កាលពីថ្ងៃទី២៣ ខែកុម្ភៈ ឆ្នាំ ២០២៦ កម្លាំងការិយាល័យនគរបាលចរាចរណ៍ផ្លូវគោកខេត្តកំពង់ឆ្នាំង បានចុះអនុវត្តច្បាប់ស្តីពីចរាចរណ៍ផ្លូវគោក ដោយធ្វើការត្រួតពិនិត្យល្បឿន នៅលើផ្លូវជាតិលេខ៥ ចន្លោះគីឡូម៉ែត្រលេខ ១០៩-១១០ ស្ថិតនៅស្រុកបរិបូណ៌ ខេត្តកំពង់ឆ្នាំង។ ចំណុចត្រួតពិនិត្យល្បឿននេះ ធ្វើនៅកន្លែងដែលមានស្លាកសញ្ញាកំណត់ល្បឿនអតិបរមា ៩០គ.ម/ម៉។

ក្នុងចំណោមរថយន្តដែលលើសល្បឿននេះ ក្នុងនោះគឺមានរថយន្ត១គ្រឿងត្រូវថតជាប់ល្បឿនដល់ ១៨៩គ.ម/ម៉ ពោលគឺលើសល្បឿនស្ទើរតែ ១០០គ.ម/ម៉ ទៅហើយ។ អ៊ីចឹង តើការលើសល្បឿនដ៏ខ្ពស់នេះ នឹងត្រូវទទួលការផាកពិន័យ និងកាត់បន្ថយពិន្ទុបណ្ណបើកបរចំនួនប៉ុន្មាន?

យោងតាមមាត្រា៧ ក្នុងអនុក្រឹត្យស្តីពីការពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក តាមអនុក្រឹត្យលេខ៣៩ អនក្របក ចុះថ្ងៃទី១៧ ខែមីនា ឆ្នាំ២០២០ ឲ្យដឹងថា ករណីលើសល្បឿនចាប់ពី ៤០គ.ម/ម៉ ឡើងទៅ ត្រូវពិន័យចំពោះយានយន្តធុនស្រាល ៣០ម៉ឺនរៀល។

ជាមួយគ្នានេះ បើយោងតាមប្រកាសអន្តរក្រសួងស្តីពីនីតិវិធីនៃការដក និងបំពេញពិន្ទុឡើងវិញសម្រាប់បណ្ណបើកបរ ចុះកាលពីថ្ងៃទី១៤ ខែកញ្ញា ឆ្នាំ២០២១ ឲ្យដឹងផងដែរថា ក្នុងករណីបើកបរលើសល្បឿនកំណត់ចាប់ពី ៥០គ.ម/ម៉ ឡើងទៅ ត្រូវកាត់បន្ថយពិន្ទុបណ្ណបើកបរចំនួន ៦ពិន្ទុ។

សូមបញ្ជាក់ថា គ្រប់បណ្ណបើកបរត្រូវមានពិន្ទុសរុបចំនួន ១២ពិន្ទុ។ ក្នុងករណីអស់ពិន្ទុ បណ្ណបើកបរត្រូវទុកឃាមោឃៈ ដូច្នេះបើចង់បានបណ្ណបើកបរថ្មី គឺត្រូវរៀនបំប៉ន និងប្រឡងយកបណ្ណបើកបរឡើងវិញ ក្នុងរយៈពេលយ៉ាងតិច ៦ខែ ចាប់ពីថ្ងៃដែលបណ្ណបើកបរត្រូវទុកជាមោឃៈ៕

ផ្ទាំងផ្សាយពាណិជ្ជកម្ម

ចាប់តាំងពីមានផ្លូវល្បឿនលឿនមក យើងសង្កេតឃើញមានករណីឆេះរថយន្តជាបន្តបន្ទាប់ ដោយមកទល់ពេលនេះ មិនទាន់មានលទ្ធផលស៊ើបអង្កេតច្បាស់លាស់អំពីមូលហេតុអគ្គិភ័យនេះឡើយ។ យ៉ាងណាមិញ បើយើងនិយាយពីកត្តាទូទៅវិញ ការឆេះរថយន្តគឺសុទ្ធតែមានមូលហេតុរបស់វា ដែលពាក់ព័ន្ធនឹងប្រព័ន្ធភ្លើង ម៉ាស៊ីន និងសាំងជាដើម រួមមានដូចខាងក្រោមនេះ៖

១. លេចសាំង៖ នេះជាករណីគ្រោះថ្នាក់បំផុតមួយដែលគេរកឃើញជាញឹកញាប់ ដោយនៅពេលសាំងបានលេចចេញពីធុងសាំង ឬទុយោចំណុចមួយ ហើយសាំងបានប៉ះជាមួយនឹងផ្នែកណាមួយនៃម៉ាស៊ីន ឬសំបុកឃ្មុំដែលកំពុងមានកម្តៅដ៏ខ្លាំង គឺអាចបង្កជាអគ្គិភ័យបាន។

២. ប្រព័ន្ធភ្លើង៖ នេះក៏ជាករណីដែលតែងកើតឡើងផងដែរ ដែលអាចមានការឆ្លងភ្លើង ឬខូចខ្សែភ្លើងណាមួយ ព្រមទាំងការបំពាក់គ្រឿង accessories ដែលមានការដោត ឬតខ្សែភ្លើងខុសបច្ចេកទេស ក៏អាចបង្កឲ្យអណ្តាតភ្លើងផងដែរ។

៣. ម៉ាស៊ីនឡើងកម្តៅខ្លាំង៖ នៅពេលប្រព័ន្ធបញ្ចុះកម្តៅ ឬប្រព័ន្ធទឹក មានបញ្ហាអ្វីមួយដែលបណ្តាលឲ្យកម្តៅម៉ាស៊ីនឡើងខ្ពស់ ហើយមានការលេចជ្រាបប្រេងម៉ាស៊ីនទៀតនោះ វាអាចនឹងប៉ះដល់គ្រឿងបង្គុំដែលក្តៅ អាចបង្កឲ្យមានភ្លើងឆេះបាន។

៤. បញ្ហាអាគុយ៖ សម្រាប់រថយន្ត Hybrid ឬ អគ្គិសនីសុទ្ធ ប្រសិនបើមានករណីការឡើងកម្តៅអាគុយខ្ពស់ខ្លាំង ក៏អាចបណ្តាលឲ្យផ្ទុះឆេះផងដែរ។

៥. សំបុកឃ្មុំ៖ ប្រសិនបើកបរក្នុងល្បឿនលឿនខ្លាំង ប្រព័ន្ធបញ្ចេញផ្សែងក្នុងនោះសំបុកឃ្មុំ ក៏នឹងកើនឡើងសីតុណ្ហភាពខ្ពស់ ពោលគឺសឹងតែដូចរងើកភ្លើងមួយទៅហើយ ប្រសិនបើមានសាំង ឬប្រេងដែលខ្ទាតចូលចំសំបុកឃ្មុំនេះ គឺនឹងឆេះតែម្តង។

៦. សម្រាប់រថយន្តដែលចតចោលក្រោមកម្តៅថ្ងៃ ក៏អាចមានហានិភ័យផ្ទុះឆេះផងដែរ តាមរយៈពន្លឺថ្ងៃដែលចាំងចូលក្នុងកាប៊ីនរថយន្ត ប៉ះជាមួយដបទឹក ក្រដាស ឬវត្ថុផ្សេងៗដែលងាយឆេះ។

ដូច្នេះ នៅក្នុងពេលកំពុងបើកបររថយន្ត លោកអ្នកត្រូវចាប់អារម្មណ៍លើសញ្ញាព្រមាននៃការឆាបឆេះរថយន្ត ដូចជា ការកើនឡើងកម្តៅម៉ាស៊ីនដ៏ឆាប់រហ័ស ផ្សែងហ៊ុយចេញពីប្លុកម៉ាស៊ីន ឬកង់ ធុំក្លិនឆ្ងៀមសាំង កៅស៊ូ ឬប្លាស្ទីក ក៏ដូចជាសញ្ញាព្រមាននានាក្នុងកុងទ័ររថយន្ត។ ប្រសិនបើប្រទះឃើញសញ្ញាព្រមានទាំងអស់នេះ ត្រូវបញ្ឈប់រថយន្តភ្លាមៗតាមដែលអាចធ្វើបាន ដើម្បីកាត់ផ្តាច់លំហូរសាំង និងជម្លៀសអ្នកនៅក្នុងរថយន្តចេញក្រៅឲ្យឆ្ងាយ ដើម្បីគិតគូពីសុវត្ថិភាពជាចម្បង៕

ផ្ទាំងផ្សាយពាណិជ្ជកម្ម

រាល់សញ្ញាព្រមាន ឬភ្លើងព្រមាន ដែលបង្ហាញក្នុងកុងទ័ររថយន្ត គឺសុទ្ធតែបញ្ជាក់ពីបញ្ហាកំហូចនូវផ្នែកណាមួយរបស់រថយន្ត ដោយត្រូវការស្កេន និងឆែករកចំណុចដែលខូចនោះឲ្យបានពិតប្រាកដ។

ជាទូទៅ សញ្ញាព្រមានរបស់រថយន្ត ត្រូវបានបែងចែកជា ៣ពណ៌ រួមមាន ពណ៌ក្រហម ជាសញ្ញាកម្រិតធ្ងន់ ពណ៌លឿង ជាសញ្ញាដាស់តឿន និងពណ៌ខៀវ ឬបៃតង ដែលជាសញ្ញាផ្តល់ដំណឹង។

១. ពណ៌ក្រហម៖ សញ្ញាព្រមានពណ៌ក្រហមនេះ គឺបញ្ជាក់ពីកម្រិតធ្ងន់ធ្ងររបស់រថយន្ត ដែលតម្រូវឲ្យអ្នកបើកបរឈប់រថយន្តជាបន្ទាន់តាមដែលអាចធ្វើបាន ដើម្បីបង្ការកុំឲ្យម៉ាស៊ីនកាន់តែខូចធ្ងន់ធ្ងរ និងបញ្ចៀសគ្រោះថ្នាក់។ សញ្ញាព្រមាននេះរួមមាន ប្រព័ន្ធហ្វ្រាំង, សីតុណ្ហភាពម៉ាស៊ីនឡើងខ្ពស់ខ្លាំង កម្រិតប្រេងម៉ាស៊ីនទាប, ប្រព័ន្ធសាកអាគុយ និងពោងសុវត្ថិភាព។

២. ពណ៌លឿង៖ សញ្ញាព្រមានពណ៌លឿងនេះ មិនតម្រូវឲ្យឈប់រថយន្តភ្លាមៗនោះទេ ប៉ុន្តែក៏គួរយកចូលការ៉ាស់ឲ្យបានឆាប់ផងដែរ ដើម្បីត្រួតពិនិត្យជួសជុល។ សញ្ញាព្រមាននេះរួមមាន សញ្ញាឆេកម៉ាស៊ីន, ប្រព័ន្ធ ABS, សញ្ញាធុងសាំង, សេនស័រសម្ពាធខ្យល់កង់ និងប្រព័ន្ធគ្រប់គ្រងលំនឹង Traction Control ជាដើម។

៣. ពណខៀវ ឬបៃតង៖ ជាសញ្ញាផ្តល់ព័ត៌មានថា អ្នកបើកបរកំពុងប្រើប្រាស់មុខងារដូចជា បើកភ្លើងហ្វា, cruise control និងការវ៉ៃភ្លើងស៊ីញូជាដើម៕

ផ្ទាំងផ្សាយពាណិជ្ជកម្ម