[ទីផ្សារបរទេស] ផ្អែកតាមទិន្នន័យសកលដែលរៀបចំឡើងដោយ Fiat Group World ដោយប្រើប្រាស់ទិន្នន័យលក់របស់ក្រុមហ៊ុនរថយន្តពីទីផ្សារផ្សេងៗគ្នា បានបង្ហាញថារថយន្ត Toyota RAV4 គឺជារថយន្តដែលលក់ដាច់បានច្រើនជាងគេកាលពីឆ្នាំ២០២១ ដែលអាចលក់ចេញបានដល់ ១,១៣ លានគ្រឿង។
ដោយឡែក Toyota Corolla ដែលធ្លាប់ជាប់ចំណាត់ថ្នាក់លេខមួយកាលពីឆ្នាំ២០២០នោះ បានថយចំណាត់ថ្នាក់មកនៅលេខពីរជាមួយចំនួនលក់ ១,១លានគ្រឿង ដែលជាចំនួនលក់ទូទាំងសកលលោក។
គួរចាប់អារម្មណ៍ផងដែរថា Tesla Model 3 បានជាប់ចំណាត់ថ្នាក់លេខ១០ ជាមួយចំនួនលក់ ៥០៨ ០០០គ្រឿង នាំមុខរថយន្ត Honda Accord និងរថយន្ត Honda Civic ហើយសម្រាប់ឆ្នាំ២០២២នេះ មានការរំពឹងទុកថា Tesla Model 3 អាចនឹងឡើងឈរនៅចំណាត់ថ្នាក់កំពូលទាំង៥។
ការរំពឹងទុកនេះក៏ដោយសារ Tesla Model 3 មានកំណើនចំនួនលក់ខ្ពស់ជាងគេធៀបនឹងឆ្នាំ២០២០ ដែលចំនួនលក់មានការកើនឡើង ៤០% ខណៈដែលរថយន្តដទៃទៀតមានកំណើតបន្តិចបន្តួចប៉ុណ្ណោះ។
ដោយឡែក Tesla Model Y ក៏លក់ចេញបានច្រើនផងដែរកាលពីឆ្នាំ២០២១ ដោយវាអាចលក់ចេញបាន ៣៩ម៉ឺនគ្រឿង ជាប់ចំណាត់ថ្នាក់លេខ១៩ ហើយចំនួនលក់របស់វាមានកំណើនរហូតដល់ ៤១២% ឯណោះ៕
