យោងតាមប្រភពព័ត៌មានបានឲ្យដឹងថា ប្រទេសចិនចង់លើកទឹកចិត្តឲ្យមានការរួបរួមគ្នា ក្នុងចំណោមក្រុមហ៊ុនផលិតរថយន្តអគ្គិសនីរាប់រយរបស់ខ្លួន។
ប្រទេសចិនបានលើកកម្ពស់រថយន្តអគ្គិសនីក្នុងរយៈពេលប៉ុន្មានឆ្នាំចុងក្រោយនេះ ហើយឥឡូវវាមានក្រុមហ៊ុនផលិតរថយន្តអគ្គិសនី ប្រមាណ ៣០០ ក្រុមហ៊ុនឯណោះ។ នេះបើយោងតាមរដ្ឋមន្ត្រីក្រសួងឧស្សាហកម្ម និងបច្ចេកវិទ្យាព័ត៌មាន លោក Xiao Yaqing។
រដ្ឋមន្ត្រីខាងលើបាននិយាយថា “ក្រុមហ៊ុនទាំងនោះភាគច្រើន ជាក្រុមហ៊ុនតូចតាច។ យើងលើកទឹកចិត្តឲ្យមានការរួមបញ្ចូលគ្នា និងការរៀបចំរចនាសម្ព័ន្ធឡើងវិញ នៅក្នុងវិស័យរថយន្តអគ្គិសនី ដើម្បីបង្កើនការប្រមូលផ្តុំទីផ្សារបន្ថែមទៀត”។
គួរឲ្យដឹងថា រដ្ឋាភិបាលចិនបានផ្តល់ប្រាក់ឧបត្ថម្ភធនប្រមាណជា ៥,១ ពាន់លានដុល្លារ ដើម្បីលើកទឹកចិត្តអ្នកប្រើប្រាស់ឲ្យទិញរថយន្តអគ្គិសនី ក្នុងរយៈពេល ៥ ឆ្នាំ។ មិនតែប៉ុណ្ណោះ អាជ្ញាធរខេត្តជាច្រើនក៏បានផ្តល់ការបន្ធូរបន្ថយពន្ធដ៏ច្រើន និងការលើកទឹកចិត្តផ្សេងទៀត ដើម្បីលើកទឹកចិត្តដល់ក្រុមហ៊ុនផលិតរថយន្តអគ្គិសនី ដើម្បីបង្កើតរោងចក្រផលិតទៀតផង៕
