ក្រុមហ៊ុន Subaru បានប្រកាសពីតម្លៃសម្រាប់រថយន្តម៉ូឌែល Forester ឆ្នាំ២០២៦ សម្រាប់រថយន្តប្រភេទ off-road ម៉ូឌែល Wilderness ជាម៉ូឌែលមួយតម្លើងថ្លៃលក់ច្រើនជាងគេ ឡើងរហូតដល់ ២ ១៣០ដុល្លារ។ សម្រាប់ម៉ូឌែល Forester ដែលមិនមែនជាប្រភេទ Hybrid ផ្សេងទៀតមានការកើនឡើងតម្លៃតិចតួចប៉ុណ្ណោះ។ សម្រាប់ Forester ស៊េរីឆ្នាំ២០២៦ នេះនឹងត្រូវដាក់រដូវស្លឹកឈើជ្រុះខាងមុខនេះ។
រថយន្ត Subaru Forester Wilderness ស៊េរីឆ្នាំ២០២៦ នឹងត្រូវដាក់លក់ជាមួយតម្លៃចាប់ពី ៣៩ ៨៣៥ដុល្លារ។ ជាមួយតម្លៃនេះគឺថ្លៃជាងម៉ូឌែលឆ្នាំ ២០២៥ ចំនួន ២ ១៣០ដុល្លារ ខណៈម៉ូឌែលចាស់នោះមិនមានការរចនា និងលក្ខណៈពិសេសថ្មីដូចម៉ូដែលថ្មីនេះទេ។ ក្រៅពីប្រើប្រាស់ពីការប្រើប្រាស់គ្រោងឆ្អឹងខុសគ្នា Wilderness ម៉ូឌែលថ្មីរចនាកម្ពស់តួរថយន្តខ្ពស់ជាងមុននិងបំពាក់បំពាក់ធំជាងមុន ដើម្បីងាយស្រួលក្នុងការបើកបរផ្លូវពិបាក។ សម្រាប់ម៉ូឌែលនេះមិនត្រូវបានផ្តល់ជូនជាមួយប្រព័ន្ធ Hybrid ដូចម៉ូឌែល Forester ផ្សេងទៀតឡើយ។ ផ្ទុយទៅវិញ ម៉ូឌែល Wilderness ត្រូវបានបំពាក់ដោយម៉ាស៊ីន ២.៥លីត្រ អាចផលិតកម្លាំងបាន ១៨០សេះ រួមជាមួយនឹងប្រអប់លេខ CVT និងប្រព័ន្ធបើកបរកង់ទាំងអស់ (all-wheel drive)។
សម្រាប់អ្នកដែលចាប់អារម្មណ៍លើរថយន្ត Forester ក្រៅពីម៉ូឌែល Wilderness តម្លៃបានកើនឡើងតិចតួចប៉ុណ្ណោះសម្រាប់ម៉ូឌែលភាគច្រើន។ ក្នុងនោះមានការដំឡើងតម្លៃចំនួន៣០ដុល្លារ ត្រូវបានអនុវត្តចាប់ពីម៉ូឌែលមូលដ្ឋានមានតម្លៃ ៣១ ៤៤៥ រហូតដល់ម៉ូឌែល Touring ដែលមានតម្លៃខ្ពស់បំផុតដល់ ៤៣ ០៤៥ ដុល្លារ។ ចំណែកឯម៉ូឌែល Premium មានតម្លៃ ៣៤ ៨៣៥ដុល្លារ, Sport មានតម្លៃ ៣៧ ៥៥៥ដុល្លារ និង Limited មានតម្លៃ ៣៩ ១៤៥ដុល្លារ។ សម្រាប់ម៉ូឌែលឆ្នាំ ២០២៦ ទាំងអស់បានបំពាក់មកជាមួយមុខងារ Blind-spot monitor និង rear cross-traffic alert ឥឡូវនេះក៏មានមុខងារ lane-keeping assist ផងដែរ។
យ៉ាងមិញក្រុមហ៊ុន Subaru មិនទាន់បានប្រកាសពីតម្លៃសម្រាប់រថយន្ត Forester ម៉ូឌែល Hybrid ឆ្នាំ 2026 នៅឡើយទេ។ ទោះជាយ៉ាងណាក៏ដោយ ព័ត៌មាននោះគួរតែត្រូវបានប្រកាសក្នុងពេលឆាប់ៗនេះ៕
