នៅមានជាសំនួរចោទសួរថា ក្រុមហ៊ុន GMC នឹងបន្តបង្ហាញចេញរថយន្ត Hummer ប្រភេទអគ្គិសនី នាថ្ងៃទី ២១ ខែឧសភាដូចដែលបានគ្រោងទុកមុនជំងឺកូវីដ១៩បានផ្ទុះ ឬបែបណា?
កាលពីថ្ងៃទី ៣១ ខែមីនា អ្នកនាំពាក្យរបស់ GMC និយាយថាពួកគេបានឃ្លាំមើលស្ថានភាពយ៉ាងជិតដិត ហើយមិនទាន់មានការសម្រេចចិត្តរំសាយកម្មវិធីចោលនូវឡើយទេនាពេលនោះ។ ប៉ុន្តែពេលនេះវិបសាយ MuscleCarsAndTrucks អះអាងថាពួកគេបានដឹងថាកម្មវិធីបង្ហាញចេញរថយន្ត Hummer ប្រភេទអគ្គិសនីត្រូវបានរំសាយចោល ដោយសារការផ្ទុះជំងឺកូវីដ១៩។
ការចុះផ្សាយមានបញ្ជាក់ថា អ្នកដែលត្រូវបានអញ្ជើញចូលរួមក្នុងកម្មវិធីប្រកាសចេញរថយន្ត Hummer អគ្គិសនី មិនទាន់ទទួលបានការបញ្ជាក់ថាកម្មវិធីនឹងនៅបន្តឬយ៉ាងនោះទេ។ មួយទៀត ដោយសារតែរោងចក្ររបស់ក្រុមហ៊ុន General Motor ត្រូវបិទ នោះការអភិវឌ្ឍន៍រថយន្តអគ្គិសនីប្រហែលជាត្រូវផ្អាកផងដែរ។
យ៉ាងណាក្ដីគេនៅរង់ចាំការបញ្ជាក់ជាផ្លូវការពីក្រុមហ៊ុន GMC នៅឡើយអំពីការរំសាយចោល។ វាអាចទៅរួចថា GMC អាចនឹងធ្វើតាមក្រុមហ៊ុន Genesis និង Hyundai ដែលកាលពីថ្មីៗនេះពួកគេសម្រេចធ្វើការប្រកាសរថយន្តថ្មីតាមរយៈអនឡាញ៕
