ជាទូទៅសម្រាប់រថយន្តសាំង នៅពេលចេញសញ្ញាឆេក គឺវាបង្ហាញពីបញ្ហាដែលកើតឡើងនៅផ្នែកណាមួយនៅក្នុងប្រព័ន្ធសាំង ម៉ាស៊ីន ប្រព័ន្ធទឹក ប្រព័ន្ធខ្យល់ និងប្រព័ន្ធបញ្ចេញផ្សែង ពោលគឺរួមមានដូចជា ប៊ិចសាំង ប៊ូស៊ី សំបុកឃ្មុំ ឌុយស៊ីមុំាង ក្លាប៉េទឹក ឬ Mass Air Flow ជាដើម។
ចំណែករថយន្តអគ្គិសនី ទោះបីមិនមានម៉ាស៊ីន និងឥន្ធនៈក៏ដោយ ប៉ុន្តែវាក៏នឹងចេញសញ្ញាឆេកក្នុងកុងទ័រ ឬអេក្រង់ថាច់ស្គ្រីនរថយន្តផងដែរ ប្រសិនបើមានបញ្ហា ឬកំហូចណាមួយ ក្នុងករណីដូចខាងក្រោមនេះ៖
១. ប្រព័ន្ធអាគុយ
២. ប្រព័ន្ធបញ្ចុះកម្តៅអាគុយ ឬម៉ូទ័រ
៣. ប្រព័ន្ធបំលែងថាមពល
៤.ប្រព័ន្ធថាមពលដែលបង្កើតឡើងចេញពីការជាន់ហ្វ្រាំង
៥. កំហូចសេនស័រណាមួយ
និង ៦. បញ្ហាការអាប់ដេត Software។
ដូចច្នេះ ប្រសិនបើលោកអ្នកកំពុងបើកបរលើរថយន្តអគ្គិសនី ហើយស្រាប់តែចេញសញ្ញាឆេក សូមកុំទាន់ច្រួលច្របល់អី។ បើរថយន្តនៅតែដំណើរការរលូនធម្មតា គ្មានសំឡេងអ្វីប្លែក គឺអាចបន្តបើកបរបាននិងស្វែងរកការ៉ាស់ដើម្បីត្រួតពិនិត្យ។ ប៉ុន្តែប្រសិនបើកត់សម្គាល់ឃើញថា ថាមពលអាគុយស្រាប់តែធ្លាក់ចុះខ្លាំង មានសំឡេងប្លែក ជាន់ហ្គែស្ទក់ៗ និងមានធុំក្លិនឆ្ងៀមនោះ គឺគួរតែឈប់រថយន្តភ្លាមៗតាមដែលអាចធ្វើបាន ហើយស្វែងរកជំនួយ៕
