តម្រូវការឡាន Tesla Model 3 នៅចិនហក់ឡើង ៤៥០% ក្រោយសេដ្ឋកិច្ចងើបឡើងវិញ

April 16, 2020

តម្រូវការនៃរថយន្ត Tesla នៅប្រទេសចិនចាប់ផ្ដើមស្ទុះឡើងវិញនាខែមីនា ក្រោយពីជួបប្រទះនឹងតម្រូវការមានកំណើនតិចតួចកាលពីខែកុម្ភៈរួចមក។ ជាក់ស្ដែងតម្រូវការរថយន្ត Model 3 នាខែមីនាមានកើនឡើងរហូតដល់ ៤៥០% បើធៀបនឹងខែកុម្ភៈ។

ផ្អែកតាមតួលេខរបស់ LMC Automative បានបង្ហាញថា ចំនួនរថយន្ត Tesla ដែលចុះបញ្ជីនាខែមីនា មានចំនួន ១២ ៧០៩ គ្រឿងនៅប្រទេសចិន ដែលធៀបនឹងខែកុម្ភៈមានត្រឹម ២ ៣១៤ គ្រឿងប៉ុណ្ណោះ។ កំណើនដ៏ខ្លាំងក្លានេះអាចដោយសាររដ្ឋាភិបាលចិនបានចាប់ផ្ដើមបើកការបិទទីក្រុងព្រោះជំងឺកូវីដ១៩។

យ៉ាងណាក្ដីឧស្សាហកម្មរថយន្តនៅប្រទេសចិននាខែមីនាមានការធ្លាក់ចុះ ៤៣,៤% បើធៀបនឹងពេលដូចគ្នាកាលពីឆ្នាំ ២០១៩ ដោយសារតែការផ្ទុះជំងឺកូវីដ១៩ នៅបន្តប៉ះពាល់ដល់ឧស្សាហកម្មជុំវិញពិភពលោក៕

ផ្ទាំងផ្សាយពាណិជ្ជកម្ម

លេចធ្លាយតម្លៃ Cadillac Escalade ឆ្នាំ២០២១ ថោកជាង Lexus LX570

April 16, 2020

ក្នុងរយៈពេល ១សប្តាហ៍ទៀត ក្រុមហ៊ុន Cadillac នឹងចាប់ផ្តើមបើកឲ្យបញ្ជាទិញរថយន្ត Escalade ជំនាន់ថ្មី ប៉ុន្តែមិនទាន់បានបញ្ជាក់តម្លៃជាផ្លូវការនៅឡើយទេ។

ទោះជាយ៉ាងណា គេហទំព័រ CadillacSociety អះអាងថា ពួកគេទទួលបានតម្លៃផ្លូវការហើយ ដោយចាប់ពី ៧៦ ១៩៥ដុល្លារ សម្រាប់ប្រភេទ Base Model នៅលើទីផ្សារសហរដ្ឋអាមេរិក។ តម្លៃនេះនឹងធ្វើឲ្យ Escalade ឆ្នាំ២០២១ ថ្លៃជាងស៊េរីមុន ១ ០០០ដុល្លារប៉ុណ្ណោះ។

ក្រៅពី Base Model រថយន្ត SUV ប្រណីតរបស់អាមេរិកខាងលើ ក៏មានផ្តល់ជម្រើសដូចជា Escalade Sport តម្លៃចាប់ពី ៨៥ ៥៩៥ដុល្លារ និង Escalade Premium Luxury តម្លៃ ៨៥ ៦៩៥ដុល្លារ។

រថយន្ត Cadillac Escalade ស៊េរីឆ្នាំ២០២១ បំពាក់ម៉ាស៊ីន ២ប្រភេទ គឺចំណុះ ៣,០លីត្រ turbocharged ទំហំ ៦ស៊ីឡាំង មានកម្លាំង ២៧៧សេះ និង ចំណុះ ៦,២លីត្រ ទំហំ ៨ស៊ីឡាំង មានកម្លាំង ៤២០សេះ។ ពួកវាប្រើប្រអប់លេខអូតូ ១០វគ្គ ហើយមានទាំងជម្រើសប្រើប៉ុងមួយ និងប៉ុងពីរ៕

ផ្ទាំងផ្សាយពាណិជ្ជកម្ម

មើលឡាន Toyota ជាន់ដល់ល្បឿន ៣០០គ.ម៉/ម៉ ព្រឺរោមជំនួស (មានវីដេអូ)

April 16, 2020

Toyota Supra ជំនាន់ Mk4 គឺជារថយន្តដ៏ល្បីឈ្មោះ និងមានគេចង់បានច្រើនបំផុត ជាពិសេសអ្នកស្រលាញ់ចូលចិត្តរថយន្ត។

ថ្មីៗនេះ Channel YouTube មួយឈ្មោះថា AutoTopNL បានយករថយន្ត Toyota Supra ជំនាន់ Mk4 មកតេស្តលើផ្លូវលាត ដែលគ្មានល្បឿនកំណត់ Autobahn ដោយជាន់ដល់ល្បឿនរហូតដល់ទៅ ៣០០គីឡូម៉ែត្រក្នុងមួយម៉ោងឯណោះ។

គួរឲ្យដឹងថា Supra Mk4 ខាងលើ បានបំពាក់ម៉ាស៊ីនដ៏ល្បីឈ្មោះ 2JZ ដែលមាន Turbocharge ចំនួន២ ប៉ុន្តែបានកែរហូតមានកម្លាំងសរុប ១ ២៣៩សេះឯណោះ។ ជាមួយនឹងកម្លាំងប៉ុណ្ណេះ ធ្វើឲ្យរថយន្ត Toyota នេះ ខ្លាំងជាងរថយន្ត Bugatti Veyron ទៅទៀត៕

ចង់ដឹងយ៉ាងណា សូមទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

Ford F-150 Raptor ឆ្នាំ ២០២១ អាចនឹងមានតែមួយប្រភេទប៉ុណ្ណោះ

April 15, 2020

ឯកសារដែលលេចធ្លាយកាលពីថ្មីៗកន្លងទៅ អាចឲ្យដឹងអំពីប្រភេទម៉ាស៊ីនសម្រាប់រថយន្ត Ford F-150 ស៊េរីឆ្នាំ ២០២១ ប៉ុន្តែក្រុមការងារ MotorTrend ប្រទះឃើញចំណុចមួយដែលមនុស្សជាច្រើនអាចមើលរំលង។

ឯកសារដែលលេចធ្លាយគឺមានបង្ហាញអំពីរថយន្ត Ford F-150 ជាច្រើនប្រភេទ ប៉ុន្តែសម្រាប់រថយន្ត F-150 Raptor គឺឃើញមានតែប្រភេទ SuperCrew ដែលជាប្រភេទមានទ្វារបួនប៉ុណ្ណោះ។ នេះអាចមានន័យថាប្រភេទ SuperCab ដែលមានទ្វារប្រភេទ Suicide និងមានរូបរាងតូចនោះ អាចលែងមានតទៀត។

បើពិនិត្យមើលការលក់ F-150 Raptor លើអនឡាញឃើញថាប្រភេទ SuperCew គឺពេញនិយមជាង SuperCab។ នេះអាចជាហេតុផលមួយដែល Ford សម្រេចចិត្តឈប់ផលិតប្រភេទ SuperCab សម្រាប់ F-150 Raptor។ យ៉ាងណាក្ដីដំណឹងមួយនេះនៅមិនទាន់មានការបញ្ជាក់ផ្លូវការនៅឡើយទេ៕

ផ្ទាំងផ្សាយពាណិជ្ជកម្ម

SUV ថ្មីរបស់ Ford ពន្យាពេលផលិតហើយ

April 15, 2020

Ford Bronco Sport គឺជារថយន្តដែលទទួលបានការចាប់អារម្មណ៍ខ្លាំងបំផុតមួយ ហើយត្រូវបានកំណត់ឲ្យបង្ហាញខ្លួនជាផ្លូវការ នៅក្នុងកម្មវិធី New York Auto Show នាខែមេសានេះ។

ផ្ទុយទៅវិញ ដោយសារតែការផ្ទុះឡើងនៃវីរុស COVID-19 កំពុងកើតមានឡើង កម្មវិធី New York Auto Show ក៏ត្រូវបានលុបចោល ខណៈការបង្ហាញខ្លួនក៏ត្រូវពន្យាពេលផងដែរ។

យោងតាមគេហទំព័រ Automotive News បានឲ្យដឹងថា សង្វាក់ផលិតកម្មនៃរថយន្ត Ford Bronco Sport ឥឡូវនេះត្រូវបានពន្យាពេល ២ខែទៀត ដោយដំបូងត្រូវកំណត់ឲ្យចាប់ផ្តើមនៅថ្ងៃទី១៣ ខែកក្កដា ប៉ុន្តែឥឡូវនេះវានឹងចាប់ផ្តើមផលិតនៅថ្ងៃទី០៧ ខែកញ្ញា វិញ។

Bronco Sport នឹងបំពាក់ម៉ាស៊ីនចំនួន ២ជម្រើស គឺ ចំណុះ ១,៥លីត្រ turbocharged ទំហំ ៣ស៊ីឡាំង និងចំណុះ ២,០លីត្រ turbocharged ទំហំ ៤ស៊ីឡាំង៕

ផ្ទាំងផ្សាយពាណិជ្ជកម្ម

ចេញរូបរាង MG6 ស៊េរីថ្មី ផ្លាស់ប្ដូរមុខមាត់ថ្មី

April 15, 2020

ក្រុមហ៊ុន MG Motor បានបង្ហាញចេញរថយន្ត MG6 ជំនាន់បច្ចុប្បន្ននេះកាលពីខែកញ្ញាឆ្នាំ ២០១៧ ដែលរថយន្តនេះប្រើប្រាស់គ្រោងឆ្អឹងដូចជារថយន្ត Roewe i6 ដែរ។ MG6 គឺមានជម្រើសម៉ាស៊ីនសាំង ឬ Hybrid ដែលមានរូបរាងក្រៅ និងការឌីហ្សាញខាងក្នុងបែបទាន់សម័យ។

ដោយមានរយៈពេល ៣ ឆ្នាំកន្លងទៅហើយនោះ គឺដល់ពេលដែលក្រុមហ៊ុន MG ត្រូវផ្ដល់ការអាប់ដេតដល់ MG6 ហើយបើផ្អែមតាមសារព័ត៌មានចិន Xincheping អាចឲ្យគេដឹងខ្លះៗអំពីរថយន្ត MG6 ម៉ូដែលថ្មី។

រូបភាពបានបង្ហាញថា MG6 ស៊េរីថ្មីគឺមានការផ្លាស់ប្ដូររចនាបថផ្នែកខាងមុខ ជាមួយចង្កៀងខាងមុខប្ដូរស្ទីលថ្មី និងមានរន្ធខ្យល់ដែលមានទំហំទូលាយជាងមុន និងមានឡូហ្គោ MG ធំជាងមុនផងដែរ។ចំណែកនៅខាងក្រោយវិញ គេឃើញកាងដែលរចនារូបរាងថ្មី ហើយមានបន្ថែមបន្ទះដែកតូចមួយនៅជាប់នឹងទ្វារក្រោយរថយន្ត។

ចំពោះម៉ាស៊ីនវិញ គឺម៉ាស៊ីនសាំង Turbocharged ចំណុះ ១,៥ លីត្រពេលនេះ អាចផលិតកម្លាំងបានច្រើនជាងមុន ដែលពីមុនមានកម្លាំង ១៦៦ សេះ ហើយពេលនេះមានកម្លាំងប្រហែល ១៧៨ សេះ។ ចំណែកប្រភេទ Hybrid វិញមិនទាន់មានដំណឹងច្បាស់នៅឡើយទេ បើសិនមិនផ្លាស់ប្ដូរនោះ គឺវាមានម៉ាស៊ីនសាំង ១,០ លីត្រ គួបផ្សំដោយម៉ូទ័រអគ្គិសនីមួយ ដែលបង្កើតកម្លាំងបានសរុប ២២៤ សេះ។

MG Motor អាចនឹងបង្ហាញរថយន្ត MG6 ថ្មីនេះក្នុងពេលប៉ុន្មានខែទៀត៕

ផ្ទាំងផ្សាយពាណិជ្ជកម្ម

ម៉ាស៊ីនជំនួយផ្លូវដង្ហើមផលិតដោយដៃរបស់ GM ថ្លៃជាងឡាន Chevrolet មួយគ្រឿងទៀត

April 15, 2020

មិនមែនត្រឹមតែមន្ទីរពេទ្យរបស់សហរដ្ឋអាមេរិកប៉ុណ្ណោះទេ ដែលទទួលបានប្រយោជន៍ពីក្រុមហ៊ុន GM ដែលផលិតម៉ាស៊ីនជំនួយផ្លូវដង្ហើម ដើម្បីគាំទ្រដល់អ្នកជំងឺកូវីដ១៩ ប៉ុន្តែក្រុមហ៊ុនរថយន្តមួយនេះក៏ទទួលបានប្រយោជន៍មិនតិចដែរ ពីកិច្ចព្រមព្រៀងមួយនេះ។

គួររំលឹកថា កាលពីសប្តាហ៍មុន រដ្ឋបាលលោក ត្រាំ បានប្រកាសអំពីការចុះកុងត្រាជាមួយក្រុមហ៊ុន GM ក្នុងតម្លៃ ៤៩០លានដុល្លារ ដើម្បីឲ្យក្រុមហ៊ុនរថយន្តនេះផលិតម៉ាស៊ីនជំនួយផ្លូវដង្ហើម ឲ្យបានសរុប ៣០ ០០០គ្រឿង ត្រឹមខែសីហា។ បើគិតទៅ ម៉ាស៊ីនជំនួយផ្លូវដង្ហើមមួយគ្រឿងដែល GM ផលិត នឹងមានតម្លៃប្រហែល ១៦ ០០០ដុល្លារ ដែលមានន័យថា ថ្លៃជាងរថយន្ត Chevrolet Spark ដែល GM លក់ត្រឹម ១៣ ២២០ដុល្លារប៉ុណ្ណោះ។

ទោះជាយ៉ាងណា GM និងក្រុមហ៊ុនដៃគូផលិតម៉ាស៊ីនជំនួយផ្លូវដង្ហើម Ventec Life Systems ត្រូវធ្វើការច្រើនណាស់ដើម្បីសម្រេចកុងត្រានេះបាន។ ជាក់ស្តែង ពួកគេត្រូវចំណាយពេលដល់ ១០សប្តាហ៍ ដើម្បីផលិតគ្រឿងម៉ាស៊ីន, ជួល និងបង្វឹកបុគ្គលិកបណ្តោះអាសន្នរបស់ពួកគេ ព្រមទាំងកែកុនរោងចក្រផលិតរថយន្ត ទៅជាកន្លែងផលិតម៉ាស៊ីនជំនួយផ្លូវដង្ហើមវិញទៀតផង។

យ៉ាងណាមិញ ក្រុមហ៊ុន GM ចង់ចាប់ផ្តើមសង្វាក់ផលិតកម្មនៅសប្តាហ៍នេះ ដោយផលិតម៉ាស៊ីនជំនួយផ្លូវដង្ហើមឲ្យបាន ៦ ០០០គ្រឿង ត្រឹមថ្ងៃទី១ ខែមិថុនា៕

ផ្ទាំងផ្សាយពាណិជ្ជកម្ម

ទីផ្សាររថយន្តនៅប្រទេសចិន ផ្លាស់ប្ដូរយ៉ាងណាហើយ ក្រោយស្ងាត់កូវីដ១៩?

April 14, 2020

ផ្អែកតាមការស្ទង់មតិរបស់សហគមន៍ឈ្មួញរថយន្តចិន CADA បានបង្ហាញថា ៩៩% នៃហាងលក់រថយន្តក្នុងប្រទេសចិន បានបើកទ្វារដំណើរការឡើងវិញនាថ្ងៃសុក្រ សប្ដាហ៍កន្លងទៅ។ យ៉ាងណាក្ដីចំនួនលក់ជាមធ្យមតាមហាងលក់នីមួយៗគឺមានត្រឹម ៦៦% នៃកម្រិតធម្មតា (មុនពេលមិនទាន់ផ្ទុះជំងឺកូវីដ១៩)។ នេះបើតាមការចុះផ្សាយរបស់ Autonews Europe។

ដោយឡែក ចំណូលជាមធ្យមបានពីការលក់រថយន្តថ្មីៗគឺស្ថិតនៅ ៦៤% នៃកម្រិតធម្មតា។ នេះបើផ្អែកតាមការស្ទង់មតិពីហាងលក់រថយន្តចំនួន ៨៧២១ កន្លែងនៅទូទាំងប្រទេសចិន។ ចំណែកចំណូលពីខាងសេវាកម្ម និងគ្រឿងបន្លាស់គឺស្ថិតនៅកម្រិត ៦៧% នៃកម្រិតធម្មតា។

ក្រៅពីប្រទេសចិន គេសង្កេតឃើញថាក្រុមហ៊ុនរថយន្តភាគច្រើននៅទូទាំងពិភពលោក បានចាប់ផ្ដើមផ្ដោតលើការលក់រថយន្តតាមអនឡាញ មុនពេលដែលអតិថិជនមានជំនឿចិត្តអាចទៅកាន់ហាងលក់បាន៕

ផ្ទាំងផ្សាយពាណិជ្ជកម្ម

មើលកម្រិតស៊ីសាំងឡាន Bentley Bentayga ប្រភេទ Hybrid ស៊ីច្រើនជាងប្រភេទ V8

April 14, 2020

ស្ថាប័ន EPA បានបញ្ចេញតួលេខនៃការវាយតម្លៃផ្លូវការសម្រាប់រថយន្ត Bentley Bentayga ស៊េរីឆ្នាំ ២០២០ ប្រភេទ Hybrid ដែលមានកម្រិតស៊ីប្រេង ១៣,៨៣ លីត្រ/១០០គ.ម ពេលបើកក្នុងក្រុង ស៊ី ១១,២ លីត្រពេលបើកផ្លូវលាត និងជាមធ្យមស៊ីប្រេង ១២,៣៧ លីត្រ។

បើមើលលើតួលេខនេះឲ្យមែនទែន វាបង្ហាញនូវរឿងគួរឲ្យចាប់អារម្មណ៍មួយចំនួន។ នោះគឺកម្រិតស៊ីប្រេងពេលបើកក្នុងក្រុងរបស់ Bentayga ប្រភេទ Hybrid គឺស៊ីច្រើនជាង Bentayga ប្រភេទ V8 ដែលមានកម្រិតស៊ីប្រេង ១០,២២ លីត្រ។

បន្ថែមពីនេះរថយន្ត Bentayga V8 អាចបើកបរបានចម្ងាយប្រមាណ ៨៣៣ គ.ម ពេលចាក់សាំងមួយពេញ និងពេលបើកបរលើផ្លូវលាត។ ចំណែកប្រភេទ Hybrid វិញបើកបរបានចម្ងាយ ៦៩២ គ.ម ប៉ុណ្ណោះ ពេលមានថាមពលពេញលេញ។

Bentayga Hybrid គឺមានភ្ជាប់ជាមួយម៉ាស៊ីនសាំង Turbocharged ចំណុះ ៣,០ លីត្រ ៦ស៊ីឡាំង (V6) ដែលផលិតកម្លាំងបានសរុប ៤៤៣ សេះ ពេលគួបផ្សំនឹងម៉ូទ័រអគ្គិសនី។ ចំណែក Bentayga V8 អាចផលិតកម្លាំងបាន ៥៤២ សេះ៕

ផ្ទាំងផ្សាយពាណិជ្ជកម្ម

កាក់កបខ្លាំងនៅចិន Tesla ចាប់ផ្តើមផលិតឡាន Model 3 ចំនួន២ប្រភេទទៀត

April 14, 2020

ក្រុមហ៊ុនរថយន្តអគ្គិសនីអាមេរិក Tesla បានប្រកាសថា រថយន្ត Model 3 គ្រប់ប្រភេទដែលមានលក់លើទីផ្សារប្រទេសចិន នឹងត្រូវផលិតក្នុងស្រុកទាំងអស់ បន្ទាប់ពីរថយន្ត Model 3 ចំនួន២ប្រភេទទៀត បានចាប់ផ្តើមដំណើរការផលិតនាពេលថ្មីៗនេះ។

ដូច្នេះ Tesla នឹងមានលក់រថយន្ត Model 3 សរុបចំនួន ៣ប្រភេទ សម្រាប់អតិថិជនចិន។ កាលពីមុន Tesla មានផលិតតែរថយន្ត Model 3 ប្រភេទ Standard Range Plus RWD ប៉ុណ្ណោះ នៅរោងចក្រនៃទីក្រុងសៀងហៃរបស់ខ្លួន។ ប៉ុន្តែឥឡូវណេះ Model 3 ចំនួន២ប្រភេទទៀត គឺ ប្រភេទ Long Range RWD និង ប្រភេទ Performance ក៏ផលិតនៅទីនោះដែរ។

គួរឲ្យដឹងថា រថយន្ត Tesla Model 3 ប្រភេទ Standard Range Plus RWD មានតម្លៃចាប់ពី ៤៦ ៤០០ដុល្លារ ខណៈប្រភេទ Long Range RWD មានតម្លៃចាប់ពី ៥២ ០០០ដុល្លារ និង ប្រភេទ Performance មានតម្លៃចាប់ពី ៦៣ ៥០០ដុល្លារ សម្រាប់ទីផ្សារប្រទេសចិន៕

ផ្ទាំងផ្សាយពាណិជ្ជកម្ម