Audi RS6 Avant ឆ្នាំ២០២១ ចេញតម្លៃលក់ហើយ តែជាង១០ម៉ឺនដុល្លារប៉ុណ្ណោះ!

March 10, 2020

ក្រុមហ៊ុន Audi បានប្រកាសតម្លៃលក់ជាផ្លូវការនៃរថយន្តម៉ូដែល RS6 Avant ស៊េរីឆ្នាំ២០២១ នៅលើទីផ្សារសហរដ្ឋអាមេរិក ដោយចាប់ពី ១០៩ ៩៩៥ដុល្លារ។

រថយន្តគូទហើម Audi RS6 Avant នេះបំពាក់ម៉ាស៊ីនចំណុះ ៤,០លីត្រ twin-turbo ទំហំ ៨ស៊ីឡាំង មានកម្លាំង ៥៩២សេះ ប្រើប្រអប់លេខអូតូ ៨វគ្គ និងប្រព័ន្ធប៉ុងពីរ AWD អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ៣,៥វិនាទីប៉ុណ្ណោះ។

មិនតែប៉ុណ្ណោះ RS6 Avant មានល្បឿនអតិបរមាដល់ ២៥០គីឡូម៉ែត្រក្នុងមួយម៉ោង ចំពោះម៉ូដែលប្រើហ្វ្រាំងធម្មតា និង ៣០៥គីឡូម៉ែត្រក្នុងមួយម៉ោង ចំពោះម៉ូដែលប្រើ Option ហ្វ្រាំងប្រភេទសេរ៉ាមិច។ ក្រៅពីនោះ វាក៏បំពាក់ប្រព័ន្ធចង្កូត all-wheel steering និង ប្រព័ន្ធបូម RS adaptive air suspension ទៀតផង។

ដោយឡែកផ្នែកខាងក្នុងវិញ វាបំពាក់កៅអីស្បែកបែបស្ព័រ, ប្រព័ន្ធបង្ហាញព័ត៌មាន MMI ផ្នែកខាងលើ ទំហំ ១០,១អ៊ីង, អេក្រង់បង្ហាញព័ត៌មានផ្នែកខាងក្រោម ទំហំ ៨,៦អ៊ីង និង កុងទ័រឌីជីថលទំហំ ១២,៣អ៊ីង៕

ផ្ទាំងផ្សាយពាណិជ្ជកម្ម

Cadillac ពន្យាពេលបង្ហាញឡានអត់ប្រើសាំង ព្រោះតែវីរុសកូរ៉ូណា

March 10, 2020

កាលពីសប្តាហ៍មុន ក្រុមហ៊ុន Cadillac បានប្រកាសពីគម្រោងបង្ហាញរថយន្តអគ្គិសនីថ្មី ម៉ូដែល Lyriq នៅថ្ងៃទី០២ ខែមេសា ខាងមុខនេះ។

ដោយឡែក នៅថ្ងៃនេះក្រុមហ៊ុនរថយន្តអាមេរិកខាងលើបានលុបចោលការបង្ហាញនោះ ជុំវិញការព្រួយបារម្ភអំពីវីរុសកូរ៉ូណា។ ប្រធានផ្នែកទំនាក់ទំនងក្រុមហ៊ុន GM លោក Michael Albano បាននិយាយថា “អាទិភាពរបស់យើងគឺសុវត្ថិភាពរបស់ក្រុមអ្នកសារព័ត៌មាន និងបុគ្គលិក ដូច្នេះកម្មវិធីត្រូវបានលុបចោល”។

លោក Michael បានបន្ថែមឲ្យដឹងទៀតថា ក្រុមហ៊ុនកំពុងវាយតម្លៃគម្រោងនាថ្ងៃអនាគត ហើយនឹងប្រកាសនាពេលឆាប់ៗខាងមុខនេះ។

យ៉ាងណាមិញ Cadillac មិនបាននិយាយអ្វីច្រើនអំពីរថយន្តអគ្គិសនីថ្មីម៉ូដែល Lyriq នេះឡើយ ប៉ុន្តែគំរូរថយន្តនេះត្រូវបានដាក់បង្ហាញ កាលពីសប្តាហ៍មុន ហើយរបាយការណ៍បានអះអាងថា ៨៥% នៃគំរូរថយន្តនោះ នឹងក្លាយជារថយន្តពិតប្រាកដ។

GM ក៏ធ្លាប់បានឲ្យដឹងដែរថា រថយន្ត Lyriq នេះបំពាក់អាគុយដែលអាចឲ្យវាបើកបរបានចម្ងាយ ៤០០ម៉ាយ៍ (៦៥០គីឡូម៉ែត្រ) ឬច្រើនជាងនេះ៕

ផ្ទាំងផ្សាយពាណិជ្ជកម្ម

Bentley ប្រាប់មូលហេតុពិឃាដម៉ូដែល Mulsanne

March 10, 2020

រថយន្ត Bentley Mulsanne នឹងត្រូវបញ្ឈប់ការផលិតនៅត្រីមាសទី ២ ឆ្នាំ ២០២០ នេះ ហើយពេលនេះក្រុមហ៊ុន Bentley បានប្រាប់ពីមូលហេតុដែលសម្រេចចិត្តពិឃាដគូប្រជែងរបស់ Rolls-Royce Phantom មួយនេះ។

ក្នុងកិច្ចសម្ភាសន៍ជាមួយ Top Gear លោក Adrian Hallmark នាយកប្រតិបត្តិ Bentley បាននិយាយថា ភ័ព្វវាសនា Mulsanne បានបញ្ចប់ដោយសារចំនួនលក់មានកំណើនយឺតយ៉ាវ។ លោកបានពន្យល់ថា ៖ “ផ្នែករថយន្ត Sedan ខ្នាតធំបានក្លាយជាមូលដ្ឋានមួយសម្រាប់ Bentley ក្នុងរយៈពេលជាង ១០០ ឆ្នាំមកហើយ ប៉ុន្តែចំនួនលក់ហាក់ដើរថតក្រោយ ទោះបីជាយើងលក់បានច្រើនជាងម៉ូដែល Phantom ក្ដី។”

Hallmark និយាយថាក្រុមហ៊ុនអាចលក់រថយន្ត Mulsanne បានខ្ទង់ ៥០០គ្រឿងប៉ុណ្ណោះកាលពីឆ្នាំមុន។ ចំនួនលក់តិចតួចនេះក៏មានន័យថាអ្នកស្នងតំណែង Mulsanne នឹងមិនបង្ហាញមុខរួចនោះទេ។ ដូចការបញ្ជាក់របស់ Hallmark គឺ Bentley មិនអាចរកប្រាក់ចំណេញបានសម្រាប់ការបញ្ចេញរថយន្តម៉ូដែលថ្មីនោះទេ ក្រោយទូទាត់ការចំណាយរួច៕

ផ្ទាំងផ្សាយពាណិជ្ជកម្ម

Honda សម្រេចឈប់លក់ឡាន Clarity ប្រភេទអគ្គិសនីនៅអាមេរិក

March 10, 2020

Honda បានសម្រេចចិត្តឈប់លក់រថយន្ត Clarity ប្រភេទអគ្គិសនីនៅទីផ្សារសហរដ្ឋអាមេរិក ប៉ុន្តែនៅបន្តលក់ប្រភេទប្រើឧស្ម័នអ៊ីដ្រូហ្សែន និងប្រភេទ Plug-in Hybrid ជាបន្ត។

Honda Clarity ប្រភេទអគ្គិសនីជាប្រភេទមិនសមទំនងមួយ ចាប់តាំងពីពេលប្រកាសចេញលក់នៅអាមេរិកកាលពីប៉ុន្មានឆ្នាំមុនមកម្ល៉េះ។ រថយន្តនេះមានរយៈចម្ងាយបើកបរត្រឹម ១៤៣ គីឡូម៉ែត្រ ដោយសារមានបំពាក់អាគុយតូចត្រឹម ២៥,៥ គីឡូវ៉ាត់ម៉ោង។ វាពិបាកប្រកួតប្រជែងលើទីផ្សារដែលមានរថយន្តអគ្គិសនីមានចម្ងាយបើកបរដល់ ៦៤៣ គីឡូម៉ែត្រ ដូចជារថយន្តរបស់ Tesla និង Lucid ជាដើម។

បន្ថែមពីនេះការលក់រថយន្ត Clarity ប្រភេទអគ្គិសនីក៏មានកំណត់ មិនទូលំទូលាយនោះទេ។ ជាមួយការសម្រេចចិត្តឈប់លក់រថយន្ត Clarity ប្រភេទអគ្គិសនីនេះ មានន័យថា Honda មិនមានរថយន្តអគ្គិសនីលក់នៅអាមេរិកនោះទេ៕

ផ្ទាំងផ្សាយពាណិជ្ជកម្ម

Chevrolet បិទរោងចក្រនៅថៃ បុគ្គលិកជិត ២ពាន់នាក់បាត់ការងារ

March 9, 2020

រថយន្ត Chevrolet ជាង ៣០០ ០០០គ្រឿងនៅក្នុងប្រទេសថៃ កំពុងប្រឈមនឹងការបាត់បង់ សេវាកម្មថែទាំ បន្ទាប់ពីក្រុមហ៊ុនផលិតរថយន្តអាមេរិក General Motors (GM) បានប្រកាសឈប់លក់រថយន្ត Chevrolet នៅក្នុងប្រទេសថៃ ក្នុងឆ្នាំ២០២០ នេះ។

ជាមួយគ្នានេះ ការងារប្រមាណជា ១ ៩០០ នឹងត្រូវរងផលប៉ះពាល់ដោយសារតែការសម្រេចចិត្តរបស់ GM ដោយក្នុងនោះរួមមាន ១ ២០០ ការងារ នៅរោងចក្រ Rayong។

គួរឲ្យដឹងថា GM កំពុងលក់រោងចក្ររបស់ខ្លួននៅក្នុងខេត្ត Rayong ទៅឲ្យក្រុមហ៊ុនផលិតរថយន្តចិន Great Wall Motors។ ពួកគេចង់សម្រេចកិច្ចព្រមព្រៀង ហើយប្រគល់រងចក្រនៅក្នុងឆ្នាំ២០២០ នេះតែម្តង៕

ផ្ទាំងផ្សាយពាណិជ្ជកម្ម

Toyota និង Lexus ហៅឡាន ១,២លានគ្រឿងចូលវិញ ព្រោះមានបញ្ហាមួយ អាចធ្វើឲ្យរលត់ម៉ាស៊ីនពេលបើក

March 9, 2020

ក្រុមហ៊ុន Toyota បានប្រកាសហៅរថយន្តបន្ថែមចំនួន ១,២លានគ្រឿងនៅសហរដ្ឋអាមេរិក ចូលពិនិត្យវិញ លើបញ្ហាបូមសាំង។ ការហៅចូលវិញនេះបានធ្វើឲ្យចំនួនសរុបកើនឡើង ១,៨លានគ្រឿងនៅសហរដ្ឋអាមេរិក និង ៣,២លានគ្រឿងនៅទូទាំងពិភពលោក។

ការហៅចូលដំបូងបានធ្វើឡើងនៅក្នុងខែមករា ជាមួយនឹងរថយន្តប្រមាណ ៦៩៦ ០០០គ្រឿងនៅសហរដ្ឋអាមេរិក ពី Toyota និង Lexus។

ក្រុមហ៊ុនផលិតរថយន្តជប៉ុនខាងលើបានឲ្យដឹងថា រថយន្ត Toyota និង Lexus ជាច្រើនម៉ូដែល មានបញ្ហាបូមសាំង ដែលអាចធ្វើឲ្យរលត់ម៉ាស៊ីនពេលបើក និងមិនអាចបញ្ឆេះវិញទៀតផង។ ប្រសិនបើរថយន្តកំពុងស្ថិតនៅល្បឿនលឿន វាអាចនឹងបង្កជាគ្រោះថ្នាក់ខ្លាំង។

រថយន្តដែលត្រូវបានហៅចូលកាលពីខែមករា មានដូចជា រថយន្ត Lexus ម៉ូដែល LS 500, LC 500, RC 350, RC 300, GS 350, IS 300, ES 350, LX 570, GX 460, RX 350, Lexus NX 300, RX 350L និង GS 300 ស៊េរីឆ្នាំ២០១៩។ ចំណែកឯ Toyota វិញមានដូចជា 4Runner, Camry, Highlander, Land Cruiser, Sequoia, Sienna, Tacoma, Tundra Avalon និង Corolla ចាប់ពី ស៊េរីឆ្នាំ២០១៨-២០១៩។

ដោយឡែកការហៅចូលថ្មីចុងក្រោយនេះវិញ មានដូចជា រថយន្ត Lexus ម៉ូដែល IS 350, LC 500h, LS 500h ស៊េរីឆ្នាំ២០១៨-២០១៩ ក៏ដូចជា ម៉ូដែលLS 460 ស៊េរីឆ្នាំ ២០១៣-២០១៥, ម៉ូដែល GS 350 ស៊េរីឆ្នាំ២០១៣-២០១៤ និង ម៉ូដែល IS-F ស៊េរីឆ្នាំ២០១៤, NX 200t និង RC 350 ស៊េរីឆ្នាំ២០១៥ , IS 200t និង RC 200t ស៊េរីឆ្នាំ២០១៧។ រីឯ Toyota មានដូចជា Land Cruiser, and Toyota 4Runner ស៊េរីឆ្នាំ២០១៤-២០១៥ និង Sienna ស៊េរីឆ្នាំ២០១៧-២០១៩៕

ផ្ទាំងផ្សាយពាណិជ្ជកម្ម

រថយន្តប្រណីតបើកដំបូលរបស់រុស្ស៊ី មានអ្នកកុម្ម៉ង់ទិញ ៧០០ គ្រឿង

March 9, 2020

ក្រុមហ៊ុនផលិតរថយន្តរបស់រុស្ស៊ីឈ្មោះ Aurus បានបង្ហាញឲ្យដឹងថាខ្លួនទទួលបានការកុម្ម៉ង់ទិញ ៧០០ គ្រឿងសម្រាប់រថយន្តម៉ូដែល Senat Convertible របស់ខ្លួន ដែលបង្ហាញចេញកាលពីឆ្នាំមុន។

រថយន្ត Senat Convertible គឺផលិតឡើងផ្អែកតាមរថយន្ត Senat Sedan ប៉ុន្តែមានបំពាក់ទ្វារចំនួនពីរប៉ុណ្ណោះ ហើយមានរូបរាងខាងក្រៅខុសគ្នាបន្តិចបន្តួច ប៉ុន្តែខាងក្នុងគឺដូចគ្នាបេះដាក់តែម្ដង។

រថយន្តនេះដំណើរការដោយម៉ាស៊ីន Hybrid ដែលមានម៉ូទ័រអគ្គិសនី ភ្ជាប់នឹងម៉ាស៊ីនសាំងចំណុះ ៤,៤ លីត្រ ៨ ស៊ីឡាំង ដែលម៉ាស៊ីនសាំងបង្កើតកម្លាំងបាន ៥៩០ សេះ និងមានភ្ជាប់ជាមួយប្រអប់លេខស្វ័យប្រវត្តិ ៩ វគ្គ ជាមួយប្រព័ន្ធបើកបរវិលកង់ទាំងបួន។

បច្ចុប្បន្ននេះ Aurus កំពុងអភិវឌ្ឍន៍រថយន្តម៉ូដែលថ្មី ដែលនឹងមានទ្រង់ទ្រាយជារថយន្ត SUV ប្រណីតមានឈ្មោះថា Komendant។ មានការអះអាងថារថយន្តនេះនឹងប្រើប្រព័ន្ធម៉ាស៊ីនដូច Senat ដូច ហើយនឹងចេញលក់នៅឆ្នាំ ២០២២៕

ផ្ទាំងផ្សាយពាណិជ្ជកម្ម

Mazda ដាក់លក់ឡានអគ្គិសនីដំបូងរបស់ខ្លួន តម្លៃជិត ៤ម៉ឺនដុល្លារនៅអង់គ្លេស

March 9, 2020

Mazda នឹងបញ្ចេញលក់រថយន្ត MX-30 ប្រភេទ First Edition របស់ខ្លួននៅអង់គ្លេស នាដើមឆ្នាំ ២០២១ ខាងមុខ ជាមួយតម្លៃចាប់ពី ៣៩ ៣៤០ ដុល្លារ។ ក្រុមហ៊ុន Mazda បញ្ជាក់ថារថយន្ត MX-30 First Edition នេះនឹងលក់ត្រឹម ៥០០ គ្រឿងប៉ុណ្ណោះនៅចក្រភពអង់គ្លេស។

MX-30 មានបំពាក់នូវម៉ូទ័រអគ្គិសនីនៅខាងមុខ ដែលផលិតកម្លាំងបាន ១៤២ សេះ ហើយវាទទួលបានថាមពលពីអាគុយទំហំ ៣៥,៥ គីឡូវ៉ាត់ម៉ោង ដែលក្រុមហ៊ុននិយាយថាអាចទ្រាំទ្រការជិះចម្ងាយប្រមាណ ២០០ គីឡូម៉ែត្រ។ ជាមួយប្រព័ន្ធសាកថ្មល្បឿនលឿន អ្នកប្រើប្រាស់អាចសាកអាគុយរថយន្តដល់ ៨០% ក្នុងពេលត្រឹម ៣០ នាទី។

រថយន្ត MX-30 គឺប្រើប្រាស់គ្រោងឆ្អឹង e-SkyActiv ដែលមានមកជាមួយនូវមុខងារសុវត្ថិភាពជាច្រើន។ ឧទាហរណ៍ដូចជា Smart Brake Support ជាមួយនឹង Turn-Across Traffic Detection ដែលប្រើប្រាស់រ៉ាដា និងកាមេរ៉ាខាងមុខ៕

ផ្ទាំងផ្សាយពាណិជ្ជកម្ម

មេ Tesla ថា ឡានប្រើសាំង និងម៉ាស៊ូតមួយទឹក នឹងធ្លាក់ថ្លៃ ព្រោះហេតុផលមួយ

March 7, 2020

មេ Tesla លោក Elon Musk បានប្រាប់ឲ្យដឹងថា តម្លៃនៃរថយន្តប្រើសាំង និងម៉ាស៊ូតមួយទឹក នឹងធ្លាក់ចុះខ្លាំង នៅក្នុងរយៈពេលប៉ុន្មានឆ្នាំខាងមុខនេះ ដោយសារតែការកើនឡើងនៃរថយន្តអគ្គិសនី។

ការអះអាងរបស់ Musk បានធ្វើឡើងបន្ទាប់ពីមានអ្នកប្រើបណ្តាញសង្គម Twitter ឈ្មោះ SamTalksTesla និយាយថា “ចក្រភពអង់គ្លេស នឹងហាមឃាត់រថយន្តដំណើរការដោយម៉ាស៊ីនចំហេះក្នុង (ប្រើប្រេងឥន្ធនៈ) ចាប់ពីឆ្នាំ២០៣៥។ ប្រទេសដទៃជាច្រើនទៀតនឹងធ្វើតាម។ Tesla បានបញ្ជាក់ឲ្យឃើញ ១០០% ថា រថយន្តអគ្គិសនីពិតជាមានសមត្ថភាព និងទទួលបានជោគជ័យ”។

ជាការពិតណាស់ រថយន្តប្រើម៉ាស៊ូត និងសាំង នឹងធ្លាក់ចុះថ្លៃ ស្របពេលដែលរថយន្តអគ្គិសនីកើនឡើងរឹតតែច្រើន ហើយលក់ដាច់ជាងរថយន្តដំណើរការដោយម៉ាស៊ីនចំហេះក្នុងទាំងនោះ៕

ផ្ទាំងផ្សាយពាណិជ្ជកម្ម

Toyota នឹងសាងសង់រោងចក្រផលិតឡានអគ្គិសនីនៅចិន

March 7, 2020

Toyota មានបំណងផលិតរោងចក្រសម្រាប់ផលិតរថយន្តអគ្គិសនីថ្មី នៅក្នុងទីក្រុង Tianjin ប្រទេសចិន ជាមួយដៃគូសហការណ៍ក្នុងស្រុក គឺក្រុមហ៊ុន FAW Group។

ក្រុមហ៊ុន Toyota និង FAW Group នឹងបោះលុយវិនិយោគទុនសរុបចំនួន ១,២២ពាន់លានដុល្លារ សម្រាប់រោងចក្រផលិតរថយន្តអគ្គិសនីខាងលើ។

គួរឲ្យដឹងថា រោងចក្រនោះនឹងមានសមត្ថភាពអាចផលិតរថយន្តចំនួន ២០០ ០០០គ្រឿងជារៀងរាល់ឆ្នាំ ដោយក្នុងនោះរួមមានរថយន្តប្រភេទ ប្រើអគ្គិសនីសុទ្ធ, រថយន្តប្រភេទ Plug-in Hybrid និង រថយន្តប្រើអ៊ីដ្រូហ្សែន ផងដែរ។

ទោះជាយ៉ាងណាគេមិនទាន់ដឹងនៅឡើយទេ រថយន្តម៉ូដែលអ្វីខ្លះដែល Toyota នឹងផលិតនៅទីនោះ៕

ផ្ទាំងផ្សាយពាណិជ្ជកម្ម