[ទីផ្សារបរទេស] Ford កំពុងអភិវឌ្ឍន៍គំរូស្ថានីយសាកភ្លើងរ៉ូបូតដែលអ្នកបើកបររថយន្តអគ្គិសនី អាចបញ្ជារ៉ូបូតឲ្យសាកភ្លើងរថយន្តតាមរយៈទូរសព្ទដៃបានដោយងាយស្រួល មិនចាំបាច់ចេញពីរថយន្ត។
Ford និយាយថាបច្ចេកវិទ្យាថ្មីនេះអាចផ្ដល់ភាពងាយស្រួលដល់អ្នកបើកបរដែលមានកាយសម្បទាមិនគ្រប់គ្រាន់ ដោយពួកគេអាចស្ថិតនៅក្នុងរថយន្ត Mustang Mach E, F-150 Lightning ឬរថយន្តអគ្គិសនីដទៃទៀត ខណៈពេលដែលកំពុងសាកភ្លើងរថយន្ត។
ដំណើរនៃការរ៉ូបូតសាកភ្លើងនេះគឺដំបូងឡើងនៅពេលដែលបើកដំណើរការ ស្ថានីយសាកភ្លើងនឹងបើកគម្រប រួចបញ្ចេញដៃសាកភ្លើងសំដៅទៅកាន់រន្ធសាករបស់រថយន្តអគ្គិសនី ដែលមើលទៅទំនងជាអាចដំណើរការបានដោយប្រើប្រាស់កាមេរ៉ា។ សូមទស្សនាវីដេអូខាងក្រោម ៖
ពេលដែលរថយន្តសាកភ្លើង ម្ចាស់រថយន្តអាចសង្កេតមើលស្ថានភាពនៃការសាកភ្លើងតាមរយៈកម្មវិធីឈ្មោះថា FordPass ហើយពេលដែលសាកភ្លើងរួចរាល់ដៃរ៉ូបូតនឹងដកខ្លួនចេញពីរន្ធសាកត្រឡប់ទៅកាន់ទីតាំងដើមរបស់ខ្លួនវិញ
បច្ចុប្បន្ននេះ បច្ចេកវិទ្យាទំនើបនេះគឺមានតែមួយប៉ុណ្ណោះក្នុងលោក ដោយសាងសង់ឡើងដោយសកលវិទ្យាល័យ Dortmund នៅក្នុងប្រទេសអាល្លឺម៉ង់។ Ford និយាយថានៅថ្ងៃអនាគតខ្លួនអាចនឹងដំឡើងស្ថានីយសាកភ្លើងនេះនៅតាមស្ថានីយភ្លើងរបស់ជនដែលមានកាយសម្បទាមិនគ្រប់គ្រាន់៕
