Hyundai នឹងចេញលក់រថយន្ត Venue ថ្មីនៅប្រទេសឥណ្ឌាក្នុងពេលឆាប់ៗខាងមុខ ដោយបំពាក់ប្រអប់លេខដៃ ប៉ុន្តែអត់មានឈ្នាន់អំប្រ៊ីយ៉ាឡើយ។
ក្រុមហ៊ុនរថយន្តកូរ៉េខាងលើបានហៅប្រអប់លេខដៃដ៏ពិសេសនេះថា Intelligent Manual Transmission (iMT) ដែលគួបផ្សំរវាងប្រអប់លេខដៃ និងប្រអប់លេខអូតូ ទៅក្នុងប្រព័ន្ធតែមួយ។
ប្រអប់លេខដៃ iMT នេះ នឹងមានបំពាក់តែលើរថយន្ត Hyundai Venue ម៉ាស៊ីនសាំងចំណុះ ១,០លីត្រ Turbo កម្លាំង ១២០សេះប៉ុណ្ណោះ។
គួរឲ្យដឹងថា iMT ខាងលើ គឺដូចទៅនឹងប្រអប់លេខដៃធម្មតាអីចឹង ដោយមានកន្លែងដាក់លេខរាងអក្សរ H ៦វគ្គ សម្រាប់ទៅមុខ និងថយក្រោយ។ អ្នកបើកបរអាចដាក់លេខបានតាមចិត្តចង់ ដូចលើប្រអប់លេខដៃធម្មតាដទៃទៀតអីចឹង គ្រាន់តែរថយន្តនេះមានឈ្នាន់តែ ២ប៉ុណ្ណោះ គឺឈ្នាន់ហ្វ្រាំង និងឈ្នាន់ហ្គែរ។
យ៉ាងណាមិញ ក្រុមហ៊ុន Kia ដែលជាសាច់ញាតិរបស់ Hyundai ក៏ធ្លាប់បានប្រកាសដែរថា នឹងបំពាក់ប្រអប់លេខដៃពិសេសនេះលើរថយន្ត Sonet SUV របស់ខ្លួន៕
