រោងចក្រ Jaguar Land Rover ៣ នៅអង់គ្លេស អាចបិទទ្វារនៅសប្តាហ៍ក្រោយ ព្រោះខ្វះគ្រឿងពីចិន

February 20, 2020

ក្រុមហ៊ុន Jaguar Land Rover ប្រហែលជាត្រូវបង្ខំចិត្តបិទទ្វាររោងចក្រផលិតរថយន្តរបស់ខ្លួននៅចក្រភពអង់គ្លេស ដោយសារតែខ្វះគ្រឿងពីចិន។

នាយកប្រតិបត្តិក្រុមហ៊ុន Jaguar Land Rover លោក Ralf Speth បានប្រាប់ឲ្យដឹងថា ក្រុមហ៊ុនផលិតរថយន្តអគ្គិសនីមួយនេះ ប្រហែលអស់គ្រឿងប្រើនាសប្តាហ៍ក្រោយ ស្របពេលដែលវីរុសកូរ៉ូណាកំពុងផ្ទុះឡើងខ្លាំង នៅក្នុងប្រទេសចិន។

គួរឲ្យដឹងថា Jaguar Land Rover កំពុងប្រតិបត្តិការណ៍រោងចក្រចំនួន ៣ នៅចក្រភពអង់គ្លេស ដែលផលិតរថយន្តជិត ៤០០ ០០០គ្រឿងជារៀងរាល់ឆ្នាំ។

Jaguar Land Rover គឺជាក្រុមហ៊ុនមួយ ក្នុងចំណោមក្រុមហ៊ុនផលិតរថយន្តជាច្រើនទៀត ដែលកំពុងរងផលប៉ះពាល់ ដោយសារតែការផ្ទុះឡើងនៃវីរុសកូរ៉ូណានេះ៕

ផ្ទាំងផ្សាយពាណិជ្ជកម្ម

ចិន លើកពេលធ្វើកម្មវិធីបង្ហាញរថយន្តដ៏ធំប្រចាំឆ្នាំ ព្រោះវីរុសកូរ៉ូណា

February 19, 2020

ថ្មីៗនេះ មានលេចឮពាក្យមួយចំនួននិយាយថា អ្នករៀបចំកម្មវិធីតាំងបង្ហាញរថយន្ត 2020 Beijing Auto Show គ្រោងលើកពេលកម្មវិធី ដោយសារតែការឆ្លងវីរុសកូរ៉ូណា នៅក្នុងប្រទេសចិន។

ឥឡូវនេះ ព័ត៌មានផ្លូវការបានបញ្ជាក់ហើយថា កម្មវិធី 2020 Beijing Auto Show ដែលគ្រោងធ្វើនៅថ្ងៃទី ២១-៣០ មេសា ២០២០ នឹងត្រូវលើកទៅធ្វើនៅពេលក្រោយទៀត។ យ៉ាងណាក៏ដោយ កាលបរិច្ឆេទជាក់លាក់ថ្មី នឹងត្រូវប្រកាសនៅពេលក្រោយ។

គួរឲ្យដឹងថា ក្រៅពីកម្មវិធី Beijing Auto Show ត្រូវលើកពេល ក៏មានកម្មវិធីធំៗមួយចំនួនទៀតលើកពេលផងដែរ ដូចជា កម្មវិធី Mobile World Congress នៅក្នុងទីក្រុង Barcelona ប្រទេសអេស្ប៉ាញ ត្រូវលុបចោល ខណៈការប្រកួត 2020 Formula 1 Chinese Grand Prix ត្រូវពន្យាពេល៕

ផ្ទាំងផ្សាយពាណិជ្ជកម្ម

ឡាន Nissan GT-R50 សម្រាប់លក់ផ្លូវការដំបូងបង្អស់ នឹងត្រូវដាក់តាំងបង្ហាញឆាប់ៗ

February 19, 2020

វាជិត២ឆ្នាំមកហើយដែល ក្រុមហ៊ុន Nissan និង Italdesign បានបង្ហាញគំរូរថយន្ត GT-R50 ហើយវាក៏ជិតដល់ពេលដែលពួកគេ នឹងដាក់បង្ហាញរថយន្តសម្រាប់លក់ផ្លូវការ មួយគ្រឿងដំបូងបង្អស់ផងដែរ។

ក្រុមហ៊ុនទាំង២ខាងលើ មិនបាននិយាយអ្វីច្រើនពាក់ព័ន្ធរថយន្តនេះឡើយ ប៉ុន្តែ Italdesign បានបង្ហោះរូបថត GT-R50 ហើយសរសេរថា “មិនចាំបាច់ពន្យល់ឡើយ”។

រថយន្ត Nissan GT-R50 នឹងបង្ហាញខ្លួនជាផ្លូវការនៅថ្ងៃទី០៣ មីនា ខាងមុខ ហើយនឹងចេញលក់នៅចុងឆ្នាំ២០២០ នេះតែម្តង។ វានឹងត្រូវផលិតត្រឹមតែ ៥០គ្រឿងប៉ុណ្ណោះ ជាមួយតម្លៃចាប់ពីខ្ទង់ ១លានដុល្លារ ទាំងមិនទាន់គិតពន្ធ និង Option មួយចំនួនទៀត។

GT-R50 បំពាក់ម៉ាស៊ីន Twin-turbo ចំណុះ ៣,៨លីត្រ ទំហំ ៦ស៊ីឡាំង មានកម្លាំងរហូតដល់ទៅ ៧១០សេះ ខ្លាំងជាង GT-R Nismo ដែលមានកម្លាំងត្រឹម ៦០០សេះ និងតម្លៃខ្ទង់ ២០ម៉ឺនប៉ុណ្ណោះ៕

ផ្ទាំងផ្សាយពាណិជ្ជកម្ម

Lexus គ្មានផែនការលក់ឡានអគ្គិសនីនៅអាមេរិក ព្រោះហេតុផលមួយ

February 19, 2020

Lexus បានបង្ហាញចេញរថយន្តប្រើថាមពលអគ្គិសនីសុទ្ធរបស់ខ្លួនម៉ូដែល UX 300e កាលពីខែវិច្ឆិកាឆ្នាំកន្លងទៅ ដែលរថយន្តនេះដែរគឺក្រុមហ៊ុនមិនមានផែនការដាក់លក់វាលើទីផ្សារសហរដ្ឋអាមេរិកនោះឡើយ។

លោក Koji Sato ជាប្រធាននៃក្រុមហ៊ុន Lexus អន្តរជាតិបានលើកឡើងដូចនេះថា ៖ “មិនមានផែនការក្នុងការបញ្ចេញលក់រថយន្តអគ្គិសនីណាមួយនោះទេ (នៅអាមេរិក) ដោយសារដែលគ្មានតម្រូវការ (នៅអាមេរិក) ហើយការស្ថានភាពនៃនិយតករក៏ខុសប្លែកដែរនៅទីនោះ។ យុទ្ធសាស្ត្រមេសម្រាប់បច្ចេកវិទ្យាអគ្គិសនីរបស់យើងគឺ «ចំកន្លែងល្អ, ចំពេលល្អ និងតម្លៃល្អ»។”

លោក Sato ក៏បានបញ្ជាក់ដែរថា UX 300e នឹងដាក់លក់នៅប្រទេសចិន ជប៉ុន និងប្រទេសមួយចំនួននៅអាស៊ី ប៉ុន្តែគោលដៅចម្បងគឺអឺរ៉ុប និងប្រទេសចិន៕

ផ្ទាំងផ្សាយពាណិជ្ជកម្ម

មកដឹងចំនួនអ្នកកុម្ម៉ង់ទិញឡានភីកអាប់អគ្គិសនី Cybertruck នាពេលនេះ ច្រើនមិនធម្មតា!

February 19, 2020

បើផ្អែកតាមការវិភាគលើទិន្នន័យដែលធ្វើឡើងដោយ Cybertruck Owners Club បានប៉ាន់ស្មានអំពីតួលេខចុងក្រោយនៃចំនួនកុម្ម៉ង់ទិញរថយន្ត Cybertruck ដែលមានប្រមាណ ៥៣២ ០០០ គ្រឿង គិតត្រឹមថ្ងៃទី ១៨ កុម្ភៈនេះ។

តួលេខនេះគឺមានការកើនឡើងទ្វេដងបើប្រៀបនឹងថ្ងៃទី ២៦ ខែវិច្ឆិកា ដែលពេលនោះលោក Elon Musk ប្រាប់ថាចំនួនកុម្ម៉ង់ទិញមាន ២៥០ ០០០ គ្រឿង។ ប្រសិនបើតួលេខនេះពិតមែន មានន័យថាក្នុងមួយថ្ងៃមានការកុម្ម៉ង់ទិញ Cybertruck ប្រមាណ ៣៣៥០ គ្រឿង ដែលនេះមានន័យថា Tesla រកបាន ៣៣៥ ០០០ ដុល្លារ ក្នុងមួយថ្ងៃពីថ្លៃកក់រថយន្ត។

តួលេខនេះចាត់ទុកថាអស្ចារ្យខ្លាំង ព្រោះអតិថិជនទាំងនេះមិនធ្លាប់ប្រើប្រាស់រថយន្តភីកអាប់អគ្គិសនីពីមុនមកហើយ ហើយមានភាគច្រើនគឺមិនធ្លាប់ទាំងបានឃើញរូបរាងវាផ្ទាល់ភ្នែកផង៕

ផ្ទាំងផ្សាយពាណិជ្ជកម្ម

Kia កំពុងសម្ងំផលិតឡានអគ្គិសនីកម្លាំងខ្លាំង ជាមួយ Rimac

February 18, 2020

រថយន្តអគ្គិសនីរបស់ Kia ដែលផ្អែកលើគំរូរថយន្ត Imagine កំពុងត្រូវបានបង្កើតឡើង ដោយមានជំនួយពីក្រុមហ៊ុនរថយន្តក្រូអាត Rimac។

រថយន្តអគ្គិសនីថ្មី Kia អាចនឹងមានរូបរាងជា Sedan កាត់ SUV ស្ថិតនៅចន្លោះម៉ូដែល e-Niro និង Soul EV។ អ្វីដែលគួរឲ្យចាប់អារម្មណ៍បំផុតគឺ វានឹងមានកម្លាំងខ្លាំង។ នេះបើតាមការអះអាងពីលោក Carlos Lahoz ប្រធានផ្នែកទីផ្សាររបស់ Kia។

គួរឲ្យដឹងថា កាលពីដើមឆ្នាំ២០១៩ ក្រុមហ៊ុន Hyundai និង Kia បានវិនិយោគលុយចំនួន ៨៦លានដុល្លារជាមួយក្រុមហ៊ុន Rimac ដើម្បីបង្កើតភាពជាដៃគូផ្នែកបច្ចេកទេសជាមួយគ្នា។ ភាពជាដៃគូនេះ ក្រុមហ៊ុនខាងលើនឹងធ្វើការលើរថយន្តស្ព័រថ្មីពី Hyundai N និងអនាគតរថយន្តប្រើអ៊ីដ្រូហ្សែនទៀតផត៕

ផ្ទាំងផ្សាយពាណិជ្ជកម្ម

Cadillac នឹងចេញឡាន SUV អត់ប្រើសាំង ក្នុងខែមេសានេះ!

February 18, 2020

យោងតាមគេហទំព័រ Auto News បានបង្ហាញថា ក្រុមហ៊ុន Cadillac នឹងបង្ហាញរថយន្ត SUV ខ្នាតកណ្តាល ដំណើរការដោយថាមពលអគ្គិសនី នៅក្នុងខែមេសា ឆ្នាំ២០២០ នេះ។

រថយន្តអគ្គិសនីរបស់ Cadillac ត្រូវបានក្រុមហ៊ុនបង្ហើបឲ្យឃើញ កាលពី១៣ខែមុន ដែលមានរូបរាងបែបជ្រុងៗ កាច និងទាប។ ទោះជាយ៉ាងណា វាអាចនឹងផ្លាស់ប្តូររូបរាង និងការរចនាមួយចំនួន នៅពេលចេញលក់ជាផ្លូវការ។

Cadillac នឹងប្រើប្រាស់គ្រោងឆ្អឹងថ្មីលើរថយន្តអគ្គិសនីរបស់ខ្លួន ដែលបាននិងកំពុងប្រើលើរថយន្តអគ្គិសនីរបស់ក្រុមហ៊ុន General Motors ជាច្រើនម៉ូដែលមកហើយ។ គ្រោងឆ្អឹងនេះអាចប្រើជារថយន្តប៉ុងមុខ, ប៉ុងក្រោយ និង ប៉ុងពីរ AWD បានផងដែរ។

ក្រុមហ៊ុន Cadillac បានឲ្យដឹងថា រថយន្តអគ្គិសនីថ្មីនេះ នឹងផ្អោតលើទីផ្សាររថយន្តប្រណីតនៅទូទាំងពិភពលោកតែម្តង។

ទោះបីជាកាលបរិច្ឆេទជាក់លាក់មិនទាន់ត្រូវបានបង្ហាញ ប៉ុន្តែរថយន្ត Cadillac នេះនឹងបង្ហាញខ្លួនក្នុងកម្មវិធី New York Auto Show ដែលធ្វើឡើងចាប់ពីថ្ងៃទី១០ ដល់ ១៩ ខែមេសា ឆ្នាំ២០២០៕

ផ្ទាំងផ្សាយពាណិជ្ជកម្ម

មែនទែនហើយ! Toyota នឹងបង្ហាញឡាន SUV ថ្មី យកលំនាំតាម Yaris

February 18, 2020

នៅឆ្នាំនេះ Toyota នឹងបញ្ចូលនូវ SUV ខ្នាតតូចមួយទៀតក្នុងសែស្រឡាយរថយន្តរបស់ខ្លួន ដែលនឹងស្ថិតនៅក្រុមម៉ូដែល C-HR ហើយវាប្រើប្រាស់គ្រោងឆ្អឹងនិងការឌីហ្សាញដូចជារថយន្ត Yaris ជំនាន់ថ្មី។

រថយន្តថ្មីកំណត់ថានឹងបង្ហាញមុខចំពោះសារព័ត៌មាននាថ្ងៃទី ៣ ខែមីនា ក្នុងកម្មវិធីតាំងបង្ហាញរថយន្ត Geneva Motor Show ដែលវានឹងមានប្រើប្រាស់បច្ចេកវិទ្យា Hybrid ចុងក្រោយរបស់ក្រុមហ៊ុន និងមានប្រព័ន្ធបើកបរប៉ុងពីរទៀតផង។

រថយន្តផ្សេងទៀតដែលនឹងដាក់បង្ហាញនៅ Geneva Motor Show មាន RAV4 Plug-in Hybrid ជាប្រភេទអាចសាកភ្លើងផង ប្រើសាំងផង និង រថយន្ត Mirai ជំនាន់ថ្មីដែលជារថយន្តប្រើថាមពលអ៊ីដ្រូហ្សែន៕

ផ្ទាំងផ្សាយពាណិជ្ជកម្ម

ក្រុមហ៊ុនអូស្ត្រាលីថាអាចដំឡើង Ford Ranger Raptor ឲ្យមានកម្លាំងដល់ ៧១៩សេះ

February 18, 2020

មានការអះអាងថា Ford គឺត្រៀមបញ្ចេញរថយន្ត Ranger Raptor ដែលប្រើប្រាស់ម៉ាស៊ីន ៨ ស៊ីឡាំង សម្រាប់ទីផ្សារប្រទេសអូស្ត្រាលី ហើយពេលនេះក្រុមហ៊ុនជំនាញកែរថយន្តរបស់អូស្ត្រាលីចាប់ផ្ដើមធ្វើការគិតនូវវិធីកែរថយន្តប្រភេទនេះ។

ក្រុមហ៊ុនជំនាញកែរថយន្ត Tickford និយាយថាខ្លួនអាចដំឡើងនូវគ្រឿង Supercharger របស់ Roush នៅលើ Ranger Raptor បាន។ បច្ចុប្បន្ននេះក្រុមហ៊ុនមានផ្ដល់នូវកញ្ចប់ដំឡើងនេះសម្រាប់រថយន្ត Ford Mustang GT ជាមួយម៉ាស៊ីន ៥,០ លីត្រ ៨ ស៊ីឡាំង ដែលផលិតកម្លាំងបាន ៧១៩ សេះ។

គួរដឹងថា Tickford លក់កញ្ចប់ម៉ាស៊ីន ៧១៩ សេះ សម្រាប់រថយន្ត Ford Mustang GT ក្នុងតម្លៃប្រមាណ ១២ ០៩៨ ដុល្លារ ហើយតម្លៃអាចនឹងដូចគ្នាសម្រាប់រថយន្ត Ranger Raptor៕

ផ្ទាំងផ្សាយពាណិជ្ជកម្ម

ឡាន SUV ថ្មី Ford Bronco ឆ្នាំ២០២១ អាចចេញលក់ លឿនជាងការរំពឹងទុក

February 17, 2020

ជាមនុស្សជាច្រើនកំពុងរង់ចាំអ៊ុតមើលរថយន្ត Ford Bronco ស៊េរីឆ្នាំ២០២១ ថ្មី ប៉ុន្តែការរង់ចាំនោះអាចនឹងត្រូវបញ្ចប់ក្នុងពេលឆាប់ៗ។

យោងតាមរបាយការណ៍មួយអះអាងថា រថយន្ត SUV មានសមត្ថភាព Off-road មិនធម្មតាមួយនេះ នឹងបង្ហាញខ្លួនក្នុងកម្មវិធី 2020 New York Auto Show នាខែមេសា ឆ្នាំ២០២០ នេះតែម្តង ស្របពេលដែលរបាយការណ៍ពី Automotive News ឲ្យដឹងថា ការបង្ហាញជាផ្លូវការនឹងធ្វើឡើងក្នុងខែមិនា។

ជាមួយគ្នានេះ ក៏មានរបាយការណ៍មួយចំនួនអះអាងទៀតថា រថយន្ត Ford Bronco នោះ នឹងទទួលបានឈ្មោះថ្មីហៅថា Ford Maverick ខណៈឈ្មួញរថយន្តមួយចំនួននិយាយថា វានឹងត្រូវហៅ Ford Bronco Sport។ ទោះជាយ៉ាងណា នេះគ្រាន់តែជារបាយការណ៍បឋមប៉ុណ្ណោះ និងមិនទាន់មានការបញ្ជាក់ជាផ្លូវការពីក្រុមហ៊ុន Ford ឡើយ។

យ៉ាងណាក៏ដោយ Ford មានសង្ឃឹមដណ្តើមទីផ្សារខ្ពស់ពី Bronco ដែលនឹងចេញលក់ជាម៉ូដែលទ្វារ២ និងទ្វារ៤ ហើយរំពឹងថានឹងលក់បានយ៉ាងហោចណាស់ ២០០ ០០០គ្រឿងក្នុងឆ្នាំ២០២១៕

ផ្ទាំងផ្សាយពាណិជ្ជកម្ម