[ទីផ្សារបរទេស] រថយន្ត Honda Prologue ដែលជារថយន្ត SUV អគ្គិសនីថ្មីរបស់ Honda បានបង្ហាញខ្លួនជាផ្លូវការក្នុងនាមជា SUV ដំបូងរបស់ Honda សម្រាប់វាយលុកចូលទីផ្សារសហរដ្ឋអាមេរិក។
រថយន្ត Prologue នេះនឹងត្រូវបានចូលរួមដោយរថយន្តអគ្គិសនីយ៉ាងតិច ៣០ម៉ូដែល ដែល Honda នឹងត្រូវប្រកាសចេញសម្រាប់ទីផ្សារពិភពលោកនៅត្រឹមឆ្នាំ២០៣០ ជាមួយផែនការកាត់ផ្ដាច់ការលក់រថយន្តម៉ាស៊ីនពីស្តុងនៅត្រឹមឆ្នាំ២០៤០។
រថយន្តអគ្គិសនីនេះគឺជាការសហការបង្កើតជាមួយក្រុមហ៊ុនអាមេរិក General Motors ដោយប្រើប្រាស់គ្រោងឆ្អឹង BEV3 របស់ក្រុមហ៊ុន General Motors ផ្ទាល់។
Prologue នេះមានប្រវែងសរុប ៤៨៧៧ម.ម ទទឹង ១៩៨៩ម.ម ជាមួយកម្ពស់ ១៦៤៣ម.ម និងប្រវែងពីកង់មុខទៅកង់ក្រោយគឺ ៣០៩៤ម.ម ដែលប្រវែងសរុបរបស់វាគឺវែងជាង Honda CR-V ស៊េរីឆ្នាំ២០២៣ ប្រវែង ២០៣ម.ម និងមានទទឹងធំជាង ១២៧ម.ម។
យ៉ាងណាក្ដីទាក់ទងនឹងលក្ខណៈសម្បត្តិបច្ចេកទេស នៅមិនទាន់បានបង្ហាញចេញនៅឡើយទេ ប៉ុន្តែអ្វីដែលគេបានដឹងគឺថារថយន្តអគ្គិសនីនេះនឹងមានជម្រើសប្រព័ន្ធបើកបរប៉ុងពីរ ដោយមិនច្បាស់ពីជម្រើសប៉ុងមួយនៅឡើយទេ។
Honda Prologue នឹងត្រូវចេញលក់លើទីផ្សារនាឆ្នាំ២០២៤ ដោយតម្លៃលក់ និងលក្ខណៈសម្បត្តិ នឹងត្រូវបង្ហាញចេញពេលដែលជិតដល់ថ្ងៃដាក់លក់ជាផ្លូវការ៕
