Genesis G90 បានជាប់ឈ្មោះជារថយន្ត Sedan ខ្នាតធំប្រណីតរបស់កូរ៉េខាងត្បូង ដែលមានភាពទំនើប និងការឌីហ្សាញរូបរាងស្អាត អាចប្រជែងជាមួយនឹងរថយន្តអាល្លឺម៉ង់បាន ជាពិសេសគឺ Mercedes-Benz S-Class តែម្តង។ ថ្មីៗនេះដែរ រថយន្ត Genesis G90 ស៊េរីឆ្នាំ២០២៣ ក៏បានបង្ហាញខ្លួនជាផ្លូវការ ដូច្នេះថ្ងៃនេះ ក្រុមការងារ ខេមបូ អូតូ សូមលើនូវលក្ខណៈពិសេសទាំង ៥យ៉ាងដែលមាននៅលើរថយន្តដ៏ប្រណិតរបស់កូរ៉េមួយនេះមកបង្ហាញជូនបងប្អូនទាំងអស់គ្នា។
ការរចនាផ្នែកខាងក្រៅ
បើនិយាយពីការឌីហ្សាញរូបរាងផ្នែកខាងក្រៅរបស់វា រថយន្ត Genesis G90 ស៊េរីឆ្នាំ២០២៣ ប្រើសំណុំចង្កៀងមុខ LED រាងស្លីម ២ ឈ្នូត ដោយក្នុងនោះវាដើរតួជាអំពូលបំភ្លឺពេលថ្ងៃ, ស៊ីញ៉ូ, ភ្លើងកូត និង ភ្លើងហ្វា ហើយបំពាក់ប៉ាណាមុខរាងជាគ្រាប់ពេជ្រ ទៀតផង។
ងាកមកមើលផ្នែកចំហៀងវិញ វាមានបំពាក់យ៉ាន់កង់ទំហំដល់ ២០អ៊ីញ អមជាមួយនឹងកញ្ចក់ក្តោបអូតូ ហើយមានមុខងារ Blind-spot និងប្រើដៃទ្វារលិបចេញចូល ផងដែរ។
ក្រឡេកទៅមើលផ្នែកខាងក្រោយវិញ វាក៏នៅតែបន្តប្រើការឌីហ្សាញស្តុបបែប ២ ឈ្នូត បុន្តែលាតកាត់ពេញផ្ទៃខាងក្រោយរថយន្តតែម្តង មើលទៅពិតជាទាក់ទាញមែនទែន ទោះបីជាមើលពីចម្ងាយក្តី។
សូមបញ្ជាក់ថា រថយន្តនេះមានប្រវែងតួខ្លួន ៥ ២០០មីលីម៉ែត្រ ទទឹង ១ ៩០០មីលីម៉ែត្រ កម្ពស់ ១ ៤០០មីលីម៉ែត្រ និងប្រវែងពីកង់មុខទៅកង់ក្រោយ ៣ ១០០មីលីម៉ែត្រ។
ការរចនាផ្នែកខាងក្នុង
ចូលទៅមើលផ្នែកខាងក្នុងវិញ រថយន្ត Genesis G90 ស៊េរីឆ្នាំ២០២៣ បានរៀបចំយ៉ាងប្រណីត និង Premium មែនទែន ដោយក្នុងនោះវាបានបំពាក់កុងទ័រឌីជីថលទំហំ ១២,៣អ៊ីញ និងអេក្រង់កម្សាន្ត Touchscreen ទំហំ ១២,៣អ៊ីញ ដែលអាចភ្ជាប់ជាមួយមុខងារ Apple CarPlay និង Android Auto បាន។
បន្ថែមពីនេះ វាក៏មាន Option ពិសេសៗមួយចំនួនទៀត រួមទាំង ដំបូលកញ្ចក់វែង panoramic sunroof, ទ្វារចុចបិទ, ប្រព័ន្ធម៉ាស៊ីនត្រជាក់ ៣តំបន់, ប្រព័ន្ធសំឡេង Bang & Olufsen audio system និង កន្លែងសាកថ្មទូរសព្ទឥតប្រើខ្សែ ជាដើម។
ក្រៅពីនោះ មុខងារថ្មីមួយទៀតត្រូវបានដាក់លើ Genesis ឆ្នាំ២០២៣ គឺ Digital Key 2 ដែលនឹងដោះសោររថយន្តដោយស្វ័យប្រវត្តិ នៅពេលម្ចាស់ដើរចូលទៅជិត។
ប្រព័ន្ធសុវត្ថិភាព និងជំនួយការបើកបរ
បើនិយាយពីប្រព័ន្ធសុវត្ថិភាព និងជំនួយការបើកបរវិញ រថយន្ត Genesis G90 ស៊េរីឆ្នាំ២០២៣ ក៏មិនចាញ់រថយន្តអាល្លឺម៉ង់ប៉ុន្មានដែរ ដោយក្នុងនោះរួមមានទាំង
- ពោងសុវត្ថិភាពចំនួន ៩គ្រាប់,
- ប្រព័ន្ធជំនួយ និងរក្សាគន្លងផ្លូវអោយបានត្រឹមត្រូវ
- ប្រព័ន្ធកំណត់ល្បឿនថេរ និងបន្ថែមបន្ថយល្បឿនតាមរថយន្តខាងមុខស្វ័យប្រវត្តិ
- ប្រព័ន្ធផ្តល់សញ្ញាអាសន្ននៅកញ្ចកចំហៀង ពេលមានឧបសគ្គកមកកៀរ ងាយស្រួសសម្រាប់ការវ៉ាជែងផ្សេងៗ
- ប្រពន្ធដាស់តឿនអ្នកបើកបរពេលងងុយគេង
- ប្រពន្ធជាន់ហ្វ្រាំងបន្ទាន់ដោយស្វ័យប្រវិត្ត ក្នុងលក្ខណអ្នកបើកបរបាត់បង់ម្ចាស់ការ
- និង ប្រព័ន្ធកាំមេរ៉ា ៣៦០ដឺក្រេ ផងដែរ។
ថាមពលម៉ាស៊ីន
សូមបញ្ជាក់ថា រថយន្ត Genesis G90 ស៊េរីឆ្នាំ២០២៣ នេះផ្តល់ជម្រើសម៉ាស៊ីនចំនួន ២ គឺ ម៉ាស៊ីនសាំងចំណុះ ៣,៥លីត្រ turbocharged ទំហំ ៦ស៊ីឡាំង មានកម្លាំង ៣៨០សេះ ប្រើប្រអប់លេខអូតូ ៨វគ្គ និងប៉ុងក្រោយមកស្តង់ដារ ខណៈម៉ាស៊ីនមួយទៀតមានចំណុះ ៣,៥លីត្រ supercharged ទំហំ ៦ស៊ីឡាំង និងមានកម្លាំង ៤០៩សេះ។ ចំពោះកម្រិតស៊ីសាំងរបស់វាជាមធ្យមគឺ ១២លីត្រ/១០០គីឡូម៉ែត្រ។
បើនិយាយពីសន្ទុះល្បឿនវិញ រថយន្តនេះអាចរត់ពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលប្រហែល ៤,៧ វិនាទី ហើយមានល្បឿនអតិបរមា ២៣០គីឡូម៉ែត្រក្នុងមួយម៉ោង។
តម្លៃ
រថយន្ត Genesis G90 ស៊េរីឆ្នាំ២០២៣ នឹងមានតម្លៃចាប់ពីខ្ទង់ ៨៨ ៤០០ដុល្លារ នៅលើសហរដ្ឋអាមេរិក ដែលជាការឡើងថ្លៃដល់ខ្ទង់ ១០ ០០០ បើប្រៀបធៀបទៅនឹងម៉ូដែល G90 ស៊េរីឆ្នាំ២០២២៕
