មកស្គាល់រថយន្តមានគេជិះយូរបំផុត

March 2, 2020

ក្រុមការងារ iSeeCars ដែលមូលដ្ឋាននៅ Boston សហរដ្ឋអាមេរិក បានធ្វើការវិភាគលើរថយន្តជាង ១៥,៨ លានគ្រឿងដែលលក់នៅក្នុងឆ្នាំ ២០១៩ នៅសហរដ្ឋអាមេរិក ដើម្បីរកមើលថារថយន្តថាដែលមានចម្ងាយបើកបរដល់ ៣២ ម៉ឺនគីឡូម៉ែត្រ ច្រើនជាងគេ។

ខាងក្រោមនេះគឺជារថយន្តដែលអាចជិះដល់ ៣២ ម៉ឺនគីឡូម៉ែត្រ ដោយ Toyota Land Cruiser មានភាគរយខ្ពស់ជាងគេ ៖

១. Toyota Land Cruiser ៖ ១៥,៧%

២. Toyota Sequoia ៖ ៩,២%

៣. Ford Expedition ៖ ៥,២%

៤. Chevrolet Suburban ៖ ៤,៩%

៥. Toyota Highlander Hybrid ៖ ៤,២%

៦. Chevrolet Tahoe ៖ ៤,១%

៧. GMC Yukon XL ៖ ៤,១%

៨. Toyota 4Runner ៖ ៣,៩%

៩. GMC Yukon ៖ ៣,២%

១០. Honda Ridgeline ៖ ៣%

ផ្ទាំងផ្សាយពាណិជ្ជកម្ម

ពិព័រណ៌រថយន្តធំបំផុតមួយត្រូវលុបចោល ព្រោះតែវីរុសកូរ៉ូណា

March 2, 2020

ក្រុមប្រឹក្សាសហព័ន្ធស្វីស Swiss Federal Council បានសម្រេចចិត្តហាមឃាត់កម្មវិធីធំៗទាំងអស់ ដែលមានការចូលរួមពីមនុស្ស ១ ០០០នាក់ឡើងទៅ យ៉ាងហោចណាស់រហូតដល់ថ្ងៃទី១៥ ខែមីនា ស្របពេលដែលការឆ្លងវីរុសកូរ៉ូណាកំពុងកើនឡើង។

វាមានន័យថា កម្មវិធីពិព័រណ៌រថយន្តធំបំផុតមួយ គឺ Geneva Motor Show ប្រចាំឆ្នាំ២០២០ នឹងត្រូវលុបចោល។

ក្រុមប្រឹក្សាខាងលើបានឲ្យដឹងថា “យើងស្តាយណាស់ដែលត្រូវប្រកាសថា កម្មវិធី 2020 Geneva Motor Show នឹងត្រូវលុបចោល ប៉ុន្តែអ្វីដែលចាំបាច់បំផុត គឺការពារមនុស្ស។”។

គួរឲ្យដឹងថា ដំបូងឡើយកម្មវិធី Geneva Motor Show ត្រូវកំណត់ធ្វើឡើងនៅថ្ងៃទី០២ មីនា នេះ រហូតដល់ថ្ងៃទី១៥ ខែមីនា។ ក្នុងនោះ ក្រុមហ៊ុនរថយន្តធំៗជាច្រើនមកពីជុំវិញពិភពលោក បានត្រៀមបង្ហាញរថយន្តថ្មីៗរបស់ខ្លួនផងដែរ។ យ៉ាងណាក៏ដោយ Geneva Motor Show នឹងសងលុយថ្លៃសំបុត្រទាំងអស់វិញ៕

ផ្ទាំងផ្សាយពាណិជ្ជកម្ម

Suzuki ចេញលក់ឡានតម្លៃខ្ទង់ ១ម៉ឺនដុល្លារនៅថៃ

March 2, 2020

ក្រុមហ៊ុន Suzuki Motor Thailand បានដាក់បង្ហាញរថយន្តខ្នាតតូចម៉ូដែល Ciaz ស៊េរិឆ្នាំ២០២០ ជាផ្លូវការ នៅក្នុងប្រទេសថៃ។

រថយន្ត Suzuki Ciaz ថ្មីនេះ ទទួលបានការអាប់ដេតជាច្រើន ជាពិសេសផ្នែកខាងក្រៅ។ វាបំពាក់ម៉ាស៊ីនចំណុះ ១,២លីត្រ ទំហំ ៤ស៊ីឡាំង មានកម្លាំង ៩១សេះ ប្រើប្រអប់លេខអូតូ CVT ហើយសាំងមួយលីត្រជិះបាន ២០គីឡូម៉ែត្រ។

Ciaz គឺជាគូប្រជែងរបស់រថយន្ត Honda City, Mazda 2, Mitsubishi Attrage, Nissan Almera និង Toyota Yaris Ativ នៅក្នុងប្រទេសថៃ។ វាមានតម្លៃចាប់ពី ៥៦៩ ០០០បាត (ខ្ទង់ ១៨ ០០០ដុល្លារ) ដល់ ៦៨៩ ០០០ដុល្លារ (ខ្ទង់ ២២ ០០០ដុល្លារ)។ Ciaz ក៏មានជម្រើសលេខដៃដែរ ដោយមានតម្លៃ ៥៣៣ ០០០បាត (ខ្ទង់ ១៧ ០០០ដុល្លារ)៕

ផ្ទាំងផ្សាយពាណិជ្ជកម្ម

ម្ចាស់រថយន្ត Chevrolet បាតុកម្មចង់បានលុយមកវិញ

February 29, 2020

ម្ចាស់រថយន្ត Chevrolet Captiva ប្រមាណ ១០០ នាក់ក្នុងប្រទេសថៃ បានធ្វើបាតុកម្មសុំឲ្យក្រុមហ៊ុន General Motors Thailand ផ្ដល់ជូនលុយ ១៦ ០០០ ដុល្លារ ត្រឡប់ទៅឲ្យពួកគេ ដែលជាតម្លៃដែលក្រុមហ៊ុនបានចុះថ្លៃលើរថយន្ត Captiva កាលពីថ្មីៗនេះ។

គួរដឹងថាក្រុមហ៊ុន GM Thailand បានប្រកាសឈប់លក់រថយន្ត Chevrolet និងលក់រោងចក្រផលិតរថយន្ត Chevrolet នៅប្រទេសថៃ។ ទន្ទឹមនឹងនេះក្រុមហ៊ុនក៏បានធ្វើការលក់បញ្ចុះតម្លៃរថយន្តដែលនៅសល់ក្នុងស្តុករហូតដល់រាប់ពាន់ រាប់ម៉ឺនដុល្លារឯណោះ។ ជាក់ស្ដែងរថយន្ត Captiva មួយប្រភេទ ទម្លាក់ថ្លៃពី ៣២ ០០០ ដុល្លារ មកនៅ ១៦ ០០០ ដុល្លារ។

អ្នកដែលបាតុកម្មទាមទារលុយមកវិញ គឺពួកគេបានទិញរថយន្ត Captiva នៅពេលដែលវាចេញលក់ដំបូងនៅខែកញ្ញា ឆ្នាំ ២០១៩ រយៈពេល ៥ ខែមុនការប្រកាសដកខ្លួនចេញពីទឹកដីថៃរបស់ GM។ ខណៈពេលនេះមិនទាន់ឃើញមានការឆ្លើយតបពី GM Thailand នៅឡើយទេ៕

ផ្ទាំងផ្សាយពាណិជ្ជកម្ម

មកស្គាល់រថយន្ត ១០ លក់ដាច់បានច្រើនជាងគេនៅអាស៊ីអាគ្នេយ៍នាឆ្នាំ ២០១៩

February 29, 2020

ផ្អែកតាមតួលេខរបស់វិបសាយ Focus2move បានបង្ហាញថា រថយន្តដែលលក់ដាច់បានច្រើនជាងគេបំផុតលើទីផ្សារអាស៊ីអាគ្នេយ៍នាឆ្នាំ ២០១៩ ភាគច្រើនគឺជាម៉ូដែលរថយន្តជប៉ុន។

១. Toyota Hilux លក់បាន ២០៣ ៥២៣ គ្រឿង (កើន ៥,៨%)

២. Isuzu D-Max លក់បាន ១៥៥ ៧៤៧ គ្រឿង (ថយ ៩,២%)

៣. Mitsubishi Xpander លក់បាន ១២៣ ៦១១ គ្រឿង (កើន ៣១,៤%)

៤. Toyota Avanza លក់បាន ១០២ ៤៦៤ គ្រឿង (កើន ៥,៨%)

៥. Toyota Vios លក់បាន ៩១ ៦៥៩ គ្រឿង (កើន ៦,១%)

៦. Toyota Rush លក់បាន ៨២ ៧២១ គ្រឿង (កើន ២៧,៥%)

៧. Pedodua Myvi លក់បាន ៨១ ៩៦៦ គ្រឿង (ថយ ០,២%)

៨. Toyota Agya លក់បាន ៧៩ ៦៣១ គ្រឿង (កើន ១៤២,២%)

៩. Ford Ranger លក់បាន ៧៩ ៣៥០ គ្រឿង (ថយ ៣,៩%)

១០. Toyota Fortuner លក់បាន ៧៧ ៥៨៥ គ្រឿង (ថយ ២%)

ផ្ទាំងផ្សាយពាណិជ្ជកម្ម

មេ Tesla ថា ពេល Cybertruck ចេញលក់ នឹងមានរាងស្អាតជាងមុន

February 29, 2020

ថ្មីៗនេះមេក្រុមហ៊ុន Tesla លោក Elon Musk បានចែករំលែកព័ត៌មានបន្ថែមអំពីរថយន្តភីកអាប់ Cybertruck របស់ខ្លួន នៅលើបណ្តាញសង្គម Twitter ដោយបង្ហាញថា នៅពេលវាចេញលក់ ការឌីហ្សាញមួយចំនួននឹងត្រូវផ្លាស់ប្តូរ ខុសពីពេលបង្ហាញលើកដំបូង។

ជាការពិតណាស់ Tesla Cybertruck បានទទួលរងមតិរិះគន់ជាច្រើន ដោយសារតែរូបរាងបែបជ្រុងៗរបស់វា។ ទោះជាយ៉ាងណា លោក Elon Musk បានអះអាងថា វានឹងមានរូបរាងប្រសើរជាងមុន នៅពេលចេញលក់។

Cybertruck មានជម្រើសចំនួន ៣ គឺ ៖

Single Motor RWD តម្លៃ ៣៩ ៩០០ដុល្លារ មានចម្ងាយបើកបរជាង ៤០០គីឡូម៉ែត្រ
Dual Motor តម្លៃ ៤៩ ៩០០ដុល្លារ មានចម្ងាយបើកបរជាង ៤៨០គីឡូម៉ែត្រ
Tri-Motor AWD អាចរត់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេលត្រឹមតែ ២,៩វិនាទីប៉ុណ្ណោះ ហើយមានល្បឿនអតិបរមា ២១០គីឡូម៉ែត្រក្នុងមួយម៉ោង និងចម្ងាយបើកបរជាង ៨០០គីឡូម៉ែត្រ ឯតម្លៃវិញគឺ ៦៩ ៩០០ដុល្លារ៕

ផ្ទាំងផ្សាយពាណិជ្ជកម្ម

Hyundai បិទទ្វាររោងចក្រនៅកូរ៉េ ក្រោយរកឃើញបុគ្គលិកមានវីរុសកូរ៉ូណា

February 29, 2020

ក្រុមហ៊ុនផលិតរថយន្ត Hyundai បានបិទទ្វាររោចចក្ររបស់ខ្លួនៅក្នុងប្រទេសកូរ៉េខាងត្បូង បន្ទាប់ពីបុគ្គលិកម្នាក់បានធ្វើតេស្តរកឃើញមានវីរុសកូរ៉ូណា។

រោងចក្រដែលត្រូវបិទទ្វារនោះស្ថិតនៅក្នុងទីក្រុង Ulsan ដែលផលិតរថយន្ត SUV ជាច្រើនម៉ូដែល រួមមាន Santa Fe, Tucson, Palisade និង Genesis GV80 ផងដែរ។

មិនតែប៉ុណ្ណោះ Hyundai ក៏បានឲ្យអ្នកធ្វើការ ឬប៉ះពាល់ជាមួយអ្នកផ្ទុកវីរុសខាងលើ នៅដាច់ដោយឡែកពីគេ ហើយឲ្យពួកគេធ្វើតេស្តដើម្បីរកវីរុសកូរ៉ូណាផងដែរ។

ទោះជាយ៉ាងណា Hyundai មិនបានប្រាប់ឲ្យដឹងឡើយថា ពេលណាទើបបើកទ្វាររោងចក្រវិញ គ្រាន់តែប្រាប់ថា កំពុងបាញ់ថ្នាំដើម្បីកម្ចាត់វីរុសប៉ុណ្ណោះ៕

ផ្ទាំងផ្សាយពាណិជ្ជកម្ម

មើលរូបរាង Ford F-150 ពិសេស ម៉ាស៊ីនកម្លាំង ៧៧៥ សេះ

February 28, 2020

ក្រុមហ៊ុនជំនាញខាងលេងរថយន្ត Hennessey បានបង្ហាញចេញរូបរាងរថយន្ត Ford F-150 ដែលមានប្រើកញ្ចប់កែច្នៃម៉ាស៊ីនថ្មី ដែលក្រុមហ៊ុនដាក់ឈ្មោះឲ្យថា Venom 775 Supercharged Truck។

រថយន្តពិសេសនេះគឺមានបំពាក់ម៉ាស៊ីនថ្មី ដែលអាចបង្កើតកម្លាំងបាន ៧៧៥ សេះ អាចបង្កើនសន្ទុះពី ០ដល់៩៦គ.ម/ម៉ ក្នុងពេលត្រឹមតែ ៤ វិនាទីប៉ុណ្ណោះ។ កញ្ចប់ Venom 775 នេះគឺមានតម្លៃរហូតដល់ ៥៣ ៣០០ ដុល្លារ ហើយបូកនឹងការលេងរូបរាងប្លែកភ្នែកបន្ថែមទៀតដូចបង្ហាញក្នុងរូបភាព គឺត្រូវចំណាយបន្ថែម ១៦ ៣០០ ដុល្លារ សរុប ៦៩ ៦០០ ដុល្លារ។ យ៉ាងណាក្ដីនេះមិនទាន់គិតបញ្ចូលតម្លៃនៃរថយន្ត F-150 ឆ្នាំ ២០២០ នោះទេ។

គួរដឹងថា Hennessey នឹងផលិតរថយន្តពិសេសនេះត្រឹមតែ ១០០ គ្រឿងប៉ុណ្ណោះ និងមានលក់ផ្ដាច់មុខតាមរយៈ Brown Lee Ford៕

ផ្ទាំងផ្សាយពាណិជ្ជកម្ម

ទីបំផុតកម្មវិធីតាំងបង្ហាញរថយន្ត Geneva ឆ្នាំ ២០២០ ត្រូវរំសាយចោលជាផ្លូវការ

February 28, 2020

កម្មវិធីតាំងបង្ហាញរថយន្ត Geneva Motor Show លើកទី ៩០ គ្រោងថានឹងចាប់ផ្ដើមជាផ្លូវការពីថ្ងៃទី ៥ ដល់ថ្ងៃទី ១៥ ខែមីនា ឆ្នាំ ២០២០ នេះ។ យ៉ាងណាក្ដីទឹកប្រាក់ដែលគេបានបណ្ដាក់ទុនលើកម្មវិធីនេះក្លាយជាអសារបង់ ដោយសារកម្មវិធីនេះត្រូវបានរំសាយចោលជាផ្លូវការ ដោយមានការបារម្ភខ្លាំងជុំវិញការផ្ទុះវីរុសកូរ៉ូណា។

ការសម្រេចចិត្តរំសាយចោលនេះ បន្ទាប់ពីការប្រកាសរបស់រដ្ឋាភិបាលប្រទេសស្វីសអំពីការហាមឃាត់មិនឲ្យមានការជួបជុំជាសាធារណៈលើសពី ១ ពាន់នាក់ ចាប់ពីពេលនេះរហូតដល់ថ្ងៃទី ១៥ ខែមីនា ឬអាចឆាប់នេះ។ កម្មវិធី Geneva ដែលនឹងត្រូវចាប់ផ្ដើមក្នុងប៉ុន្មានសប្ដាហ៍ទៀត គឺរំពឹងថានឹងអាចទាក់ទាញអ្នកចូលរួមច្រើន ហេតុនេះគេអាចយល់បានអំពីមូលហេតុនៃការរំសាយចោល។ គួរដឹងថាឆ្នាំមុនមានមនុស្សសរុបជាង ៦០ ម៉ឺននាក់ ចូលរួមកម្មវិធីតាំងបង្ហាញនេះ។

គួររំលឹកដែរថា Geneva Motor Show នាឆ្នាំនេះគឺមិនធំនោះឡើយ បើធៀបនឹងឆ្នាំមុន ដោយសារមានក្រុមហ៊ុនជាច្រើនបានប្រកាសមិនចូលរួមតាំងពីដើមឆ្នាំ ២០២០ មក ដែលរួមមាន Citroën, Ford, Jaguar, Lamborghini, Land Rover, Mini, Mitsubishi, Nissan, Opel, Peugeot, Subaru, Tesla និង Volvo៕

ផ្ទាំងផ្សាយពាណិជ្ជកម្ម

ចេញហើយ Volkswagen Golf GTI ឆ្នាំ២០២១ ខ្លាំងជាងមុន ហើយដូររាងថ្មីទៀត!

February 28, 2020

ក្រុមហ៊ុន Volkswagen បានប្រកាសចេញនូវរថយន្តដ៏មានប្រជាប្រិយបំផុតរបស់ខ្លួន ម៉ូដែល Golf GTI ស៊េរីឆ្នាំ២០២១ ដោយប្តូររូបរាងថ្មីទាំងស្រុង។

រថយន្ត Volkswagen Golf GTI ជំនាន់ទី៨ នេះ នឹងបង្ហាញខ្លួនជាផ្លូវការ នៅក្នុងកម្មវិធី Geneva Motor Show នាខែមីនានេះតែម្តង។ វាបំពាក់ម៉ាស៊ីនសាំង ចំណុះ ២,០លីត្រ turbocharged ទំហំ ៤ស៊ីឡាំង មានកម្លាំងសរុប ២៤៥សេះ ច្រើនជាង Golf GTI ស៊េរីចាស់ ១៧សេះ។ វានឹងប្រើប្រព័ន្ធប៉ុងមួយវិលកង់មុខ ជាមួយប្រអប់លេខដៃ ៦វគ្គ ឬអូតូ ៧វគ្គ ប្រភេទ dual-clutch។

Golf GTI មានរូបរាងថ្មីទាំងស្រុង ទៅមើលស្ព័រជាងមុន ហើយស្រលូនជាងមុន។ ចំណែកឯកាប៊ីនខាងក្នុងរបស់វា ត្រូវបានគេឲ្យឈ្មោះថា Innovision Cockpit ដោយបំពាក់អេក្រង់បង្ហាញព័ត៌មានទំហំ ១០អ៊ីង និងកុងទ័រឌីជីថល ១០,២៥អ៊ីង។