ចាប់ពីឆ្នាំ២០២០ Mercedes ប្រហែលអាចឈប់ផលិតម៉ូដែល AMG ព្រោះមូលហេតុមួយ

December 23, 2019

យោងតាមរបាយការណ៍ថ្មីបានឲ្យដឹងថា ក្រុមហ៊ុន Mercedes កំពុងពិចារណាកាត់ចោលការផលិតរថយន្ត AMG មួយចំនួន ដោយសារតែការរឹតបន្តឹងការបំភាយជាតិពុលនៅអឺរ៉ុប។

កាសែត Financial Times បានឲ្យដឹងថា ក្រុមហ៊ុន Daimler (ក្រុមហ៊ុនមេរបស់ Mercedes) ទំនងអាចកាត់បន្ថយ ៧៥% នៃត្រកូល AMG បច្ចុប្បន្ន ដែលមានកម្រិតបំពុលបរិស្ថានខ្លាំងបំផុតនៅអាល្លឺម៉ង់។

គួរឲ្យដឹងថា បច្ចុប្បន្ននេះរថយន្ត AMG ជាច្រើនម៉ូដែល មានកម្រិតបំភាយជាតិពុល ១៣៨ក្រាម/គីឡូម៉ែត្រ ខណៈគោលការណ៍អនុញ្ញាតឲ្យត្រឹម ១០០ក្រាម/គីឡូម៉ែត្រប៉ុណ្ណោះ។ ប្រសិនបើក្រុមហ៊ុនមិនធ្វើតាម នឹងទទួលពិន័យធ្ងន់ធ្ងរពីសហភាពអឺរ៉ុប ក្នុងឆ្នាំ២០២១ ជាមិនខាន។

ទោះបីជាយ៉ាងណា រថយន្ត Mercedes ប្រភេទ High-performance ជួយឲ្យក្រុមហ៊ុនចំណេញច្រើនជាងរថយន្ត Mercedes ធម្មតា៕

ផ្ទាំងផ្សាយពាណិជ្ជកម្ម

ឡានអគ្គិសនីថ្មីទើបលក់នៅឥណ្ឌា តម្លៃតែជាង ២ ម៉ឺនដុល្លារ

December 23, 2019

Tata Motors បានបង្ហាញជាផ្លូវការនូវរថយន្តអគ្គិសនី Nexon EV ជាប្រភេទរថយន្ត SUV ដែលមានតម្លៃចាប់ពីប្រមាណ ២១ ០០០ ដុល្លារ ទៅ ២៣ ៨០០ ដុល្លារ ជាតម្លៃលក់នៅឥណ្ឌា។

រថយន្តនេះដំណើរការដោយបច្ចេកវិទ្យា Ziptron ជាបច្ចេកវិទ្យាចុងក្រោយរបស់ក្រុមហ៊ុន។ វាបានថាមពលពីម៉ូទ័រអគ្គិសនីចំនួន ១ ដែលបង្កើតកម្លាំងបាន ១២៩ សេះ, អាគុយអាចផ្ទុកថាមពលបាន ៣០,២ គីឡូវ៉ាត់ម៉ោង។ ចំណាយពេល ៩,៩ វិនាទី វាអាចបង្កើនសន្ទុះបានពី ០-១០០ គ.ម/ម៉ ហើយសាកពេញអាចជិះបាន ៣០០ គីឡូម៉ែត្រ។

បច្ចេកវិទ្យា Ziptron គឺអាចធ្វើការសាកបញ្ចូលបានថ្មលឿន ដែល Tata អះអាងថាចំណាយពេលតែ ៦០ នាទី អាចសាកពី ០ ដល់ ៨០% ដោយប្រើប្រាស់នូវឌុយ IEC 62196 Type 2។ ចំពោះការសាកថ្មតាមឌុយ ១៥អំពែ ធម្មតាវិញ សាកមួយម៉ោង បាន ១០% ប៉ុណ្ណោះ។

រថយន្តនេះបានចាប់ផ្ដើមទទួលការកក់ពីពេលនេះ ដោយការដឹកជញ្ជូននឹងចាប់ផ្ដើមនៅខែមករា ឆ្នាំ ២០២០។ រថយន្តទាំងអស់មានការធានា ៨ ឆ្នាំ ឬ ១៦ ម៉ឺនគីឡូម៉ែត្រ សម្រាប់អាគុយ និងម៉ូទ័រអគ្គិសនីរបស់វា៕

ផ្ទាំងផ្សាយពាណិជ្ជកម្ម

Toyota ជាប់ជាម៉ាករថយន្តដែលអូស្រ្តាលីទុកចិត្តជាងគេ

December 23, 2019

ការស្ទង់មតិជាមួយជនជាតិអូស្ត្រាលី ១៤ ៣៨៣ នាក់ ដែលធ្វើឡើងដោយ Down Under កាលពីថ្មីៗនេះ បានបង្ហាញថា Toyota គឺជាម៉ាករថយន្តដែលគេទុកចិត្តខ្លាំងជាងគេបំផុត។

តំណែងលេខពីរគឺបានទៅលើក្រុមហ៊ុន Mazda តាមពីក្រោយដោយ Honda, Subaru, Nissan, Hyundai, Tesla, Mercedes, Kia និង Ford។ សង្កេតឃើញថាម៉ាកនៅតំណែងកំពូលទាំង ៥ សុទ្ធសឹងជាម៉ាករបស់ជប៉ុន។

មួយទៀតការដែល Tesla នាំមុខ Mercedes, Kia និង Ford ក៏ជាលទ្ធផលគួរភ្ញាក់ផ្អើលមួយ មានន័យថាជនជាតិអូស្ត្រាលីទទួលស្គាល់លើកេរ្តិ៍ឈ្មោះរបស់ក្រុមហ៊ុនផលិតរថយន្តអគ្គិសនីនេះ ថាជាក្រុមហ៊ុនច្នៃប្រឌិតមួយ៕

ផ្ទាំងផ្សាយពាណិជ្ជកម្ម

ឡានបើកដំបូល Lexus LC 500 Convertible ឆ្នាំ២០២០ មួយគ្រឿងដំបូងបង្អស់ នឹងត្រូវលក់ដេញថ្លៃយកលុយដុំ

December 21, 2019

នៅទីបំផុតក្រុមហ៊ុន Lexus បានដាក់បង្ហាញរថយន្តស្ព័របើកដំបូលបាន LC 500 Convertible ស៊េរីឆ្នាំ២០២០ ជាផ្លូវការ។ ថ្វីបើក្រុមហ៊ុនមិនទាន់បង្ហាញពីតម្លៃរបស់វា ប៉ុន្តែគេដឹងរួចមកហើយថា វានឹងមានតម្លៃថ្លៃជាងរថយន្ត Lexus LC 500 Coupe ធម្មតា ដែលមានតម្លៃ ៩២ ៣០០ដុល្លារលើទីផ្សារបរទេស។

ជាមួយគ្នានេះ នៅខែក្រោយ រថយន្ត Lexus LC 500 Convertible បើកដំបូលមួយគ្រឿងដំបូងបង្អស់ នឹងត្រូវដាក់លក់ដេញថ្លៃយកលុយដុំ នៅ Barrett-Jackson Auction ក្នុងទីក្រុង Scottsdale រដ្ឋ Florida សហរដ្ឋអាមេរិក។

LC 500 Convertible មួយគ្រឿងដំបូងបង្អស់នោះ គឺជាប្រភេទ Inspiration Series ដែលផលិតតែ ១០០គ្រឿងគត់លើពិភពលោក ហើយមានលេខតួ VIN 001 និងបំពាក់លក្ខណៈពិសេស ដែលមិនមានលើរថយន្ត LC 500 ដទៃទៀត បូករួមទាំងទឹកថ្នាំពណ៌ពិសេសខុសគេទៀតផង។

គួរឲ្យដឹងថា រថយន្ត Chevrolet Corvette Stingray ឆ្នាំ២០២០ មួយគ្រឿងដំបូងបង្អស់ ធ្លាប់ដាក់លក់ដេញថ្លៃបានរហូតដល់ទៅ ២,៧លានដុល្លារ កាលពីខែមិថុនាកន្លងទៅនេះ៕

ផ្ទាំងផ្សាយពាណិជ្ជកម្ម

Tesla ចង់ទម្លាក់តម្លៃ Model 3 លក់នៅចិន

December 21, 2019

តាមការចុះផ្សាយរបស់ Los Angeles Times បានឲ្យដឹងថា Tesla កំពុងពិចារណាទម្លាក់តម្លៃរថយន្ត Model 3 ផលិតនៅប្រទេសចិន សម្រាប់លក់នៅទីផ្សារក្នុងស្រុកនាឆ្នាំក្រោយ។

ជាមួយនឹងការដំណើរការនូវរោងចក្រផលិតដ៏ធំនៅសៀងហៃ អ្នកដែលជិតស្និទ្ធនឹង Tesla អះអាងថាក្រុមហ៊ុនអាចនឹងបញ្ចុះតម្លៃរថយន្ត Model 3 រហូតដល់ ២០% នៅឆ្នាំក្រោយ ដើម្បីទាក់ទាញចិត្តអតិថិជនក្នុងទីផ្សារប្រទេសចិនដែលកំពុងលំបាកលំបិន។

បច្ចុប្បន្ននេះតម្លៃ Tesla Model 3 ដែលផលិតនៅប្រទេសចិន មានដាក់លក់នៅចិនក្នុងតម្លៃចាប់ពីប្រមាណ ៥០ ៨០០ ដុល្លារ ដូចនេះតម្លៃសម្រាប់ឆ្នាំក្រោយអាចនឹងមានចាប់ពីប្រមាណ ៤០ ៦០០ ដុល្លារប៉ុណ្ណោះ។

នៅត្រឹមដំណាច់ឆ្នាំ ២០១៩ Tesla រំពឹងថានឹងអាចផលិតរថយន្ត Model 3 បានយ៉ាងហោចណាស់ ១ ពាន់គ្រឿងក្នុងមួយសប្ដាហ៍ នៅរោងចក្រនាទីក្រុងសៀងហៃ៕

ផ្ទាំងផ្សាយពាណិជ្ជកម្ម

McLaren GT ថ្មី ដាក់លក់នៅថៃ ជិត១លានដុល្លារ

December 21, 2019

ក្រុមហ៊ុន McLaren Bangkok បានប្រកាសចេញលក់រថយន្ត McLaren GT ជាផ្លូវការ នៅក្នុងប្រទេសថៃ ជាមួយនឹងតម្លៃចាប់ពី ២៣,៩លានបាត ឬប្រហែលខ្ទង់ ៧៩ម៉ឺនដុល្លារ។

McLaren GT គឺជាប្រភេទរថយន្ត High-performance របស់អង់គ្លេស ដែលសង្ឃឹមថានឹងទាក់ទាញចំណាប់អារម្មណ៍អ្នកទិញ ដែលត្រូវការទាំងបទពិសោធន៍បើកបរដ៏អស្ចារ្យ និងភាពងាយស្រួលប្រើប្រាស់។ ថ្វីបើ GT ប្រើម៉ាស៊ីននៅខាងក្រោយ ប៉ុន្តែវាឃ្លុបខាងមុខរបស់វា អាចដាក់កាបូបវាយកូនហ្គោលមួយបាន។

មិនតែប៉ុណ្ណោះ រថយន្តស្ព័រនេះមានកាប៊ីនខាងក្នុងទំនើប និងប្រណីត ជាងរថយន្ត McLaren ផ្សេងទៀត ព្រោះវាជាប្រភេទរថយន្ត Grand Touring។

សូមបញ្ជាក់ថា រថយន្ត McLaren GT ប្រើម៉ាស៊ីនចំណុះ ៤,០លីត្រ Twin-turbo ទំហំ ៨ស៊ីឡាំង ប្រអប់លេខអូតូ ៧វគ្គ មានកម្លាំង ៦២០សេះ អាចជាន់ពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេល ៣,២វិនាទីប៉ុណ្ណោះ៕

ផ្ទាំងផ្សាយពាណិជ្ជកម្ម

មានម៉ូដែលទី ៤ ទើប Lamborghini សង្ឃឹមលក់បាន ១ ម៉ឺនគ្រឿង/មួយឆ្នាំ

December 21, 2019

Lamborghini មិនមែនជាក្រុមហ៊ុនផលិតរថយន្តទំហំធំនោះទេ។ យ៉ាងណាក៏ដោយក្រុមហ៊ុនអាចលក់រថយន្តបានប្រមាណ ៨ ២០០ គ្រឿងសម្រាប់ឆ្នាំ ២០១៩ ដែលជាកំណត់ត្រាដ៏អស្ចារ្យមួយខ្ពស់ជាងកំណត់ត្រាដែលសាងបានកាលឆ្នាំ ២០២០។ របាយការណ៍ពី Automative News Europe បានអះអាងថា ក្រុមហ៊ុននេះចង់រក្សាស្ថិរភាពនូវចំនួនលក់របស់ខ្លួន ក្នុងរង្វង់រយៈពេលប៉ុន្មានឆ្នាំខាងមុខ។

លោក Stefano Domenicali ដែលជានាយកប្រតិបត្តិក្រុមហ៊ុនបាននិយាយថា ៖ “យើងគ្រោងនឹងលក់ឲ្យបានប្រមាណ ៨ ៥០០ គ្រឿងនៅឆ្នាំ ២០២០ បន្ទាប់មកគឺនៅត្រឹមនឹងមួយរយៈ។ ផ្នែក Supercar គឺរំពឹងថានឹងរីកធំប្រមាណ ៣% ក្នុងមួយឆ្នាំ ហើយយើងមិនអាចរំពឹងថាម៉ូដែល Urus នឹងបន្តរីកចម្រើនរហូតនោះទេ។ ហេតុនេះហើយ ត្រូវមានរថយន្តម៉ូដែលទី ៤ ទើបយើងអាចលក់បានដល់ ១ ម៉ឺនគ្រឿងបាន។ ម៉ូដែលទីបួននឹងលេចមុខនៅឆ្នាំ ២០២៥ យ៉ាងលឿនបំផុត។”

រថយន្តម៉ូដែលទីបួនរបស់ Lamborghini រំពឹងថានឹងជារថយន្ត GT ថ្មី ដែលមានកៅអីអង្គុយចំនួន ៤ និងទ្វារបួន។ ម៉ូដែលទីបួននេះដែរអាចនឹងជារថយន្តដំបូងរបស់ក្រុមហ៊ុនដែលប្រើប្រាស់នូវថាមពលអគ្គិសនីសុទ្ធ៕

ផ្ទាំងផ្សាយពាណិជ្ជកម្ម

មិនធម្មតា! VW នឹងបញ្ចេញរថយន្តថ្មីចំនួន ៣៤ ម៉ូដែលនៅឆ្នាំ ២០២០

December 20, 2019

Volkswagen នឹងធ្វើការបញ្ចេញលក់រថយន្តថ្មីចំនួន ៣៤ ម៉ូដែលនៅទូទាំងពិភពលោកក្នុងឆ្នាំ ២០២០ ដែលជាផ្នែកមួយនៃការបណ្ដាក់ទុនដ៏ធំរបស់ខ្លួនលើបច្ចេកវិទ្យាអនាគត។

ក្នុង ៣៤ ម៉ូដែលដែលចេញឆ្នាំក្រោយនេះ មាន ១២ ម៉ូដែលជាប្រភេទ SUV និង ៨ ម៉ូដែលនឹងជាប្រភេទអគ្គិសនី ឬ Hybrid។ ដំបូងគេនឹងមានរថយន្ត ID 3 Hatchback ថ្មី បន្ទាប់មកគឺ ID Next និងកូនរថយន្ត SUV អគ្គិសនីមួយដែលទំនងជាប្រើឈ្មោះ ID 4។

ក្រុមហ៊ុនអាល្លឺម៉ង់នេះនឹងត្រូវបណ្ដាក់ទុនមិនតិចជាង ២១ ពាន់លានដុល្លារនោះទេ រហូតដល់ឆ្នាំ ២០២៤ ជាមួយនឹងកញ្ចប់លុយ ១២,២ ពាន់លានដុល្លារគឺសម្រាប់ការអភិវឌ្ឍរថយន្តអគ្គិសនី៕

ផ្ទាំងផ្សាយពាណិជ្ជកម្ម

BMW លក់រថយន្តប្រើថាមពលអគ្គិសនីបាន ៥០០ ០០០ គ្រឿងហើយ

December 20, 2019

BMW បានប្រកាសពីការលក់រថយន្តមានប្រើថាមពលអគ្គិសនីបានចំនួន ៥០០ ០០០ គ្រឿងនៅទូទាំងពិភពលោក ហើយរថយន្តទី ៥០ ម៉ឺនគ្រឿងគឺជាម៉ូដែល BMW 330e ដែលបានដឹកជញ្ជូនទៅដល់ម្ចាស់របស់វានៅប្រទេសអាល្លឺម៉ង់។

ដោយសារវាជារថយន្តដែលតំណាងឲ្យការឈានដល់ដំណាក់កាលដ៏អស្ចារ្យថ្មីមួយនោះ ទើបសោនៃរថយន្តត្រូវបានប្រគល់ជូនម្ចាស់ដោយលោក Sebastian Mackensen ប្រធានផ្នែកលក់របស់ BMW ផ្ទាល់តែម្ដង។

លោក Oliver Zipse ជាប្រធាន BMW បាននិយាយថា ៖ “យើងបានធ្វើការបោះពួយយ៉ាងលឿន យើងបានកំណត់គោលដៅថាចង់ឲ្យមានរថយន្តប្រើថាមពលអគ្គិសនីចំនួន ១ លានគ្រឿងរត់លើដងផ្លូវនៅក្នុងពេល ២ ឆ្នាំខាងមុខ។”

ដើម្បីសម្រេចគោលដៅនេះ BMW នឹងបញ្ចេញលក់រថយន្ត BMW iX3 នៅឆ្នាំក្រោយជារថយន្ត SUV ប្រើប្រាស់ថាមពលអគ្គិសនីសុទ្ធ និងបន្ទាប់មកគឺបញញចេញ iNEXT និង i4 នៅឆ្នាំ ២០២១៕

ផ្ទាំងផ្សាយពាណិជ្ជកម្ម

Volkswagen Golf ឆ្នាំ២០២០ ធ្វើតេស្តសុវត្ថិភាព ទទួលបានចំណាត់ថ្នាក់ “ផ្កាយ៥” (វីដេអូ)

December 20, 2019

Golf គឺជារថយន្តលក់ដាច់បំផុតរបស់ក្រុមហ៊ុន Volkswagen។ ថ្មីៗនេះ ក្រុមហ៊ុន Volkswagen ទើបតែបានបញ្ចេញរថយន្ត Golf ជំនាន់ថ្មីឆ្នាំ២០២០ (All-new) ហើយមនុស្សជាច្រើននឹងទិញវាប្រើប្រាស់ ដូច្នេះវាជារឿងសំខាន់ណាស់ដែល Volkswagen ត្រូវប្រាកដថា Golf ថ្មីផ្តល់សុវត្ថិភាពខ្ពស់។

ជាក់ស្តែង ទីភ្នាក់ងារ Euro NCAP បានយករថយន្ត Volkswagen Golf ថ្មីទៅធ្វើតេស្តសុវត្ថិភាព ហើយបានឲ្យចំណាតថ្នាក់វា “ផ្កាយ៥” ព្រោះទទួលពិន្ទុខ្ពស់ក្នុងប្រភេទតេស្តទាំងអស់ ដោយក្នុងនោះ ទទួលបាន ៩៥ពិន្ទុ សម្រាប់ការការពារអ្នកដំណើរពេញវ័យ, ៨៩ពិន្ទុ សម្រាប់ការការពារអ្នកដំណើរវ័យក្មេង, ៧៦ពិន្ទុ សម្រាប់ការការពារអ្នកថ្មើរជើង និងអ្នកជិះកង់ ហើយ ៧៨ពិន្ទុសម្រាប់មុខងារជំនួយសុវត្ថិភាព។

ជាស្តង់ដារ រថយន្ត Volkswagen Golf ឆ្នាំ២០២០ មានបំពាក់មុខងារដូចជា lane-keeping system និង front assist ដែលពិនិត្យមើលស្ថានភាពផ្លូវខាងមុខ ដោយប្រើប្រាស់សេនស័ររ៉ាដា និងកាមេរ៉ាមុខ៕

សូមទស្សនាវីដេអូធ្វើតេស្តខាងក្រោម៖