រូបរាងសម្រេចរបស់ឡាន SUV អគ្គិសនីចិន មិនខុសពីប្រភេទ Concept ប៉ុន្មានឡើយ

April 27, 2020

រូបភាពជាច្រើនសន្លឹកនៃរថយន្ត Hongqi E115 ដែលក្រុមហ៊ុនសម្រេចផលិតផលជាផ្លូវការបានលេចចេញពីប្រទេសចិន ក្រោយពីប្រភេទ Concept នៃរថយន្តនេះបានបង្ហាញមុខក្នុងកម្មវិធី Guangzhou Auto Show កាលពីឆ្នាំមុនរួចមក។

រូបភាពនៃរថយន្តដែលជាផលិតផលគំរូសម្រាប់ការសាកល្បង គឺមានការបិទបាំងរូបរាងខាងក្រៅមិនឲ្យមហាជនមើលស្គាល់នោះទេ ប៉ុន្តែគេអាចមើលដឹងថាទំហំរបស់វាហាក់មានទំហំធំមិនខុសពីប្រភេទ Concept ឡើយ។ នៅផ្នែកខាងមុខក៏មានបំពាក់នូវផ្ទាំងប៉ាណាទំហំធំ មានអំពូល LED រាងស្ដើង និងមានដំបូលរាងវែងដូចប្រភេទ Concept អ៊ីចឹងដែរ។

រថយន្ត E115 នេះនឹងលក់លើទីផ្សារដោយមានបំពាក់ម៉ូទ័រអគ្គិសនីចំនួនពីរ ដែលម៉ូទ័រមុខមានកម្លាំង ២១៥ សេះ ហើយម៉ូទ័រក្រោយមានកម្លាំង ២៩៥ សេះ។ វាទទួលបានថាមពលពីអាគុយចំណុះ ៩២,៤ គីឡូវ៉ាត់ម៉ោង ដែលអាចមួយពេញអាចជិះបានចម្ងាយ ៦០០ គីឡូម៉ែត្រ៕

ផ្ទាំងផ្សាយពាណិជ្ជកម្ម

ម៉ាកឡានវៀតណាម ឈរលំដាប់ទី ៥លើទីផ្សារក្នុងស្រុក

April 27, 2020

ក្នុងត្រីមាសដំបូងនាឆ្នាំ ២០២០ នេះ ក្រុមហ៊ុនផលិតរថយន្តដំបូងរបស់វៀតណាម VinFast អាចលក់រថយន្តបាន ៥ ១២៤ គ្រឿង ដែលក្នុងនោះមាន ៣១៩៥គ្រឿង ជាម៉ូដែល Fadil, ១០២៤គ្រឿង ជាម៉ូដែល Lux SA និង ៩០៥គ្រឿងជាម៉ូដែល Lux A។

ជាមួយចំនួនលក់សរុប ៥១២៤ គ្រឿងនេះ អាចឲ្យ VinFast ឈរនៅលំដាប់ថ្នាក់ទី ៥ សម្រាប់ទីផ្សារក្នុងស្រុក។ ចំណាត់ថ្នាក់ក្រុមហ៊ុនរថយន្តធំទាំង ១០ ប្រចាំនៅវៀតណាម គិតត្រឹមត្រីមាសទី ១ ឆ្នាំ ២០២០ ៖

១. Hyundai ៖ ១៥ ៣៦២ គ្រឿង

២. Toyota ៖ ១៣ ៧៤៨ គ្រឿង

៣. Kia ៖ ៥ ៦២៧ គ្រឿង

៤. Honda ៖ ៥ ២៩០ គ្រឿង

៥. VinFast ៖ ៥ ១២៤ គ្រឿង

៦. Mitsubishi ៖ ៥ ០០១ គ្រឿង

៧. Mazda ៖ ៤ ៨៨៩ គ្រឿង

៨. Ford ៖ ៣ ៨៨៣ គ្រឿង

៩. Suzuki ៖ ២ ៣៩៤ គ្រឿង

១០. Isuzu ៖ ១ ៤៥៣ គ្រឿង

ផ្ទាំងផ្សាយពាណិជ្ជកម្ម

Mansory Cabrera កែចេញពី Lamborghini Aventador SVJ មានតែ៣គ្រឿងគត់លើលោក

April 27, 2020

ថ្មីៗនេះ ក្រុមហ៊ុនកែរថយន្តប្រណីត Mansory បានបញ្ចេញរថយន្តស្ព័រថ្មីរបស់ខ្លួនហៅថា Mansory Cabrera ដែលកែចេញពីរថយន្ត Lamborghini Aventador SVJ។

រថយន្ត Mansory Cabrera ត្រូវបានផលិតឡើងតែ ៣គ្រឿងប៉ុណ្ណោះលើពិភពលោក ដើម្បីអបអរខួបលើកទី ៣០ឆ្នាំរបស់ក្រុមហ៊ុន Mansory។

Cabrera ត្រូវបានឌីហ្សាញយ៉ាងស្រស់ស្អាត និងទាក់ទាញខ្លាំងបំផុត តាំងពីផ្នែកខាងក្រៅ ដល់ផ្នែកខាងក្នុង។ ទោះជាយ៉ាងណា វានៅតែរក្សាម៉ាស៊ីនរបស់ Aventador SVJ ដដែល គឺ ចំណុះ ៦,៥លីត្រ naturally-aspirated ទំហំ ១២ស៊ីឡាំង ប៉ុន្តែ Mansory បានកែឲ្យវាមានកម្លាំងដល់ ៨១០សេះ អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ២,៦វិនាទី ហើយមានល្បឿនអតិបរមាដល់ ៣៥៥គីឡូម៉ែត្រក្នុងមួយម៉ោង៕

គួរឲ្យដឹងថា រថយន្ត Lamborghini Aventador SVJ មានតម្លៃជាង ៥០០ ០០០ដុល្លារទៅហើយ ដូច្នេះរថយន្ត Mansory Cabrera នឹងមានតម្លៃលើសនេះទៅទៀត៕

ផ្ទាំងផ្សាយពាណិជ្ជកម្ម

សឹងដាច់ផ្ងារ ពេលឃើញតម្លៃឡាន Porsche ឆ្នាំ១៩៩១ ជិះទើបបាន ៥៥០គ.ម៉នេះ

April 27, 2020

រថយន្ត Porsche 911 ស៊េរីឆ្នាំ១៩៩១ មួយគ្រឿង កំពុងដាក់លក់នៅលើគេហទំព័រ Early911s ក្នុងប្រទេសអាល្លឺម៉ង់ ជាមួយនឹងតម្លៃគួរឲ្យភ្ញាក់ផ្អើល។

រថយន្តស្ព័រ Porsche 911 មានពណ៌ស្វាយ Clematis Metallic នេះ ទើបតែត្រូវគេប្រើបានចម្ងាយ ៥៥០គីឡូម៉ែត្រប៉ុណ្ណោះ ដែលមើលទៅពិតជានៅស្អាតដូចថ្មីអីចឹង។ វាបំពាក់ម៉ាស៊ីនចំណុះ ៣,៣លីត្រ Turbo ទំហំ ៦ស៊ីឡាំង មានកម្លាំង ៣១២សេះ ប៉ុន្តែបានថែមកញ្ចប់ Option X33 Engine Package ធ្វើឲ្យវាមានកម្លាំងសរុបដល់ទៅ ៣៥៥សេះឯណោះ។

911 ខាងលើ ក៏មានបំពាក់ Option ពិសេសៗមួយចំនួន រួមទាំង Limited-slip Differential, ដំបូល Sunroof, ដៃចង្កូតស្បែក និងកៅអីមានមុខងារកម្តៅ ជាដើម។ រថយន្តស្ព័ររបស់អាល្លឺម៉ង់ស៊េរីចាស់មួយគ្រឿងនេះ ត្រូវបានគេដាក់លក់ក្នុងតម្លៃ រហូតដល់ទៅ ៣៥៨ ១៥០ដុល្លារឯណោះ៕

ផ្ទាំងផ្សាយពាណិជ្ជកម្ម

ទិញឡានថ្មីតម្លៃក្រោម ៣ម៉ឺន ហើយបានចាក់សាំង ២ឆ្នាំឥតគិតថ្លៃ!

April 27, 2020

នៅលើទំព័រផ្លូវការហ្វេសប៊ុករបស់ក្រុមហ៊ុន Ford Cambodia បានធ្វើការប្រកាសពីប្រូម៉ូសិនដ៏ធំអស្ចារ្យមិនធ្លាប់មានពីក្រុមហ៊ុន Ford។ រាល់ការទិញរថយន្ត Ford Ecosport ស៊េរីថ្មីឆ្នាំ ២០២០ លោកអ្នកនឹងទទួលបានការចាក់សាំងរហូតដល់ ២ឆ្នាំដោយឥតគិតថ្លៃ រួមជាមួយនឹងតម្លៃពិសេសត្រឹមតែ $២៩ ៩០០ តែប៉ុណ្ណោះ!

សូមប្រញ៉ាប់រួសរាន់ឡើង ការផ្តល់ជូននេះមានកំណត់ !!! ព័ត៌មានបន្ថែម សូមទំនាក់ទំនងលេខទូរស័ព្ទ ០៧៨ ៣៣៣ ៧៤៨ | ០១៦ ៣៣៣ ៧៨៥។

ផ្ទាំងផ្សាយពាណិជ្ជកម្ម

Ferrari ចង់ប្រកាសចេញរថយន្តថ្មី ២ម៉ូដែលនៅឆ្នាំ ២០២០

April 25, 2020

Ferrari គ្រោងប្រកាសចេញរថយន្តថ្មីចំនួនពីរម៉ូដែលនៅឆ្នាំ ២០២០ នេះ ត្បិតថាកន្លងមក ប្រធានផ្នែកពាណិជ្ជកម្មរបស់ក្រុមហ៊ុនបាននិយាយថា ២០២០ នឹងជាឆ្នាំដែលត្រូវពង្រឹងផ្ទៃក្នុងក្ដី។

ពេលសម្ភាសន៍ជាមួយ Autocar កាលពីថ្មីៗនេះប្រធានផ្នែកពាណិជ្ជកម្មរបស់ Ferrari លោក Enrico Galliera បាននិយាយថា ៖ “យើងតែងតែមានគម្រោងថាធ្វើអ្វីលើសពីនេះ ហើយយើងចង់បង្កើតព័ត៌មានមួយចំនួន។ យើងនឹងប្រកាសចេញរថយន្តថ្មីពីរម៉ូដែលនៅត្រឹមដំណាច់ឆ្នាំនេះ។”

គួរដឹងថាកាលពីឆ្នាំ ២០១៩ ក្រុមហ៊ុន Ferrari បានប្រកាសចេញរថយន្តថ្មីចំនួនប្រាំម៉ូដែល រួមមាន F8 Tributo, F8 Spider, SF90 Stradale, 812 GTS និង Roma ដែលការប្រកាសចេញរថយន្តថ្មីនេះជាផ្នែកមួយនៃផែនការពង្រីកសែស្រឡាយរថយន្តរបស់ Ferrari ដោយក្នុងពេល ៥ឆ្នាំ ប្រកាសចេញរថយន្តថ្មីឲ្យបាន ១៥ម៉ូដែល៕

ផ្ទាំងផ្សាយពាណិជ្ជកម្ម

ចេញរូបរាង Toyota Hilux ស៊េរីថ្មីសម្រាប់ឆ្នាំ ២០២០

April 25, 2020

នៅឆ្នាំ ២០២០ នេះគេរំពឹងថារថយន្តម៉ូដែល Hilux នឹងទទួលបានការផ្លាស់ប្ដូរមុខមាត់ថ្មី ហើយនាថ្ងៃនេះប្រហែលជាការឃើញជាលើកដំបូងនៃ Toyota Hilux ស៊េរីថ្មី។

ត្បិតថាគេមិនអាចជឿជាក់លើរូបភាពនេះទាំងស្រុងដោយសារតែមិនមែនចេញពីក្រុមហ៊ុន Toyota ផ្ទាល់ ប៉ុន្តែវិបសាយ Car Advice អះអាងថានេះអាចជារូបភាព Render ផ្អែកតាមឯកសារផ្ទៃក្នុងនៃរថយន្ត Toyota Hilux ឆ្នាំ ២០២១។ វិបសាយដដែលនេះបន្តថារូបរាងពិតរបស់ Hilux ស៊េរីថ្មីអាចនឹងមិនដូចអ្វីដែលបង្ហាញតាម Render ទាំងអស់នោះទេ ប៉ុន្តែ Hilux ថ្មីនេះនឹងមានការផ្លាស់ប្ដូរមុខមាត់ថ្មីខុសពីមុន។

តាមរយៈរូបភាពបង្ហាញថា Hilux ឆ្នាំ ២០២១ នឹងមានការឌីហ្សាញអំពូលមុខចំនួនពីរប្រភេទ ដែលមួយសម្រាប់ Option ខ្ពស់ប្រើប្រាស់អំពូល Halogen លាយនឹងអំពូល LED ហើយមួយទៀតជា Option ខ្ពស់ ប្រើប្រាស់អំពូល LED សុទ្ធ។ ភ្លើងក្រោយក៏មានប្ដូរមកប្រើអំពូល LED ផងដែរ ប៉ុន្តែភ្លើងស៊ីញ៉ូឆ្វេងស្ដាំ នៅជាប្រភេទ Halogen ដដែល។

គេជឿជាក់ថាម៉ាស៊ីនរបស់ Toyota Hilux ឆ្នាំ ២០២១ នឹងមានសមត្ថភាពខ្លាំងលើសមុនបន្តិច ហើយបើតាមការចុះផ្សាយកាលពីថ្មីៗនេះគឺនឹងមានជាប្រភេទ GR Hilux ដែលមានប្រើម៉ាស៊ីន Turbodiesel V6 ថ្មី ផ្ដល់កម្លាំងខ្លាំងដល់ប្រព័ន្ធប៉ុងពីរនៃរថយន្ត៕

ផ្ទាំងផ្សាយពាណិជ្ជកម្ម

ដឹងមូលហេតុ Lexus សម្រេចឈប់ផលិតម៉ូដែល GS

April 25, 2020

បន្ទាប់ពីចេញលក់បានរយៈពេល ២៧ឆ្នាំ នៅទីបំផុតក្រុមហ៊ុន Lexus សម្រេចចិត្តផលិតរថយន្តម៉ូដែល GS របស់ខ្លួនហើយ។

ការសម្រេចចិត្តបែបនេះ ក៏ដោយសារតែចំនួនលក់ក្នុងរយៈពេលប៉ុន្មានឆ្នាំចុងក្រោយនេះ ហាក់មិនកាក់កបឡើយ ពោលគឺមានចំនួនតិច។

គួរឲ្យដឹងថា នៅក្នុងឆ្នាំ២០១៩ Lexus បានលក់ GS ត្រឹម ៣ ៣៧៨គ្រឿងប៉ុណ្ណោះនៅសហរដ្ឋអាមេរិក។ កាលពីឆ្នាំ២០១៥ Lexus លក់ GS បានរហូតដល់ទៅ ២៣ ១១៧គ្រឿងឯណោះ ប៉ុន្តែក៏ធ្លាក់សល់ត្រឹម ១៤ ៨៧៨គ្រឿង ក្នុងឆ្នាំ២០១៦។ ក្រោយពីនោះមក Lexus មិនដែលលក់ GS បានដល់ ១០ ០០០គ្រឿងឡើយ។

រថយន្ត Lexus GS ស៊េរីឆ្នាំ២០២០ មានតម្លៃចាប់ពី ៥១ ០៦៥ដុល្លារ ដោយបំពាក់ម៉ាស៊ីនសាំងចំណុះ ៣,៥លីត្រ ទំហំ ៦ស៊ីឡាំង មានកម្លាំង ៣១១សេះ៕

ផ្ទាំងផ្សាយពាណិជ្ជកម្ម

ឡានភីកអាប់ Hyundai Santa Cruz ថ្មី អាចនឹងតម្លៃត្រឹម ២៥ ០០០ដុល្លារ

April 25, 2020

រថយន្តភីកអាប់របស់ Hyundai គឺម៉ូដែល Santa Cruz កំពុងស្ថិតក្រោមការធ្វើតេស្ត ហើយត្រូវគេរំពឹងថានឹងមានលក់នៅសហរដ្ឋអាមេរិក ក្នុងឆ្នាំ២០២១ ខាងមុខ។

យោងតាមគេហទំព័រ Car and Driver ឲ្យដឹងថា ភីកអាប់ Santa Cruz អាចនឹងមានតម្លៃចាប់ពីខ្ទង់ ២៥ ០០០ដុល្លារ ដើម្បីប្រជែងនឹងភីកអាប់ Honda Ridgeline ដែលមានតម្លៃចាប់ពី ៣៣ ៩០០ដុល្លារនៅសហរដ្ឋអាមេរិក។

វាត្រូវគេរំពឹងថា នឹងមានការឌីហ្សាញបែបស្ព័រ ហើយមានទ្វារ៤ ទៀតផង។ រថយន្តនេះប្រើគ្រោងឆ្អឹងដូចគ្នាទៅនឹង Hyundai Santa Fe ហើយក៏ត្រូវបានផលិតផ្អែកតាម ម៉ូដែល Santa Fe នេះផងដែរ។

Santa Cruz អាចនឹងបំពាក់ម៉ាស៊ីនចំនួន ២ជម្រើស គឺ ចំណុះ ២,៤លីត្រ កម្លាំង ១៨៥សេះ និងចំណុះ ២,០លីត្រ Turbocharged កម្លាំង ២៣៥សេះ៕

ផ្ទាំងផ្សាយពាណិជ្ជកម្ម

Cadillac Escalade ESV ឆ្នាំ២០២១ រាងធំជាងមុន តម្លៃខ្ទង់ ៨ម៉ឺនដុល្លារ

April 24, 2020

ក្រុមហ៊ុន Cadillac បានបញ្ចេញរថយន្ត Escalade ស៊េរីឆ្នាំ២០២១ មួយម៉ូដែលទៀត ហៅថា Escalade ESV។

រថយន្ត Cadillac Escalade ESV ថ្មីនេះមានប្រវែង ៥,៧ម៉ែត្រ វែងជាង Escalade ធម្មតាដែលត្រឹម ៥,៣ម៉ែត្រប៉ុណ្ណោះ។ SUV កៅអី៣ជួរនេះ មិនត្រឹមតែវែងជាងមុនប៉ុណ្ណោះទេ ថែមទាំងធំទូលាយ អាចដាក់ឥវ៉ាន់បានច្រើនជាងមុនផងដែរ សរុបគឺ ៣ ៥៨៤លីត្រឯណោះ។

រថយន្តតួខ្ពស់របស់អាមេរិកនេះមានជម្រើសម៉ាស៊ីនចំនួន ២ គឺ ម៉ាស៊ីនសាំងចំណុះ ៦,២លីត្រ ទំហំ ៨ស៊ីឡាំង មានកម្លាំង ៤២០សេះ និង ម៉ាស៊ីនម៉ាស៊ូត ចំណុះ ៣,០លីត្រ Turb ទំហំ ៦ស៊ីឡាំង មានកម្លាំង ២៧៧សេះ។ វាប្រើប្រអប់លេខអូតូ ៨វគ្ក ហើយក៏មានទាំងជម្រើសប្រភេទប៉ុងមួយ និងប៉ុងពីរ។

Escalade ESV ត្រូវបានដាក់លក់ក្នុងតម្លៃចាប់ពី ៨០ ៤៩០ដុល្លារ នៅលើទីផ្សារសហរដ្ឋអាមេរិក សម្រាប់ប្រភេទប៉ុងមួយ ខណៈ Escalade ធម្មតាមានតម្លៃត្រឹមតែ ៧៦ ១៩៥ដុល្លារប៉ុណ្ណោះ៕

ផ្ទាំងផ្សាយពាណិជ្ជកម្ម