រថយន្ត Jaguar I-Pace ស៊េរីថ្មីឆ្នាំ ២០២១ បានបង្ហាញមុខមាត់ជាផ្លូវការ ដែលមានបន្ថែមនូវមុខងារបច្ចេកវិទ្យាច្រើនជាងមុន និងមានផ្លាស់ប្ដូរការឌីហ្សាញផងដែរ។
រថយន្ត SUV អគ្គិសនីដែលមានតម្លៃចាប់ពីប្រមាណ ៨០ ៩៦៧ដុល្លារ នៅចក្រភពអង់គ្លេស មានបន្ថែមនូវប្រព័ន្ធកម្សាន្តថ្មីឈ្មោះថា Pivi Pro ដែលមានការរៀបរាប់ថាវាអាចប្រើប្រាស់បានដូចជាស្មាតហ្វូន មានផ្ដល់ការបញ្ជាសម្រាប់មុខងារជាច្រើន មានបង្ហាញលើអេក្រង់ Touchscreen ទំហំ ១០អ៊ីញ និងមានចូលរួមដោយអេក្រង់ផ្នែកខាងក្រោមទំហំ ៥អ៊ីញ ហើយមានកុងទ័រឌីជីថលទំហំ ១២,៣អ៊ីញទៀតផង។
រថយន្តនេះអាចមាន Option សម្រាប់បន្ថែមកន្លែងសាកថ្មទូរសព្ទឥតប្រើខ្សែនៅផ្នែកកណ្ដាលផងដែរ។ វាក៏មាននូវ Option ឈ្មោះថា Smartphone Pack ដែលនាំមកជាមួយការគាំទ្រមុខងារ Apple CarPlay, Android Auto និង Bluetooth ដែលអាចភ្ជាប់ជាមួយទូរសព្ទពីរក្នុងពេលតែមួយ ហើយវាមានបង្កប់ដោយស៊ីមកាតសម្រាប់ប្រើអ៊ីនធឺណិត 4G បានទៀតផង។
រថយន្ត I-Pace ឆ្នាំ ២០២១ នេះ មានបំពាក់មកជាមួយនូវឆ្នាំងសាកកម្លាំង ១១kW ដែលអាចជិះបានចម្ងាយ ៥៣គ.ម ពេលសាកមួយម៉ោង។ ការសាកភ្លើងឲ្យពេញចំណាយពេល ៨,៦ម៉ោង ដោយប្រើឆ្នាំងសាក ១១kW។ បើមានឆ្នាំងសាក ៥០kW អាចជិះបានចម្ងាយ ៦៣គ.ម ពេលសាកត្រឹម ១៥នាទី ឬជិះបានចម្ងាយ ១២៦គ.ម បើប្រើឆ្នាំងសាក ១០០kW។
Jaguar I-Pace នេះមានបំពាក់ម៉ូទ័រអគ្គិសនីពីរដែលផលិតកម្លាំងបានសរុប ៣៩៤សេះ ហើយអាគុយ ៩០kWh របស់វាអាចជិះបានចម្ងាយ ៤៧០គ.ម ពេលសាកភ្លើងពេញ៕
