[បរទេស] មេដឹកនាំកំពូលរបស់ប្រទេសរុស្សីលោក វ្ល៉ាឌីមៀ ពូទីន បានផ្តល់ជូនអំណោយនៅរថយន្ត Limousine Aurus Senat ដ៏ប្រណិតដែលផលិតដោយផ្ទាល់នៅក្នុងប្រទេសរុស្សី ដល់មេដឹកនាំប្រទេសកូរ៉េខាងជើង លោក គីម ជុងអ៊ុន បន្ទាប់ពីដំណើរទស្សនកិច្ចផ្លូវរដ្ឋទៅកាន់ប្រទេសរុស្ស៊ី ដើម្បីរឹតចំនងមិត្តភាពអោយកាន់តែរឹងមាំ។
គួរឲ្យដឹងថា ការផ្តល់អំណោយរបស់ប្រទេសរុស្សីនេះគឺជាការរំលោភលើសេចក្តីសម្រេចរបស់អង្គការសហប្រជាជាតិដែលហៅកាត់ថា UN ទាក់ទងនឹងការហាមឃាត់ការផ្តល់ជូននៅវត្ថុដែលមានតម្លៃដល់ប្រទេសកូរ៉េខាងជើង។ បន្ថែមពីនេះមេដឹកនាំសហរដ្ឋអាមេរិក និងកូរ៉េខាងត្បូង ក៏បានចោទប្រកាន់កូរ៉េខាងជើងថាបានផ្គត់ផ្គង់អាវុធដល់រុស្ស៊ី ដើម្បីជួយដល់ការធ្វើសង្គ្រាមនៅអ៊ុយក្រែនផងដែរ។
រថយន្ត Aurus Senat Limounsine នេះបានពាក់តួខ្លួនពាសដែក ដែលអាចការពារគ្រាប់កាំភ្លើង និងគ្រាប់បែកទៀត រួមទាំងលក្ខណៈពិសេសផេ្សងទៀតមិនចាញ់រថយន្ត The Beast របស់លោក Joe Biden នោះទេ។ រថយន្តនេះ ដំណើរការដោយម៉ាស៊ីនកូនកាត់ Hybrid ធ្វើការរួមគ្នាជាមួយម៉ាស៊ីនសាំងចំណុះ ៤,៤ លីត្រ V8 ដែលអាចផលិតកម្លាំងបានដល់ទៅ ៥៩០ សេះ ៕
