ម៉ាកឡាន ១០ នេះ ផ្ដល់ការឈឺក្បាលដល់ម្ចាស់តិចតួចជាងគេបំផុត

February 14, 2020

ក្រុមហ៊ុនស្រាវជ្រាវទីផ្សាររបស់អាមេរិក JD Power បានបង្ហាញចេញនូវចំណាត់ថ្នាក់នៃម៉ាករថយន្តគួរអាចទុកចិត្តបានជាងគេប្រចាំឆ្នាំ ២០១៩ របស់ខ្លួន។ ក្រុមហ៊ុនបានធ្វើវាស់វែងតួលេខនៃបញ្ហាដែលអតិថិជនរាយការណ៍អំឡុងពេល ៩០ ថ្ងៃដំបូងនៃការប្រើប្រាស់រថយន្តថ្មីរបស់ពួកគេ។

ខាងក្រោមជាម៉ាករថយន្តគួរឲ្យទុកចិត្តជាងគេ ផ្អែកលើចំនួនបញ្ហាដែលបានរាយការណ៍ក្នុងចំណោមរថយន្ត ១០០ គ្រឿង ៖

១០. Toyota ៖ ១០០ រថយន្តមាន ៩០ បញ្ហា

១០. Lexus ៖ ១០០ រថយន្តមាន ៩០ បញ្ហា

១០. Dodge ៖ ១០០ រថយន្តមាន ៩០ បញ្ហា

៧. Nissan ៖ ១០០ រថយន្តមាន ៨៦ បញ្ហា

៦. Chevrolet ៖ ១០០ រថយន្តមាន ៨៥ បញ្ហា

៥. Lincoln ៖ ១០០ រថយន្តមាន ៨៤ បញ្ហា

៤. Ford ៖ ១០០ រថយន្តមាន ៨៣ បញ្ហា

៣. Hyundai ៖ ១០០ រថយន្តមាន ៧១ បញ្ហា

២. Kia ៖ ១០០ រថយន្តមាន ៧០ បញ្ហា

១. Genesis ៖ ១០០ រថយន្តមាន ៦៣ បញ្ហា

ផ្ទាំងផ្សាយពាណិជ្ជកម្ម

ពីរប្រភេទពិសេសនេះគឺជាការលាគ្នាទៅកាន់ឡានភីកអាប់ Mercedes X-Class

February 14, 2020

ដោយសារតែ Mercedes-Benz បានបញ្ជាក់ថានឹងបញ្ចប់ជីវិតរថយន្ត X-Class នៅចុងខែឧសភាទៅហើយនោះ ក្រុមហ៊ុន Carlex Design បានសម្រេចធ្វើការលាគ្នាជាចុងក្រោយទៅដល់រថយន្តភីកអាប់នេះ។

ក្រុមហ៊ុនជំនាញកែរថយន្តរបស់ប៉ូឡូញនេះ បានប្រកាសចេញប្រភេទពិសេសចំនួនពីរនៃរថយន្ត X-Class គឺ Off-Road Final Edition និង Extreme Final Edition ដែលមានលេងរូបរាងខាងក្រៅប្លែកបំផុត និងផ្លាស់ប្ដូរគ្រឿងបរិក្ខារផ្នែកខាងក្នុងទៀតផង។

ចំណុចខុសគ្នាដ៏ធំរវាងរថយន្តពិសេសទាំងពីរ គឺនៅលើរូបរាងខាងក្រៅ និងការប្រើប្រាស់ពណ៌ស្បែកកៅអីខាងក្នុង ដោយប្រភេទ Off-Road Final Edition មានពណ៌ក្រហមភ្លឺ ហើយប្រភេទ Extreme Final Edition មានពណ៌ខ្មៅ៕

ផ្ទាំងផ្សាយពាណិជ្ជកម្ម

BMW បោះបង់ផែនការសងរោងចក្រនៅរុស្ស៊ី

February 13, 2020

Automative Logistics បានឲ្យដឹងថាក្រុមហ៊ុន BMW នឹងមិនបើករោងចក្រនៅប្រទេសរុស្ស៊ីឡើយ ដោយសារចរចាជាមួយមន្ត្រីរដ្ឋាភិបាលមិនត្រូវគ្នា ជុំវិញការលើកលែងពិសេសផ្នែកអត្រាពន្ធសម្រាប់រោងចក្រ។

បច្ចុប្បន្ននេះ BMW មានក្រុមហ៊ុន Avtotor ជាដៃគូផលិតក្នុងស្រុក ដែលផលិតរថយន្ត 3-series និង 5-series ប្រភេទ Sedan រួមទាំងរថយន្ត SUV នៅទីក្រុង Kaliningrad ប្រទេសរុស្ស៊ី។ គួររំលឹកថាផែនការនៃសាងសង់រោងចក្រផលិតដោយផ្ទាល់ខ្លួនរបស់ BMW ត្រូវបានលោក Stefan Teuchert នាយកប្រតិបត្តិ BMW Russia ប្រកាសកាលពីឆ្នាំ ២០១៨។

ខណៈដែល BMW បោះបង់ចោលគម្រោងការរបស់ខ្លួន ក្រុមហ៊ុន Daimler ដែលជាគូប្រជែងបានបើករោងចក្រ Mercedes-Benz នៅជិតរដ្ឋធានីមូស្គូកាលពីឆ្នាំមុន ដែលបានក្លាយជាម៉ាករថយន្តប្រណីតលក់ដាច់ជាងគេនៅរុស្ស៊ីក្នុងឆ្នាំ ២០១៩ លក់បាន ៤២ ០៤៦ គ្រឿង។ ចំណែក BMW ស្ថិតនៅលេខពីរ លក់បាន ៤១ ៥២០ គ្រឿង៕

ផ្ទាំងផ្សាយពាណិជ្ជកម្ម

ទាំងនេះជាពណ៌សម្រាប់រថយន្ត Ford F-150 ស៊េរីឆ្នាំ ២០២១ ដែលប្ដូរការឌីហ្សាញថ្មី

February 13, 2020

នៅពេលនេះវិបសាយមួយបានបង្ហាញអំពីជម្រើសទាំងអស់សម្រាប់រថយន្ត Ford F-150 ជំនាន់ថ្មីជំនាន់ទី ១៤ ដែលមានការផ្លាស់រូបរាងថ្មី ដោយជឿជាក់ថាវានឹងបង្ហាញខ្លួននៅអំឡុងចុងឆ្នាំ ២០២០ នេះ។

ពណ៌ទាំងអស់គឺមានចំនួន ១៥ ដែលមានពណ៌ខ្លះគេធ្លាប់ស្គាល់ពីមុនមក និងមានពណ៌ខ្លះគឺថ្មីតែម្ដង។ ពណ៌ទាំង ១៥ មានដូចជា ៖

Antimatter Blue Metallic
Carbonized Gray Metallic (ដូចឃើញលើរថយន្ត Mustang Mach-E)
Space White Pearl
Oxford White
Star White Pearl
Race Red
Kodiak Brown Metallic
Stone Gray Metallic
Lucid Red Pearl
Smoked Quartz Metallic
Velocity Blue Metallic
Guard Metallic
Lead Foot Gray
Iconic Silver Metallic
Agate Black Metallic

ប្រភពជិតស្និទ្ធនឹងម៉ាករថយន្ត Ford បានឲ្យដឹងថារថយន្ត F-150 ស៊េរីឆ្នាំ ២០២១ នឹងចូលរោងចក្រផលិតចាប់ពីខែកក្កដានេះ ជាមួយនឹងពេលវេលាចេញលក់អាចនឹងនៅរង្វង់ខែកញ្ញា។

មកទល់ពេលនេះគេដឹងមិនច្រើនឡើយអំពី Ford F-150 ជំនាន់ទី ១៤ ក្រៅតែដឹងថាវានឹងមានប្រភេទម៉ាស៊ីន Hybrid ជាលើកដំបូង បន្ទាប់មកនឹងមានជម្រើសប្រើថាមពលអគ្គិសនីសុទ្ធដែលអាចនឹងចេញ ១ ឆ្នាំក្រោយប្រភេទ Hybrid៕

ផ្ទាំងផ្សាយពាណិជ្ជកម្ម

៤ឆ្នាំទៀត Porsche នឹងឈប់ផលិត Macan ប្រើសាំង

February 13, 2020

ថ្មីៗនេះក្រុមហ៊ុន Porsche ទើបតែបានបញ្ចេញរថយន្តអគ្គិសនីដំបូងបង្អស់របស់ខ្លួនម៉ូដែល Taycan។ ជាមួយគ្នានេះ រថយន្ត Porsche Macan ក៏នឹងមានប្រភេទប្រើអគ្គិសនីសុទ្ធដែរ។

គេរំពឹងថា Porsche Macan EV នឹងបង្ហាញខ្លួននាឆ្នាំក្រោយ ហើយចេញលក់នៅឆ្នាំ២០២២ ឬ២០២៣ ប៉ុន្តែ Porsche ក៏បានដឹងដែរថា អតិថិជនជាច្រើនប្រហែលជាមិនទាន់ត្រៀមខ្លួន សម្រាប់ការផ្លាស់ប្តូរទៅប្រើរថយន្តអគ្គិសនីភ្លាមឡើយ។ ជាលទ្ធផល Porsche បានបញ្ជាក់ថា រថយន្ត Macan ប្រើសាំង និងអគ្គិសនី នឹងត្រូវលក់ជាមួយគ្នា។

យោងតាមគេហទំព័រ Car and Driver បានឲ្យដឹងថា Porsche នឹងបន្តលក់រថយន្ត Macan ប្រើសាំងយ៉ាងហោចណាស់ ៣ឆ្នាំទៀត ដែលមានន័យថា វានឹងមានតែ Macan EV សុទ្ធនៅត្រឹមឆ្នាំ២០២៤។

គួរឲ្យដឹងដែរថា Porsche Macan ប្រភេទប្រើសាំង ដែលបំពាក់ម៉ាស៊ីនចំណុះ ២,០លីត្រ ទំហំ ៤ស៊ីឡាំង គឺជារថយន្តលក់ដាច់បំផុតរបស់ក្រុមហ៊ុន Porsche៕

ផ្ទាំងផ្សាយពាណិជ្ជកម្ម

ឡានអគ្គិសនី Ford Mustang Mach-E លក់នៅអឺរ៉ុប សាកភ្លើងមួយពេញ ជិះបាន៦០០គ.ម៉

February 13, 2020

ក្រុមហ៊ុន Ford នឹងបញ្ចេញរថយន្តអគ្គិសនីថ្មីចំនួន ១៨ម៉ូដែលនៅអឺរ៉ុប មុនដាច់ឆ្នាំ២០២០ នេះ ខណៈរថយន្តដំបូងបង្អស់គឺ Mach-E។

រថយន្ត Ford Mustang Mach-E ប្រភេទ Extended Range ដែលប្រើប៉ុងមួយវិលកង់ក្រោយ នឹងអាចបើកបរបានចម្ងាយ ៦០០គីឡូម៉ែត្រ នៅពេលសាកភ្លើងពេញម្តង។ មិនតែប៉ុណ្ណោះ អាគុយរបស់វាក៏គាំទ្រការសាកភ្លើងល្បឿនលឿន ដោយសាកភ្លើងតាមរយៈខ្សែកម្លាំង ១៥០គីឡូវ៉ាត់ ត្រឹម១០នាទី អាចឡើងដល់ជិត ១០០គីឡូម៉ែត្រ។

យោងតាម Ford បានឲ្យដឹងថា Mustang Mach-E ប្រភេទ Extended Range ដែលប្រើប៉ុងមួយវិលកង់ក្រោយ គឺជាម៉ូដែលពិសេសនិយមបំផុតក្នុងចំណោម SUV អត់ប្រើសាំងរបស់ខ្លួន។

សូមបញ្ជាក់ថា នៅសហរដ្ឋអាមេរិក Mustang Mach-E មានចំនួន ៥ម៉ូដែល ដោយមានតម្លៃចាប់ពី ៤៣ ៨៩៥ដុល្លារ៕

ផ្ទាំងផ្សាយពាណិជ្ជកម្ម

ស្វែងយល់អោយច្បាស់ ពីភ្លើងចរាចរណ៍ក្រហមតែអាចបត់បាន…

February 12, 2020

រូបភាព៖ ស្នងការដ្ឋាននគរបាលរាជធានីភ្នំពេញ

ភ្នំពេញ៖ ថ្ងៃពុធ ទី១២ ខែកុម្ភៈ ឆ្នាំ២០២០ នៅលើបណ្តាញសង្គមហ្វេសប៊ុកផ្លូវការ របស់ស្នងការដ្ឋាននគរបាលរាជធានីភ្នំពេញ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជា ស្នងការនគរបាលរាជធានីភ្នំពេញ បានណែនាំដល់ការិយាល័យចរាចរណ៍ផ្លូវគោក និងអធិការដ្ឋាននគរបាលខណ្ឌទាំង១៤ ត្រូវអនុវត្តតាមដូចខាងក្រោម :

១. ភ្លេីងសញ្ញាចរាចរណ៍ពណ៌ ក្រហម រង្វង់មូលបែបនេះ (ដូច
បង្ហាញក្នុងរូបភាព ) លោកអ្នកអាចបត់ស្តាំបានដោយប្រុងប្រយ័ត្នខ្ពស់ ក្នុងករណីមិនមានឧបសគ្គនៅខាងមុខ ។

២. ភ្លេីងសញ្ញាចរាចរណ៍ដែលមានព្រួញពណ៌ ក្រហម បែបនេះ ( ដូចបង្ហាញក្នុងរូបភាព ) លោកអ្នកមិនអាចបត់ស្តាំបានទេ ទោះក្នុងករណីមិនមានឧបសគ្គនៅខាងមុខក៏ដោយ ។

ផ្ទាំងផ្សាយពាណិជ្ជកម្ម

Mitsubishi គ្រោងលក់ឡាន Outlander សាកភ្លើងនៅថៃ ក្នុងឆ្នាំ២០២១

February 12, 2020

ក្រុមហ៊ុន Mitsubishi Motors Thailand គ្រោងចាប់ផ្តើមលក់រថយន្ត Outlander ប្រភេទ Plug-in Hybrid ដែលដំឡើងនៅប្រទេសថៃ ក្នុងខែមករា ឆ្នាំ២០២១ ខាងមុខនេះ។

រថយន្ត Mitsubishi Outlander ប្រើម៉ាស៊ីន Plug-in Hybrid គឺជាផ្នែកមួយនៃគម្រោង EV របស់រដ្ឋាភិបាលថៃ។ ក្រុមហ៊ុន Mitsubishi បានស្នើសុំលក់រថយន្តចំនួន ២ ប្រភេទ គឺ រថយន្ត Plug-in Hybrid និង រថយន្តអគ្គិសនីសុទ្ធ។

នាយកក្រុមហ៊ុនខាងលើ លោក Morikazu Chokki បានឲ្យដឹងថា ទីផ្សារប្រទេសថៃអាចល្អសម្រាប់រថយន្ត Outlander ប្រើម៉ាស៊ីន Plug-in Hybrid ព្រោះតែស្ថានីយ៍សាកភ្លើង មិនទាន់ដំឡើងបានទូទាំងប្រទេសនៅឡើយទេ។

យ៉ាងណាក៏ដោយ Mitsubishi គ្រោងលក់រថយន្តនេះឲ្យបាន ៣ ០០០គ្រឿងក្នុងមួយឆ្នាំ៕

ផ្ទាំងផ្សាយពាណិជ្ជកម្ម

Toyota អាចនឹងចេញ GR Corolla កម្លាំងជិត ៣០០សេះ ប្រជែង Civic Type R

February 12, 2020

Toyota កំពុងតែត្រៀមខ្លួនបញ្ចេញម៉ូដែល GR លើរថយន្ត Corolla ដែលអាចនឹងបង្ហាញខ្លួនលើទីផ្សារ ក្នុងឆ្នាំ២០២៣ ខាងមុខនេះ។

រថយន្ត Toyota GR Corolla ទំនងអាចប្រើម៉ាស៊ីនដូច Toyota GR Yaris ដែរ គឺចំណុះ ១,៦លីត្រ Turbocharged ដែលអាចបង្កើតកម្លាំងរហូតដល់ទៅ ២៦៨សេះ។

ដូច្នេះ នៅពេលបង្ហាញខ្លួន GR Corolla នឹងក្លាយជារថយន្តប្រភេទ Hot-hatch ដែលនឹងប្រជែងជាមួយនឹង Honda Civic Type R, Hyundai i30 N, VW Golf R និង Ford Focus RS ជាដើម។

មិនតែប៉ុណ្ណោះ GR Corolla ទំនងនឹងប្រើប្រអប់លេខដៃ ៦វគ្គ មកស្តង់ដារតែម្តង។ ដូចដែល Corolla បច្ចុប្បន្នកំពុងប្រើគ្រោងឆ្អឹងថ្មី TNGA ដូច្នេះ Toyota គួរតែអាចធ្វើឲ្យ GR Corolla ក្លាយជារថយន្តដ៏អស្ចារ្យមួយមិនខាង៕

ផ្ទាំងផ្សាយពាណិជ្ជកម្ម

CEO ថ្មីរបស់ក្រុមហ៊ុនរថយន្តបារាំង បានប្រាក់បៀវត្ស ៦,៣លានដុល្លារ លើសអ្នកចាស់ ៥៧%

February 12, 2020

នាយកប្រតិបត្តិថ្មីនៃក្រុមហ៊ុន Renault គឺលោក Luca de Meo នឹងទទួលបានប្រាក់បៀវត្សលើសនាយកប្រតិបត្តិមុនលោក Thierry Bollore ជិត ៥៧%។

ផ្អែកតាមការឲ្យដឹងពីក្រុមហ៊ុន Renault ផ្ទាល់ លោក de Meo នឹងទទួលបានកញ្ចប់ប្រាក់បៀវត្សប្រមាណ ៦,៣ លានដុល្លារក្នុងមួយឆ្នាំ ដោយក្នុងនោះមានប្រាក់ចំណូលជាក់លាក់គឺប្រមាណ ១,៤២ លានដុល្លារសម្រាប់ឆ្នាំនេះ ជាមួយភាគហ៊ុន Renault ចំនួន ៧៥ ០០០ ហ៊ុន។

លោក de Meo ត្រូវបានចាត់តាំងជានាយកប្រតិបត្តិថ្មីកាលពីចុងខែមុន ស្របពេលដែលក្រុមហ៊ុនផលិតរថយន្តរបស់បារាំងនេះ ធ្វើការផ្លាស់ប្ដូរថ្នាក់ដឹកនាំរបស់ខ្លួន៕

ផ្ទាំងផ្សាយពាណិជ្ជកម្ម