ឡាន Chevrolet នៅថៃក្រោយចុះថ្លៃ សល់តម្លៃប៉ុន្មានខ្លះ?

February 22, 2020

ក្រុមហ៊ុនរថយន្ត General Motors រំពឹងថានឹងលក់រថយន្តប្រមាណ ៤ ទៅ ៥ ពាន់គ្រឿងដែលនៅសេសសល់ឲ្យអស់ពីស្តុកក្នុងប្រទេសថៃ ដោយមានការផ្ដល់ការបញ្ចុះតម្លៃរហូតដល់រាប់សែនបាតឯណោះ។

តម្លៃលក់រាយថ្មីនៃរថយន្ត Chevrolet ចំនួនបីម៉ូដែលរួមមាន Captiva, Trailblazer និង Colorado ត្រូវបានប្រកាសកាលពីល្ងាចថ្ងៃពុធពីសំណាក់ក្រុមហ៊ុន Chevrolet Thailand ជាក្រុមហ៊ុនរបស់ GM Thailand។

រថយន្ត Captiva មានការបញ្ចុះតម្លៃរហូតដល់ ៥០០ ០០០ បាត (ប្រមាណ ១៥ ៨៤៧ ដុល្លារ) ដែលតម្លៃពេលនេះមានចាប់ពី ៤៩៩ ០០០ បាត ដល់ ៦៩៩ ០០០ បាត ដែលស្មើប្រមាណ ១៥ ៨១៦ ដុល្លារ ដល់ ២២ ១៥៥ ដុល្លារ។

ចំណែករថយន្ត Trailblazer ចុះថ្លៃពី ១ ១៤៤ ០០០ បាត (ប្រមាណ ៣៦ ២៥៩ ដុល្លារ) មកនៅត្រឹម ៨៩៥ ០០០ បាត (ប្រមាណ ២៨ ៣៦៧ ដុល្លារ) និងរថយន្ត Colorado ចុះមកនៅ ៦៥៥ ០០០ បាត (ប្រមាណ ២០ ៧៦០ ដុល្លារ) និង ៧៧៥ ០០០ បាត (ប្រមាណ ២៤ ៥៦៤ ដុល្លារ) ប៉ុណ្ណោះ។

គួរដឹងថា General Motors បានលក់រោងចក្ររបស់ខ្លួននៅប្រទេសថៃ ទៅឲ្យក្រុមហ៊ុនរថយន្តចិន Great Wall Motors ទើបនាំឲ្យមានការលក់បញ្ចុះតម្លៃបែបនេះ ដើម្បីសម្អាតស្ដុក៕

ផ្ទាំងផ្សាយពាណិជ្ជកម្ម

Chevrolet ចេញលក់ឡានអគ្គិសនីដំបូងនៅចិន តម្លៃជាង ២ម៉ឺនដុល្លារ

February 22, 2020

រថយន្ត Chevrolet Menlo ដែលជារថយន្តអគ្គិសនីដំបូងរបស់ Chevrolet សម្រាប់ប្រទេសចិនបានចេញលក់នៅប៉េកាំងមុនគេ ចាប់ពីពេលនេះ។

រថយន្តមានចែកចេញជា ៤ ប្រភេទផ្សេងគ្នា ដែលមានតម្លៃចន្លោះពី ២២ ៧៤០ ដុល្លារ ទៅ ២៥ ៥៨៥ ដុល្លារ ក្រោយពីមានការជួយសម្រួលពីរដ្ឋាភិបាលចិនសម្រាប់រថយន្តដែលជួយបរិស្ថាន។ រថយន្តនេះប្រើប្រាស់ប្រព័ន្ធអគ្គិសនីថ្មី ដែលដូចគ្នានឹងរថយន្ត Buick Velite 6 Plus ដែរ។ នោះគឺម៉ូទ័រអគ្គិសនីចំនួនមួយ ដែលបង្កើតកម្លាំងបាន ១៤៨ សេះ ផ្គត់ផ្គង់ថាមពលដោយអាគុយដែលមានទំហំ ៥២,៥ គីឡូវ៉ាត់ម៉ោង។

Chevrolet បាននិយាយថាកម្រិតស៊ីថាមពលគឺ ១៣,១ គីឡូវ៉ាត់ម៉ោងក្នុងចម្ងាយ ១០០ គីឡូម៉ែត្រ ដែលមានន័យថា Menlo អាចជិះបានចម្ងាយដល់ទៅ ៤១០ គីឡូម៉ែត្រ ពេលសាកមួយពេញ។រឹតតែពិសេសគឺថាមពលថ្មអាចសាកពី ០ ដល់ ៨០% ក្នុងពេលត្រឹមតែ ៤០ នាទី ដោយប្រើប្រាស់ឆ្នាំងសាកល្បឿនលឿន៕

ផ្ទាំងផ្សាយពាណិជ្ជកម្ម

អ្នកថតរូបអាជីពម្នាក់ បញ្ចេញស្នាដៃថតរូបឡានមិនធម្មតា ដូចក្នុងរឿងហូលីវូត

February 21, 2020

រូបថតរថយន្តតូយ៉ូតាជាច្រើនសន្លឹក ត្រូវបានបង្ហោះជាមួយបច្ចេកទេសថតយ៉ាងស្ទាត់ជំនាញរបស់លោក Jerry Thai ទទួលបានការចាប់អារម្មណ៍យ៉ាងច្រើនពីប្រិយមិត្តបណ្តាញសង្គមហ្វេសប៊ុក ដោយសាររូបទាំងនោះបានបង្ហាញនូវរសជាតិថ្មីមួយទៀត ឬអាចនិយាយបានថាសម្រាប់ស្វាគមន៍រឿងរបស់ហូលីវូត F9 (Fast & Furious 9) ដែលនឹងចាក់បញ្ចាំងនៅខែមេសា ឆ្នាំ២០២០ ខាងមុខនេះ អញ្ចឹងដែរ។

គួរបញ្ជាក់ផងដែរថា លោកគឺជាម្ចាស់ហាងថត @home photography ដ៏ល្បីមួយប្រចាំប្រទេសកម្ពុជា។ ការថតនេះគឺអាចនិយាយបានថា ជាការបង្ហាញនូវបច្ចេកទេសថតរូបដោយប្រើប្រាស់ពន្លឺ និងភាពច្នៃប្រឌិតខ្ពស់។

រូបភាពទាំងនោះត្រូវបានបញ្ចេញនៅលើគណនីផ្ទាល់ខ្លួន និងទំព័រផ្លូវការរបស់ @homePhotography។ ចង់ដឹងយ៉ាងណាសូមទស្សនារូបភាពខាងក្រោមដែលមានរថយន្តតូយ៉ូតា Hilux Revo Rally និង Camry៖

ខាងក្រោមនេះជារូបភាពជាច្រើនទៀត៖

1 នៃ 10

ផ្ទាំងផ្សាយពាណិជ្ជកម្ម

ជប៉ុនបង្កើតក្រុមពិសេសជួយដល់ឧស្សាហកម្មរថយន្ត ដែលរងការប៉ះពាល់ព្រោះវីរុសកូរ៉ូណា

February 21, 2020

ក្នុងអំឡុងពេលនៃការផ្ទុះនូវវីរុសកូរ៉ូណា ប្រទេសជប៉ុនគិតចង់បង្កើតក្រុមពិសេសមួយ ដែលជាការបង្កើតឡើងរវាងឧស្សាហកម្មរថយន្ត និងរដ្ឋាភិបាល។

គោលបំណងគឺសម្រាប់ក្រុមហ៊ុនផលិតរថយន្ត និងក្រុមហ៊ុនផ្គត់ផ្គង់ទទួលបានជំនួយ និងអាចឆ្លងផុតការបង្អាក់ដំណើរដែលបណ្ដាលមកពីការផ្ទុះវីរុស។ ក្រុមការងារនឹងធ្វើចែករំលែកទាក់ទងនឹងការជួយជ្រោមជ្រែងដល់ផ្នែកហិរញ្ញវត្ថុ និងលក្ខខណ្ឌនានា។

ក្រុមនេះក៏នឹងត្រួតពិនិត្យមើលការវិវត្តថ្មី និងរៀបចំការទំនាក់ទំនង ខណៈដែលធ្វើការជាមួយរដ្ឋាភិបាលជប៉ុន ក្នុងគោលដៅជួយដោះស្រាយបញ្ហាទាក់ទងនឹងសង្វាក់ផលិតកម្មផ្គត់ផ្គង់។

ក្រុមហ៊ុនរថយន្តដូចជា Nissan បានរងផលប៉ះពាល់ធ្ងន់ដែលឈានដល់ការបិទសង្វាក់ផលិតកម្ម នៅ Kyushu ភាគខាងលិចប្រទេសជប៉ុននាថ្ងៃទី ១៤ និង ១៧ កុម្ភៈ ហើយក៏នឹងផ្អាកការផលិតនៅថ្ងៃទី ២៤ កុម្ភៈដែរ។ ចំណែក Mazda, Honda, Mitsubishi និង Toyota វិញក៏បានផ្អាកប្រតិបត្តិការមួយចំនួននៅចិន ដោយមិនទាន់មានការផ្អាកនៅជប៉ុននៅឡើយទេ៕

ផ្ទាំងផ្សាយពាណិជ្ជកម្ម

Honda Accord ជំនាន់ថ្មី ចេញលក់នៅជប៉ុន មានម៉ូទ័រអគ្គិសនីភ្លោះ

February 21, 2020

ក្រុមហ៊ុន Honda បានបញ្ចេញលក់រថយន្ត Accord ជំនាន់ថ្មីជាផ្លូវការនៅប្រទេសជប៉ុន ដោយមានតែប្រភេទម៉ាស៊ីន Hybrid ដែលវាមានម៉ូទ័រអគ្គិសនីភ្លោះ ជាប្រភេទផ្ដាច់មុខសម្រាប់ប្រទេសជប៉ុន។

ប្រភេទពិសេសនេះត្រូវបានក្រុមហ៊ុនដាក់ឈ្មោះឲ្យថា Honda Accord e:HEV ដែលម៉ូទ័រអគ្គិសនីនេះផលិតកម្លាំងបាន ១៨១ សេះ គួបផ្សំនឹងម៉ាស៊ីន VTEC ៤ ស៊ីឡាំង ចំណុះ ២,០ លីត្រ ដែលផលិតកម្លាំងបាន ១៤៣ សេះ។

រថយន្ត Honda Accord e:HEV នេះមានដាក់លក់នៅជប៉ុនក្នុងតម្លៃចាប់ពី ៤ ,៦៥ លានយេន ដែលស្មើនឹងប្រមាណ ៤១ ៥៣០ ដុល្លារ៕

ផ្ទាំងផ្សាយពាណិជ្ជកម្ម

Mercedes បញ្ជាក់ថា នឹងបង្ហាញឡានត្រកូល AMG ថ្មី ៣ម៉ូដែល

February 21, 2020

កម្មវិធី Geneva Motor Show នឹងមកដល់ក្នុងរយៈពេលមិនដល់ ២សប្តាហ៏ទៀតឡើយ ហើយ Mercedes នឹងបង្ហាញរថយន្តថ្មីចំនួន ៣ម៉ូដែល។

ក្រុមហ៊ុនមិនបានបង្ហាញច្រើនឡើយ តែបានបញ្ជាក់ថា នឹងបង្ហាញឡានម៉ូដែល E-Class ថ្មី, ឡាន Hybrid និងឡានត្រកូល AMG ៣ម៉ូដែលទៀត។

ក្នុងនោះ Mercedes ថា នឹងបង្ហាញ E-Class និង SUV ត្រកូល AMG ប៉ុន្តែមិនបានបញ្ជាក់ថាម៉ូដែលណាឡើយ។

ដោយឡែក រថយន្ត Hybrid វិញ ត្រូវគេរំពឹងថាជាប្រភេទ Plug-in Hybrid ហើយអាចជាម៉ូដែល CLA ឬ GLA។

លើសពីនេះទៅទៀត Mercedes ក៏នឹងបង្ហាញរថយន្តវ៉ែន Marco Polo ស៊េរីថ្មី និង Vision Avtr ទៀតផងដែរ៕

ផ្ទាំងផ្សាយពាណិជ្ជកម្ម

Chevrolet បញ្ជុះតម្លៃជិត១ម៉ឺនដុល្លារ លើឡានស្ព័រ ២៦០០គ្រឿង

February 21, 2020

បន្ទាប់ពីរថយន្តស្ព័រ Chevrolet Corvette Stingray ស៊េរីថ្មីឆ្នាំ២០២០ (C8) បានចូលសង្វាក់ផលិតកម្ម ឥឡូវនេះស៊េរីឆ្នាំ២០១៩ (C7)នៅសល់ជាច្រើនគ្រឿង កំពុងរង់ចាំនៅក្នុង Showroom នៅទូទាំងសហរដ្ឋអាមេរិក។

ប្រធានផ្នែកទីផ្សារ Chevrolet លោក Steve Majoros បានឲ្យដឹងថា នៅសល់រថយន្ត C7 ប្រហែល ២ ៦០០គ្រឿងទៀត កំពុងរង់ចាំម្ចាស់ថ្មី។

ដោយសារតែ C8 ជាម៉ូដែលថ្មីសន្លាង ឥឡូវនេះក្រុមហ៊ុន Chevrolet បានប្រកាសបញ្ចុះតម្លៃរថយន្ត C7 របស់ខ្លួនដល់ទៅ ៨ ៣៣៨ដុល្លារក្នុងមួយគ្រឿង។

គួរឲ្យដឹងថា រថយន្តស្ព័រអាមេរិក C8 ថ្មី បំពាក់ម៉ាស៊ីនចំណុះ ៦,២លីត្រ ទំហំ ៨ស៊ីឡាំង មានកម្លាំង ៤៩៥សេះ ប្រើប្រអប់លេខអូតូ ៨វគ្គ ប្រភេទ dual-clutch អាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹម ២,៩វិនាទីប៉ុណ្ណោះ ហើយមានល្បឿនអតិបរមាដល់ ១៩៥គីឡូម៉ែត្រក្នុងមួយម៉ោង៕

ផ្ទាំងផ្សាយពាណិជ្ជកម្ម

Tesla Model 3 ជាស្ដេចឡានអគ្គិសនីនៅអឺរ៉ុបកាលឆ្នាំមុន

February 20, 2020

ចំនួនលក់រថយន្តថ្មីនៅអឺរ៉ុបបានកើនឡើងដល់ ១៥ ៧៥៧ ៤១២ គ្រឿង កាលពីឆ្នាំមុន ដែលជាលទ្ធផលល្អបំផុតមិនធ្លាប់មានក្នុងពេលជាង ១០ ឆ្នាំកន្លងមកនេះ។

ផ្អែកតាមតួលេខបានពី JATO Dynamics វាគឺជាកំណើនរយៈពេល ៦ ឆ្នាំជាប់គ្នា ដោយលក់បានលើសឆ្នាំ ២០១៨ ចំនួន ១៧១ ៤៥២ គ្រឿង។ ទីផ្សាររថយន្តធំជាងគេគឺអាល្លឺម៉ង់ ចក្រភពអង់គ្លេស និងបារាំង ដែលតាមពីក្រោយដោយអ៊ីតាលី និងអេស្ប៉ាញ។

គួរដឹងថាក្នុងចំណោមរថយន្តថ្មីដែលលក់ចេញ មាន ២៨% គឺជារថយន្តប្រើប្រាស់ថាមពលអគ្គិសនីសុទ្ធ ដែលវាស្មើនឹង ៣៥៦ ៣០០ គ្រឿង។ វាគឺជាកំណត់ត្រាថ្មីសម្រាប់រថយន្តអគ្គិសនី ហើយ JATO Dynamics បានលើកសរសើរ Tesla Model 3 ដែលនាំឲ្យមានកំណើននេះ។

JATO Dynamics កត់សម្គាល់ថានៅឆ្នាំដំបូងក្នុងទីផ្សារអឺរ៉ុប រថយន្ត Model 3 ទទួលបានជោគជ័យខ្លាំង ក្លាយជារថយន្តប្រើថាមពលអគ្គិសនីសុទ្ធដែលលក់ដាច់ជាងគេ។ អឺរ៉ុបបានទិញយករថយន្តនេះជាង ៩៥ ០០០ គ្រឿង ធ្វើឲ្យវាក្លាយជារថយន្តពេញនិយមលំដាប់លេខ ៥១ នៅទ្វីបអឺរ៉ុប៕

ផ្ទាំងផ្សាយពាណិជ្ជកម្ម

ក្រុមហ៊ុនបារាំងបង្ហាញរថយន្តភីកអាប់ដំបូងរបស់ខ្លួន

February 20, 2020

ក្រុមហ៊ុនរថយន្ត Peugeot បានឲ្យតម្រុយអំពីការឈានជើងចូលទីផ្សាររថយន្តភីកអាប់រយៈប៉ុន្មានឆ្នាំមកហើយ ដែលពេលនេះក្រុមហ៊ុនសម្រេចចិត្តបង្ហាញរថយន្តភីកអាប់របស់ខ្លួនជាផ្លូវការ។

វាជាម៉ូដែល Landtrek ដែលនឹងចេញលក់មុនគេនៅអាមេរិកឡាទីន និងអាហ្វ្រិក មុននឹងចេញលក់លើទីផ្សារផ្សេងទៀត។ រថយន្តនេះមានជាប្រភេទមួយបាំង និងពីរបាំង ដែលអាចអូសសណ្ដោងដល់ ១ តោន និង ១,២ តោនសម្រាប់ប្រភេទខ្លះ។

រថយន្តនេះដំណើរការដោយម៉ាស៊ីនម៉ាស៊ូត ១,៩ លីត្រ ឬម៉ាស៊ីនសាំង ២,៤ លីត្រ ប្រភេទ Turbocharged។ ម៉ាស៊ីនម៉ាស៊ូតអាចបង្កើតកម្លាំងបាន ១៤៨ សេះ ភ្ជាប់នឹងប្រអប់លេខដៃ ៦ វគ្គ ដែលមានកម្រិតស៊ីប្រេង ៧,៨ លីត្រ/១០០ គ.ម។

ចំណែកម៉ាស៊ីនសាំងបង្កើតកម្លាំងបាន ២០៧ សេះ អាចភ្ជាប់នឹងប្រអប់លេខដៃ ៦ វគ្គ ឬប្រអប់លេខស្វ័យប្រវត្តិ ៦ វគ្គ។ ចំពោះកម្រិតស៊ីប្រេងមិនទាន់បានបង្ហាញនោះទេ។ វាទាំងពីរមានជម្រើសប្រព័ន្ធបើកបរប៉ុងមួយ និងប្រព័ន្ធបើកបរប៉ុងពីរផងដែរ៕

ផ្ទាំងផ្សាយពាណិជ្ជកម្ម

ឡាន Koenigsegg កម្លាំង ១៥០០សេះថ្មី ទំនងអាចបង្ហាញខ្លួននៅខែក្រោយ

February 20, 2020

យោងតាមប្រភពព័ត៌មានបានឲ្យដឹងថា Koenigsegg នឹងដាក់បង្ហាញរថយន្តរបស់ខ្លួនយ៉ាងហោចណាស់ ២ម៉ូដែល នៅក្នុងកម្មវិធី Geneva Motor Show នាខែមីនា។

បើតាមរូបថតមួយសន្លឹក ដែលបញ្ចេញដោយក្រុមហ៊ុន Koenigsegg បានបង្ហាញឲ្យឃើញ រថយន្តមិនតិចជាង ៥គ្រឿងទេ ស្ថិតនៅក្រោមក្រណាត់ខ្មៅ ដើម្បីត្រៀមបង្ហាញខ្លួន។

ក្នុងនោះដែរ រថយន្ត Koenigsegg ដែលត្រៀមបង្ហាញ មានមួយម៉ូដែលត្រូវហៅឈ្មោះ (codename) ថា KG12 ជារថយន្តទ្វារ២ តែអាចអង្គុយបាន៤នាក់។

តាមរបាយការណ៍ KG12 នឹងបំពាក់ម៉ាស៊ីនអគ្គិសនី គួបផ្សំនឹងម៉ាស៊ីនសាំងចំណុះ ២,០លីត្រ ទំហំ ៣ស៊ីឡាំង ជាមួយបច្ចេកវិទ្យា FreeValve របស់ Koenigsegg និង ម៉ូទ័រអគ្គិសនីដ៏មានកម្លាំងខ្លាំងក្លាមួយ ដែលអាចបង្កើតកម្លាំងបានសរុបដល់ទៅ ១ ៥០០សេះឯណោះ។

រថយន្តខាងលើនេះនឹងត្រូវផលិតត្រឹមតែ ៣០០គ្រឿងប៉ុណ្ណោះ សម្រាប់ទីផ្សារទូទាំងពិភពលោក ជាមួយតម្លៃចាប់ពី ១,៥លានដុល្លារ៕

ផ្ទាំងផ្សាយពាណិជ្ជកម្ម