វាកាន់តែជិតដល់ពេលដែលគេបានឃើញរថយន្តភីកអាប់ដំបូងរបស់ Hyundai ដែលគ្រោងនឹងប្រកាសចេញឆ្នាំ ២០២១ ខាងមុខនេះ។ មកទល់ពេលនេះគេនៅមិនទាន់ដឹងថាវាមានរចនាបថបែបណានៅឡើយទេ ដោយកន្លងមកគេបានឃើញវាបើកបរសាកល្បងនៅលើដងផ្លូវប៉ុន្តែមានឃ្លុំមុខមាត់ជិតឈឹង។
យ៉ាងណាក្ដីកាលពីដើមខែកន្លងទៅគ្រោងឆ្អឹងរបស់រថយន្តភីកអាប់ Hyundai ដែលផលិតចេញពីរថយន្ត Concept Santa Cruz នោះ ត្រូវបានគេប្រទះឃើញជាលើកដំបូង ដែលអាចឲ្យគេដឹងខ្លះៗអំពីការឌីហ្សាញរបស់រថយន្ត។ តាមរយៈរូបភាពគ្រោងឆ្អឹងនេះ អមជាមួយរូបភាពពេលរថយន្តបើកបរសាកល្បងកន្លងមក ក្រុមអ្នកជំនាញ Render រូបភាពរថយន្តឈ្មោះ Kolesa បានបង្កើតរូបភាព Render ពីរសន្លឹកនៃភីកអាប់ដំបូងរបស់ Hyundai។
រថយន្តភីកអាប់ដំបូងរបស់ Hyundai នឹងផលិតនៅរោងចក្រក្នុងរដ្ឋ Alabama របស់ Hyundai ដែលរំពឹងថាមានជម្រើសម៉ាស៊ីនពីរ។ ទីមួយមានចំណុះ ២,៤លីត្រ ផ្ដល់កម្លាំងបាន ១៨៥សេះ និងទីពីរចំណុះ ២,០ លីត្រ Turbocharged អាចផលិតកម្លាំងបាន ២៣៥សេះ៕
