ហាងលក់ Lexus លេងប្រើក្បាច់ផ្ញើសារទៅម្ចាស់រថយន្ត Tesla ឲ្យយករថយន្តមកប្ដូរ

March 13, 2020

ហាងលក់រថយន្ត Lexus មួយកន្លែងនៅ Texas ហាក់មានភាពហានក្លាខ្លាំង ដោយបានផ្ញើខិត្តប័ណ្ណទៅម្ចាស់រថយន្ត Tesla ឲ្យពួកគេយករថយន្តមកប្ដូរជាមួយរថយន្ត Lexus។

តាមការចុះផ្សាយរបស់ Electrek ហាងដែលមានឈ្មោះ Lexus of Lakeway បានព័ត៌មានអំពីម្ចាស់រថយន្ត Tesla ដែលមានក្នុងតំបន់ខ្លួន រួចផ្ញើខិត្តប័ណ្ណទៅពួកគេ ដែលខិត្តប័ណ្ណនោះមានផ្ដល់ការបញ្ចុះតម្លៃបន្ថែម ១ ពាន់ដុល្លារសម្រាប់ការទិញរថយន្ត Lexus។ លើខិត្តប័ណ្ណក៏មានបញ្ចូលភាពទាក់ទាញច្រើនចំណុចដូចជា មានប្រព័ន្ធ Network ហាងលក់ក្នុងតំបន់ មិនមានការពន្យារពេលលើគ្រឿងបន្លាស់ អស់បារម្ភអំពីការថាំចិត្តនឹងរយៈចម្ងាយបើកបរ និងការហ៊ានទិញយករថយន្ត Tesla ចូលក្នុងតម្លៃខ្ពស់ទៀតផង។

គួរដឹងថារថយន្តដែលសន្សំសំចៃបំផុតនិងមិនប៉ះពាល់ដល់បរិស្ថានដែល Lexus មានលក់នៅអាមេរិក គឺមានតែប្រភេទ Hybrid ជាមួយម៉ូដែល UX NX RX ES LS និង LC ដែលក្រៅពីនោះជាប្រភេទប្រើម៉ាស៊ីនប្រេងឥន្ធនៈសុទ្ធ៕

ផ្ទាំងផ្សាយពាណិជ្ជកម្ម

Lamborghini បិទរោងចក្រមានតែមួយគត់របស់ខ្លួន ក្រោយផ្ទុះ COVID-19 នៅអ៊ីតាលី

March 13, 2020

ក្រុមហ៊ុន Lamborghini បានប្រកាសក្នុងសេចក្ដីថ្លែងការណ៍មួយថារោងចក្រនៅតំបន់ Sant’Agata Bolognese នៃប្រទេសអ៊ីតាលី នឹងត្រូវបិទចាប់ពីថ្ងៃទី ១៣ ដល់ ២៥ ខែមីនា ជាការគាំទ្រដល់ការណែនាំរបស់រដ្ឋាភិបាលក្រោយពីមានការផ្ទុះ COVID-19 ធ្ងន់ធ្ងរនៅប្រទេសនេះ។

គួរដឹងថាម៉ាករថយន្ត Lamborghini ទាំងអស់គឺសុទ្ធតែផលិតផលនៅរោងចក្រខាងលើ ដែលមានន័យថាអំឡុងប្រមាណ ២ សប្ដាហ៍ទៀត ទើបមានការផលិតរថយន្ត Lamboghini ថ្មីៗ។

កាលពីថ្ងៃពុធ នាយករដ្ឋមន្ត្រីនៃប្រទេសអ៊ីតាលី លោក Giuseppe Conte បានបញ្ជាឲ្យបិទហាងទាំងអស់នៅអ៊ីតាលីរហូតដល់ថ្ងៃទី ២៥ ខែមីនា លើកលែងតែហាងលក់គ្រឿងទេស ឱសថស្ថាន និងហាងមួយចំនួនទៀត៕

ផ្ទាំងផ្សាយពាណិជ្ជកម្ម

VW ផ្ដល់ប្រាក់រង្វាន់ដល់ ៥៦០០ដុល្លារ ដល់បុគ្គលិក សម្រាប់ការងារឆ្នាំ ២០១៩

March 12, 2020

ត្បិតថាទីផ្សាររថយន្តហាក់ដាំក្បាលចុះក៏ពិតមែន ប៉ុន្តែក្រុមហ៊ុន Volkswagen អាចបិទបញ្ចប់ឆ្នាំ ២០១៩ ជាមួយលទ្ធផលវិជ្ជមាន។ ក្រុមហ៊ុននេះអាចបិទបញ្ចប់ឆ្នាំជាមួយកំណើនលក់រថយន្ត ២,៦% ធៀបនឹងឆ្នាំមុន។ ពេលនេះក្រុមហ៊ុនបានប្រកាសថាធ្វើការផ្ដល់ប្រាក់រង្វាន់លើកទឹកចិត្តដល់បុគ្គលិកសម្រាប់ការងារឆ្នាំ ២០១៩។

បុគ្គលិក Volkswagen នឹងទទួលបានប្រាក់រង្វាន់រហូតដល់ ៥៦០០ ដុល្លារ ដោយលោក Dr. Herbert ជានាយកប្រតិបត្តិក្រុមហ៊ុនបានលើកសរសើរបុគ្គលិកដែលខិតខំធ្វើការបានល្អ។ លោកនិយាយបែបនេះថា ៖ “បុគ្គលិកនៃ Volkswagen បានបង្ហាញអំពីកិច្ចខិតខំប្រឹងប្រែងខ្លាំងជាថ្មីម្ដងទៀតក្នុងឆ្នាំ ២០១៩។”

យ៉ាងណាក្ដីសម្រាប់ឆ្នាំ ២០២០ នេះ ក្រុមហ៊ុនបានត្រៀមខ្លួនរួចជាស្រេចសម្រាប់លទ្ធផលអវិជ្ជមានដែលអាចកើនឡើងដោយសារទីផ្សាររថយន្តរំពឹងថានឹងបន្តដាំក្បាលចុះ ទន្ទឹមនឹងការផ្ទុះនូវវីរុស COVID-19 ផងដែរ៕

ផ្ទាំងផ្សាយពាណិជ្ជកម្ម

BMW i8 នឹងត្រូវបញ្ឈប់ការផលិតនៅខែមេសានេះ

March 12, 2020

ពេលដែលបង្ហាញចេញរថយន្ត BMW i8 Ultimate Sophisto កាលពីដើមខែកញ្ញា ឆ្នាំ ២០១៩ ក្រុមហ៊ុន BMW បានប្រកាសអំពីផែនការបញ្ឈប់ការផលិតរថយន្តស្ព័រដែលសាកភ្លើងបានមួយនេះ។

កន្លងមក BMW មិនធ្លាប់បានបង្ហាញកាលបរិច្ឆេទច្បាស់លាស់នោះទេ ប៉ុន្តែបើតាមការចុះផ្សាយរបស់វិបសាយ Autocar កាលពីដើមឆ្នាំបានប្រាប់ថារថយន្ត i8 អាចនឹងបញ្ឈប់ការផលិតនៅខែមេសា។ ពេលនេះដែរ BMW ក៏បានធ្វើការប្រកាសជាផ្លូវការ ការផលិតរថយន្ត i8 នឹងបញ្ចប់នៅពាក់កណ្ដាលខែមេសា។

រថយន្ត i8 បានប្រកាសចេញកាលពី ៦ ឆ្នាំមុន ដោយនៅខែធ្នូឆ្នាំ ២០១៩ រថយន្តនេះមានចំនួនផលិតដល់ ២ ម៉ឺនគ្រឿង ដែលរថយន្តទី ២ ម៉ឺន គឺរំកិលចេញពីរោងចក្រដំឡើងនៅ Leipzig ប្រទេសអាល្លឺម៉ង់។ តួលេខនេះអាចឲ្យ BMW អះអាងថា i8 គឺជារថយន្តស្ព័រសាកភ្លើងបាន ដែលលក់ដាច់បានច្រើនជាងគេបំផុត៕

ផ្ទាំងផ្សាយពាណិជ្ជកម្ម

Tesla នឹងអាចផលិតឡាន ៥សែនគ្រឿងក្នុងមួយឆ្នាំ បើធ្វើរឿងនេះបាន!

March 12, 2020

ក្រុមហ៊ុន Tesla មានបំណងចង់បង្កើនការផលិតគ្រឿងគ្រូវរថយន្តមួយចំនួន នៅឯរោងចក្រតម្លៃ ២ពាន់លានដុល្លាររបស់ខ្លួន ក្នុងប្រទេសចិន។

យោងតាមប្រភពព័ត៌មាន Tesla មានគម្រោងចង់បន្ថែមខ្សែសង្វាក់ផលិតកម្មនៅរោងចក្រ ក្នុងទីក្រុងសៀងហៃ ដើម្បីបង្កើនការផលិត កញ្ចប់អាគុយអគ្គិសនី, ម៉ូទ័រអគ្គិសនី និងប្លុកបញ្ជាម៉ូទ័រ។

សូមបញ្ជាក់ថា គ្រឿងគ្រូវជាង ៧០% ដែលប្រើលើរថយន្ត Tesla ផលិតនៅចិន សុទ្ធតែជាគ្រឿងនាំចូលមកពីក្រៅទាំងអស់។ Tesla ធ្លាប់បាននិយាយថា ខ្លួនចង់ប្រើគ្រឿងគ្រូវដែលផលិតក្នុងប្រទេសចិនទាំងអស់ នៅចុងឆ្នាំ២០២០ នេះ។

យ៉ាងណាក៏ដោយ Tesla មានបំណងចង់ផលិតរថយន្ត Model 3 ឲ្យបាន ១៥០ ០០០គ្រឿង នៅរោងចក្រក្នុងទីក្រុងសៀងហៃ មុនពេលបង្កើនចំនួនដល់ ២៥០ ០០០គ្រឿង ក្នុងមួយឆ្នាំ ដោយក្នុងនោះរួមមានទាំង Model Y ផងដែរ។ ប្រសិនបើធ្វើបានមែន នោះ Tesla នឹងអាចដឹកចេញរថយន្តអគ្គិសនីទៅកាន់ទីផ្សារទូទាំងពិភពលោកចំនួន ៥០០ ០០០គ្រឿងក្នុងមួយឆ្នាំ នៅចុងឆ្នាំ២០២០ ខាងមុខតែម្តង៕

ផ្ទាំងផ្សាយពាណិជ្ជកម្ម

Toyota ចេញឡានស្ព័រ GT86 ម៉ូដែល Black Limited ខ្មៅក្រិបទាក់ភ្នែកខ្លាំង

March 12, 2020

ក្រុមហ៊ុន Toyota បានបញ្ចេញរថយន្តស្ព័រ GT86 ម៉ូដែល Black Limited ថ្មី សម្រាប់ទីផ្សារប្រទេសជប៉ុន ដោយមានតួខ្លួនពណ៌ខ្មៅក្រិបតែម្តង។

រថយន្ត Toyota GT86 Black Limited នេះ មានតួខ្លួនពណ៌ខ្មៅហៅថា Crystal Black Silica រំលេចដោយយ៉ាន់អាលុយមីញ៉ូមពណ៌ទង់ទំហំ ១៧អ៊ីង, ហ្វ្រាំងឌីស Brembo ទំហំ ១៧អ៊ីង ក៏ដូចជាបូម Sachs ផងដែរ។

ជាមួយគ្នានេះ កាប៊ីនផ្នែកខាងក្នុងត្រូវបានរចនាមកពណ៌ខ្មៅសុទ្ធ រំលេចដោយពណ៌ទង់ដែងដូចគ្នាដែរ ហើយមានបំពាក់ឡូហ្គូ Black Limited លើតាប្លូផ្នែកអ្នកដំណើរ។

GT86 Black Limited នេះ បំពាក់ម៉ាស៊ីនចំណុះ ២,០លីត្រ naturally aspirated ទំហំ ៤ស៊ីឡាំង មានកម្លាំង ២០៤សេះ ប្រើប្រអប់លេខដៃ ៦វគ្គ ខណៈជម្រើសប្រអប់លេខអូតូ ៦វគ្គ មានកម្លាំងត្រឹម ១៩៧សេះប៉ុណ្ណោះ។

រថយន្តនេះនឹងត្រូវផលិតត្រឹមតែ ៨៦គ្រឿងប៉ុណ្ណោះ ជាមួយតម្លៃចាប់ពី ៣០ ៨៧០ដុល្លារសម្រាប់លេខដៃ និង ៣១ ៤៦០ដុល្លារសម្រាប់លេខអូតូ៕

ផ្ទាំងផ្សាយពាណិជ្ជកម្ម

ឡានបើកដំបូលថ្មីរបស់ Volkswagen ចេញតម្លៃលក់ផ្លូវការហើយ!

March 11, 2020

Volkswagen បានទាក់ទាញចំណាប់អារម្មណ៍អតិថិជនរបស់ខ្លួន ជាមួយនឹងរថយន្តបើកដំបូលថ្មី ម៉ូដែល T-Roc Cabriolet ដែលនឹងចេញលក់ជាផ្លូវការ នៅក្នុងប្រទេសអាល្លឺម៉ង់ និងទីផ្សារអឺរ៉ុបផ្សេងទៀត ចាប់ពីថ្ងៃទី២០ ខែមីនា នេះ។

រថយន្ត Volkswagen T-Roc Cabriolet អាចបើកដំបូលបានដោយប្រើពេល ៩វិនាទី ខណៈកំពុងបើកបរដល់ល្បឿន ៣០គីឡូម៉ែត្រក្នុងមួយម៉ោង។

T-Roc Cabriolet ចែកចេញជា ២ម៉ូដែល គឺ T-Roc Cabriolet Style និង T-Roc Cabriolet R-Line។ ម៉ូដែល Style បំពាក់ម៉ាស៊ីនចំណុះ ១,០លីត្រ TSI turbocharged ទំហំ ៣ស៊ីឡាំង មានកម្លាំង ១១៣សេះ ប្រើប្រអប់លេខដៃ ៦វគ្គ។ ដោយឡែក ម៉ូដែល R-Line វិញ បំពាក់ម៉ាស៊ីនចំណុះ ១,៥លីត្រ TSI turbocharged ទំហំ ៤ស៊ីឡាំង មានកម្លាំង ១៤៨សេះ ហើយមានជម្រើសទាំងលេខដៃ ៦វគ្គ និងលេខអូតូ ៧វគ្គ ប្រភេទ dual-clutch។

យ៉ាងណាក៏ដោយ រថយន្តបើកដំបូលនេះមិនមាន Option ប៉ុងពីរ 4Motion AWD ដ៏ល្បីល្បាញប្រចាំត្រកូល Volkswagen ឡើយ។ ចំពោះតម្លៃវិញគឺចាប់ពី ៣១ ០៧០ដុល្លារសម្រាប់ម៉ូដែល Style និង ៣៧ ០៧០ដុល្លារសម្រាប់ម៉ូដែល R-Line៕

ផ្ទាំងផ្សាយពាណិជ្ជកម្ម

Chevrolet Corvette ថ្មី ជាន់ពីកុងទ័រ ០-១០០ ប្រើពេលតែ ២,៨វិនាទី (មានវីដេអូ)

March 11, 2020

កាលពីពេលថ្មីៗនេះ ក្រុមការងារមកពីគេហទំព័ររថយន្ត Motor Trend បានយករថយន្ត Chevrolet Corvette Stingray ស៊េរីឆ្នាំ២០២០ (ផលិតផលសម្រេច) ធ្វើតេស្តសមត្ថភាពជាច្រើន ដោយទទួលបានលទ្ធផលគួរឲ្យភ្ញាក់ផ្អើល។

រថយន្តស្ព័រអាមេរិកថ្មីនេះ បំពាក់ម៉ាស៊ីនចំណុះ ៦,២លីត្រ naturally-aspirated ទំហំ ៨ស៊ីឡាំង មានកម្លាំង ៤៩៥សេះ។ វាមានសមត្ថភាពអាចជាន់ពីកុងទ័រ ០-១០០ គីឡូម៉ែត្រក្នុងមួយម៉ោង ប្រើពេលត្រឹមតែ ២,៨វិនាទីប៉ុណ្ណោះ។

បើនិយាយពីសមត្ថភាពប្រព័ន្ធហ្វ្រាំងរបស់វាវិញ Chevrolet Corvette Stingray ថ្មី អាចជាន់ពីកុងទ័រ ១០០-០គីឡូម៉ែត្រក្នុងមួយម៉ោង ប្រើចម្ងាយត្រឹមតែ ៣០ម៉ែត្រប៉ុណ្ណោះ៕

ចង់ដឹងយ៉ាងណា សូមទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

កម្មវិធីបង្ហាញរថយន្តនៅញ៉ូវយក ត្រូវរងគ្រោះព្រោះ COVID-19

March 11, 2020

កម្មវិធីតាំងបង្ហាញរថយន្ត New York Auto Show ដែលគ្រោងធ្វើឡើងនាខែមេសាខាងមុខនេះ ត្រូវពន្យារពេលជាផ្លូវការ ទោះបីជាកន្លងមកមានការអះអាងថាកម្មវិធីនេះនឹងប្រព្រឹត្តិទៅតាមការគ្រោងទុកថ្វី។

ក្នុងអ៊ីមែលផ្ញើទៅកាន់សមាគមអ្នកចែកចាយរថយន្តនៅញូវយ៉ក មាននិយាយថា ស្ថានភាពនៃការរាតត្បាតវីរុសកូរ៉ូណាដែលកំពុងកើតមាន បានបណ្ដាលឲ្យមានការផ្លាស់ប្ដូរនៃផែនការ។

ជាលទ្ធផលកម្មវិធីនេះត្រូវលើកពីខែមេសា ទៅកាន់តែសីហាវិញ។ ខណៈពេលនេះកាលបរិច្ឆេទដែលកំណត់សម្រាប់កម្មវិធីសារព័ត៌មានគឺនៅថ្ងៃទី ២៦ និង ២៧ ខែសីហា ខណៈការបង្ហាញដល់សាធារណជនគឺចាប់ពីថ្ងៃទី ២៨ ខែសីហា ដល់ថ្ងៃទី ៦ ខែកញ្ញា៕

ផ្ទាំងផ្សាយពាណិជ្ជកម្ម

Tesla សាទរការផលិតរថយន្តអគ្គិសនីបាន ១ លានគ្រឿង

March 11, 2020

Tesla ធ្លាប់ជួបប្រទះបញ្ហាទាក់ទងនឹងការផលិតដែលជាប់គាំងសម្រាប់រថយន្ត Model 3 ហើយពេលនោះក្រុមហ៊ុនត្រូវខាតបង់យ៉ាងធ្ងន់ធ្ងរ។

ប៉ុន្តែនៅឆ្នាំ ២០២០ នេះ Tesla មានរឿងត្រូវអបអរជាច្រើន។ ឆ្នាំនេះ Tesla Model 3 កំពុងឈានជើងក្លាយជារថយន្តអគ្គិសនីលក់ដាច់បានច្រើនជាងគេក្នុងលោក ដែលអាចយកឈ្នះរថយន្ត Nissan Leaf។ Tesla ក៏បានក្លាយជាក្រុមហ៊ុនផលិតរថយន្តអាមេរិក មានតម្លៃជាងគេក្នុងលោកផងដែរ។ ហើយពេលនេះក្រុមហ៊ុនកំពុងសាទរចំពោះការផលិតរថយន្តដល់កម្រិតកំពូលមួយ គឺ Tesla បានផលិតរថយន្តទី ១ លានគ្រឿងរបស់ខ្លួនហើយ។

តាមរយៈគណនី Twitter ផ្លូវការរបស់លោក Elon Musk បានបង្ហោះរូបភាពថតនៅរោងចក្រ Fremont របស់ Tesla ដែលវាបង្ហាញនូវរថយន្តទី ១ លាន ដែលជារថយន្ត Tesla Model Y ពណ៌ក្រហម។

ក្រុមហ៊ុនផលិតរថយន្តធំៗដូចជា Ford Toyota និង Volkswagen អាចផលិតរថយន្តបានរាប់លានគ្រឿងជារៀងរាល់ឆ្នាំ។ ប៉ុន្តែសម្រាប់ Tesla គឺជាសមិទ្ធផលអស្ចារ្យមួយ ដោយសារជាក្រុមហ៊ុន Start-up មួយ ហើយមានផលិតតែរថយន្តអគ្គិសនីប៉ុណ្ណោះ៕

ផ្ទាំងផ្សាយពាណិជ្ជកម្ម