ក្រុមហ៊ុន FCA បានចាប់ផ្តើមការដំឡើងរថយន្ត Jeep Wrangler 4xe ប្រភេទសាកភ្លើងថ្មី នៅរោងចក្រ Toledo North របស់ខ្លួន ក្នុងរដ្ឋ Ohio សហរដ្ឋអាមេរិក ជាមួយនឹងរថយន្ត Wrangler ផ្សេងទៀតហើយ។
រថយន្ត SUV ប្រភេទ Plug-in Hybrid នេះ ត្រូវបានគេកំណត់ឲ្យចេញលក់ជាផ្លូវការ នៅដើមឆ្នាំ២០២១ នេះតែម្តង។
Wrangler 4xe ឆ្នាំ២០២១ ប្រើម៉ាស៊ីនចំណុះ ២,០លីត្រ turbocharged និង ម៉ូទ័រអគ្គិសនី២ ដែលបង្កើតកម្លាំងបានសរុប ៣៧៥សេះ។ វាក៏មានបំពាក់កញ្ចប់អាគុយអគ្គិសនីទំហំ ១៧គីឡូវ៉ាត់ម៉ោង ដែលផ្តល់ឲ្យវានូវចម្ងាយបើកបរដោយថាមពលអគ្គិសនីសុទ្ធ ៤០គីឡូម៉ែត្រ នៅពេលសាកភ្លើងពេញម្តង។
Jeep នឹងមានលក់ Wrangler ប្រភេទសាកភ្លើងនេះចំនួន ៣ ម៉ូដែលសម្រាប់ទីផ្សារសហរដ្ឋអាមេរិក គឺ 4xe, Sahara 4xe និង Rubicon 4xe ជាមួយនឹងជម្រើសពណ៌ចំនួន១០។ ទោះជាយ៉ាងណាក៏ដោយ ក្រុមហ៊ុនរថយន្តអាមេរិកមួយនេះ មិនទាន់បានប្រកាសតម្លៃរបស់វានៅឡើយទេ៕
