កំពុងតែបាត់បង់ចំណូលហើយ Ferrari ឆ្លៀតបរិច្ចាគលុយច្រើនសន្ធឹកជួយដល់ការប្រយុទ្ធកូវីដ១៩

March 21, 2020

ឧស្សាហកម្មយានយន្តត្រូវបានផ្អាកដំណើរការជាបណ្ដោះអាសន្នដោយសារការព្រួយបារម្ភនៃការឆ្លងរាលដាលកូវីដ១៩។ ជាក់ស្ដែង Ferrari បានបិទរោងចក្ររបស់ខ្លួនទាំងស្រុងនៅ Maranello និង Modena រហូតដល់ថ្ងៃទី ២៧ ខែមីនា ឬឆាប់ជាងនេះ។

ច្បាស់ណាស់ថា Ferrari នឹងបាត់បង់ចំណូលអំឡុងពេលបិទរោងចក្រនេះ ប៉ុន្តែក្រុមហ៊ុនផលិតរថយន្តរបស់អ៊ីតាលីមួយនេះសម្រេចចិត្តធ្វើការបរិច្ចាគទឹកប្រាក់ដល់អ្នកដែលប៉ះពាល់ដោយសារការផ្ទុះវីរុសកូរ៉ូណា។

ក្រុមគ្រួសារ Agneli ដែលជាអ្នកបង្កើតក្រុមហ៊ុន Fiat ហើយបច្ចុប្បន្នជាអ្នកកាន់កាប់ Ferrari នាពេលនេះកំពុងធ្វើការជាមួយមន្ទីរការពារជនស៊ីវិលអ៊ីតាលី ដើម្បីជួយដល់សេវាកម្មសុខាភិបាលរបស់អ៊ីតាលី។ គ្រួសារនេះបានផ្ដល់ថវិកាប្រមាណ ១០,៦ លានដុល្លារ ដែលនឹងជួយដល់ការឆ្លើយតបតម្រូវការសុខភាពក្នុងសង្គម នៅទីក្រុង Turin និង Piedmont៕

ផ្ទាំងផ្សាយពាណិជ្ជកម្ម

មើលរូបរាងភីកអាប់ Volkswagen Amarok ឆ្នាំ ២០២២ បង្កើតតាមរូប Teaser ផ្លូវការ

March 21, 2020

កាលពីដើមសប្ដាហ៍ Volkswagen បានបង្ហាញចេញគំនូរព្រាងនៃរថយន្តភីកអាប់ Amarok ជំនាន់ថ្មីស៊េរីឆ្នាំ ២០២២ ដែលមានប្រើប្រាស់គ្រោងឆ្អឹងដូចជា Ford Ranger ជំនាន់បន្ទាប់ដែរ។

ផ្អែកតាមគំនូរព្រាង គេបានបង្កើតរូបភាព Render ដែលបង្ហាញឲ្យឃើញច្បាស់ៗនូវរូបរាង VW Amarok ស៊េរីឆ្នាំ ២០២២ ដែលជាស្នាដៃបង្កើតឡើងដោយអ្នកជំនាញឈ្មោះ Kolesa។ រូបភាពបង្ហាញថា Amarok ជំនាន់ថ្មីនេះ មានរូបរាងខុសពីជំនាន់បច្ចុប្បន្នទាំងស្រុង ប្ដូរពីរចនាបថរាងកោង មកជារចនាបថរាងជ្រុងៗវិញ។

គួរដឹងថាខណៈពេលនេះ រថយន្ត Amarok ជំនាន់បន្ទាប់កំពុងស្ថិតក្នុងដំណាក់កាលនៃការផលិតនៅឡើយ ជាមួយគ្នានឹង Ford Ranger ជំនាន់ថ្មី។ រថយន្តទាំងពីរនឹងត្រូវវាយលុកទីផ្សារអឺរ៉ុប អាហ្វ្រិក មជ្ឈិមបូព៌ា អាស៊ីប៉ាស៊ីហ្វិក និងអាមេរិកខាងត្បូង៕

ផ្ទាំងផ្សាយពាណិជ្ជកម្ម

លោកត្រាំ សម្រេចថានឹងជួយដល់ឧស្សាហកម្មយានយន្តដែលកំពុងជួបវិបត្តិ

March 20, 2020

លោក Donald Trump ប្រធានាធិបតីសហរដ្ឋអាមេរិកបានមានប្រសាសន៍ថារដ្ឋាភិបាលនឹងជួយដល់ឧស្សាហកម្មយានយន្តនៅអាមេរិក ដែលកំពុងជួបវិបត្តិព្រោះតែកូវីដ១៩។

លោកបានមានប្រសាសន៍ថា ៖ “យើងកំពុងមើលឧស្សាហកម្មយានយន្តយ៉ាងយកចិត្តទុកដាក់។ យើងនឹងជួយពួកគេយ៉ាងហោចណាស់តិចតួច ហើយពួកគេក៏បានដាក់សំណើសុំជំនួយមួយចំនួនផងដែរ ហើយនេះមិនមែនជាកំហុសពួកគេនោះទេដែលមានរឿងនេះកើតឡើង។ ដូចនេះយើងនឹងមើលថែឧស្សាហកម្មយានយន្ត។”

យ៉ាងណាក្ដីលោក Trump មិនបានបញ្ជាក់ថារដ្ឋាភិបាលនឹងផ្ដល់ជាជំនួយបែបណានោះទេ សម្រាប់ឧស្សាហកម្មយានយន្ត។ ការឆ្លើយតបរបស់ប្រធានាធិបតីរូបនេះគឺបន្ទាប់ពីសហគមន៍ផលិតគ្រឿងម៉ាស៊ីន និងឧបករណ៍ ទទូចឲ្យថ្នាក់ដឹកនាំផ្ដល់ការផ្គត់ផ្គង់ដើម្បីជួយសម្រាលវិបត្តិ៕

ផ្ទាំងផ្សាយពាណិជ្ជកម្ម

រថយន្ត Bugatti ទាំង ៦ ម៉ូដែលក្នុងរូបនេះ តម្លៃសរុបជាង ៣៥លានដុល្លារ

March 20, 2020

Bugatti Chiron គឺជារថយន្តដែលគេកម្រឃើញផ្ទាល់ភ្នែកមួយ ប៉ុន្តែវាមិនកម្រដូចជាការប្រមូលផ្ដុំនៃរថយន្ត Bugatti ច្រើនប្រភេទផ្សេងគ្នា ដែលថ្មីៗនេះក្រុមហ៊ុនបានយករថយន្តចំនួន ៦ ម៉ូដែលមកដាក់ជុំគ្នានៅ Château St. Jean នៃតំបន់ Molsheim ប្រទេសបារាំង។

រថយន្តដែលមកជួបជុំគ្នានេះរួមមាន Centodieci, Divo, La Voiture Noire, Chiron Sport, Chiron Pur Sport និង Chiron Super Sport 300+។ រថយន្តទាំង ៦ នេះគឺមានតម្លៃសរុបដល់ប្រមាណ ៣៥,៦៥ លានដុល្លារ។ តម្លៃដ៏ថ្លៃនេះ មួយភាគធំគឺមកពី La Voiture Noire ដែលវាជារថយន្តថ្មីតម្លៃថ្លៃដាច់គេមួយក្នុងលោក។

រថយន្ត La Voiture Noire មានតម្លៃប្រមាណ ១៨,៩ លានដុល្លារ ដែលមានតែមួយគ្រឿងគត់ក្នុងលោក។ វាមានបំពាក់ម៉ាស៊ីន Turbocharged ចំណុះ ៨,០ លីត្រ ១៦ ស៊ីឡាំង ដែលបង្កើតកម្លាំងបាន ១៤៧៩ សេះ។

រថយន្តថ្លៃលំដាប់ទីពីរគឺ Centodieci ដែលមានតម្លៃប្រមាណ ៨,៥ លានដុល្លារ ដែលមានផលិតត្រឹម ១០ គ្រឿងប៉ុណ្ណោះ។ បន្តមកទៀតគឺ Divo ដែលមានតម្លៃប្រមាណ ៥,៣ លានដុល្លារ មានផលិតត្រឹម ៤០ គ្រឿង៕

ផ្ទាំងផ្សាយពាណិជ្ជកម្ម

Nissan ចុះប៉ាតង់ឡូហ្គូថ្មី២ ឌីហ្សាញសាមញ្ញជាងមុន

March 20, 2020

និមិត្តសញ្ញាម៉ាកយីហោចំនួន២ របស់ក្រុមហ៊ុន Nissan ត្រូវបានបង្ហាញឲ្យឃើញនៅលើបណ្តាញអ៊ីនធឺណិត ដែលមួយជាឡូហ្គូថ្មីសម្រាប់ក្រុមហ៊ុនផលិតរថយន្តនេះ និងមួយទៀតសម្រាប់ប្រើរថយន្តស្ព័រត្រកូល Z។

ឡូហ្គូម៉ាកយីហោ Nissan ដែលអ្នកបានឃើញនេះ ត្រូវបានចុះបញ្ជីនៅចក្រភពអង់គ្លេស ឈីលី អាហ្សង់ទីន ប៉េរូ និងអ៊ុយរូហ្គាយ ដោយវាមានការឌីហ្សាញបែបសាមញ្ញជាងឡូហ្គូបច្ចុប្បន្ន។ វានៅតែប្រកាន់ខ្ជាប់នូវការឌីហ្សាញបែប 2D ជាមួយពណ៌អក្សរខ្មៅ។

គួរឲ្យដឹងថា ក្រុមហ៊ុនធំៗជាច្រើនបាននាំគ្នាងាកមកប្រើប្រាស់ការឌីហ្សាញបែប 2D វិញ ក្នុងរយៈពេលប៉ុន្មានឆ្នាំចុងក្រោយនេះ។ ជាក់ស្តែងដូចជាក្រុមហ៊ុន Google, BMW និង Volkswagen ជាដើម។

ទោះជាយ៉ាងណា គេមិនទាន់ដឹងច្បាស់នៅឡើយទេថា Nissan នឹងប្រើហ្គូឡូថ្មីនោះលើរថយន្តរបស់ខ្លួន ឬគ្រាន់តែសម្រាប់ប្រើក្នុងគោលបំណងផ្សេងទៀត៕

ផ្ទាំងផ្សាយពាណិជ្ជកម្ម

Suzuki Swift ឆ្នាំ២០២០ ថែមប្រភេទ Hybrid ស៊ីសាំងតិចខ្លាំង

March 20, 2020

ក្រុមហ៊ុន Suzuki បានបញ្ចេញរថយន្តខ្នាតតូចម៉ូដែល Swift Sport ប្រើម៉ាស៊ីន Hybrid សម្រាប់ទីផ្សារអឺរ៉ុប ដែលសន្យាថានឹងស៊ីសាំងតិចជាងមុន ហើយផ្តល់ការបើកបរកាន់តែអស្ចារ្យជាងមុនទៀតផង។

រថយន្ត Suzuki Swift Sport Hybrid នេះបំពាក់ម៉ាស៊ីន turbocharged ចំណុះ ១,៤លីត្រ ទំហំ ៤ស៊ីឡាំង ប្រភេទ Boosterjet ជាមួយនឹងអាគុយ Hybrid ៤៨វ៉ុល មានកម្លាំងសរុប ១២៧សេះ ប្រើប្រអប់លេខដៃ ៦វគ្គមកស្តង់ដារ។

Swift Sport Hybrid អាចជាន់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៩,១វិនាទី ហើយមានល្បឿនអតិបរមាដល់ទៅ ២១០គីឡូម៉ែត្រក្នុងមួយម៉ោង។ បើនិយាយពីកម្រិតស៊ីសាំងរបស់វាវិញ គឺត្រឹមតែ ៤,៦លីត្រប៉ុណ្ណោះ សម្រាប់ការបើកបរចម្ងាយ ១០០គីឡូម៉ែត្រ។

បន្ថែមពីនេះ រថយន្ត Suzuki ស៊េរីឆ្នាំ២០២០ ខាងលើ បានបំពាក់មុខងារសំខាន់ៗជាច្រើន ដូចជា ចង្កៀង LED, adaptive cruise control, ផែនទី, parking sensors, blind spot monitoring, rear cross traffic alert និង traffic sign recognition មកស្តង់ដារតែម្តង៕

ផ្ទាំងផ្សាយពាណិជ្ជកម្ម

ទីលានប្រណាំងឡានល្បីបំផុតមួយលើពិភពលោក សម្រេចចិត្តបិទទ្វារ

March 19, 2020

មិនខុសពីឧស្សាហកម្មជាច្រើនទេ ឧស្សាហកម្មយានយន្តកំពុងរងផលប៉ះពាល់យ៉ាងធ្ងន់ធ្ងរ ដោយសារជំងឺរាតត្បាតថ្មី គឺ វីរុសកូរ៉ូណា ឬជំងឺកូវីដ១៩។

ជាក់ស្តែង ពិព័រណ៍រថយន្ត 2020 Geneva Motor Show គឺជាព្រឹត្តិការណ៍រថយន្តធំដំបូងគេ ដែលត្រូវបានលុបចោល ដើម្បីកាត់បន្ថយការរីករាលដាលនៃវីរុសខាងលើ។ បន្ទាប់មកទៀត ពិព័រណ៍រថយន្ត 2020 New York Auto Show ក៏ត្រូវបានពន្យារពេលចាប់ពីខែមេសា ទៅខែសីហាវិញដែរ។

មិនតែប៉ុណ្ណោះ ក្រុមហ៊ុនផលិតរថយន្តជាច្រើន ដូចជា Porsche, Ferrari, Lamborghini, Maserati និង Volkswagen ជាដើម ក៏បានបិទទ្វាររោងចក្ររបស់ខ្លួនផងដែរ។ បន្ថែមពីនេះ ការប្រកួត 2020 Formula One ដែលគ្រោងនឹងចាប់ផ្តើមនៅប្រទេសអូស្ត្រាលី ត្រូវបានលុបចោលនៅមុនការប្រណាំងមកដល់ទៀតផង។

ឥឡូវនេះ ទីលានប្រណាំងរថយន្តដ៏ល្បីឈ្មោះមួយនៅលើពិភពលោក គឺ Nurburgring ក៏បានសម្រេចចិត្តបិទទ្វាររបស់ខ្លួនដែរ ដូច្នេះគ្រប់ព្រឹត្តិការណ៍ទាំងអស់ ដែលគ្រោងធ្វើឡើងនៅទីនោះ នឹងត្រូវលុបចោលតែម្តង៕

ផ្ទាំងផ្សាយពាណិជ្ជកម្ម

Porsche បិទទាំងទីស្នាក់ការកណ្តាល និងរោងចក្រ ដោយសារជំងឺកូវីដ១៩

March 19, 2020

ឥឡូវនេះ ជំងឺរាតត្បាតជាសកល គឺ កូវីដ១៩ ឬវីរុសកូរ៉ូណា កំពុងបង្កការរំខានយ៉ាងខ្លាំងដល់ឧស្សាហកម្មនៅទូទាំងពិភពលោក។ បន្ទាប់ពីពិព័រណ៍រថយន្ត 2020 Geneva Motor Show ត្រូវបានលុបចោលកាលពីប៉ុន្មានថ្ងៃមុន ពិព័រណ៍រថយន្ត 2020 New York Auto Show ក៏ត្រូវបានពន្យារពេលដែរ ខណៈក្រុមហ៊ុនផលិតជាច្រើនបានផ្អាកផលិតកម្ម ដើម្បីជួយកាត់បន្ថយការរីករាលដាលនៃជំងឺនេះ ដោយក្នុងនោះរួមមានទាំងក្រុមហ៊ុន Ferrari, Lamborghini, Maserati និង Volkswagen ។

ឥឡូវនេះ ក្រុមហ៊ុនរថយន្ត Porsche ក៏បានបង្ខំចិត្តផ្អាកផលិតកម្មរបស់ខ្លួនផងដែរ។ កត្តាបង្កការរំខានដល់សង្វាក់ផ្គត់ផ្គង់សកល និងការធ្លាក់ចុះតម្រូវការអតិថិជន Porsche បានធ្វើការសម្រេចចិត្តចុងក្រោយ ដោយបិទទីស្នាក់ការកណ្តាលរបស់ខ្លួន នៅទីក្រុង Zuffenhausen ប្រទេសអាល្លឺម៉ង់ និងរោងចក្រផលិតកម្មនៅ ទីក្រុង Leipzig ប្រទេសអាល្លឺម៉ង់ ចាប់ពីថ្ងៃសៅរ៍ទី ២១ ខែមីនា ដោយចាប់ផ្តើមរយៈពេល ២សប្តាហ៍សិន។

ទន្ទឹមនឹងនេះ Porsche ក៏ហាមឃាត់រាល់ការធ្វើដំណើរ (business travel), អនុញ្ញាតឲ្យអ្នកធ្វើការនៅការិយាល័យ អាចធ្វើការពីផ្ទះបាន ហើយរាល់ការប្រជុំទាំងអស់នឹងត្រូវធ្វើឡើងតាមរយៈវីដេអូ (video ឬ conference calls)៕

ផ្ទាំងផ្សាយពាណិជ្ជកម្ម

BMW បញ្ជាក់ជាផ្លូវការអំពីរថយន្ត 7-Series ប្រើថាមពលអគ្គិសនីសុទ្ធ

March 19, 2020

ត្បិតថា BMW នឹងមិនបន្ថែមប្រភេទ M7 សម្រាប់រថយន្ត 7-Series ជំនាន់បន្ទាប់ដើម្បីប្រកួតប្រជែងនឹង Mercedes-AMG S63 មែន ប៉ុន្តែក្រុមហ៊ុនមានអាវុធសម្ងាត់មួយទៀតដែលខ្លាំងក្លាដែរ នោះគឺ 7-Series ដែលប្រើថាមពលអគ្គិសនីសុទ្ធ។

វត្តមានរថយន្ត 7-Series ដែលប្រើថាមពលអគ្គិសនីសុទ្ធ ត្រូវបានបញ្ជាក់ជាផ្លូវការដោយប្រធានក្រុមប្រឹក្សាភិបាលរបស់ BMW ដែលនិយាយថា វានឹងជា 7-Series ដែលមានថាមពលខ្លាំងជាងគេបំផុត ហើយក៏នឹងមាននូវប្រភេទ Plug-in Hybrid មកជាមួយផងដែរ។ រថយន្តទាំងពីរប្រភេទ រួមជាមួយប្រភេទប្រើប្រេងសាំង និងម៉ាស៊ីន នឹងប្រើប្រាស់គ្រោងឆ្អឹងដូចគ្នា។

គួរដឹង BMW 7-Series ដែលមានកម្លាំងខ្លាំងជាងគេដែលមានលក់នាពេលនេះគឺ M760i ដែលប្រើម៉ាស៊ីន Twin-Turbo ចំណុះ ៦,៦ លីត្រ ១២ ស៊ីឡាំង មានកម្លាំង ៦០០ សេះ ភ្ជាប់នឹងប្រអប់លេខស្វ័យប្រវត្តិ ៨ វគ្គ និងប្រព័ន្ធបើកបរវិលកង់ទាំងបួន៕

ផ្ទាំងផ្សាយពាណិជ្ជកម្ម

Rolls-Royce ក៏ត្រូវបិទរោងចក្រផលិតរថយន្តដែរ

March 19, 2020

ឆ្នាំ ២០១៩ ជាឆ្នាំល្អបំផុតសម្រាប់ Rolls-Royce ដែលអាចលក់រថយន្តរហូតបានដល់ ៥ ១៥២ គ្រឿង ដោយសារការពេញនិយមខ្លាំងទៅលើម៉ូដែល Cullinan ដែលជារថយន្ត SUV ដំបូងបំផុតរបស់ក្រុមហ៊ុន។

ឆ្នាំ ២០២០ ក្រុមហ៊ុនចង់បន្តភាពជោគជ័យនេះ ជាមួយគម្រោងការបង្ហាញចេញរថយន្ត Rolls-Royce Ghost ជំនាន់ថ្មីដែលមានរូបរាងកាន់តែទាក់ទាញ។ ប៉ុន្តែប្រហែលជាត្រូវបង្អាក់ដំណើរដោយសារកូវីដ១៩។

នាថ្ងៃនេះ Rolls-Royce Motor Cars បានប្រកាសថានឹងបិទរោងចក្រផលិតរថយន្តដែលមានមូលដ្ឋាននៅតំបន់ Goodwood ក្នុងចក្រភពអង់គ្លេស ក្រោយពីក្រុមហ៊ុនផលិតរថយន្តជាច្រើនបានបិទរោងចក្រផលិតរបស់ខ្លួនព្រោះតែភ័យខ្លាចនឹងការផ្ទុះកូវីដ១៩។

Rolls-Royce ថារោងចក្ររបស់ខ្លួននឹងត្រូវបិទរយៈពេល ២ សប្ដាហ៍ ចាប់ពីថ្ងៃចន្ទទី ២៣ ខែមីនា ហើយវានឹងត្រូវបន្តបិទថែមពីរសប្ដាហ៍ទៀតសម្រាប់ការជួសជុលរោងចក្រ ដែលក្រុមហ៊ុនបានកំណត់តាំងពីយូរមកហើយ។ នេះមានន័យថា Rolls-Royce អាចនឹងចាប់ផ្ដើមផលិតរថយន្តជាថ្មី លឿនបំផុតគឺនៅខែឧសភា៕

ផ្ទាំងផ្សាយពាណិជ្ជកម្ម