មិនទាន់ដឹងអីផង គូប្រជែង Tesla នៅចិន ជិតបះជើងបាត់!

March 24, 2020

Nio ដែលជាក្រុមហ៊ុនរថយន្តអគ្គិសនីនៅក្នុងប្រទេសចិន ហើយក៏ជាគូប្រជែងដោយផ្ទាល់ទៅកាន់ក្រុមហ៊ុនរថយន្តអគ្គិសនីអាមេរិក Tesla កំពុងតែជួបបញ្ហាហិរញ្ញវត្ថុជាទម្ងន់នាពេលនេះ។

ក្រុមហ៊ុនចិនដែលមានរថយន្តស្ព័រអគ្គិសនី EP9 កម្លាំង ១ ៣៤២សេះនេះ បានជួបបញ្ហាហិរញ្ញវត្ថុ បន្ទាប់ពីការលក់ហាក់មិនសូវបានផល គិតចាប់តាំងពីចុងឆ្នាំមុនមក។ មិនតែប៉ុណ្ណោះ ឥឡូវនេះជំងឺកូវីដ១៩ កំពុងតែវាយលុកនៅក្នុងប្រទេសចិនទៀតផង។

យោងតាមគេហទំព័រ Automobilwoche ឲ្យដឹងថា ក្រុមហ៊ុន Nio ផ្ទាល់បានទទួលស្គាល់ថា ស្ថិតក្នុងស្ថានភាពបែបនេះខ្លួនមិនធានាថាអាចបន្តដល់ ១២ខែទៀតនោះទេ។

Nio បានលក់រថយន្តសរុបចំនួន ២០ ៥៦៥គ្រឿងនៅក្នុងឆ្នាំ២០១៩ ខណៈ Tesla កំពុងផលិតរថយន្តចន្លោះពី ២ ០០០ ទៅ ៣ ០០០គ្រឿងក្នុងមួយសប្តាហ៍ ហើយរករថយន្តលក់សឹងមិនទាន់ទៀត៕

ផ្ទាំងផ្សាយពាណិជ្ជកម្ម

ភីកអាប់ Chevrolet Colorado ឆ្នាំ២០២១ អាចថ្លៃជាងស៊េរីមុន ៤ពាន់ដុល្លារ

March 24, 2020

Chevrolet មានគម្រោងផ្លាស់ប្តូរ និងបន្ថែមលក្ខណៈពិសេសមួយចំនួនលើភីកអាប់ Colorado ស៊េរីឆ្នាំ២០២១ ថ្មីរបស់ខ្លួន។

យោងតាមគេហទំព័រ CarsDirect បង្ហាញថា រថយន្ត Chevrolet Colorado ឆ្នាំ២០២១ ប្រភេទ Base Model មានតម្លៃចាប់ពី ២៦ ៣៩៥ដុល្លារ ពោលគឺថ្លៃជាងស៊េរីមុនដល់ទៅ ៤ ០០០ដុល្លារ។

ថ្វីបើមានតម្លៃថ្លៃជាងមុនមែន ប៉ុន្តែ Colorado ថ្មី នឹងពាំនាំមកនូវការឌីហ្សាញថ្មី ដែលបំផុសគំនិតតាមម៉ូដែល Silverado។ Colorado ក៏នឹងចែកចេញជា ៣ម៉ូដែលផ្សេងទៀត គឺ LT, Z71 និង ZR2 ដែលមានតម្លៃ ២៧ ៧០០ដុល្លារ, ៣៣ ៩០០ដុល្លារ និង ៤១ ៤០០ដុល្លារ។

រថយន្តភីកអាប់នេះមានជម្រើសម៉ាស៊ីនដូចជា៖

ចំណុះ ២,៥លីត្រ ទំហំ ៤ស៊ីឡាំង កម្លាំង ២០០សេះ
ចំណុះ ៣,៦លីត្រ DOHC ទំហំ ៦ស៊ីឡាំង កម្លាំង ៣០៨សេះ
ចំណុះ ២,៨លីត្រ Duramax Turbodiesel កម្លាំង ១៨១សេះ

ផ្ទាំងផ្សាយពាណិជ្ជកម្ម

Aston Martin បង្ហាញម៉ាស៊ីន Twin-Turbo ចំណុះ ៣,០លីត្រ ៦ស៊ីឡាំង ទើបផលិតបាន

March 24, 2020

Aston Martin បានខិតខំខ្លាំងបំផុតក្នុងការអភិវឌ្ឍម៉ាស៊ីន Twin-Turbocharged ចំណុះ ៣,០ លីត្រ ៦ ស៊ីឡាំង ហើយពេលនេះក្រុមហ៊ុនបានបញ្ចេញវីដេអូ និងរូបភាពបង្ហាញអំពីម៉ាស៊ីនថ្មីនេះ។

ម៉ាស៊ីននេះមានឈ្មោះសម្គាល់ថា TM01 ដែលវានឹងម៉ាស៊ីនដែល Aston Martin ឌីហ្សាញដោយខ្លួនឯងដំបូងចាប់តាំងពីឆ្នាំ ១៩៦៨ មក ដែលនឹងត្រូវប្រើប្រាស់លើរថយន្ត Valhalla នៅឆ្នាំ ២០២២។ ម៉ាស៊ីននេះក៏នឹងត្រូវប្រើលើរថយន្ត Aston Martin ផ្សេងទៀតនាថ្ងៃអនាគតផងដែរ។

ម៉ាស៊ីននេះមានការឌីហ្សាញបែប “Hot V” ដែលអាចឲ្យវាផ្ដល់នូវកម្លាំងល្អ អាចទ្រាំទ្រជាមួយប្រព័ន្ធអគ្គិសនី និងអាចបន្ថយទម្ងន់ឲ្យបានស្រាលជាងធម្មតា ២០០ គីឡូក្រាម។ Aston Martin មិនទាន់បានបង្ហាញលក្ខណៈសម្បត្តិលម្អិតរបស់ម៉ាស៊ីននេះនៅឡើយទេ។ ប៉ុន្តែតាមឯកសារអំពី Valhalla ដែលក្រុមហ៊ុនចែកដល់ហាងលក់រថយន្តកាលពីឆ្នាំមុន បានបញ្ជាក់អំពីគោលដៅនៃកម្លាំង ១០០០ សេះ។

ម៉ាស៊ីនលើរថយន្ត Valhalla រំពឹងថាអាចឲ្យរថយន្តស្ទុះពី ០-១០០ គ.ម/ម៉ ក្នុងពេល ២,៥ វិនាទី និងមានល្បឿនអតិបរមា ៣៥៤ គ.ម/ម៉៕

ផ្ទាំងផ្សាយពាណិជ្ជកម្ម

ឡានអគ្គិសនី Polestar 2 ចាប់ផ្ដើមការផលិតនៅចិន ទោះកំពុងផ្ទុះ COVID-19

March 24, 2020

ការផលិតរថយន្តអគ្គិសនី Polestar 2 បានចាប់ផ្ដើមហើយ នៅឯរោងចក្រក្នុងតំបន់ Luqiao ភាគខាងកើតខេត្ត Zhejiang ប្រទេសចិន។

ខណៈដែលក្រុមហ៊ុនរថយន្តនៅពាសពេញប្រទេសចិនបានបិទទ្វាររោងចក្រផលិតជាច្រើនសប្ដាហ៍ដោយសារការរាតត្បាត COVID-19 ក្រុមហ៊ុន Polestar នៅតែមានការអនុវត្តតាមការកំណត់យ៉ាងខ្ជាប់ខ្ជួន ដើម្បីធានាថាប្រតិបត្តិការរបស់ខ្លួននៅចិន នឹងមិនមានរងការប៉ះពាល់។

Polestar បានចាប់ផ្ដើមការផលិត ដោយមានចេញនូវច្បាប់ត្រួតពិនិត្យយ៉ាងម៉ត់ចត់ ដូចជាការវាស់កម្ដៅ ការសម្លាប់មេរោគ និងការផ្ដល់ម៉ាស់សម្រាប់បុគ្គលិកទាំងអស់ជាច្រើន។ ការត្រួតពិនិត្យនេះហាក់មានលទ្ធផល ដោយក្រុមហ៊ុននិយាយថាមិនមានបុគ្គលិកណាម្នាក់របស់ខ្លួនមានឆ្លងវីរុសនោះទេ។

រថយន្ត Polestar 2 ដែលត្រូវផលិតដំបូងគេគឺជាប្រភេទ Launch Edition ដែលមានតម្លៃចាប់ពី ៦៣ ០០០ ដុល្លារ។ វាមានបំពាក់ម៉ូទ័រអគ្គិសនីមួយគូដែលផលិតកម្លាំងបាន ៤០២ សេះ អាចស្ទុះពី ០–១០០ គ.ម/ម៉ ក្នុងពេលមិនដល់ ៥ វិនាទី៕

ផ្ទាំងផ្សាយពាណិជ្ជកម្ម

ឡាន Mini ប្រើអគ្គិសនី តម្លៃថោកសមរម្យ កំពុងមានអ្នកបញ្ជាទិញច្រើន

March 23, 2020

កាលពីប៉ុន្មានខែមុន ក្រុមហ៊ុន Mini បានបង្ហាញរថយន្តអគ្គិសនីដំបូងរបស់ខ្លួន ម៉ូដែល Mini Cooper SE ស៊េរីឆ្នាំ២០២០ ហើយទទួលបានការចាប់អាមរ្មណ៍ជាច្រើន។

មកទល់ពេលនេះ ក្រុមហ៊ុន Mini ទទួលបានការបញ្ជាទិញច្រើនជាង ៨ ០០០គ្រឿងបាត់ទៅហើយ នៅទូទាំងពិភពលោក។

រថយន្ត Mini Cooper SE ដែលដំណើរការដោយថាមពលអគ្គិសនីសុទ្ធនេះ មានកម្លាំង ១៨៤សេះ អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៦,៩វិនាទី ហើយមានល្បឿនអតិបរមា ១៥០គីឡូម៉ែត្រក្នុងមួយម៉ោង។

បើតាម EPA បានបង្ហាញថា រថយន្ត Cooper SE អាចបើកបរបានចម្ងាយ ១៨០គីឡូម៉ែត្រ នៅពេលសាកភ្លើងពេញម្តង។ វាត្រូវបានដាក់លក់ក្នុងតម្លៃចាប់ពី ២៩ ៩០០ដុល្លារ នៅលើទីផ្សារសហរដ្ឋអាមេរិក៕

ផ្ទាំងផ្សាយពាណិជ្ជកម្ម

ក្រុមហ៊ុនឡានអាមេរិកធំៗ៣ ចេញមុខផលិតឧបករណ៍សម្រួលផ្លូវដង្ហើម ទប់ទល់នឹងជំងឺកូវីដ១៩

March 23, 2020

ក្រុមហ៊ុនរថយន្តអាមេរិកធំៗចំនួន៣ រួមមាន Ford, GM និង Tesla ទទួលបានភ្លើងខៀវក្នុងការផលិតឧបករណ៍សម្រួលផ្លួវដង្ហើម ស្របពេលដែលមន្ទីរពេទ្យកំពុងខ្វះខាតឧបករណ៍នេះ ខណៈជំងឺកូវីដ១៩ កំពុងតែផ្ទុះឡើង។ នេះបើយោងតាមប្រធានាធិបតីអាមេរិក លោក ដូណាល់ ត្រាំ ប្រាប់ឲ្យដឹងនៅលើ Tweeter កាលពីថ្ងៃអាទិត្យ។

ឧបករណ៍សម្រួលផ្លូវដង្ហើម គឺជាផ្នែកមួយដ៏សំខាន់នៃឧបករណ៍វេជ្ជសាស្រ្ត សម្រាប់អ្នកជំងឺកូវីដ១៩ ដែលកំពុងសម្រាកព្យាបាលនៅមន្ទីរពេទ្យ ដែលជាជំងឺផ្លូវដង្ហើមថ្មី។ ជំងឺកូវីដ១៩ វាយប្រហារសួត និងអាចបណ្តាលឲ្យមានរោគសញ្ញាផ្លូវដង្ហើម និងរលាកសួតធ្ងន់ធ្ងរ។

ជាមួយគ្នានេះ ដោយសារតែមិនទាន់មានការព្យាបាលពិតប្រាកដណាមួយនៅឡើយ ឧបករណ៍សម្រួលផ្លូវដង្ហើម ត្រូវការយ៉ាងចាំបាច់ ក្នុងការជួយមនុស្សឲ្យដកដង្ហើមស្រួល និងប្រយុទ្ធនឹងជំងឺនេះ។

គួរឲ្យដឹងថា សហរដ្ឋអាមេរិក មានឧបករណ៍សម្រួលផ្លូវដង្ហើមនេះប្រហែល ១៦០ ០០០គ្រឿង និង ១២ ៧០០គ្រឿងផ្សេងទៀត ស្ថិតនៅ National Strategic Supply៕

ផ្ទាំងផ្សាយពាណិជ្ជកម្ម

Mercedes បញ្ចេញលក់កំពូលប្រណីតថ្មីសម្រាប់ចិន តម្លៃ ២០ម៉ឺនដុល្លារ

March 23, 2020

Mercedes-Maybach S450 4 MATIC Collector’s Edition គឺជារថយន្តប្រណីតថ្មីមួយទៀតពី Mercedes-Benz សម្រាប់ដាក់លក់នៅលើទីផ្សារប្រទេសចិន ដែលរថយន្តគឺផលិតឡើងផ្អែកលើរថយន្ត Mercedes-Maybach S450 4MATIC។

រថយន្តនេះនៅបន្តប្រើប្រាស់ម៉ាស៊ីន Twin-Turbocharged ចំណុះ ៣,០ លីត្រ ៦ ស៊ីឡាំង ដែលដំណើរការព្រមគ្នាជាមួយប្រព័ន្ធ Hybrid ៤៨ វ៉ុល។ សរុបទៅម៉ាស៊ីននេះអាចបង្កើតកម្លាំងបាន ៣៦៧ សេះ ភ្ជាប់នឹងប្រអប់លេខអូតូ ៩វគ្គ និងប្រើប្រព័ន្ធបើកបរវិលកង់ទាំងអស់។

អ្វីដែលគេចាប់អារម្មណ៍ខ្លាំងលើរថយន្តនេះ គឺវាមានបំពាក់នូវរចនាបថរន្ធខ្យល់ផ្នែកខាងមុខទាក់ទាញបំផុត ដែលជាចំណុចកម្រមួយសម្រាប់ប្រភេទរថយន្ត S450។ ចំណុចពិសេសផ្សេងទៀតគឺមានបំពាក់កង់ខ្មៅលាយទឹកប្រាក់ទំហំ ២០ អ៊ីញ និងមានស្រោបដោយទឹកថ្នាំពណ៌ត្នោតងងឹតយ៉ាងទាក់ទាញ។

គេមិនទាន់ដឹងថាចំនួនផលិតរថយន្ត Mercedes-Maybach S450 4 MATIC Collector’s Edition នេះនឹងមានកំណត់ឬយ៉ាងណានោះទេ ប៉ុន្តែដឹងថានៅទីផ្សារប្រទេសចិនវាមានតម្លៃចាប់ពីប្រមាណ ២០៥ ៥៨៦ ដុល្លារ៕

ផ្ទាំងផ្សាយពាណិជ្ជកម្ម

ក្រុមហ៊ុនរថយន្ត ៣ ទៀតហើយ ប្រកាសផ្អាកការផលិតរថយន្ត

March 23, 2020

ក្នុងរយៈពេលប៉ុន្មានថ្ងៃចុងក្រោយនេះ មានក្រុមហ៊ុនរថយន្តជាច្រើនបានផ្អាកដំណើរការផលិតរបស់ខ្លួន ដែលជាការឆ្លើយតបនឹងការផ្ទុះវីរុសកូរ៉ូណា។ នៅប្រទេសអ៊ីតាលី មាន Ferrari Lamborghini និង Maserati សុទ្ធតែផ្អាកការផលិត ចំណែក Volkswagen Group និង Porsche បិទទ្វាររោងចក្រនៅអាល្លឺម៉ង់។ ហើយនៅអាមេរិកក្រុមហ៊ុន Ford, Fiat Chrysler, General Motors និង Tesla ក៏បានបិទរោងចក្រដូចគ្នា។

ពេលនេះវីរុសកូរ៉ូណាបន្តបង្កផលប៉ះពាល់ឧស្សាហកម្មរថយន្តនៅអង់គ្លេសវិញម្ដង ដោយមានក្រុមហ៊ុន Bentley និង Jaguar Land Rover បានប្រកាសថាផលិតកម្មរបស់ខ្លួននៅរោងចក្រនៅចក្រភពអង់គ្លេសនឹងត្រូវផ្អាកយ៉ាងហោចណាស់មួយខែ។

Bentley ផ្អាកដំណើរការនៅរោងចក្រនៅតំបន់ Crewe ចាប់ពីថ្ងៃទី ២០ ខែមីនា ខណៈដែល JLR នឹងផ្អាកនៅអំឡុងសប្ដាហ៍នេះដើម្បីការពារបុគ្គលិក។ ក្រុមហ៊ុនទាំងពីរគ្រោងនឹងបន្តការផលិតវិញនៅថ្ងៃទី ២០ ខែមេសា ប៉ុន្តែនឹងត្រូវរង់ចាំតាមដានស្ថានភាពជាបន្តសិន។

ទន្ទឹមនឹងនេះ Bugatti ក៏នឹងចូលរួមផ្អាកការផលិតផងដែរ ដោយចាប់ពីថ្ងៃទី ២០ ខែមីនា ការផលិតរថយន្ត Bugatti Chiron នៅរោងចក្រក្នុងតំបន់ Molsheim ប្រទេសបារាំងនឹងត្រូវផ្អាក។ Bugatti មិនបានប្រាប់ថានឹងចាប់ផ្ដើមប្រតិបត្តិការវិញនាពេលណានោះទេ៕

ផ្ទាំងផ្សាយពាណិជ្ជកម្ម

Volvo សម្រេចបិទទ្វាររោងចក្រ ទាំងនៅស៊ុយអែត និងអាមេរិក

March 21, 2020

Volvo គឺជាក្រុមហ៊ុនផលិតរថយន្តដ៏ធំ និងចុងក្រោយបង្អស់មួយ ដែលសម្រេចចិត្តបិទទ្វាររោងចក្ររបស់ខ្លួន ដោយសារតែការផ្ទុះឡើងនៃជំងឺកូវីដ១៩។

ក្រុមហ៊ុនរថយន្តនេះបានបង្ខំចិត្តបិទរោងចក្រនៅក្នុងប្រទេសស៊ុយអែត និងសហរដ្ឋអាមេរិក ចាប់ពីថ្ងៃទី២៦ ខែមីនា ដល់ ទី១៤ ខែមេសា ឆ្នាំ២០២០ ខណៈរោងចក្រនៅប្រទេសបែលហ្ស៉ិករបស់ខ្លួន នៅបន្តបិទទ្វាររហូតដល់ថ្ងៃទី១៥ ខែមេសា ដដែល។

ទោះបីជាយ៉ាងណា ក្រុមហ៊ុន Volvo បានផ្តោតសំខាន់លើសុខភាព និងសុវត្ថិភាពរបស់បុគ្គលិកខ្លួន ហើយបានដាក់ការហាមឃាត់មួយចំនួន លើការធ្វើដំណើររបស់បុគ្គលិកទៀតផង។ បន្ថែមពីនេះ ដើម្បីជួយកាត់បន្ថយការរីករាលដាលនៃជំងឺកូវីដ១៩ បុគ្គលិកធ្វើការនៅការិយាល័យរបស់ Volvo នឹងត្រូវអនុញ្ញាតឲ្យធ្វើការពីផ្ទះមក ចាប់ពីថ្ងៃទី២៦ ខែមីនា ហើយម៉ោងការងារនឹងត្រូវកាត់បន្ថយទៀតផង៕

ផ្ទាំងផ្សាយពាណិជ្ជកម្ម

ដឹងថ្ងៃដែលឡាន Porsche Macan អត់ប្រើសាំង បង្ហាញខ្លួនហើយ

March 21, 2020

អ្នកទាំងអស់ប្រហែលជាបានដឹងមកហើយថា Porsche បានប្រកាសផលិតរថយន្ត Macan ប្រើអគ្គិសនីថ្មី បន្ទាប់ពីម៉ូដែល Taycan ដែលទើបចេញលក់ថ្មីៗកន្លងទៅនេះ។

យោងតាមប្រភពព័ត៌មានបានឲ្យដឹងថា Porsche បានត្រៀមខ្លួនបញ្ចេញរថយន្ត Macan ប្រើអគ្គិសនី លឿនបំផុតនៅដើមឆ្នាំ២០២១។ ទោះជាយ៉ាងណា ប្រភពពី Automobilwoche អះអាងថា ផលិតកម្មនៃរថយន្ត SUV អត់ប្រើសាំងនេះនឹងចាប់ផ្តើមនៅចុងឆ្នាំ២០២២ ដូច្នេះមានន័យថា ទម្រាំបានដឹកឲ្យអតិថិជនរបស់ខ្លួនគឺនៅឆ្នាំ២០២៣ ឯណោះ។

ដោយឡែក ព័ត៌មានលម្អិតទាក់ទងនឹងផ្នែកមេកានិចរបស់ Macan ប្រើអគ្គិសនី មិនទាន់ត្រូវបានបង្ហាញនៅឡើយទេ ប៉ុន្តែគេបានដឹងថា វានឹងប្រើគ្រោងឆ្អឹងថ្មី PPE ដែលចូលរួមសហការណ៍ផលិតដោយក្រុមហ៊ុន Porsche និង Audi។ គ្រោងឆ្អឹងនេះក៏កំពុងប្រើលើរថយន្តអគ្គិសនី Audi e-tron GT ផងដែរ។

មិនខុសពីរថយន្ត Porsche ដទៃទៀតនោះទេ រថយន្ត Macan ប្រើអគ្គិសនីនេះ នឹងចែកចេញជាច្រើនប្រភេទ ហើយប្រភេទថ្លៃ និងខ្លាំងបំផុតគឺ Macan Turbo ដែលគេរំពឹងថាមានកម្លាំងដល់ ៧០០សេះ៕

ផ្ទាំងផ្សាយពាណិជ្ជកម្ម