[ទីផ្សារបរទេស] តាមការចុះផ្សាយរបស់វិបសាយ Cars Direct បានឲ្យដឹងថារថយន្ត Lexus LS Hybrid នៅសហរដ្ឋអាមេរិក បានឡើងថ្លៃរហូតដល់ ២១ ០០០ដុល្លារ ដែលធ្វើឲ្យវាថ្លៃជាងរថយន្ត LS ធម្មតាប្រមាណ ៣៦ ០០០ដុល្លារឯណោះ។
ការឡើងថ្លៃនេះធ្វើឲ្យ Lexus LS Hybrid នៅសហរដ្ឋអាមេរិកមានតម្លៃចាប់ពី ១១២ ០០០ដុល្លារ ដែលជាតម្លៃប្រកួតប្រជែងមួយបើធៀបទៅនឹងរថយន្តគូប្រជែង Mercedes S-Class ដែលមានតម្លៃចាប់ពី ១១១ ១០០ដុល្លារ។
ការឡើងថ្លៃនេះដែរមិនមែនឥតហេតុផលនោះទេ ព្រោះថា LS Hybrid នឹងមានបន្ថែមចំណុចពិសេសៗមកជាស្តង់ដារតែម្ដង។ LS Hybrid នឹងមានមកជាស្តង់ដារនូវប្រព័ន្ធបើកបរប៉ុងពីរ, មានមុខងារ Cruise Control ស្វ័យប្រវត្តិពាក់កណ្ដាលឈ្មោះថា Teammate, មានប្រព័ន្ធជំនួយដល់ការបើកបរដែលទំនើបជាងមុន និងប្រព័ន្ធសុវត្ថិភាព Safety System 2.5+ ថែមទៀតផង។
អ្នកតំណាង Lexus បានបញ្ជាក់ថា LS Hybrid នឹងជាម៉ូដែលតែមួយគត់ដែលមានបំពាក់បច្ចេកវិទ្យាដូចរៀបរាប់ខាងលើមកជាស្តង់ដារ។ បន្ថែមពីនេះវាក៏នឹងមានបំពាក់មុខងារដែលមានក្នុងកញ្ចប់ Luxury Package ដោយមិនត្រូវការចំណាយប្រាក់បន្ថែមឡើយ ដោយក្នុងនោះមានមុខងារបូមខ្យល់, មានរូបភាពដែលបង្ហាញចេញជាប្រភេទ Panoramic និងមានមុខងារ Head-Up Display ជាដើម៕
