[ទីផ្សារបរទេស] ក្រុមហ៊ុនផលិតរថយន្ត Subaru បានធ្វើការបញ្ចេញតម្លៃលក់ជាផ្លូវការនៅ Subaru Forester ស៊េរីឆ្នាំ ២០២៥ ប្រភេទ SUV រូបរាងថ្មី ព្រមទាំងទទួលបានការអាប់ឌេតបន្ថែមទាំងផ្នែកខាងក្នុង-ក្រៅ ដែលមានតម្លៃលថ្លៃជាងម៉ូដែលឆ្នាំ ២០២៤ ដល់ទៅ ២៦៥០ ដុល្លារ ពោលគឺមានតម្លៃចាប់ពី ៣១ ០៩០ ដុល្លារ ដល់ ៤១ ៣៩០ ដុល្លារនៅទីផ្សារសហរដ្ឋអាមេរិក ។
រថយន្តនេះ នៅតែផលិតឡើងនៅលើគ្រោងឆ្អឹង Modular Subaru Global Platform ប៉ុន្តែមានកាន់តែរឹងមាំ សុវត្ថិភាពជាងមុន និងដំណើរការដោយម៉ាស៊ីនដដែល ពោលគឺម៉ាស៊ីន boxer ចំណុះ ២,៥ លីត្រ អាចផលិតកម្លាំងបាន ១៨០ សេះ តិចជាងមុន ២ សេះ និងកម្លាំងរមួល ២៤១ ញ៉ូតុនម៉ែត្រ ប្រភេទបើកបរប៉ុង ២ symmetrical AWD និងប្រព័ន្ធ X-Mode system ផងដែរ ។ លើសពីនេះ នឹងទទួលបានម៉ាស៊ីន Hybrid នៅពេលខាងមុខផងដែរ ។
Subaru Forester ស៊េរីឆ្នាំ ២០២៥ មានកំពស់ពីដីទៅបាតរថយន្ត ២០០ ម.ម ប្រើប្រាស់នៅថាសកង់ស្ព័រទំហំ ១៩អ៉ីញពណ៌សំរិទ្ធ (bronze-color) ទ្វាឃ្លុបក្រោយបើក-បិទដោយថាមពលអគ្គិសនីដោយការគ្រវាសជើង ។ មិនត្រឹមតែប៉ុណ្ណោះ ប្រព័ន្ធជំនួយការអ្នកបើកបរ EyeSight driver assist ក៏ត្រូវបានធ្វើឲ្យប្រសើរឡើងជាងមុនទៀតផង ។
ចំពោះនៅផ្នែខាងក្នុង Forester មានការរចនាឡើងវិញ ដែលឥឡូវនេះមានអេក្រង់កំសាន្ត touchscreen បញ្ឈរទំហំ ១១,៦ អ៉ីញ និងកន្លែងសាកថ្មឥតប្រើខ្សែ និងដំបូលកញ្ចក់ panoramic roof និងមានទំហំ ២១០៦ លីត្រនៅពេលបត់កៅអីចុះក្រោម ៕
