួងពាណិជ្ជកម្ម

ជាឆ្លើយបតនិងអរគុណដល់ទឹកចិត្តដ៏ធំធេងក្នុងស្មារតីជួយកម្ពុជាបែបនេះ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម  បានថ្លែងអំណរគុណក្រុមហ៊ុន Toyota ដែលបានជ្រើសរើសមកបណ្តាក់ទុកវិនិយោគដំណើរការរោងចក្រដំឡើងរថយន្តរបស់ក្រុមហ៊ុនតូយ៉ូតានៅកម្ពុជា ដែលបានផ្តល់ឱកាសការងារជាច្រើនកន្លែងដល់ប្រជាជនកម្ពុជា ក៏ដូចជាការផ្ទេរបច្ចេកវិទ្យាជាដើម។ លោកជំទាវរដ្ឋមន្ត្រី បានគូសបញ្ជាក់ថា រថយន្ត Toyota មានភាពពេញនិយមខ្លាំងចំពោះប្រជាជនកម្ពុជា ដោយភាពល្បីល្បាញលើគុណភាព និងភាពធន់ ដែលផ្តល់ភាពជឿជាក់ដល់អ្នកបើកបរ។


គួរបញ្ជាក់ផងដែរថាជំនួបពិភាក្សារការងារនេះ បានធ្វើឡើងនាព្រឹកថ្ងៃព្រហស្បតិ៍ ទី៤ ខែកញ្ញា ឆ្នាំ២០២៥ នៅទីក្រុងអូសាកា ដោយមានវត្ដមានលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានចូលរួមទទួលទានអាហារការងារពេលព្រឹកជាមួយតំណាងក្រុមហ៊ុន Toyota Tsusho Corporation ដែលដឹកនាំដោយលោក Harada Shigeru, Division CEO ក្រុមហ៊ុន Toyota Tsusho Co., LTD (Japan) និងសហការី ព្រមទាំងតំណាងក្រុមហ៊ុន Toyota Tsusho Manufacturing (Cambodia) ដែលមានវត្តមានអញ្ជើញចូលរួមដោយឯកឧត្តមរដ្ឋលេខាធិការអនុរដ្ឋលេខាធិការ និងឯកឧត្តមឯកអគ្គរាជទូតកម្ពុជាប្រចាំប្រទេសជប៉ុន។

រូបភាព៖ក្រសួងពាណិជ្ជកម្ម

គួររំលឹកផងដែរកន្លងមក​ក្រុមហ៊ុន Toyota Tsusho Manufacturing Cambodia បាន​ចូល​រួម​ចំណែក​ជាមួយ​កម្ពុជា ដើម្បីអភិវឌ្ឍ​ធនធាន​មនុស្ស សេដ្ឋកិច្ចជាតិ តាម​រយៈ​ការ​បង្កើន​ការ​អភិវឌ្ឍន៍​ឧស្សាហកម្ម​យានយន្ដ។ ជាក់​ស្ដែង​ក្នុង​ចង្វាក់​ផលិតកម្ម​ផ្គុំ និង​ដំឡើង​រថយន្ដ​ដែល​ក្រុមហ៊ុន​បាន​បោះ​ទុន​វិនិយោគ​សរុប ៣៦,៨លាន​ដុល្លារ​នេះ នឹង​ប្រើ​បុគ្គលិកជំនាញ​ចំនួន ១៥០​នាក់៕

ផ្ទាំងផ្សាយពាណិជ្ជកម្ម

បន្ទាប់ពីបានចែករំលែកព័ត៌មានអាជីវកម្មដ៏រសើបរបស់ Xiaomi Auto ជាមួយភាគីខាងក្រៅ ពេលនេះ លោក Thomas Wang ត្រូវបានបណ្តេញចេញហើយ!

Xiaomi founder and CEO Lei Jun stands next to Xiaomi's newly unveiled first electric vehicle (EV) SU7, at an event in Beijing, China December 28, 2023. REUTERS/Florence Lo

បន្ទាប់ពីមានការស៊ើបអង្កេតផ្ទៃក្នុង ពេលនេះ ក្រុមហ៊ុន Xiaomi បានសម្រេចបណ្តេញលោក Thomas Wang ដែលជាបុគ្គលិកជាន់ខ្ពស់នៃផ្នែកទីផ្សារក្នុងប្រទេសចិនរបស់ខ្លួនហើយ នេះបើយោងតាមកាសែត The Paper ។

ក្នុងនោះ ចំពោះមូលហេតុនៃការបណ្តេញលោក Thomas Wang របស់ក្រុមហ៊ុន Xiaomi នេះ គឺកើតឡើងចំពេលដែលក្រុមហ៊ុនបានរកឃើញថា លោក Thomas Wang បានចែករំលែកព័ត៌មានអាជីវកម្មដ៏រសើបរបស់ក្រុមហ៊ុន Xiaomi Auto ជាមួយភាគីខាងក្រៅសម្រាប់ផលប្រយោជន៍ផ្ទាល់ខ្លួន។ ចំពោះការសម្រេចចិត្តនេះ ត្រូវបានប្រកាសដោយគណៈកម្មាធិការក្រមសីលធម៌វិជ្ជាជីវៈរបស់ក្រុមហ៊ុន Xiaomi ។

គួរឲដឹងថា លោក Thomas Wang គឺបានចូលរួមជាមួយក្រុមហ៊ុន Xiaomi ក្នុងឆ្នាំ ២០១៦ និងបានកាន់តួនាទីជាន់ខ្ពស់ជាច្រើននៅក្នុងក្រុមហ៊ុន Xiaomi រួមទាំងអ្នកគ្រប់គ្រងទូទៅនៃទីផ្សារប្រទេសចិន, អ្នកគ្រប់គ្រងទូទៅនៃម៉ាក Redmi, អ្នកគ្រប់គ្រងទូទៅនៃផ្នែកទីផ្សារ Redmi និងអ្នកនាំពាក្យផ្លូវការសម្រាប់ម៉ាកទូរស័ព្ទ Redmi ។ គាត់ត្រូវបានចាត់ថ្នាក់ជាអ្នកគ្រប់គ្រងកម្រិតមធ្យមកម្រិតទី ២១ ៕

ផ្ទាំងផ្សាយពាណិជ្ជកម្ម

Leapmotor បង្ហាញរថយន្ត EV ថ្មីរបស់ខ្លួន ត្រៀមវៃយកទីផ្សារ EV នៅទូទាំងពិភពលោក

បន្ទាប់ពីរង់ចាំអស់រយៈពេលជាយូរ ទីបំផុត ក្រុមហ៊ុន Leapmotor បានប្រកាសបង្ហាញចេញជាផ្លូវការនូវរថយន្តថ្មីរបស់ខ្លួនដែលមានឈ្មោះថា Leapmotor Lafa 5 ឬ Leapmotor B05 ហើយ ដោយក្នុងនោះ នឹងធ្វើបើកទទួលកក់នៅក្នុងពេលឆាប់ៗខាងមុខនេះនៅក្នុងទីផ្សារប្រទេសចិន។

ក្នុងនោះ សម្រាប់រថយន្ត hatchback តូចនេះ គឺត្រូវបានផលិតឡើងនៅលើគ្រោងឆ្អឹង LEAP 3.5 មានប្រវែង ៤ ២៦២ ម.ម ទទឹង ១ ៨០៩ ម.ម និងកម្ពស់ ១ ៥៥២ ម.ម ។ វាដំណើរការដោយ៖

  • ម៉ូទ័រអគ្គិសនីចំនួន ១ ប៉ុង ១ (RWD) អាចផលិតកម្លាំងបាន ១៧៧សេះ
  • ម៉ូទ័រអគ្គិសនីចំនួន ១ ប៉ុង ១ (RWD) អាចផលិតកម្លាំងបាន ២១៥សេះ

ជាមួយគ្នានេះ ក៏ទទួលបានជម្រើសកញ្ចប់អាគុយទំហំ ៥៦,២ និង ៦៧,១គីឡូវ៉ាត់ ផងដែរ។

ចំពោះការរចនារបស់រថយន្ត Lafa 5 នេះវិញ គឺមានការរចនាប្លែក ពោលគឺបានភ្ជាប់មកជាមួយការរចនាជាមួយចង្កៀងមុខ LED រាងកោង, ទ្វារប្រភេទ retractable door handles, sporty roof spoiler ជាប់ដំបូល និងចង្កៀងខាងក្រោយប្រភេទ single taillight ។ លើសពីនេះ ក៏ទទួលបាននូវប្រព័ន្ធ LiDAR នៅលើដំបូល ក៏ដូចជាកញ្ចក់មើលចំហៀងពណ៌ខ្មៅ និងកាមេរ៉ាមើលក្រោយផងដែរ ខណៈព័ត៌មានលម្អិតផ្សេងៗទៀត ក៏ដូចជាតម្លៃ និងចម្ងាយបើកបរគឺមិនទាន់បានបង្ហាញចេញនៅឡើយទេ៕

ផ្ទាំងផ្សាយពាណិជ្ជកម្ម

រថយន្ដគម្រូបែបអនាគតរបស់ Avatr បានបង្ហាញវត្ដមាននៅប្រទេសអាល្លឺម៉ង់

រថយន្តគម្រូ Avatr Vision Xpectra ត្រូវបានដាក់តាំងបង្ហាញក្នុងព្រឹត្តិការណ៍ IAA Mobility 2025 នៅទីក្រុង Munich ប្រទេសអាល្លឺម៉ង់។ រថយន្តនេះបានបង្ហាញពីការអភិវឌ្ឍន៍នាពេលអនាគតរបស់ម៉ាកយីហោលំដាប់ខ្ពស់ ដែលគ្រប់គ្រងដោយក្រុមហ៊ុន Changan។ លក្ខណៈពិសេសរថយន្ដមានតួខ្លួនប្រវែង ៥.៨ម៉ែត្រ, កាប៊ីនកញ្ចក់ និងទ្វារខាងក្រោយអាចបើកបញ្រ្ជាសបាន។

Avatr ជាម៉ាកយីហោលំដាប់ខ្ពស់ ដែលគ្រប់គ្រងដោយក្រុមហ៊ុន Changan និង CATL។ ក្រុមហ៊ុន Huawei ដើរតួជាអ្នកផ្គត់ផ្គង់គ្រឿងបន្លាស់សំខាន់ៗ និងប្រព័ន្ធប្រតិបត្តិការ ដោយមិនមានចំណែកណាមួយនៅក្នុងក្រុមហ៊ុនបណ្តាក់ទុនរួមគ្នានេះទេ។ រថយន្តម៉ូដែលដំបូងដែលមានយីហោ Avatr បានចូលទីផ្សារប្រទេសចិនក្នុងឆ្នាំ ២០២២។ បច្ចុប្បន្នមានរថយន្ដ៤ប្រភេទដល់លក់នៅលើទៅផ្សារក្នុងនោះរថយន្ដចំនួន ១១ម៉ូឌែល ជាប្រភេទ fastback crossover, រថយន្តចំនួន១២ម៉ូឌែល ជាប្រភេទ liftback, រថយន្តចំនួន ៧ម៉ូឌែល ជាប្រភេទ SUV និងរថយន្តចំនួន ៦ម៉ូឌែលជាប្រភេទ sedan។

យោងតាមទិន្នន័យពី China EV DataTracker ការលក់រថយន្តសរុបរបស់ក្រុមហ៊ុន Avatr បានកើនដល់ ១៤០ ៧៨៧ គ្រឿងនៅក្នុងទីផ្សារក្នុងស្រុក។ តាមការគ្រោងទុកត្រឹមដំណាច់ឆ្នាំ ២០៣០ ក្រុមហ៊ុន Avatr មានផែនការពង្រីកប្រភេទ ម៉ូឌែលរបស់ខ្លួននៅលើទីផ្សារ ដោយនឹងបញ្ចេញផលិតផលរថយន្ដថ្មីចំនួន ១៧ម៉ូឌែលបន្ថែមទៀត។ រថយន្តគំរូ Vision Xpectra ដែលបានដាក់បង្ហាញនៅទីក្រុង Munich បានក្លាយជាគំរូយោងសម្រាប់រថយន្តដែលនឹងចេញនាពេលខាងមុខ។

រថយន្ត Vision Xpectra គឺជាប្រភេទរថយន្តធំដែលមាន ៤ កៅអី និងមានតួខ្លួនរាងស្តើងស្រឡូន។ វាត្រូវបានរចនាឡើងតាមភាសារចនាបថមួយហៅថា “The Energy Force”។ លក្ខណៈពិសេសស្នូលនៃផ្នែកខាងក្រៅរបស់រថយន្តនេះរួមមាន តួខ្លួនដែលរលោងស្រឡះ របាំងកង់ដែលធំទូលាយ និងកាប៊ីនកញ្ចក់ដ៏ធំ។ ចំពោះផ្នែកខាងមុខរបស់រថយន្តគំរូនេះមានប្រើប្រាស់អំពូលភ្លើងពីរជាន់ និងរន្ធខ្យល់ធំ។

ចំណុចពិសេសមួយទៀតរបស់រថយន្ត Avatr Vision Xpectra វាក៏មិនមានសសរ B (B-pillars) ដូចទៅនិងរថយន្តគំរូទូទៅដែរ ព្រោះវាមិនតម្រូវឲ្យបំពេញតាមលក្ខខណ្ឌសុវត្ថិភាព និងភាពរឹងមាំរបស់តួឡើយ។ ទ្វារក្រោយរបស់វាអាចបើកបញ្រ្ជាសបាន បង្កើតជាចន្លោះដ៏ធំទូលាយសម្រាប់ងាយស្រួលឡើងចូលទៅក្នុងរថយន្ត។ នៅខាងក្នុង រថយន្ត Avatr Vision Xpectra មានបំពាក់កៅអីបួន និងមានភ្លើងបំភ្លឺជុំវិញ (ambient lighting) ជាច្រើន។

កុងសូលកណ្តាលនៃរថយន្តគំរូនេះ មានធ្វើឡើងពីធាតុមួយហៅថា “Vortex”។ សម្រាប់ប្រព័ន្ធបញ្ជាដំណើរការដោយប្រព័ន្ធ AI អាចបង្កើតទំនាក់ទំនងផ្លូវអារម្មណ៍យ៉ាងស៊ីជម្រៅ ជាមួយអ្នកបើកបរ។ ខាងក្រោម Vortex មានអេក្រង់ធំទូលាយថ្លាមួយ៕

ផ្ទាំងផ្សាយពាណិជ្ជកម្ម

មកដឹងពីព័ត៌មានត្រួសៗពីម៉ូឌែលថ្មីតម្លៃក្រោម ២ម៉ឺនដុល្លារ បើកបានចម្ងាយលើស ២ ០០០គ.ម របស់ BYD ដែលត្រៀមអង្រួនទីផ្សារកម្ពុជាឆាប់ៗ នេះ (មានវីដេអូ)

[ក្នុងស្រុក] BYD Seal 5 Super Hybrid គឺជាម៉ូឌែល PHEV ថ្មីរបស់ BYD ដែលត្រៀមអង្រួនទីផ្សាររថយន្តថ្មីនៅកម្ពុជាក្នុងពេលឆាប់ៗនេះ ហើយគ្រាន់តែក្រុមហ៊ុនបើកទទួលកក់ភ្លាមធ្វើអោយផ្ទុះការចាប់អារម្មណ៍ខ្លាំងមែនទែន ដោយសារតែម៉ូឌែលថ្មីនេះមានតម្លៃក្រោម ២ម៉ឺនដុល្លារ និងអាចបើកបរបានចម្ងាយសរុបលើសពី ២ពាន់គីឡូម៉ែត្រ ពេលសាកថ្ម និងសាំងពេញម្តង អាចនិយាយបានថាធ្វើអោយបងប្អូនយើងពិបាកសម្រេចចិត្តបន្តិចហើយមិនដឹងថាទិញឡានថ្មី ឬមួយទឹកតម្លៃប្រហាក់ប្រហែលគ្នាទេ។

តែពុំថ្វីឡើយមុនសម្រេចចិត្តបងប្អូនអាចមកដឹងព័ត៌មានត្រួសៗមួយចំនួនសិន ចំណុចដំបូងនោះគឺម៉ូឌែលថ្មីនេះមានឈ្មោះខ្មែរថា Seal 5 ចំណែកឈ្មោះចិនគឺ Destroyer 05 និងស្ថិតនៅក្នុង Ocean Series របស់ BYD ជាមួយការបង្ហាញខ្លួនផ្លូវការកាលពីដើមឆ្នាំ២០២៥ នេះ ជាមួយទំហំសរុប ៤ ៧៨០មម, ទទឹង ១ ៨៣៧មម, កម្ពស់ ១ ៥១៥មម និងប្រវែងគម្លាតកង់ ២ ៧១៨មម។

ចំណុចបន្ទាប់ទៀតនោះ BYD Seal 5 Super Hybrid បំពាក់មកជាមួយបច្ចេកវិទ្យា DM-i របស់ BYD ដែលដំណើរការរួមគ្នារវាងម៉ាស៊ីនសាំងចំណុះ ១,៥លីត្រ អាចផលិតកម្លាំងបាន ៩៩សេះ ជាមួយម៉ូទ័រអគ្គិសនីនៅខាងមុខមួយ ផលិតកម្លាំងបាន 161Hp ដែលទទួលបានថាមពលពីកញ្ចប់អាគុយ LFP Blad Battery ទំហំ ៧,៦៨kWh ដែលអាចបើកដោយថាមពលអគ្គិសនីសុទ្ធបាន ៥៥km និងសាកមួយពេញជាមួយចាក់សាំងមួយពេញអាចបើកបានចម្ងាយលើពី ២ពាន់គ.ម។ ចំណែកកម្រិតស៊ីសាំងវិញយោងតាមព័ត៌មានពី BYD បង្ហាញថាស៊ីសាំងចំនួន ២,៩៥លីត្រ/១០០គ.ម តែបើគិតទៅសម្រាប់បងប្អូនប្រើក្នុងក្រុងប្រើតែថាមពលអគ្គិសនីក៏មិនអស់ផង លើកលែងត្រូវចុះខេត្ត។ 

សូមបញ្ជាក់ផងដែរថាទាក់ទងនឹងតម្លៃ និងការនាំចូល ម៉ូឌែលដែលនឹងមកដល់កម្ពុជាក្នុងពេលឆាប់ៗនេះគឺជាម៉ូឌែលនាំចូល ប៉ុន្តែនៅពេលរោងចក្រ BYD នៅក្រុងព្រះសីហនុសាងសងរួចរាល់ ម៉ូឌែលថ្មីនឹងតម្លើង និងផ្គុំនៅខ្មែរផ្ទាល់។ ដូច្នេះទាក់ទងនឹងតម្លៃយោងតាមការចុះផ្សាយផ្ទាល់ពី BYD ប្រចាំប្រទេសកម្ពុជាបង្ហាញថាតម្លៃនេះជាតម្លៃផលិតក្នុងស្រុក ដែលឧបត្ថមពីរោងចក្ររបស់ BYD ផ្ទាល់។ តើបងប្អូនយល់យ៉ាងណាដែរសម្រាប់មួយម៉ូឌែលនេះ ដូច្នេះសម្រាប់ព័ត៌មានលម្អិតបន្ថែមដូចជាតម្លៃ ឬ Option មួយចំនួន បងប្អូនអាចទំនាក់ទំនងទៅកាន់ BYD KHIEV Auto Cambodia ដែលមានទីតាំងស្ថិតនៅមហាវិថីព្រះមុន្នីវង្ស និងសាខាច្បារអំពៅផ្ទាល់បាន ឬតាមរយៈលេខទូរសព្ទ 010 886 811 / 093886895៕

ផ្ទាំងផ្សាយពាណិជ្ជកម្ម
1...545556...1,079ទំព័រ 55 នៃ 1,079

បច្ចេកវិទ្យា

គន្លឹះសំខាន់ៗ

REVIEW+

© ២០២២ រក្សាសិទ្ធិគ្រប់យ៉ាង​ ហាមដាច់ខាតយកព័ត៌មានទៅផ្សាយបន្ត ដោយគ្មានការអនុញ្ញាត | www.camboauto.com