កាលពីដើមសប្ដាហ៍ក្រុមហ៊ុន SAIC-GM-Wuling (ក្រុមហ៊ុនបីសហការគ្នា) បានបង្ហាញចេញរថយន្តអគ្គិសនីដំបូងរបស់ម៉ាក Wuling ដែលជាម៉ូដែល Hongguang Mini EV។
រថយន្តអគ្គិសនីនេះមានប្រវែងត្រឹម ២៩១៧ ម.ម, ទទឹង ១៤៩៣ ម.ម, កម្ពស់ ១៦២១ ម.ម និងប្រវែងពីកង់មុខទៅកង់ក្រោយមាន ១៩៤០ ម.ម។ ត្បិតថារូបរាងតូចមែន ប៉ុន្តែវាមានកន្លែងអង្គុយសម្រាប់មនុស្សបួននាក់ ហើយ Wuling បានពណ៌នាថាផ្នែកខាងក្នុងមានទំហំទូលាយគួរឲ្យភ្ញាក់ផ្អើលបំផុត។
តាមរូបភាពបានបង្ហាញថាគេបានបំពាក់កៅអីអង្គុយជួរទីពីរនៅទីតាំងដែលត្រូវជាកន្លែងដាក់ឥវ៉ាន់។ ដូចនេះរថយន្ត Mini EV នេះអាចសម្រាប់ដឹកមនុស្សបានបួននាក់ដោយមិនមានឥវ៉ាន់ ឬដឹកមនុស្សពីរនាក់ដោយមានឥវ៉ាន់។
ក្រុមហ៊ុនមិនបានប្រាប់អំពីលក្ខណៈសម្បត្តិគ្រឿងម៉ាស៊ីននោះទេ ប៉ុន្តែវិបសាយ Carnewschina អះអាងថាវាមានម៉ូទ័រអគ្គិសនីកម្លាំង ២៧ សេះ ដែលបានថាមពលពីអាគុយទំហំ ១៣,៨២ គីឡូវ៉ាត់ម៉ោង និងមានល្បឿនអតិបរមា ១០០ គ.ម/ម៉។
រថយន្តរាងដូចប្រអប់មួយនេះនឹងមានលក់លើទីផ្សារប្រទេសចិននៅក្នុងត្រីមាសទី ៣ នៃឆ្នាំ ២០២០៕
