ឡានមួយម៉ូដែលនេះ Chevrolet នឹងឈប់ផលិតទៀតហើយ ចាប់ពីថ្ងៃនេះទៅ

February 28, 2020

រថយន្ត Chevrolet Impala មួយគ្រឿងចុងក្រោយបង្អស់ បានបើកចេញពីខ្សែសង្វាក់ផលិតកម្ម នៅឯរោងចក្រ Detroit-Hamtramck ក្នុងរដ្ឋ Michigan សហរដ្ឋអាមេរិក។

Impala ស្ថិតក្នុងចំណោមរថយន្ត ៦ម៉ូដែលផ្សេងទៀត ដែល Chevrolet សម្រេចចិត្តឈប់ផលិត ដើម្បីកាត់បន្ថយការចំណាយ ដោយក្នុងនោះរួមមាន Buick LaCrosse, Chevrolet Cruze, Chevrolet Volt, Cadillac CT6 និង Cadillac XTS។

មិនខុសពីរថយន្តដទៃទៀតដែលគេឈប់ផលិតឡើយ ចំនួនលក់នៃរថយន្ត Impala គឺមិនសូវច្រើននោះទេ។ កាលពីឆ្នាំមុន ក្រុមហ៊ុន Chevrolet លក់វាបានតែ ៤៥ ០០០គ្រឿងប៉ុណ្ណោះ។

បច្ចុប្បន្នក្រុមហ៊ុនខាងលើកំពុងផ្តោតលើការផ្លាស់ប្តូររោងចក្រ Detroit-Hamtramck ទៅជារោងចក្រផលិតរថយន្តអគ្គិសនី ដោយវិនិយោគលុយចំនួន ២,២ពាន់លានដុល្លារ សម្រាប់ផលិតរថយន្ត GMC Hummer EV វិញ៕

ផ្ទាំងផ្សាយពាណិជ្ជកម្ម

មកមើលឡាន Porsche 911 កែឡើងកម្លាំង ១០០០សេះ ជាន់ហើបកង់មុខ ឡើងសាហាវ! (មានវីដេអូ)

February 27, 2020

រថយន្ត Porsche 911 Turbo S បានធ្វើឲ្យមនុស្សជាច្រើនមានការភ្ញាក់ផ្អើលយ៉ាងខ្លាំង ដោយអាចជាន់ដល់ហើបកង់មុខ យ៉ាងសាហាវតែម្តង។

លោក Mark Blackwell ដែលជាម្ចាស់រថយន្តនេះ បានយក 911 Turbo S របស់លោកទៅធ្វើការកែច្នៃមួយចំនួន ដើម្បីឲ្យបានដូចអ្វីដែលលោកចង់បាន។

គួរឲ្យដឹងថា រថយន្តស្ព័រនេះបំពាក់ម៉ាស៊ីនចំណុះ ៣,៨លីត្រ twin-turbo ទំហំ ៦ស៊ីឡាំង មានកម្លាំងដើម ៥៦០សេះ តែក្រោយពេលលោក Mark កែរួច វាមានកម្លាំងដល់ទៅជាង ១ ០០០សេះឯណោះ៕

ចង់ដឹងថារថយន្ត Porsche ជាន់សាហាវយ៉ាងណា សូមទស្សនាវីដេអូខាងក្រោម៖

ផ្ទាំងផ្សាយពាណិជ្ជកម្ម

Audi SQ7 ឆ្នាំ២០២០ កម្លាំង៥០០សេះ ចេញតម្លៃលក់ផ្លូវការហើយ

February 27, 2020

ក្រុមហ៊ុន Audi បានបង្ហាញតម្លៃលក់ជាផ្លូវការនៃរថយន្ត SQ7 ស៊េរីឆ្នាំ២០២០ សម្រាប់ទីផ្សារសហរដ្ឋអាមេរិក។

រថយន្ត Audi SQ7 ថ្មីនេះបំពាក់ម៉ាស៊ីនចំណុះ ៤,០លីត្រ turbodiesel TFSI ទំហំ ៨ស៊ីឡាំង មានកម្លាំង ៥០០សេះ ប្រើប្រអប់លេខអូតូ ៨វគ្គ ប្រភេទ Tiptronic និងប្រព័ន្ធប៉ុងពីរ Quattro AWD។ SUV នេះអាចជាន់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ៤,៣វិនាទីប៉ុណ្ណោះ។

SQ7 បានបំពាក់ប្រព័ន្ធជើងក្រោមថ្មីហៅថា S-tuned Adaptive Air Suspension និងប្រព័ន្ធបង្វិលចង្កូតវិលកង់ទាំង៤ All-wheel Steering ផងដែរ។ ក្រៅពីនោះ ក៏មានមុខងារ Active Roll Stabilization, Quattro with Sport Differential ទៀតផង បើបន្ថែមកញ្ចប់ Option “Sport Package”។

ដោយឡែកផ្នែកខាងក្នុងកាប៊ីនវា SQ7 បានបំពាក់ប្រព័ន្ធ MMI ថ្មីលើអេក្រង់ធំ Touchscreen ២, កុងទ័រឌីជីថល Audi Virtual Cockpit, ប្រព័ន្ធសំឡេង 3D Surround Sound System ចំនួន១៩គ្រាប់, មុខងារ Adaptive Cruise Cssist, Emergency Assist និងមុខងារផ្សេងៗជាច្រើនទៀត។

រថយន្ត Audi SQ7 នេះមានតម្លៃចាប់ពី ៨៤ ៨០០ដុល្លារ សម្រាប់ម៉ូដែល Premium Plus និង ៩០ ៤០០ដុល្លារ សម្រាប់ម៉ូដែល Prestige៕

ផ្ទាំងផ្សាយពាណិជ្ជកម្ម

ក្រុមហ៊ុន Geely ចាប់ផ្ដើមការលក់រថយន្តអនឡាញ និងដឹកជញ្ជូនដល់កន្លែង

February 27, 2020

ក្រុមហ៊ុនរថយន្ត Geely Auto របស់ចិន ដែលជាក្រុមហ៊ុនមេរបស់ Volvo Cars, Lotus និង London EV បានចាប់ផ្ដើមការលក់រថយន្តនៅលើអនឡាញ ដែលអាចឲ្យអតិថិជនធ្វើការបញ្ជាទិញ និងដឹកជញ្ជូនដល់គេហដ្ឋាន។

ក្រុមហ៊ុនក៏មានផ្ដល់ជូនការអនុញ្ញាតឲ្យបើកបររថយន្តសាកល្បង ដោយនឹងបញ្ជូនរថយន្តសម្រាប់សាកល្បង (Demo) ដល់ផ្ទះរបស់អតិថិជនតែម្ដង។ លើសពីនេះក្រុមហ៊ុនជួយដល់ការចុះបញ្ជីផ្សេង និងសេវាធានារ៉ាប់រងនៅក្នុងដំណើរការនៃទិញផងដែរ ដែលបង្កើតជាបទពិសោធន៍ទិញរថយន្តអនឡាញប្រភេទ One-Stop ហើយអតិថិជនក៏នឹងអាចជ្រើសរើសភ្នាក់ងារផ្ដល់ប្រាក់កម្ចីច្រើនប្រភេទតាមរយៈ Platform ថ្មីនេះបានទៀតផង។

គួរដឹងថា Geely Auto បានដាក់គោលដៅក្នុងការពង្រីកសេវាកម្មនេះ ដោយចង់បញ្ចូលនូវការបម្រើសេវាកម្មដល់ផ្ទះ ដែលក្រុមហ៊ុននឹងប្រមូលរថយន្តដើម្បីយកមកធ្វើការថែទាំ រួចហើយបញ្ជូនត្រឡប់ទៅដល់ផ្ទះអតិថិជនវិញ។ សេវាកម្មនេះ ក្រុមហ៊ុននិយាយថានឹងផ្ដល់ជូនក្នុងពេលឆាប់ៗខាងមុខ៕

ផ្ទាំងផ្សាយពាណិជ្ជកម្ម

កម្មវិធីតាំងបង្ហាញរថយន្ត Geneva Motor Show ឆ្នាំ ២០២០ នៅតែបន្ត ទោះកូរ៉ូណាកំពុងផ្ទុះ

February 27, 2020

វីរុសកូរ៉ូណា ដែលមានឈ្មោះផ្លូវការថា Covid-19 បានធ្វើឲ្យកម្មវិធីបច្ចេកវិទ្យាដូចជា Mobile World Congress នៅទីក្រុងប៉ាសេឡូណា និងកម្មវិធី Beijing Auto Show ត្រូវរំសាយចោលទាំងស្រុង។

មានការជជែកវែកញែកថាព្រឹត្តិការណ៍កីឡាអូឡាំពិតឆ្នាំ ២០២០ អាចត្រូវលើកពេល ឬរំសាយចោលតែម្ដង ប៉ុន្តែអ្វីដែលគេរឹតតែព្រួយបារម្ភគឺកម្មវិធីតាំងបង្ហាញរថយន្ត Geneva International Motor Show ឆ្នាំ ២០២០ ដែលនឹងមកដល់ឆាប់ៗនេះ។

យ៉ាងណាក្ដីបើផ្អែមតាមអ្នកនាំពាក្យនៃអ្នករៀបចំកម្មវិធី GIMS បានប្រាប់សារព័ត៌មាន Forbes ថា ៖ “វានឹងត្រូវបន្តដូចការគ្រោងទុក”។ ទន្ទឹមនឹងនេះតំបន់ដែលនឹងត្រូវប្រារព្ធកម្មវិធីនេះគឺនៅសាល Palexpo នៃទីក្រុង Geneva ប្រទេសស្វីស បាននិយាយថាពួកគេនឹងធ្វើការត្រួតពិនិត្យស្ថានភាពឲ្យបានដិតដល់ និងមានទំនាក់ទំនងជាមួយអគ្គនាយកដ្ឋានសុខាភិបាល ដើម្បីផ្ដល់ជាការណែនាំ និងសកម្មភាពបន្ទាន់ៗផងដែរ៕

ផ្ទាំងផ្សាយពាណិជ្ជកម្ម

ឡូហ្គោ Kia ថ្មី អាចនឹងចាប់ផ្ដើមប្រើលើរថយន្តម៉ូដែលថ្មីនៅចុងឆ្នាំ

February 26, 2020

Kia មានគម្រោងការថានឹងចាប់ផ្ដើមប្រើប្រាស់ឡូហ្គោថ្មីរបស់ខ្លួន មុនដំណាច់ឆ្នាំនេះ។ នេះបើតាមការចុះផ្សាយបស់ The Korean Car Blog។

ឡូហ្គោថ្មីនេះធ្លាប់បានបង្ហាញរូបរាងម្ដងរួចមកហើយនៅលើរថយន្ត Concept Imagine ដែលក្រុមហ៊ុនបានបង្ហាញក្នុងកម្មវិធី Geneva Motor Show កាលពីឆ្នាំមុន។ អំឡុងពេលការពិភាក្សាអំពីការដាក់ប្រើប្រាស់ឡូហ្គោថ្មី លោក Park Han-wood ប្រធានក្រុមហ៊ុន បាននិយាយថាឡូហ្គោថ្មីនេះគឺស្រដៀងនឹងឡូហ្គោដែលនៅលើរថយន្ត Concept Imagine ដែរ ប៉ុន្តែខុសគ្នាបន្តិចបន្តួច។

គេនៅរង់ចាំមើលថារថយន្ត Kia ម៉ូដែលថ្មីណានឹងបានប្រើប្រាស់ឡូហ្គោ Kia ថ្មីនេះមុនគេ។ មានមួយចំនួនជឿជាក់ថា Kia នឹងបង្ហាញចេញរថយន្តអគ្គិសនី ដែលដូចរថយន្តអគ្គិសនីរបស់ Volkswagen ម៉ូដែល ID.3 ដែរ៕

ផ្ទាំងផ្សាយពាណិជ្ជកម្ម

ឡាន Cadillac Escalade ជំនាន់ចាស់ចុះថ្លៃខ្ទង់ម៉ឺនដុល្លារ មុនជំនាន់ថ្មីចេញលក់

February 26, 2020

រថយន្ត Cadillac Escalade ជំនាន់ថ្មី ដែលផ្លាស់ប្ដូររូបរាងថ្មីនឹងចេញលក់ក្នុងពេលឆាប់ៗខាងមុខនេះ ដោយនឹងលក់ជាស៊េរីឆ្នាំ ២០២១ តែម្ដង។

មុនការចេញលក់រថយន្តស៊េរីឆ្នាំ ២០២១ នេះ ក្រុមហ៊ុន Cadillac បានផ្ដល់ការចុះថ្លៃច្រើនសម្បើមរហូតដល់ ១៦ ៥០០ ដុល្លារ សម្រាប់រថយន្ត Escalade ស៊េរីឆ្នាំ ២០២០ សម្រាប់នៅលើទីផ្សារសហរដ្ឋអាមេរិក។

ការចុះតម្លៃនេះ គឺបានដឹងផ្អែកតាមការចុះផ្សាយរបស់វិបសាយ CarsDirect ដែលខណៈពេលនេះរថយន្ត Escalade ស៊េរីឆ្នាំ ២០២០ គឺមានតម្លៃចាប់ពី ៧៦ ៤៩០ ដុល្លារ។ ការបញ្ចុះតម្លៃពិសេសនេះគឺផ្ដល់ជូនសម្រាប់ម្ចាស់រថយន្ត Escalade ស៊េរីឆ្នាំ ២០១៤ ដល់ ២០១៧ តែប៉ុណ្ណោះ៕

ផ្ទាំងផ្សាយពាណិជ្ជកម្ម

BMW ចេញលក់ឡានកូនកាត់ថ្មីនៅថៃ ហើយនេះតម្លៃវា

February 26, 2020

ក្រុមហ៊ុន BMW Thailand បានចេញលក់ជាផ្លូវការនូវរថយន្តម៉ូដែល 330e ដំណើរការដោយម៉ាស៊ីនកូនកាត់ Plug-in Hybrid ដើម្បីប្រជែងជាមួយនឹង រថយន្ត Mercedes-Benz C300e និង Volvo S60 T8។

រថយន្តដែលផលិតនៅក្នុងប្រទេសថៃ BMW 330e នេះ មានលក់តែ១ម៉ូដែលប៉ុណ្ណោះគឺ M Sport តម្លៃចាប់ពី ២,៧លានបាត (ប្រហែល ៨៧ ០០០ដុល្លារ) ថ្លៃជាង Volvo S60 T8 R-Design ប៉ុន្តែថោកជាង Mercedes-Benz C300e AMG Dynamic។

រថយន្តដែលប្រើសាំងផង ប្រើអាគុយ Hybrid ផង ហើយអាចប្រើថាមពលអគ្គិសនីសុទ្ធដែរនេះ មានកម្លាំង ២៩២សេះ អាចបើកបរដោយប្រើថាមពលអគ្គិសនីសុទ្ធ ចម្ងាយចន្លោះពី ៥៥ ទៅ ៧០គីឡូម៉ែត្រ ហើយទទួលបានកម្លាំងបន្ថែម ៤០សេះទៀត ពីប្រព័ន្ធ Hybrid ទៀតផង៕

ផ្ទាំងផ្សាយពាណិជ្ជកម្ម

ឡានចិនទើបចេញថ្មី អាចការពារវីរុសកូរ៉ូណាបាន តម្លៃថោកស្មានមិនដល់

February 26, 2020

ក្រុមហ៊ុនរថយន្តចិន Geely បានចេញលក់ SUV ខ្នាតតូចរបស់ខ្លួនម៉ូដែល Icon ស៊េរីថ្មី នៅក្នុងប្រទេសចិន ដោយទទួលបានការបញ្ជាទិញមុន ៣០ ០០០គ្រឿងបាត់ទៅហើយ។

អ្វីដែលធ្វើឲ្យរថយន្តនេះទាក់ចិត្តគេខ្លាំង ក៏ដោយសារតែវាមានបំពាក់ប្រព័ន្ធពិសេសមួយ ហៅថា Intelligent Air Purification System (IAPS) ដែលជាមុខងារបន្សុទខ្យល់ ចាំបាច់បំផុតចំពេលវីរុសកូរ៉ូណាកំពុងផ្ទុះឡើងខ្លាំងនៅចិន។

ក្រៅពីនោះ វាក៏មានបំពាក់ ultrasonic radars ដល់១២គ្រាប់, រ៉ាដា និង កាមេរ៉ាដល់ទៅ ៥គ្រាប់ទៀត។ លើសពីនេះ វាមានមុខងារជាច្រើនទៀត ដូចជា intelligent cruise control, lane keep assistance, automatic emergency braking and pedestrian recognition, one-button automatic parking និងកាមេរ៉ា ៣៦០ដឺក្រេ ផងដែរ។

រថយន្ត Geely Icon បំពាក់ម៉ាស៊ីនចំណុះ ១,៥លីត្រ turbocharged ចំណុះ ៤ស៊ីឡាំង ដំណើរការជាមួយប្រព័ន្ធ mild-hybrid កម្លាំង ៤៨វ៉ុល និងប្រអប់លេខអូតូ ៧វគ្គ មានកម្លាំងសរុប ១៨៧សេះ ហើយមានកម្រិតស៊ីសាំងជាមធ្យមត្រឹមតែ ៥,៧លីត្រប៉ុណ្ណោះ ក្នុង១០០គីឡូម៉ែត្រ។ វាមានតម្លៃចន្លោះពី ១៦ ៥០០ដុល្លារ ទៅ ១៨ ៣០០ដុល្លារ៕

ផ្ទាំងផ្សាយពាណិជ្ជកម្ម

Volkswagen ចេញឡានកូនកាត់ថ្មី សមត្ថភាពមិនធម្មតា

February 25, 2020

ក្រុមហ៊ុនរថយន្តអាល្លឺម៉ង់ Volkswagen បានប្រកាសចេញនូវរថយន្តប្រភេទ Plug-in Hybrid ម៉ូដែលថ្មី ហៅថា Touareg R។

Volkswagen Touareg R បំពាក់ម៉ាស៊ីនចំណុះ ៣,០លីត្រ TSI ទំហំ ៦ស៊ីឡាំង មានកម្លាំង ៣៣៥សេះ និងម៉ូទ័រអគ្គិនសីមួយកម្លាំង ១៣៤សេះ។ សរុបមក វាអាចបង្កើតកម្លាំងបានសរុប ៤៥៥សេះ ហើយប្រើប្រាស់ប្រព័ន្ធប៉ុងពីរ 4Motion AWD និងប្រអប់លេខអូតូ ៨វគញគ។ SUV នេះអាចជាន់ដល់ល្បឿនអតិបរមា ២៥០គីឡូម៉ែត្រក្នុងមួយម៉ោង និង ១៤០គីឡូម៉ែត្រក្នុងមួយម៉ោង នៅពេលប្រើម៉ូដអគ្គិសនីសុទ្ធ (E-Mode)។

ដោយសារតែវាជាប្រភេទរថយន្តកូនកាត់ (Plug-in Hybrid) ដូច្នេះវាអាចបើកបរដោយប្រើថាមពលអគ្គិសនីសុទ្ធបានចម្ងាយ ចន្លោះពី ៤៥ ទៅ ៥០គីឡូម៉ែត្រផងដែរ។

អ្នកបើកបរអាចផ្លាស់ប្តូរម៉ូដបើកបរ E-Mode នៅពេលចង់ប្រើថាមពលអគ្គិសនីសុទ្ធ និង Hybrid សម្រាប់ប្រើសាំង និងអាគុយ។ ក្រៅពីនោះ អ្នកបើកបរអាចជ្រើសរើសម៉ូដជាច្រើនទៀតដូចជា Eco, Comfort, Normal, Sport និង Individual ព្រមទាំង Offroad និង Snow ផងដែរ។ ប្រសិនបើបន្ថែមកញ្ចប់ Option “Off-Road Package” នោះវានឹងបន្ថែមម៉ូដ ២ទៀត គឺ Gravel និង Sand។

ជាមួយនឹងកម្លាំងជិត ៥០០សេះ រថយន្ត Touareg R អាចអូសសណ្តោងបានទម្ងន់ដល់ ៣,៥តោន ហើយមានបំពាក់ប្រព័ន្ធសុវត្ថិភាពជាច្រើន ក្នុងនោះក៏មានមុខងារ Trailer Assist ទៀតផង។